O Se Fuafuaga Faigofie mo La Tatou Malaga agai atu i le Ola Tutoatasi

Saunia e Alyssa Bradford

Mekasini a le Ekalesia

“O le ola tutoatasi o se aoaoga faavae o le talalelei a Iesu Keriso, ae e le o se polokalama.”¹

o se tagata e toatasi o loo fesoasoani i se isi e a‘ea se mauga

O le a le taimi mulimuli na e saili ai ma le agaga tatalo pe faapefea ona fausia lou ola tutoatasi?

O le ola tutoatasi o le “tomai, tautinoga, ma le taumafaiga e saunia mea faaleagaga ma faaletino e manaomia o le olaga mo le tagata lava ia ma le aiga.”² E taua i le fuafuaga a le Tama Faalelagi mo i tatou aua e tele ona aafiaga i o tatou olaga. Na saunoa mai Peresitene Dallin H. Oaks, Fesoasoani Muamua i le Au Peresitene Sili e faapea, “Po o le a lava le mafuaaga o lo tatou faalagolago atu i isi mo ni faaiuga po o ni punaoa lea e mafai ona tatou saunia mo i tatou lava, o le a faavaivaiina ai i tatou i le faaleagaga ma telegese ai lo tatou alualu i luma i le mea o lo o faamoemoe le fuafuaga o le talalelei mo i tatou ina ia oo i ai.”³ E le faapea la o le a tatou le manaomia ai lava se fesoasoani, aua o le ola tutoatasi e masani ona aofia ai le liliu atu i isi a o tatou tuputupu ae. Ae e aofia ai le faia pea o le alualu i luma agai i le sauniaina mo i tatou lava o na mea tatou te mafaia.

O le ola tutoatasi e tupu i lea fuaitau i luga o lea fuaitau (tagai i le 2 Nifae 28:30). O ni nai manatu faigofie nei e fesoasoani e faamalosia ai lo tatou ola tutoatasi.

Amata le Malaga

E tatau ona tatou amata uma (pe fetaomi atu i luma!) mai se mea, ma o le taimi sili lenei. Na aoao mai Peresitene Dieter F. Uchtdorf, a’o avea ma Fesoasoani Lua i le Au Peresitene Sili:

“Faimai se alagaupu tuai, ‘O le taimi sili ona lelei e totoina ai se laau o le 20 tausaga ua mavae. O le taimi sili lona lua o le taimi lenei.’

“O loo i ai se mea matagofie ma le faamoemoe e uiga i le upu taimi nei. O loo i ai se mea faamamanaina e uiga i le mea moni lea e faapea afai ua tonu ia i tatou e filifili nei, e mafai ona tatou agai i luma i le taimi lava lenei.

“O letaimi nei o le taimi sili lea ona lelei e amata ai ona tatou avea ma tagata tatou te fia avea ai — e le gata i le 20 tausaga mai le taimi nei, ae faapea foi mo le faavavau atoa.”⁴

E tatau ona tatou faaaofia le Atua ma isi o e e mafai ona taialaina i tatou i la tatou faigamalaga. E mafai ona tatou saili ma le agaga tatalo ia iloa mea e manaomia ona tatou galulue i ai e fausia ai lo tatou ola tutoatasi. Mo se faataitaiga, e mafai ona tatou faia mea e pei o le:

“Pulea [a tatou] lava molimau ia Iesu Keriso ma Lana talalelei,”⁵ e pei ona aoao mai Peresitene Russell M. Nelson.
Aoao e sui se faamau i luga o se ofutino.
Fai se paketi ma mulimuli i ai.
Aoao se tomai mo se galuega.
Kuka se taumafataga manaia.
Aoao e sui se pa‘u o se uila po o se taavale.

E mafai ona tatou faaaluina se taimi e suesue ai ma malamalama i le mea tatou te mananao e fai ma saili mea e finagalo le Tama Faalelagi tatou te faia i Lona atamai i le iloaina o le mea e sili ona lelei mo i tatou taitoatasi. O le faatuina o sini atamai o le a fesoasoani ia i tatou i lenei faagasologa atoa.

