“O Lo Tatou Sulu i le Vao,” Liahona, Ian. 2024.
O Lo Tatou Sulu i le Vao
O i latou o e faitauina ma le faamaoni le Tusi a Mamona, ola i ona mataupu, ma tatalo e uiga i lona moni o le a lagonaina le Agaga Paia ma faateleina lo latou faatuatua, ma le molimau e uiga i le Faaola.
Ata o le uso a Iareto ma maa susulu na saunia e Normandy Poulter
E oo lava i lo’u tamaitiiti, sa i ai sa’u molimau i le Tusi a Mamona. Sa faapitoa ona ou lagonaina le tosina atu i le tala i le uso a Iareto ma lona nuu i la latou malaga i “se laueleele o le folafolaga” (Eteru 2:9).
Ina ua feagai ma le faamoemoega o le malaga i vaa e leai ni malamalama, sa fesili le uso a Iareto, “Faauta, le Alii e, pe e te tuu ea i matou ia matou sopoia lenei vai tele i le pogisa?” I le tali atu, na fetalai le Alii, “O le a se mea tou te mananao ia ou faia ina ia outou maua se malamalama i totonu o o outou vaa?” (Eteru 2:22, 23).
Sa iloa e le uso a Iareto sa i le Alii le malosi uma. Sa ia iloa o le Alii o le puna o le malamalama uma. Sa ia iloa na poloaiina e le Alii lona nuu e valaau atu ia te Ia i taimi e manaomia ai. O lea la, i le faatinoina o le faatuatua i le Alii, na saunia ai e le uso o Iareto ni maa laiti e 16. Tou te manatuaina na ia ole atu i le Alii e pa’i atu i maa ma Lona tamatamaiaao, “ina ia susulu atu i le pogisa” (Eteru 3:4).
O le ata o le Alii o loo pa’i mai i na maa ua vaneina i lo’u mafaufau talu ona ou faitauina muamua lena tala. E mafai ona ou vaai i lena vaaiga e pei o loo tupu i luma o o’u mata. Atonu ai ona o le ata o le pogisa ua aveesea e le malamalama e moni ia te a’u.
Pe a ou le lagonaina le Agaga Paia, pe a ou le ogatusa teisi ma le Agaga o le Alii, ou te lagonaina le pogisa. Ae a ou faitauina le Tusi a Mamona, e toe foi mai le malamalama. O le Tusi a Mamona sa pei lava o se maa susulu na pa’i i ai le Alii. Ua faamalamalamaina ai la’u malaga i le olaga atoa.
O Se Malamalama e Faavavau
E pei o i latou na aumaia e le aao o le Alii i Amerika anamua, tatou te feagai uma lava ma afa ma aso pogisa i le taimi o la tatou malaga i le nuu folafolaina o le faaeaga. Ae o le a faia e le Alii mo i tatou le mea na Ia faia mo sa Iareto ma sa Nifae. O le a Ia taialaina i tatou ma faamalamalama lo tatou ala—afai tatou te usiusitai ia te Ia, faatino le faatuatua ia te Ia, ma aioi atu mo Lana fesoasoani.
Na ta’u atu e le Alii ia Nifae: “Ma o le a avea foi Aʼu ma o outou sulu i le vao; ma o le a Ou saunia le ala i o outou luma, e tusa ma tou tausiga o aʼu poloaiga; o le mea lea, afai tou te tausia aʼu poloaiga, o le a taitaia outou agai i le laueleele na folafolaina; ma o le a outou iloa ai o aʼu lava ua taitaia outou” (1 Nifae 17:13
Na ta’u atu e le Alii i le uso o Nifae o Iakopo, “O le a avea A’u o se malamalama e faavavau ia te i latou, o e e faalogo mai i a’u upu” (2 Nifae 10:14).
E uiga i le Faaola, na molimau mai Apinati, “O Ia o le malamalama ma le ola o le lalolagi; ioe, o le malamalama e leai sona iuga, e le mafaapouliuligia” (Mosaea 16:9).
