“O Iesu Keriso i le Tusi a Mamona,” Liahona, Ian. 2024.
O Iesu Keriso i le Tusi a Mamona
E faafia ona ta’ua le Alii i totonu o le Tusi a Mamona?
O ai e te fai mai o le tagata autu i le Tusi a Mamona? E ui atonu e fautuaina e nisi ia Nifae, Alema, po o Mamona, o le tagata autu moni lava o Iesu Keriso. Na tusia e Nifae:
“Ona ua matou galulue maelega e tusia nei mea, e faatauanau atu ai ia matou fanau … ia talitonu ia Keriso. …
“Ua matou tautalatala e uiga ia Keriso, ua matou olioli ia Keriso, ua matou talai atu e uiga ia Keriso, ua matou vavalo e uiga ia Keriso” (2 Nifae 25:23, 26).
I le 1978, na lolomiina ai e Susan Ward Easton se tusiga iloga, faafuainumera e faaalia ai o Iesu Keriso o le tagata autu lea i le Tusi a Mamona. Sa ia faailoa mai ia faalagiga eseese o Iesu Keriso ma faaalia ai sa ta’ua o Ia i le igoa po o le faalagiga i taimi e 3,925 i le Tusi a Mamona, lea e averesi ai le faatasi i fuaiupu uma e 1.7.1
O lenei suesuega taua ua faailoa ai le totonugalemu o le Faaola i le Tusi a Mamona; peitai, o loo matua faatauaina ai le faitau maualalo o le taimi lea e ta’ua ai Keriso e ala i le lē faitaua o suinauna e faasino ia te Ia.
I le iuga, o le aofai o mau faasino ia Iesu Keriso e le o le auiliiliga aupito taua lea e aoao mai le Tusi a Mamona; peitai, o mau faasino taitasi ia te Ia e mafai ona aoao ai i tatou e uiga i Lona natura paia ma le misiona. Sa matou suesueina ma le faaeteete le Tusi a Mamona, ma vaavaai mo ta’uga uma o Iesu Keriso, e aofia ai faalagiga ma suinauna. Sa matou maua le 7,452 o mau faasino—o se averesi o le sili atu ma le tasi le mau faasino i fuaiupu taitasi.2 O faalagiga o Keriso o loo i ai i le tusa ma le 50 pasene o mau faasino ia Keriso i le Tusi a Mamona, faatasi ai ma le vaega o totoe e sau mai suinauna.
O le sailia o Iesu Keriso e maua ai se auala tulaga ese e aoao ai e uiga ia te Ia. Mafaufau i le faamamafa o i lenei fuaiupu e uiga ia te Ia, “Amata ona talitonu i le Alo o le Atua, o le a afio mai o ia e togiola ona tagata, ma o le a mafatia ma maliu o ia e togiola mo a latou agasala; ma o le a toetu mai o ia mai le oti, lea o le a faataunuu ai le toetutu mai, o le a laulaututu ai tagata uma i ona luma, e faamasinoina i le aso faamasino mulimuli, e tusa ma a latou galuega” (Alema 33:22; faaopoopo le faamamafa).
I le uluai suesuega a Sister Easton, o lenei fuaiupu semanu e faitauina o se tasi o mau faasino ia Keriso mai le faalaniga “Alo o le Atua.” Peitai, o loo toe ta’ua faalima le Faaola. O lenei fuaiupu o loo faamamafa mai ai e le gata o Iesu Keriso o le Alo o le Atua ae o Ia foi o lē e togiolaina i tatou e ala i Lana Togiola e faavavau ma le Toetu ma o le a avea ma o tatou faamasino.
Atonu e sili atu ona mamana, e faasino Keriso ia te Ia lava i le Tusi a Mamona. Mo se faataitaiga, tatou te faitau i le fetalaiga a le Faaola, “Ma afai e o mai tagata ia te a’u o le a ou faaali atu ia te i latou o latou vaivaiga. Ou te avatu i tagata ia vaivaiga ina ia faalotomaualalalo ai i latou; ma ua lava lo’u alofa tunoa mo tagata uma o e e latou te faalotomaualalaloina i latou lava i o’u luma; aua afai latou te faalotomaualalaloina i latou lava i o’u luma, ma faatuatua mai ia te a’u, ona ou faia lea o mea vaivai ia avea ma mea malolosi ia te i latou” (Eteru 12:27; faaopoopo le faamamafa). E ui e le o i ai le suafa o Keriso i lenei fuaiupu, ae e faavalu ona faasino le Faaola ia te Ia lava. O lana matafaioi ua faamamafaina a o tatou vaavaai mo le Faaola i lenei fuaitau.
O fuaiupu nei o loo faaalia ai le sootaga patino na lagonaina e le Faaola ma tagata taitoatasi ma o latou lagona ia te Ia:
“O mai ia te a’u, ina ia outou tuu mai o outou lima i lo’u itu, ma ina ia outou tagotago foi i tulaga o fao o i o’u lima ma o’u vae, ina ia outou iloa ai o A’u o le Atua o Isaraelu, ma le Atua o le lalolagi uma, ma sa fasiotia mo agasala a le lalolagi.
“… Sa o atu le motu o tagata i luma, ma tuu atu o latou lima i lona itu, ma tagotago i tulaga o fao i ona lima ma ona vae” (3 Nifae11:14–15; ua faaopoopo le faamamafa).
E ui lava e le mafai ona tatou lagonaina faaletino Ona faailoga, e ala i le Tusi a Mamona e mafai ona tatou faalolotoina la tatou molimau patino ia Iesu Keriso.
O mau fai soo e faasino i le Alii i le Tusi a Mamona e fesoasoani tatou te iloa ai Lona totonugalemu i lenei galuega paia. O le faailoaina o le Faaola i le Tusi a Mamona: O Se Tasi Molimau ia Iesu Keriso o se auala mamana e faalatalata atili atu ai ia te Ia.