Faaauau i le Onosai, ma Tumau

E le oo mai taunuuga i le taimi lava e uma ai le laina amata. O faigamalaga e alu ai le taimi. Aua le lotovaivai pe afai e umi pe faavaivaina (i tatou e) e le ala o le ola tutoatasi.

Na saunoa mai Elder Jeffrey R. Holland o le Korama a Aposetolo e Toasefululua: “O le upumoni manino ma le faamaoni lea, a o lei oo i taimi maoae, aemaise lava a o lei oo mai taimi maoae faaleagaga, e mafai ona oo mai faigata, feteenaiga, ma le pogisa. E i ai i le olaga nisi o na taimi mo i tatou, ma e i ai taimi e oo tonu mai ai lava a’o tatou aloalo atu i le faiga o se faaiuga taua po o se laasaga taua i o tatou olaga.”⁶

Afai o loo tatou tauivi ma le lotovaivai, e mafai ona tatou laa tasi i tua. Nai lo le taumafai e ausia se sini tele, ae a pe afai tatou te faia se mea se tasi i le taimi e tasi? Atonu o se maa-laa i la tatou sini tupito o le fausia lea o le maufetuuna‘i faalelagona; o le aoao pe faapefea ona pulea le atuatuvale po o le atiina ae o se sootaga lelei ma i tatou lava, o le a na o le faalauteleina ai o a tatou malaga o le ola tutoatasi. Pe atonu foi o la tatou sini o le aoao lea e fesootai lelei ma isi e mafai ona fesoasoani ia i tatou.

Na saunoa mai Peresitene Russell M. Nelson: “Tatou te le manaomia ona faanoanoa pe afai o a tatou taumafaiga lelei agai atu i le atoatoa e foliga mai nei e matua faigata ma e le muta. O loo faatalitali le atoatoaga. E mafai ona oo mai atoa pe a mavae le Toetu ma e na o le Alii e ala mai ai.”⁷ O lea ia faaauau pea. E mafai ona tuputupu‘ae!

Faamanatu le Manuia

Pe tatou te faamaeaina se sini mo se taimi umi pe maua sina manumalo itiiti, o se mafuaaga lea e olioli ai. E mafai ona tatou mitamita i lo tatou alualu i luma ma mea ua ausia. Ua oo i le taimi e faamanatu ai!

E tatau ona tatou manatua e faafetai atu i le Tama Faalelagi (tagai i le 1 Tesalonia 5:18; Mosaea 26:39) ma isi o e na fesoasoani ia i tatou ia ola tutoatasi atili.

Faaauau pea ona Faaleleia

A uma ona maua le manuia, o le a le isi mea?

Na saunoa mai Elder Hugo E. Martinez o le Au Fitugafulu:

“O le ola-tutoatasi o se aoaoga faavae o le talalelei a Iesu Keriso, ae e le o se polokalama. O se faagasologa tumau mo le olaga atoa, ae le o se mea e faa-tasi ona tupu.

“Tatou te ola tutoatasi i o tatou olaga atoa e ala i le tuputupu a’e i le malosiaga faaleagaga, faaleleia lo tatou soifua maloloina faaletino ma faalemafaufau, tulituliloaina o a tatou aoaoga ma galuega, ma le saunia faaletino.[tagai i le Tusitaulima Aoao, 22.1]. Pe muta ea lenei galuega i le gasologa o o tatou olaga? Leai, o se faagasologa lea o le aoaoina, tuputupu a’e, ma le galue i le olaga atoa. E le taitai muta; o se faagasologa faifai pea i aso taitasi.”⁸

A o faaauau pea ona tatou tuputupu ae, o le a faamanuiaina i tatou ma tagata o o tatou aiga i le faatuatua, malosi, ma le faaaloalogia o i tatou lava sili atu. Ona, faatasi ai lea ma faasiliga o lo tatou ola tutoatasi, e mafai ona tatou o atu e fesoasoani i isi ia faia foi faapea.