E Na o Tusiga Faaeletonika: Aoaoga a Taitai o le Ekalesia mai Ala o Faasalalauga Faaagafesootai
Avea ma Soo i le Olaga i Aso Taitasi
Tagai i mea na aoao mai e perofeta, aposetolo, ma isi taitai o le Ekalesia i luga o ala o faasalalauga faaagafesootai e uiga i le mulimuli i le Alii, o Iesu Keriso.
I le taimi o Lana galuega i le olaga nei, na aoao mai ai le Faaola: “Afai tou te tumau pea i la’u mataupu, o o’u soo moni outou” (Ioane 8:31). O le faamatalaga i le Taiala i Tusitusiga Paia mo le “Soo” o loo faamatala mai ai na tagata o “e e mulimuli ia Iesu Keriso.” A o tatou saili e mulimuli i le faataitaiga a le Faaola, o le a Ia taitai atu i tatou e toe foi i le Tama Faalelagi.
Na faamanatu mai ia i tatou e Peresitene Dallin H. Oaks, Fesoasoani Muamua i le Au Peresitene Sili e faapea: “o le talalelei a Iesu Keriso o le fuafuaga lea e mafai ai ona avea i tatou ma ituaiga fanau a le Atua e tatau ona avea ai i tatou. O lenei tulaga lē ponā ma atoatoa o le taunuuga mai se faaauauina tumau o feagaiga, sauniga, ma amioga, ma se faaputuga o filifiliga sa’o, ma ala mai i le faaauauina o le salamo. ‘O le olaga lenei o le taimi lea mo tagata e saunia ai e feiloai ma le Atua.’(Alema 34:32).
“O le taimi lenei mo i tatou taitoatasi e galulue ai i le liua o le tagata lava ia, agai atu i le avea ai ma e o finagalo lo tatou Tama Faalelagi e avea ai.”1
Po o fea lava o tatou i ai i la tatou faigamalaga o le avea ma soo, o nei savali o ala o faasalalauga faaagafesootai talu ai nei mai taitai o le Ekalesia e mafai ona fesoasoani ia i tatou e faaauau ai pea ona faamaoni o ni soo o Iesu Keriso.
Taitaiga i luga o Ala e Le Masani ai.
“Atonu e te lagonaina e pei e te le o i ai i luga o le ala ‘masani’ o loo i ai au tupulaga. Atonu e te fefe e agai i luma i le olaga aua e mafai ona e alu i le tele o itu ala eseese. Atonu e te popole e uiga i le avea ai ma tagata e finagalo le Alii e avea ai oe—e mau i se fetaula’iga ala o avanoa.
“Nai lo le popole pe o loo e i ai i le ala sao, taulai atu lou malosi i le faia o na meao le a faia ai se eseesega. Faatutu ni sini manino ma ma’oti ia avea ma mea e te manao ai. Saili le taitaiga a le Alii i lenei faagasologa.
“Afai e te le o mautinoa le isi laasaga i lou ala, galue ‘e pei’ o oe o le tagata lea e te manao e avea ai. A o e faia lena mea, o le a e tuputupu ae i lena ituaiga o tagata. Mulimuli ane o au lava faatinoga, o ou uiga faaalia, o le a taitai atu ai oe i le avea ai ma ituaiga tagata e te manao e avea ai oe.
“A o e galue agai atu i le avea ma lenei tagata ma e faatuatua i le fuafuaga a le Atua mo oe, o le a e lagonaina le filemu o loo agai i luma lou olaga i se itu lelei—e tusa lava pe le o manino atoatoa pe e ese mai ia i latou o siomia oe.”
President M. Russell Ballard, Facebook, 23 Aok., 2023, facebook.com/mrussell.ballard.
O Taimi Faigata ma Mana’omia o le Avea ma Soo
“E leoleo i tatou e le Atua[.] … E mafai ona tatou faatuatuaina o Ia i taimi uma[.]… E tele taimi Na te tali mai ai i a tatou talosaga e ala mai i isi tagata.
“I aso tatou te lagona ai ua tulei i tatou i o tatou tapulaa, ua faamanatu mai ai ia i tatou o le a le tuleiina i tatou i talaatu o lo tatou faatuatua. O le fautuaga masani lava, ‘o le mea e gata ai le malosi o le tagata o le avanoa lea o le Atua.’ O le a tatou le iloaina le tele o lo tatou malosi o i ai seiloga e tofotofoina, faamamaina, ma toe tofotofoina.
“E tele lava—atonu e masani lava—o taimi faigata ma mana’omia o o tatou olaga o vaitau ia e tuputupu ae ai—o vaitau taua. O vaitau ia e aveina i tatou mai le tagata ua tatou i ai nei i le tagata e tatau ona avea ai i tatou.
