“Saili ma le Filigā ma O Le a E Maua,” Liahona, Ian. 2024.
Saili ma le Filigā ma O Le a E Maua
Ua faaali mai e le Alii le ala e mafai ai ona tatou sailia le upumoni ma le taitaiga i o tatou olaga.
Ina ua ma toe foi atu ma lo’u toalua o Regina i le fale i Pasila ina ua uma ona ma auauna atu i le Misiona a Angola Luanda mai le 2016 i le 2019, sa i ai se ma filifiliga taua e fai. Sa matou faatauina atu lo matou fale a o lei faia le ma misiona. Ina ua mavae se tausaga talu ona toe foi i le fale, sa tatau ona matou filifili i le va o le faatau po o le mautotogiina o se fale. E faapefea ona matou filifilia le mea sa’o mo i matou?
O lenei ituaiga o faaiuga o se tasi lea o le tele o galuega, gaoioiga, ma popolega o le olaga i aso uma lea e oo mai ia i tatou uma. E i ai taimi, e mafai ai ona latou faalavelave ia i tatou mai faamanuiaga mamalu ma avanoa ia e na o le talalelei toefuataiina a Iesu Keriso e ofoina mai ia i tatou. I le feagai ai ma le tele o tautinoga ma tiutetauave, e mafai ona faigata ona iloa po o le a le itu e moni pe o le fea foi itu e tatau ona tatou uia. O lenei mea e mafai ona mafua ai ona tatou lagona faafuasei le lofituina i le tele o manaoga.
O le mea e faafetai ai, e lei tuua i tatou e lo tatou Tama Faalelagi alofa na o i tatou e fuafua po o le a le mea moni po o mea e tatau ona tatou faia.
O Le Faapogai o Upumoni Uma
A o lei tuua lenei lalolagi, sa folafola atu e lo tatou Faaola, o Iesu Keriso, i Ona soo o le a auina mai e le Tama le Fesoasoani, po o le Agaga Paia, e faamanuia i latou. O le Fesoasoani, na fetalai ai Iesu, [o le] na te aoao ia te outou i mea uma lava, e faamanatu mai foi o ia ia te outou i mea uma” (Ioane 14:26
O se matafaioi autu a le Agaga Paia o le avea lea ma tagata e faaalia mai le upumoni (tagai Ioane 16:13). O lo tatou Tama Faalelagi o le punavai o upumoni uma ua faaalia mai, pe oo mai e ala mai i perofeta, tagatavaai, ma talifaaaliga po o i tatou taitoatasi e ala mai i le Agaga Paia. A o tatou taumafai ia maua le mafutaga a le Agaga Paia, o le a taialaina i tatou e lo tatou Tama Faalelagi e oo lava i taimi sili ona faigata.
Ole Atu, Saili, ma Tuitui Atu
Ona e finagalo lo tatou Tama Faalelagi e musuia, aoao, faatonu, ma atinaae i tatou i luga, ua valaaulia i tatou e “ole atu, ona foaiina mai ai lea ia te outou; ia outou saili, ona outou maua ai lea;; tuitui atu, ona toina ai lea ia te outou” (Mataio 7:7; tagai foi Luka 11:9; 3 Nifae 14:7).
Ina ua faalogo Nifae i upu a lona tama, o Liae, e faatatau i le faaaliga a Liae e uiga i le laau o le ola, sa fai mai Nifae sa ia “manao foi ia mafai ona ou vaai, ma faalogo, ma iloa e uiga i nei mea, i le mana o le Agaga Paia, o le meaalofa lea a le Atua ia te i latou uma o e e saili ia te ia ma le filiga” (1 Nifae 10:17).
O le sailia o le upumoni e manaomia ai le filigā. A tatou filigā, tatou te taumafai pea lava pea, faamaoni, ma malosi ia iloa le upumoni ma le finagalo o le Alii mo o tatou olaga. O le filigā i le sailia o le upumoni mai le Alii e faalatalata atili atu ai i tatou ia te Ia i vaega uma o o tatou olaga.
Sa aoaoina le Perofeta o Iosefa Samita i le popofou o lona olaga e faapea o se tasi o auala sili ona aoga e maua ai le upumoni o le sailia lea ma le faamaoni o tali i fesili (tagai Iosefa Samita—Talafaasolopito 1:10, 18). E mafai ona tatou fai atu fesili nei a o saili mo le upumoni. O tali e tuuina mai ai se mamanu e mafai ona tatou mulimuli ai ina ia iloa ai le upumoni.
O Ai Tatou Te Liliu Atu i ai mo le Upumoni?
I le faaiuga o le Tusi a Mamona, ua valaaulia ai e le perofeta o Moronae tagata uma e ole atu i le Atua ma se loto faamaoni, ma le manatu moni i ai ma le faatuatua ia Keriso, “pe ua le moni ea nei mea.” Ua molimau mai Moronae o le Atua “o le a ia faaali mai le moni o [le Tusi a Mamona] ia te outou, i le mana o le Agaga Paia. Ma o le mana o le Agaga Paia e mafai ona outou iloa ai le moni o mea uma lava” (Moronae 10:4–5).
