Mauaina o le Atoatoa e ala ia Iesu Keriso

Saunia e Michelle Dennis Christensen

Faatasi ai ma le saolotoga fou, o avanoa, ma le malaga e le mailoa lea e sau mai le avea ma se tagata ua o ese atu le fanau mai le aiga, aisea na ou le lagonaina ai le faamalieina? O le a se mea na misi?

o le aao o le Faaola o loo aapa atu i le tina, o lona atalii faifeautalai o loo faafesootaia tagata e ono auai i le Ekalesia

Sa maligi loimata a o ou tatalo mo le filemu ina ua faatumuina e lo’u atalii laitiiti lana talosaga faafaifeautalai. Sa ou matuai manao lava ia te ia e alu i se misiona. Na ou manao i ai. Sa ou taumafai pea e faatalitonu a’u lava i lenei mea.

Ou te alofa i lo’u Faaola ma sa ou matuai fiafia lava mo le avanoa o lo’u atalii e faasoa atu ai le olioli e mafai ona tatou maua e ala ia Iesu Keriso. Ae i le taele o lo’u loto sa ou fefe i lona alu ese atu. Sa ou iloa o le a le toe foi moni mai lava o ia i le fale pe a maea lana misiona. E tusa lava pe nofo o ia i le fale, o le a le tutusa lava.

Sa fai mai a’u uo ia te a’u, o le laasaga i le avea ai ma se tagata ua o ese atu le fanau mai le aiga e matagofie. Sa ma fiafia ma lo’u toalua ma tulimatai atu i le saolotoga ma avanoa ma te lei mauaina a o ma tausia le ma fanau.

Faatasi ai ma lenei saolotoga fou, sa ou tuuina atu ai au lava i le anoanoai o gaoioiga. Sa ma malaga ma lo’u toalua, aoao e ta le okeni mo lo’u valaauga, taaalo ma fanau a la’u fanau, ma faia galuega faalemalumalu ma talafaasolopito o aiga.

Sa ou maua le fiafia ma ni mea fou. Na ou mauaina le faaleleia aitili o a’u. Sa ou maua ni mea matagofie.

Ae sa i ai lava i taimi uma se mea na misi. Sa i ai lava se mea sa lei i ai iina. Ina ua alu ese lo’u atalii, sa ia aveina se vaega tele o lo’u fatu sa foliga mai sa le mafai ona ou faatumuina.

Pe a ma se tausaga talu ona alu ese atu lo’u atalii, sa i ai so’u uiga maitaita tele ua tai tutusa lava ma uiga maitaita na faaali mai e la’u fanau a o laiti i latou. Sa tilotilo mai lo’u toalua ia te a’u ma fai mai, “Michelle, e tatau ona e auauna atu.” Sa ou saini mo se avanoa auauna atu.

Peitai, sa tiga lava lo’u loto. Sa faigata ia te au ona tuuina atu a’u lava i le auauna atu po o soo se isi lava taumafaiga na faaolioli mai. Faatasi ai ma la’u fanau uma ua o ese atu, sa ou lagonaina e pei o le a le toe atoatoa lava lo’u olaga.

I se tasi po ina ua ou tatalo mo se fesoasoani, sa faailoa mai e le Agaga ia te au sa ou lagonaina le lagona gaogao lea e oo mai i le leiloa—leai o se faamoemoe. Sa ou manatu sa ou feagai ma lena faanoanoaga patino e ala i le faatumuina o lo’u olaga i na gaoioiga matagofie uma.

Sailiga mo Tali

A o ou saili mo ni tali, sa ou maua le saunoaga lenei mai le talafaasolopito o le Perofeta o Iosefa Samita: “Pe a leiloa atu [se mea po o se tasi] ua tuu atu i ai o tatou loto, e tatau ona avea lena ma se lapataiga ia i tatou. … O o tatou faananauga e tatau ona tuu atu i le Atua ma lana galuega i le malosi sili atu nai lo o o tatou uso a tagata.”¹

Sa tuia le ao pogisa i luga o lo’u fatu i se iota o le malamalama. Sa ou taumafai e faatumu la’u lua loloto o le faanoanoa i mea, gaoioiga, ma aafiaga—auaunaga, agaalofa, tulitulimatagauina o taleni. O mea lelei uma, ae latou te lei faatumuina la’u lua tele. Latou te lei faamaloloina a’u i le ala sa ou manaomia ai le faamalologa.

Sa ou iloaina o lena ituaiga o filemu ma le faamalieina e na o lo tatou Faaola, o Iesu Keriso e mafai ona oo mai ai. Sa a’oa’o mai Iesu, “O a’u nei le ala, ma le upu moni, ma le ola” (Ioane 14:6). Ua na o Ia lava tatou te maua ai le olioli ma le atoatoa ma le filemu ma le faamalieina. Faimai le Salamo 16:11 , “E te faailoa mai ia te a’u le ala o le ola: o i ou luma le fiafia e malie ai.”

O le Auala na ou Suia ai

Sa le’i suia vave le olaga. Sa le’i vave ona faamaloloina lo’u loto. Ae sa ou iloa le mea e tatau ona i ai la’u taulaiga ina ia tupu ai.

Sa suia a’u tatalo. Sa amata ona ou ole atu i le Tama Faalelagi e fesoasoani mai ia te a’u e fausia se sootaga malosi atu ma lo’u Faaola. Pe a ou lotovaivai, ou te faamanatu pea ia te a’u lava ia o loo i ai Iesu Keriso iina mo a’u, ma e ala i le alofa tunoa o Lona mana togiola, o le a Ia fesoasoani mai ia te a’u. Sa atili ai ona taulai atu a’u suesuega o tusitusiga paia i le fausiaina o se sootaga ma Ia. Sa umi se taimi, ae sa ou faaauau pea i le taitaiina o o’u lagona, lo’u malosi, ma o’u mafaufauga ia Iesu Keriso.

A o o’u faia, sa amata ona sii ese a’e le pogisa mamafa. Sa ou maua se fiafiaga sili atu i nai faatinoga laiti o le auauna atu ma le alofa i aso taitasi. Sa susulu mai le malamalama ma le faamoemoe i lo’u ala ma faatumulia ai le gaogao i lo’u loto. O le faamuamua o le Faaola na tuuina atu ai se uiga loloto ma fiafiaga i vaega uma o lou olaga, mai le auauna atu i le faaaluina o le taimi ma le aiga, mai le malaga atu i le atiina ae o a’u taleni. Sa oo ina sili atu le oa o mea uma ao i ai Keriso i le ogatotonu.

O le malaga a tagata uma i taimi fesuisuiai o le olaga e tulaga ese. Peitai, o le vaifofo i o tatou faanoanoaga o le tali atu lea i le valaau a Keriso ina ua Ia fetalai mai, “O mai ia te a’u ma le faamoemoe atoa o le loto, ma o le a ou faamaloloina [outou]” (3 Nifae 18:32). Ua na o Ia lava o le a tatou maua ai le faamalologa moni, filemu, alofa, ma le olioli.

E alala le tusitala i Iuta, ISA.