E uiga ia te Ia, sa molimau Iesu Keriso lava Ia, “O Au o le malamalama ma le ola o le lalolagi.” Sa Ia faaopoopo mai, “Faauta, O a’u o le malamalama; ua ou faatuina se faataitaiga mo outou” (3 Nifae 9:18; 18:16).
Lagonaina o le Malamalama
Ou te alofa i lo tatou perofeta, o Peresitene Russell M. Nelson. Ua ou maua le faamanuiaga o le auauna atu i ona autafa. A savali atu o ia i totonu o se potu, e vave lava ona lagona e lena potu le malamalama atili. Na te tauaveina le Malamalama o Keriso faatasi ma ia.
O Le Malamalama o Keriso e moni. O le “malosiaga faalelagi, mana, po o le uunaiga e mai le Atua e ala ia Keriso ma e tuuina mai le ola ma le malamalama i mea uma.” O se meaalofa faaleagaga faapelepele lea e mafai ona taitai atu ai fanau a le Atua i le Agaga Paia ma le talalelei a Iesu Keriso.1 O le faitauina o le Tusi a Mamona e faamalosia ai lena Malamalama.
O nisi taimi e manaomia ai ona tatou toe tepa i tua i o tatou olaga ia manatua ai le ala na tatou maua ai le fesoasoani i la tatou faigamalaga. A o tatou toe tepa i tua, e mafai ona tatou toe lagonaina le faatosinaga a le Faaola. Pe a fai mai tusitusiga paia, “Ia manatua, ia manatua” (Helamana 5:12), ou te manatu o loo latou ta’u mai ia i tatou, “Aua le na ona manatua o mea sa e iloaina pe lagonaina; ae, toe lagona lena malamalama.”
Mo nisi, o le lagonaina o le malamalama faaleagaga e faigofie ona oo mai. Mo isi, o le malamalama faaleagaga e mafai ona faigata ona lagona ona o tauiviga faaletagata lava ia po o mea faalavefau faalelalolagi. Ae afai tatou te faamaoni, o le a oo mai le malamalama—i nisi taimi i auala tatou te le o faamoemoeina.
O Peresitene Nelson, o le na fautuaina i tatou ia “suesue ma le agaga tatalo le Tusi a Mamona i aso uma,”2 ua faasoa mai ni nai auala e mafai ai e le Tusi a Mamona ona aumaia i tatou ia latalata atili atu i le Faaola ma fesoasoani ia tatou lagonaina le malamalama o le talalelei, malamalama i upumoni o le talalelei, ma ola i aoaoga o le talalelei.
A o tatou faitau i le Tusi a Mamona, na saunoa mai Peresitene Nelson, o lo tatou malamalama i ai, ma le talisapaiaina o le Togiola a Iesu Keriso o le a tuputupua’e.
O le a tatou lagonaina se manao ina ia “toe fanauina” (Mosaea 27:25) a o fesoasoani le tusi ia i tatou ia iloa se suiga o le loto (tagai Mosaea 5:2).
A o tatou faitau ma suesue i aoaoga a le Tusi a Mamona e uiga i le faapotopotoina o Isaraelu, o le a tatou lagonaina se manao faateleina e saili atu i o tatou tagata maliliu ma faatino sauniga o le faaolataga ma le faaeaga mo i latou i totonu o le malumalu.
O le a tatou lagonaina le malamalama a o tatou mauaina tali i a tatou fesili, taitaiga i le faia o faaiuga, ma le malosi e salamo ai ma tetee atu i le tiapolo.
Ma a o tatou faitau i upumoni o loo maua i le Tusi a Mamona, o le a tatou lagonaina le faamalologa, mafanafana, toefuataiga, fesoasoani, malosi, faamafanafanaga, ma le faamalosiauga i o tatou agaga.3
“O lea la, pe ua le moni ea lenei mea?” Na fesili Alema e uiga i le tuputupu a’e, ma le totogo a’e o fatu o le upumoni, malamalama, ma le molimau. “Ou te fai atu ia te outou, Ioe, aua o le malamalama lea; ma o soo se mea ua malamalama, ua lelei, aua ua iloatino, o lea e tatau ona e iloa ai ua lelei” (Alema 32:35).
