O Leo o le Au Paia o Aso e Gata Ai

Aisea E Le Mafai Ai Ona Ou Faamagalo Atu?

Saunia e Samuel Kuosmanen, North Ostrobothnia, Finelani

Sa ou tatalo ina ia fesoasoani mai le Tama Faalelagi ia te au e faatoilalo ou lagona leaga ma faamagalo atu.

Ata na tusia e Allen Garns

Sa ou auai faatasi ma ni nai uso o la’u uarota e fesoasoani i se tuafafine e siitia ese. Ae ina ua matou taunuu atu i lona fale mautotogi, sa i ai se taavale sa paka le talafeagai na taofia ai matou mai le mauaina o se pakaga a le matou veni.

Sa ou valaau atu i le numera o le telefoni o loo i autafa o le veni e fesili atu i se tasi e sau ma ave ese le veni. Sa tali mai se tamaloa ma folafola o le a vave ona sau o ia.

Ina ua mavae le 15 minute, sa ou toe valaau atu, ae sa lei tali mai o ia. Mulimuli ane, ina ua mavae se isi valaau se tasi, sa o’o mai o ia ma se fanau e toalua. Sa ita o ia ma fai mai se tala sa ou tiga ai. Sa ou taumafai e faagalo a o matou faagaoioi le siiese o mea.

I lena afiafi sa ou mafaufau ai e uiga i le aafiaga. Sa ou tatalo ina ia fesoasoani mai le Tama Faalelagi ia ou faagalo i o’u lagona ma faamagalo le tagata. Sa tali mai o Ia i la’u tatalo.

Peitai, i sina taimi mulimuli ane, sa ou faitauina se nusipepa i le lotoifale ma matauina se tusiga e uiga i lenei alii. Sa aofia ai lona ata. Sa toe foi mai o’u lagona le lelei ia te ia. O lea, sa ou toe faia ai foi lea lava faagasologa e tasi. Sa ou ole atu i le Alii ia le toe faalavelave mai lenei mea faatauvaa ia te au ma ia fesoasoani mai o Ia ia te au e faamagalo le tagata. Na oo mai se lagona lelei.

E lei leva ae ou feiloai i lenei lava alii i se faleoloa. Sa toe foi mai foi o’u lagona leaga. Sa ou maofa. Sa ou fesili atu i le Alii pe aisea na le mafai ai ona ou faatoilaloina lenei aafiaga. I ni nai aso mulimuli ane, sa Ia aoaoina au i se lesona.

Sa ou alu ese mai le lotoa o le Malumalu o Helsinki Finelani ae o’u matauina lenei lava alii e tasi o galue i togalaau o le malumalu. Sa le talitonula’u vaai. Sa matala lo’u mafaufau ma sa ou malamalama o ia, e pei o a’u, sa auauna atu i le Alii ma o ia, e pei o a’u, e i ai ona aso le fiafia pe a le lelei mea uma. Ona mafai ai lea ona ou vaai i lenei alii o lo’u uso. Faatasi ai ma se vaaiga fou, sa ou lagonaina le faaaloalo ma le alofa ia te ia. Ina ua mavae lena, o lagona muamua uma na tuua a’u, sa le’i toe foi mai lava.

A tatou vaai atu i isi e pei ona silasila mai le Alii ia i tatou, e mafai ona tatou mulimuli i Lana poloaiga e faamagalo atoatoa atu (tagai i le Mataio 6:14–15; Mataupu Faavae ma Feagaiga 64:9–10). O lenei aafiaga e le mafaagaloina, o se alofa mutimutivale ma le agamalu o le Alii, lea o loo ou mafaufau loloto pea i ai i lo’u loto.