Elder Jeffrey R. Holland, Facebook, 6 Iuni, 2023, facebook.com/jeffreyr.holland.
O Soo e Lotogatasi i luga o le Ala o Feagaiga
“Sa ma foi mai talu ai nei ma Harriet mai se asiasiga matagofie o le auaunaga i Dubai. …
“… Sa ma auai i se sauniga faamanatuga matagofie i se potu tele o le faletalimalo mautotogi, ma tapuai i le Atua faatasi ma isi soo o Iesu Keriso mai le salafa o le lalolagi. Sa faatumulia o maua loto i le faafetai a o ma lagonaina le taliaina e tagata o le Ekalesia iina. E maeu le matagofie o le avea ma se vaega o se ekalesia i le lalolagi atoa o loo folafolaina atu ma faataitaia le talalelei aoao a Iesu Keriso.
“Po o ai lava i tatou po o fea lava o tatou i ai, o Iesu Keriso lo tatou malosiaga. E mafai ona tatou maua le filemu ia te Ia ma le lotogatasi ma Ona soo faamaoni e tusa pe o tatou i ai i Iutā po o Dubai, Lonetona po o Pasila. Po o fea lava o tatou i ai i le lalolagi, ua laugatasia i tatou uma lava i luga o le ala o feagaiga e toe foi atu ai i le aiga i lo tatou Tama alofa.”
Elder Dieter F. Uchtdorf, Facebook, 16 Mat., 2023, facebook.com/dieterf.uchtdorf.
O Le Ala a le Faaola
“Mai Lona soifua mai, i Lona faasatauroga ma le toetu mulimuli ane, sa i ai Iesu Keriso i se malaga e faataunuu le misiona ua maea faataatia i Ona luma. O la tatou misiona i le avea ai ma Ona soo o le aoao lea e mulimuli i Lana ala.
“O se aafiaga fiafia i lenei vaiaso le mulimuli faaleagaga ma le faaletino i tulagaaao o le Faaola—e aofia ai i Peteleema, le nofoaga na soifua mai ai le Faaola ma le mea na amata ai Lana malaga i le lalolagi.
“A o asiasi atu i le Ekalesia a Sagato. Katerina, ua lauiloa o le nofoaga masani na soifua mai ai Iesu Keriso, sa ou mafaufau ai i le faigamalaga o le avea ma soo o loo tatou i ai uma. Sa ou faasoa atu nisi o o’u manatu e uiga i le avea ma soo i se faigalotu i le Nofoaga Autu o le BYU i Ierusalema.
“I le avea ai ma soo o Iesu Keriso, tatou te saili ia avea e faapei o lo tatou Faaola ma mulimuli i Lana faataitaiga i mea uma tatou te faia. Mai i le taimi lava tatou te tuvae ai i luga o le ala o le avea ma soo, ua amata ona i ai faamanuiaga vaaia ma le lē vaaia mai le Atua ia i tatou.
“Po o fea lava o tatou i ai, e mafai e oe ma a’u ona savavali i le ala o le avea ma soo i le asō. Ia tatou lotomaualalo; ia tatou tatalo atu i le Tama i le Lagi ma o tatou loto atoa ma faaleo atu o tatou manaoga e faalatalata atu ia te Ia ma aoao e uiga ia te Ia.”
Elder Dieter F. Uchtdorf, Facebook, 22 Ape., 2023, facebook.com/dieterf.uchtdorf.
Soo—Aoao ma Mulimuli
“Fai. Avea ai. Manumalo. Faasoa atu.
“E i ai ni nai aafiaga o le faagaeetia e pei o le i ai faatasi ma faifeautalai i le NAF. Sa o se tulaga musuia! O maua ma Kathy, faatasi ai ma nisi o tagata o lo matou aiga, sa i ai talu ai nei iina. O nisi nei o manatu e faatatau ia i tatou uma.
“E manaomia e faifeautalai ona atiina ae se malamalamaaga malosi ma le manino i mea latou te talitonu i ai, o mea latou te iloa, ma mea latou te lagonaina. E i ai se aafiaga malosi o lenei mea i mea latou te faia. E faapena foi ona moni lena mea mo oe ma a’u.
“O le avea ma se soo o Iesu Keriso e sili atu nai lo na o le aoao e uiga ia te Ia. E manaomia ai le suesueina o afioga a le Atua i tusitusiga paia, faatino e tusa ai ma lo tatou faatuatua, ma mulimuli i le faataitaiga a le Faaola. O le a’oa’o ma le mulimuli e o faatasi.
