Ou te Faafetai mo o Oulua Vae

Nicholas Nelson, Texas, ISA

Sa leai se mea na faapitoa ona taua e uiga i o‘u vae, o lea sa fai si o’u le mautonu ina ua fai mai Nieves, o se tagata faatoa liliu mai i Polivia, sa faafetai mo [o’u] vae.

“Ou te matua faafetai lava mo o oulua vae,” na ia fai mai ai ia i ma’ua i vaiaso na sosoo ma lona papatisoga.

Na talia fiafia e Nieves le talalelei toefuataiina, ae ina ua ma valaaulia o ia e papatiso, sa musu o ia.

Sa ia faamalamalama mai o ia e mafatia i se tulaga o le tiga o le pa‘u. A pa’i lona pa’u i le vai malulu, e pei lava na tatui e le afe o nila ia pu ninii o lona tino. O lenei tulaga na taofia ai o ia mai le faia o galuega masani, e pei o le fufuluina o fualaau faisua po o le tatalimaina o lavalava.

Sa ma faamalamalama atu i ai e mafai ona faamafanafana le vai papatiso, ma sa ma faamautinoa atu ia Nieves o le a papatisoina o ia i le vai mafanafana. Sa matuai fiafia o ia, ma sa filifili loa e papatiso i le Aso o le Kerisimasi. Sa ma logoina ma la’u soa le peresitene o le paranesi e uiga le tulaga o lona pa’u, ma sa ia fai mai, e oo atu i le aoauli i le taimi o le papatisoga ua mafanafana le faatanoa o le vai papatiso.

Ae peitai, Ina ua matou taunuu atu i le falesa mo le papatisoga, na faatoa uma lava ona faatumu le faatanoa i le vai malulu! Na faamalamalama mai e le peresitene o le paranesi popolevale, ona o se sasi i le fesootaiga, o le a le saunia ai le vai seia oo i se taimi umi mulimuli ane.

Sa ma iloa ma la‘u soa na manao Nieves e papatiso i lena aso, ma sa ma talitonu foi o le mea foi lea sa finagalo i ai le Alii. Sa ma maua se potu avanoa ma tatalo ai ina ia fesoasoani mai o Ia ia Nieves ina ia papatisoina.

Sa ma lagona le mafanafana ina ua uma le tatalo ma filifili loa e faagasolo le sauniga. Sa matagofie aoaoga a i latou na saunoa a’o lei faia le papatisoga, ae sa faafuasei lava ona oso lo’u popole ina ua ou faalogoina, “O le a papatiso loa e Elder Nelson ia Tuafafine Nieves.”

Sa ou taumafai e nana lo’u le lagolelei a o ou laa atu i totonu o le vai malulu. Na tago mai Nieves i lo‘u lima ma tuutuu ifo lona vae i le vai. Sa ou saunia au lava mo se mea leaga o le a tupu, ae sa le’i ee pe faamimigi foi ia Nieves. Sa laalaa mai o ia ma le to’a i lalo o le faasitepu ma ataata mai ia te au.

Ina ua uma le tatalo o le papatisoga, sa taliaga atu o ia i tua i totonu o le vai malulu. Ina ua ou sii a’e o ia, sa manua’e ma se ataata. Sa faatumulia a’u i le agaga faafetai. Ia te au, o lona papatisoga sa o se vavega.

O le taimi mulimuli na ou vaai ai ia Nieves, sa ia fai mai se faamatalaga na faamalamalama ai lo’u nenefu e uiga i lona fiafia i o’u vae. Sa ia fai mai, “Ou te matua faafetai lava mo o oulua vae, ia na savavali atu i lo‘u faitotoa, ma avatu ia te a’u le upumoni.”

Ou te mafaufau lava ia Nieves ma lona faatuatua faatauvaa ma le agaga faafetai i soo se taimi lava ou te faalogo ai i upu nei a Isaia: “E matua matagofie i luga o mauga o vae o le ua fai mai le tala lelei, o le logologo mai le manuia, ua tala mai le tala lelei, ua faailoa mai le olataga, ua fai mai ia Siona, O loo pule lou Atua!” (Isaia 52:7; tagai foi i le Mosaea 12:21).