Ata o Keriso, saunia e Heinrich Hofmann
Mauaina o le Faaola i totonu o le Pogisa
Ina ua 10 tausaga o la’u uo o Kamryn, sa maua o ia i se faama’i o mata e seasea ona tupu ae tumau lea na aafia ai le vaega i luma o lona mata taumatau.4 E i ai taimi, pe a oo ina faifai pea ma lē gafatiaina le tigā e fesootai i ai, sa le mafai e Kamryn ona onosaia se malamalama. O ona matua, sa popole ina ne’i tauaso o ia, e la te faapogisaina faamalama o lona potumoe e taumafai ai e faatumauina lona toafimalie. Na faamatalaina e le tina o Kamryn, o Janna:
“Pe a ma le fa masina talu ona mae’a lana suesuega, sa ou savali atu ai i totonu o lona potu pogisa. A o faamasani o’u mata, sa mafai ona ou vaaia le faapupuu o Kamryn i luga o lona moega. Sa matua tiga tele o ia lea na le minoi ai pe tagi foi ina ua ia faalogo mai ua ou sau i totonu. Sa na ona taoto o ia iina ma ona mata uma e lua ua fulafula o loo moeiini.
“Sa ou tootuli i autafa o lona moega, uu mai lona lima i lo’u lima, ma oomi faatolu—la matou numera faalilolilo mo le ’Ou te alofa ia te oe.’ E masani lava ona ia toe oomi faafaina mo le ’Ou te alofa atili ia te oe,’ ae na te lei tali mai. Sa tiga tele o ia. Faatasi ai ma loimata o loo tafe ifo i o’u alafau, sa ou tilotilo atu ai i la’u 10 tausaga le matua o le sa malosi ae ua faapupuu pei se polo. Na nutimomoia lo’u loto.”
Sa faia e Janna se tatalo le leoa ma le faamaoni.
“Sa ou ta’u atu i le Tama Faalelagi sa ou iloa e sili atu Lona silafia, ae sa ou tatalo, ’Faamolemole fesoasoani ia te ia.’ A o ou nofo ai iina ma tatalo, sa oo mai i o’u luga se faalogona o le mafanafana. Sa ou lagona le toafimalie a o oo mai i lo’u mafaufau se manatu e uiga i le Faaola o Iesu Keriso: ’O Ia o le malamalama. Saili o Ia i le pogisa.’”
Sa ea a’e i luga le ulu o Janna ma musumusu atu i le taliga o Kamryn: “E tatau ona e maua le Faaola i le pogisa.”
Mulimuli ane, sa moe Kamryn a’o faalogologo i viiga ma tusitusiga paia i luga o le polokalama o le potutusi a le Ekalesia.
Ina ua faateleina le faama’i o ona mata, ua maua e Kamryn le Faaola i le pogisa.
O le ata pu’e mai faaaloaloga a le aiga o Kamryn
O le faama’i o Kamryn e to’afimalie i le tele o taimi, ae a mafatia pe a faateteleina, e faamafanafana o ia e Janna ma lona toalua, o Darrin, ma toe tuu ni palanikeke i luga o faamalama o lona potumoe. I na taimi tiga, na fai mai ai Kamryn, “Na o lou mauaina lava o le Faaola i le pogisa.”5
Pe a foliga mai le olaga “o se vao pogisa ma le pagatia” (1 Nifae 8:4), atonu e manaomia foi ona tatou maua le Faaola i le pogisa. Ou te molimau atu o le Tusi a Mamona, faatasi ai ma lana molimau “o Iesu o le Keriso, o le Atua Faavavau,”6 o le a taitai atu ai i tatou ia te Ia. Ou te iloa o i latou o e faitauina ma le faamaoni le Tusi a Mamona, ola i ona mataupu, ma tatalo e uiga i lona moni o le a lagonaina le Agaga Paia ma faateleina lo latou faatuatua, ma le molimau e uiga i le Faaola.
Tau ina ia tatou faaali atu le lotofaafetai mo lenei tusi “sili ona sa’o”7 e ala i le faitauina, faatauaina, ma faaaoga e faamalosia ai lo tatou faatuatua ma le faatuatua o isi i le Malamalama o le Lalolagi.