“Faatasi ai ma le aafiaga o se misiona, sa ou aoao ai i le ala e faalagolago ai i le Faaola, faamoemoe atu ia te Ia, saili ia te Ia, ma tuu atu ia te Ia e faamafanafana au a o ou i ai i luitau. O nei lesona ua taialaina ai au i lo’u olaga atoa, e pei fo’i ona taialaina oe e ou aafiaga.
“I le avea ai ma faifeautalai—ma i le avea ai ma soo o Iesu Keriso—tatou te aoao atu ma fesoasoani ia i latou o e ua saunia e faalatalata atili i le Faaola. E ala i a tatou amioga ma upu, o tagata uma tatou te fegalegaleai e tatau ona lagonaina se molimau o le alofa o le Atua mo i latou ma lo tatou tuuto atu i lo tatou Faaola, o Iesu Keriso.”
Elder Neil L. Andersen, Facebook, 23 Ape., 2023, facebook.com/neill.andersen.
O Le Ala Agai i Luma e Sili Ona Saogalemu, Vave, ma Fiafia
“‘Ou te mafaia mea uma lava i le faamalosi mai o Keriso ia te au’ (Filipi 4:13). …
“I le avea ai ma soo talavou o Keriso i lenei taimi, o le a outou feagai ma faafitauli taufaafefe. …
“Faamolemole ia manatua o le ala o feagaiga o le ala agai i luma aupito sili lea ona saogalemu, vave, ma fiafia. O nei feagaiga—faatasi ai ma perofeta, tagatavaai, ma talifaaaliga—e avea o ni faailoga o auala, e taialaina ai la outou malaga e toe foi atu i lo tatou Tama Faalelagi.”
Elder Gerrit W. Gong, Facebook, 30 Ian. , 2023, facebook.com/gerritw.gong.
Tagata Fa’alauiloa o le Filemu
“I le avea ai ma soo o Iesu Keriso, o i tatou o tagata faalauiloa o le filemu ua ofoina atu ma le agalelei e ala ia te Ia ma Lana taulaga togiola.
“O se tasi o auala tatou te faalauiloa atu ai le filemu o le Faaola o le auala lea tatou te taulimaina ai le tasi ma le isi. O se tasi o faailoga iloga o loo ua tatou latalata atili i le Faaola ma avea atili e faapei o Ia o le ala alofa, onosai, ma le agalelei tatou te taulimaina ai o tatou uso a tagata, po o a lava tulaga o i ai.
“A o tatou taumafai malosi e atia’e uiga faapei o le Faaola, e mafai ona avea i tatou ma meafaigaluega o Lona filemu i le lalolagi e tusa ai ma le mamanu sa atia’e e Ia lava. Ou te valaaulia outou e mafaufau i auala e mafai ai ona suia i tatou lava e avea ma tagata e faagaeetia ma lagolago, o tagata ua i ai se malamalama ma le loto faamagalo, tagata o e vaavaai mo le mea silisili i isi, e manatua e le aunoa e faapea “afai o i ai nisi mea e mamā, matagofie, pe logoleleia pe ta’uleleia, matou te saili atu i nei mea.” (Mataupu Faavae o le Faatuatua 1:13).”
Elder Ulisses Soares, Facebook, 2 Ape., 2023, facebook.com/soares.u.
O Se Soo Musuia
“O la’u asiasiga talu ai nei i Pasila na aofia ai se aafiaga e le’i mafaufauina—ae le mafaagaloina—faatasi ai ma se soo musuia o Keriso e igoa ia Marcos Rossi.
“Sa fanau Marcos ma auga o le gasegase o le Hanhart, o se gasegase e seasea ona tupu, na taofia ai ona lima ma ona vae mai le tupu i le tulaga atoatoa. Sa na o le 30 tausaga na tuuina atu ia te ia e fomai e ola ai, peitai ua pasi ma lenei taimi faatulagaina, o loo faaauau pea ona ia vaai i luma atu o ona tapulaa. O ia o se tane ma se tamā, o se tusitala, o se tagata faasee galu, faasee i laupapa faasee, tagata maulu, ta laau pese [DJ], tagata pese, failauga faavaomalo, ma isi mea.
“E tofu uma i tatou ma ni tapulaa, ae o le mea e taua o le auala tatou te aoao ai ma tuputupu ae ai mai faafitauli atonu e ono faatuai ai i tatou. E ui i ona tauiviga, e malosi le faatuatua o Marcos. E malamalama o ia o ona tofotofoga e le tumau. O lona agaga faafetai mo le fuafuaga e faavavau a le Tama Faalelagi e faatumauina ai lona fiafia ma le faaosofia i aso taitasi.
