Sauaga Faatautala, Vaetamaina—ma le Faamalologa

Saunia e Breawna P.

O lo’u aiga sa faasaua ma lē mautu, ae e ala ia Keriso, ua ou maua nei le faamoemoe mo lo’u aiga mo le lumanai.

tamaitai talavou matua o loo nofo i luga o le moega ma tatalo

Sa ou ola ae i se siosiomaga e le mautu. Sa sauaina ma tuulafoaiina a’u e ou matua moni, ma sa ou oo i le tele o luitau faigata. Sa ou tauivi ma le popolevale, faafitauli o vaaiga-o-le-tino, faaogea i taumafa, ma le atuatuvale lea na faafalepuipui ai a’u mo le tele o tausaga.

Sa faamauina ou matua moni i le malumalu, ae e lei leva ona uma ona ou papatiso i le valu [o o’u] tausaga, ae amata loa ona la o ese mai le Ekalesia. Ma o le faateteleina o lo la o ese mai a la feagaiga, o le mea sili lea ona leaga na oo i ai lo matou tulaga.

I le 14 o o’u tausaga, sa avea a’u ma tausi tama i lo’u tuagane ma’i ma lo’u tina. Sa tuulafoaiina au ma alu faasauea. Sa ou ita ia te au lava ma lo’u tulaga ma talitonu o le a le suia lava lo’u olaga.

Ae tupu loa se vavega. Sa iloa e lo’u tina moni e le mafai ona ia tausia a’u ma valaau atu i lona tuagane i Sigapoa e talosaga i ai pe mafai ona ia vaetamaina a’u. Faatasi ai ma ni ato ma ni mata faatumulia i loimata, sa ou alu ai i se vaalele e amata ai se olaga fou—o se olaga saoloto mai le sauaga faatautala. Ae o le taufetuunai i lo’u aiga vaetamaina ma se aganuu fou sa faigata, ma sa ou tauivi e agai i luma.

Sa faia e o’u matua na vaetamaina a’u mea uma latou te mafaia e fesoasoani ai ia te a’u. Sa vaai au e fomai faalemafaufau ma fomai. Sa amata foi ona ou toe alu i le lotu, ae o le aoao e uiga i se Tama Faalelagi e alofa ia te au ma e i ai se faamoemoega mo au sa faigata, aua ou te lei talitonu i ai ina ua uma mea uma sa ou onosaia.

Sa ou le fiafia. Ou te lei iloa pe faapefea ona faamaloloina mai le taimi ua tuanai ma sa ou lagonaina pea le leai o se faamoemoe e uiga i le lumanai.

Naunautai e Faamalolo

I se tasi aso, sa ou mafaufau loloto ai i le puupuu o le olaga faaletino. Ou te lei manao e faaalu lo’u olaga i le le fiafia. Sa manaomia ona ou aoao mai o’u tofotofoga, faaaoga mataupu faavae o le talalelei sa aoaoina ai a’u, ma valaaulia Keriso i lo’u olaga.

Sa ou faaaliale faatuatua ma amata ona tootuli ma ole atu i le Tama Faalelagi i aso uma mo le mana e faamagalo ai o’u matua moni, ia suia lo’u fefe i le faatuatua, ia maua le faamalologa ma le fiafia, ma ia iloa le alofa i lo’u olaga. Sa ou alu i le inisitituti ma amata ona suesue i tusitusiga paia ma faaaoga upumoni o le talalelei i lou olaga.

Sa ou sailia moni lava le mana faamalolo o Iesu Keriso ma Lana Togiola. Ma i le aluga o taimi, sa amata ona suia lo’u olaga. A o ou onosai, maua togafitiga faalelagona ma faalemafaufau ma togafitiga faalefuaalau, ma faatumuina lo’u olaga i le Agaga i aso taitasi, sa amata ona ou malolo: Sa ou lagonaina le faaitiitia o lo’u le taumamao ma sa sili atu ona ou pei o a’u moni lava. Sa ou lagona le saogalemu. Sa ou auauna atu i isi. Sa ou alofa, faamagalo atu, ma taliaina a’u lava. Sa ou fausia ni sootaga maloloina, ma agaalofa. Sa amata ona ou lagonaina le alofa o le Tama Faalelagi mo a’u. Ma mo le taimi muamua i lo’u olaga, sa ou lagonaina le olioli moni.

Ua Ofo Mai e Keriso le Faamoemoe mo lo Tatou Lumanai

E le mafai ona ou suia lo’u olaga ua tuanai, ae e pei ona fai mai le Mataupu Faavae ma Feagaiga 122:7 “O nei mea uma o le a tuuina mai [ia te a’u] le poto masani, ma o le a avea mo [lo’u] lelei.” Ua ou iloa nei na lagolagoina au e le Faaola i o’u tauiviga. E ui lava i ia luitau, ua ou matua tuputupu ae ona o lo’u manao ia suia ma ona o loo faaauau pea ona ou liliu atu ia te Ia.

Afai o e i ai i se tulaga faigata faaleaiga, ia e iloa o loo i ai sou Tama i le Lagi e silafia oe ma alofa ia te oe ma o le a tatalaina faitotoa i se lumanai manuia. Ao lei vaetamaina a’u, sa ou fai ifo ia te au lava, o le a le suia lava o’u tulaga, ma o le a ou le faaipoipo lava pe maua ni fanau ona sa ou fefe o le a latou mafatia e pei ona sa ou oo i ai. Ae ua ou aoaoina e tusa lava po o a tauiviga ua tatou oo i ai i o tatou aiga, a o tatou sailia Keriso, e mafai ona tatou fausia o tatou aiga i le lumanai ma aiga e faavavau i le faamoemoe, upumoni o le talalelei, ma le alofa.

E pei ona aoao mai Elder Clark G. Gilbert o le Fitugafulu: “O i tatou uma … e amata i nofoaga eseese e eseese faaeega paia o le olaga. O nisi e fananau mai ma ni faalalava e maualuluga, e tumu i avanoa. O isi o loo feagai ma … tulaga e faigata. … Ona tatou agaigai ai lea i luma i luga o se malifa o le alualu i luma faaletagata lava ia. E matua itiiti le filima’otia o lo tatou lumanai e le itu tatou te amata ai ae tele atu e lo tatou malifa. E silafia e Iesu Keriso lo tatou gafatia paia tusa lava pe o fea tatou te amata ai. … O le a Ia faia mea uma e mafai ona Ia faia e fesoasoani ai ia i tatou e liliu a tatou malifa aga’i i le lagi.”¹

Po o a lava ou tulaga, o loo i ai le faamoemoe ma le faamalologa o loo maua ia Iesu Keriso! O loo faatasi o Ia ma oe, ma o le a Ia taialaina oe i le filemu ma le olioli a o e sailia o Ia—i taimi uma.