O Leo o le Au Paia o Aso e Gata Ai

O A’u Oa Silisili

Saunia e Giuseppe Monno, Bari, Italia

O le faafoliga o se Au Paia o Aso e Gata Ai na taitai atu ai i lo’u papatisoga ma se olaga fou i le talalelei a Iesu Keriso.

Ata na tusia e Ben Simonsen

O la’u galuega o se kuka o lo’u olaga lea. Sa ou malaga i le lalolagi e kuka i faletalimalo taugata ma vaa folau. Sa ou auai i se vaega o tagata kuka maoae na manumalo i le tele o tauvaga kuka faavaomalo.

I se tasi taimi, sa ou aluese ai mai le aiga mo le tolu tausaga. E masani ona valaau mai lou tina ia te au ma loimata ma fai mai ia te au ou te sau i le fale.

I se tasi aso i Milan, Italia, lea sa ou maua ai se galuega kuka i se faletalimalo, sa ou feiloai ai i faifeautalai faamisiona i se nofoaga tumutumu e faatali ai nofoaafi. Sa la ta’u mai ia te au e uiga i le Ekalesia a Iesu Keriso o le Au Paia o Aso e Gata Ai ma faasoa mai nisi o mataupu faavae o le talalelei. Sa faapitoa lo’u fiafia i mea sa la aoaoina ai a’u e uiga i le aiga.

Sa tuuina mai e faifeautalai ia te au se kopi o le Tusi a Mamona ma fai mai ou te tatalo e uiga i ai. Sa la tuuina mai foi ia te au se tamaitusi ma ni faatonuga i le auala e tatalo ai.

Sa ou toe foi fiafia i lo’u faletalimalo, alu i lo’u potu, tatalo, ma amata ona faitau. O le tele o lo’u faitauina o le Tusi a Mamona, o le tele foi lea o lo’u manao e faitau. Ae paga lea, o la’u galuega na taofia ai au mai le toe vaai i faifeautalai. Ina ua uma la’u konekarate i le faletalimalo, sa ou toe foi i lo’u aiga i Bari, lea na amata ai ona ou kuka mo se isi faletalimalo.

I se tasi aso i le fale’aiga i le faletalimalo, sa taumafai ai se isi kuka, mo ni mafuaaga le talafeagai, e faamasani ma nisi o tamaita’i faiagaluega i le fale’aiga iina. Sa ita o ia ona o tamaita’i faigaluega, o nisi o le Au Paia o Aso e Gata Ai, sa mumusu e tafafao faamasani ma ia.

O le manatuaina o faifeautalai sa ou feiloai i ai i Milan, sa ou ta’u atu ai i le kuka o loo i ai i le au faigaluega le aia tatau e teena ai o ia.

“Ia, o oe foi o se Mamona?” na ia fesili mai ai.

Ona sa ou fiafia i mataupu faavae na aoaoina ai au e faifeautalai ma ona sa ou lagonaina le tauamiotonuina i le puipuia o tamaita’i faigaluega, sa ou tali atu, “Ioe.”

O le isi taimi na vaai ai le kuka i tamaita’i faigaluega, sa ia ta’u atu ia i latou o a’u o se tagata o le Au Paia o Aso e Gata Ai. Sa matuai fiafia lava i latou. Ina ua matou potopoto mo le taumafataga o le aoauli, sa amata ona latou fesili mai ia te au ni fesili e uiga i le Ekalesia i Milan. Sa ou tau atu ia i latou e uiga i le aai ma sa ou feiloai i faifeautalai iina. Ina ua taunuu mai le matou meaai, sa ou aapa atu mo se ipu uaina i luga o le laulau.

“O le a lau mea o fai i le inuina o le uaina?” na fesili mai ai se tasi o tamaita’i faigaluega.

“E i ai se mea e leaga ai lena mea?” Na ou fai atu ai.

“O e toaga ea?” na fesili mai ai le isi

“O le a le uiga o lau tala?” Na ou fai atu ai.

“O a ou laei i le aso na e papatiso ai?” sa la fesili mai ai.

“Ou te le manatua,” sa ou fai atu ai ia i latou. “Sa na o le tasi le masina lo’u matua.”

Sa matuai feitai lava i laua ona sa la manatu sa ou taufaalili ia i laua. Sa ou faamautinoa atu ia i laua ou te le o taufaalili. Sa ou tautino atu e le o au o se tagata o le Ekalesia, ae sa ou tau atu ia i laua ou te fiafia i le Tusi a Mamona ma mataupu faavae o le talalelei sa ou aoaoina. Ona ou fesili atu lea pe mafai faapefea ona ou aoao atili e uiga i la laua ekalesia.

Sa le’i umi ae faailoa atu a’u e le au faigaluega i faifeautalai. Sa faigata ona latou talitonu i ai ina ua uma a’u lesona ma papatisoina.

Ata o le aiga mai faaaloaloga a le tusitala

Faatasi ai ma lo’u papatisoga, sa suia ai lo’u olaga. Sa ou aoaoina e le mafai ona i ai lou vae e tasi i le lalolagi ae tu le isi vae e tasi i le talalelei. Sa ou aoaoina o le galue e le o le mea aupito sili lea ona taua i le olaga. Sa ou aoaoina e muamua le Alii ma lo’u aiga. Mulimuli ane, sa ou malamalama i le faanoanoa na lagonaina e lo’u tina i lo’u toesea ai, ma sa ou fai atu ia te ia e faamagalo a’u.

Sa ou le toe malaga i le lalolagi, sa ou faaipoipo i le Malumalu o Bern Suitiselani, amata se aiga, ma talia se galuega e kuka ai i se falemai i le lotoifale, lea sa ou faaaogaina ai au taleni e fesoasoani ai i tagata mama’i e toe manuia. O le taimi nei ua ou vaaia tagata faigaluega i le falemai. O le galue ai i le lotoifale e tuuina mai ia te au le taimi e tuuto atu ai i lou aiga ma valaauga i le Ekalesia.

Mai le aso na ou alu ai i le malumalu ma maua ai o’u faaeega paia i le lua tausaga talu ona uma lo’u papatisoga, ua ou fiafia lava i le paia o le malumalu ma le galuega iina. Ina ua maliu lo’u tama i le fa tausaga mulimuli ane, sa lofituina a’u. O ia o lo’u toa manumanu. Faafetai i le talalelei a Iesu Keriso, ou te iloa o loo soifua pea o ia.

Ina ua ou ulu atu i le potu selesitila ina ua uma ona faia le galuega sui a lou tama, sa ou lagonaina lona opo mai. I lena taimi, sa ou iloa ai ua talia e lo’u tama le talalelei ma le alofa o le Alii mo Ana fanau.

O tatou o le Au Paia o Aso e Gata Ai ua i ai le faamanuiaga o le iloa o le talalelei moni. Ou te faafetai mo le auala na suia ai lo’u olaga. O le talalelei o iina na ou maua ai le fiafia moni. O le talalelei ma lo’u aiga o a’u oa silisili ia.