“E finagalo lo tatou Tama mo i tatou e toe foi atu ia te Ia i se aso ma ua folafola mai ia i tatou e mafai ona faaatoatoaina i tatou i le Faaola. Seia oo mai lena aso, o loo faatasi o Ia ma i tatou i laasaga taitasi o la tatou malaga faaletino. A o tatou liliu atu ia te Ia, o le a tatou maua le olioli e ui lava i luitau o i o tatou luma.”
Elder Ulisses Soares, Facebook, 14 Aok., 2023, facebook.com/soares.u.
Tuuto Atu i Aso Taitasi i le Atua
“Tatou te maua le toomaga—mai le le fiafia, lototiga, ma soo se luitau—a o tatou faaogatusa o tatou loto ma mafaufau ma Iesu Keriso. Ina ia i ai ma tumau i se tulaga ogatusa ma Ia, tatou te punouai i le tuuto atu i aso taitasi i le Atua, tatalo ma suesue i tusitusiga paia. Tatou te salamo i aso taitasi. Tatou te auauna atu. Tatou te faaaogaina upu e ‘mama, matagofie, pe logoleleia, pe tauleleia’ (Mataupu Faavae o le Faatuatua 1:13).
“O nei mea uma e valaaulia ai le Agaga ina ia i ai i o tatou olaga. Tatou te faalogo ma le toto’a mo faaaliga a le Agaga Paia. Tatou te fetuutuunai o tatou manatu ma mea e faaalu ai o tatou taimi ia mautinoa ai o loo tatou fesootai pea ma le lagi.
Sister Camille N. Johnson, Facebook, 29 Aok., 2023, facebook.com/RSGeneralPresident.
O Lou Saoasaoa ma Lou Alualu i Luma
“Sa ou tamo’e i le 5K i le Aso Toonai talu ai ma nisi o tamaitai ma alii sili ona ofoofogia i le konafesi a le YSA i Iuta ‘Faatasi ia Keriso.’ Sa ootia au i le Agaga o lena afiafi. Sa matou maua le fiafia tele ma lagonaina le malosi a o matou faapotopoto faatasi ma talanoa e uiga ia Keriso ma tamomo‘e latalata i Lona maota paia. E tele ni talafaatusa na tulaga ese ia te au lea ou te manao e faasoa atu ia te outou.
“Muamua, sa tatau ona matou tamomo‘e i la matou lava saoasaoa.
“O la’u sini mo lenei 5K o le tamoe pea, aua le tu, ma faauma (o loo faamaulalo le mamafa!). A o ou sauni, sa ou iloaina e mafai ona ou alu mamao atu pe afai ou te tamoe i lo’u saoasaoa ma tumau pea. I lenei tamo‘ega matagofie, sa taufetuli saoasaoa ai nisi o tagata, o nisi sa tamomoe lemu, o nisi sa savavali, ma o nisi sa tuleia e uo po o aiga i nofoa faataavalevale. Sa le taua po o ai na muamua pe mulimuli, ae sa faatatau i le uunaia o le tasi ma le isi e faaauau pea, faia faatasi, ma faauma.
“O lou saoasaoa ma le alualu i luma e i le va o oe ma le Alii. Ma ou te manatu e le o popole tele o Ia e uiga i lou tulaga pe a faatusatusa i le tagata o loo i ou luma. po o tua atu o oe. Ae, ou te manatu o loo Ia taulai atu e fesoasoani ia te oe ia faaauau pea ona e alu i soo se mea o e i ai i lau malaga patino e toe foi atu ai ia te Ia. O lea ia saili ma olioli i le saoasaoa e aoga mo oe, ma tuu atu i le Tama Faalelagi ma le Faaola e faamalolosia ma faamalamalamaina ou laasaga!
“Lona lua, e lelei atu lo tatou tamomo‘e faatasi!
“Ou te fiafia e feiloai ma tamomo‘e ma le toatele o soo maoa‘e o le Faaola! Faatasi ai ma isi i o’u tafatafa, sa ou lagona le uunaia e faaauau pea, ma o le mamao sa foliga mai e lei umi tele. Sa fai mai se tasi o uso ia te au, ‘E mafai ona ou tamoe lelei atu faatasi ma oe!’ Sa ou fiafia sa ma fefaamalosia‘i i le tasi ma le isi. O le fesoasoani atu i isi i le ala na matou maua ai le uunaiga e faaauau pea. I se isi itu, sa ou maua le manava e asiasi ai a o tamoe ma lagonaina e pei sa mafai ona ou faaauau pea. Ou te manatu sa i ai lena lagona ona o tagata sa matou tamomoe faatasi ma le Tagata sa matou taufetuli moni i ai. Sa matou potopoto faatasi ia Keriso.
“Ma e pei lava ona matou siitia ma uunaia le tasi ma le isi i lenei tamoega 5K, e masani lava ona galue le Faaola e ala i isi i lenei tamoega faaletino e sii ae a tatou avega ma aumaia ia i tatou le malosi, faamalosiau, saogalemu, mafanafana, ma le olioli faateleina. Na te tuuina mai ia i tatou le toomaga e ala ia i latou o loo tamomoe i o tatou tafatafa.
“O le vae mulimuli sa umi ma faigata maagai tonu atu i le Malumalu o Saratoga Springs Iutā, lea sa susulu i le po. O le a le vave ona galo ia te au le agaga ma le alofa na ofoina mai ma mauaina a o matou agai atu i le tini. Tau ina ia tatou fefaamalosia‘i le tasi ma le isi ma lagonaina le olioli faateleina a o tatou tamomoe faatasi i lenei malaga ia Keriso.”
Sister Kristin M. Yee, Facebook, 18 Aok., 2023, facebook.com/RS2ndCounselor.
O Le Faataitaiga a Iesu Keriso i o Tatou Olaga i Aso Taitasi
“Ua valaaulia i tatou e Iesu Keriso e mulimuli i Lana faataitaiga i o tatou olaga i aso taitasi. Ma ua Ia folafola mai foi le fiafia a o tatou taumafai e faia le mea sili tatou te mafaia e mulimuli ai ia te Ia ma mamanu o tatou olaga e faapei o Lona soifuaga. Sa ou lagonaina talu ai nei se naunautaiga sili atu ina ia onosai atili e pei o lo tatou Faaola. O Iesu Keriso, i Lona soifuaga magaluega i le lalolagi, sa avea ma faataitaiga atoatoa o le onosai. Sa Ia tauaveina mea uma ma faia mea uma ma le tuuto atu ma le naunautai i le Tama Faalelagi. …
“Ou te fiafia [i le] pese [‘O Loo Ou Taumafai e Avea e Pei o Iesu’] aua e faatusa i le tele o mea o loo ou taumafai e fai i aso taitasi, o le mulimuli lea i le faataitaiga a lo tatou Faaola.
“… Fai mai se vaega o le fuaiupu muamua … : ‘O loo ou taumafaie avea e faapei o Iesuo loo ou mulimuli i ona ala.’ Ou te fiafia i lena savali.
“E mafai ona tatou aoao atili e uiga i lena mea i le Ioane 13:15 …[:] ‘Aua ua ou avatu le faaa’oa’o ia te outou, e pei ona ou faia ia te outou, ia faapea lava e outou ona fai.’ O se faatonuga mamana lena ia te au ua saunia e le Faaola se mamanu mo i tatou e mulimuli ai, a o tatou saili atu mo Ia ma saili atu i Lana mamanu, e mafai ona tatou avea atili e faapei o Ia.
“O lea ou te valaaulia ai outou e aoao i le asō: O a ni auala e finagalo Iesu tatou te avea atili ai e faapei o Ia? Ma ia loto atoa i ai i le taumafai e faaaofia nisi o na mea i au amioga ma au faatinoga ma au tautalaga i le asō.”
Sister Tracy Y. Browning, Facebook, 27 Ape., 2023, facebook.com/Primary2ndCounselor.
Tamaiti o ni Soo o Iesu Keriso
“Atonu e laiti fanau i le tino, ae e le laiti i latou i le agaga. O le toatele o tamaiti e le faaaogaina upu tetele, ma latou te faamatalaina mea i le tulaga faigofie. E le fefefe i latou i mea ua latou iloa e moni. Latou te folafola atu mea. E le tele ni mea e fealoalofa‘i ai. E mamana ai a latou molimau ia te au, ma ou te faamoemoe e mafai ona tatou vaai atu ia i latou o ni soo o Iesu Keriso.
“Tatou te valaaulia i latou e osia feagaiga i le valu tausaga o le matutua, ma latou te faia. Ma o i latou fo’i o ni soo. A o tatou valaaulia i latou e faaaoga lo latou avea ma soo, vaai atu ia i latou o ni soo, ma taulimaina i latou o ni soo, o le a latou tutulai ae i soo se tulaga ua tatou faatutuina mo i latou.”
Sister Tracy Y. Browning, Facebook, 11 Aok., 2023, facebook.com/Primary2ndCounselor.