Ua faatuina e le Atua, lo tatou Tama e Faavavau, se auala aoga ma faigofie e mafai ai e Lana fanau ona ole atu ia te Ia (tagai Iakopo 1:5) ma faalatalata atu ia te Ia i aso uma, itula uma--e oo lava i taimi uma. O lenei auala faigofie ae mamana o le tatalo.
O aoaoga a Alema i lona atalii o Helamana e faatatau atoatoa ia i tatou: “Tagi atu i le Atua mo mea uma e lagolago ai oe.” I “au mea uma e fai … ma o soo se mea e te alu i ai … , ia tuu atu ou manatu uma i le Alii; ioe, ia tuu atu faanaunauga o lou loto i le Alii e faavavau” (Alema 37:36). Na aoao mai foi Alema, “Filifili faatasi ma le Alii i au mea uma e fai, ma o le a ia taitai oe mo le lelei” (Alema 37:37). Tatou te lē manaomia se taimi po o se nofoaga faapitoa e tatalo ai. E ui atonu e le mafai ona tatou tatalo leotele i taimi uma, ae e mafai lava ona tatou tatalo i o tatou loto (tagai Alema 34:27).
O tali tatou te maua i a tatou tatalo atonu e le o taimi uma o mea ia tatou te faamoemoeina. O nisi taimi, atonu e feteenai ma o tatou loto. Atonu foi e umi atu le taimi faatoa tali mai a tatou tatalo nai lo le mea tatou te mananao i ai. O nisi taimi atonu e feiloai ma se to’afilemu mo sina taimi. Ae e silafia e le Tama Faalelagi o tatou manaoga. O Ana tali o le a mo lo tatou lelei i taimi uma. Tau lava o lo tatou agai i luma ma le faatuatua ia Iesu Keriso. (Tagai Luka 11:9–13.)1
Ua tautino mai e lo tatou Faaola ma le Togiola o le a tatou le oo lava i le Tama Faalelagi sei vagana ua ala atu ia te Ia. “O au nei le ala, ma le upumoni, ma le ola,” na fetalai ai Iesu. “E le alu atu lava se tasi i le Tamā, pe a le ui mai ia te au” (Ioane 14:6). O lenei mea e aveesea ai soo se isi lava filifiliga, pe oo lava i soo se mea faalavefau, i a tatou fesootaiga ma le Atua. O le mafuaaga lea e faia ai tatalo uma, lauga, molimau, vasega, ma le tele o isi mea tatou te faia—i le lotu, i le fale ma o tatou aiga, pe na o i tatou lava—i le suafa o Iesu Keriso.
O Le A La o Tatou Uiga e Tatau Ona I ai?
Ina ia maua le upumoni, e tatau ona tatou faamaoni ma ia i ai ni faamoemoega moni. Pe a tatou valaau atu ma le lotomaualalo i le Tama Faalelagi, ua tatou faaavanoaina i tatou lava e galulue e tusa ai ma tali tatou te maua ma faalautele lo tatou gafatia e faia ai.
O le faamaoni ma le faamoemoega moni e uunaia ai i tatou e faia mea e finagalo le Tama Faalelagi tatou te faia, ae le o mea tatou te mananao e fai. E tatou te faailoa atu ma le manino i lo tatou Tama Faalelagi lo tatou faatuatuaina o Ia pe a tatou “usiusitai, agamalu, lotomaualalo, onosai, tumu i le alofa, loto e usiusitai i mea uma ua silafia e le Alii e tatau ona faaoo mai i [o tatou] luga.” (Mosaea 3:19). E ala i nei uiga, tatou te malamalama ai ma talitonu o le a faia pea e le Tama Faalelagi mea e sili ona lelei mo i tatou.
Ata na pueina e Lee Michael Ragsdale
E Faapefea Ona Oo Mai Tali?
I le filifili ai pe faatau pe mautotogi i se fale, sa ma tatalo ma lo’u toalua, mafaufau loloto, ma talanoa soo e uiga i ai. Mulimuli ane, na oo mai le lagona i o ma mafaufau ma loto e le tatau ona ma faatauina se fale. Sa ma mulimuli i le faatuatua e tusa ai ma le tali na ma mauaina, ma le le iloa po o le a le mea o le a tupu i o ma olaga.
Pe tusa ma le 18 masina mulimuli ane, ia Aperila 2022, sa valaauina ai au o se Fitugafulu o le Pulega Aoao. Ina ua maea le konafesi aoao ia Aperila 2022, sa na o le tolu vaiaso ona ma tuua lea o Pasila mo le ma tofiga muamua. O le nonofo ai i se fale mautotogi i lena taimi na faigofie ai le faagasologa o le matou malaga ese. O le asō, ua mafai ai e i ma’ua ma Regina ona iloa lelei sa taialaina i ma’ua e le Alii i la ma’ua faaiuga.
Na maua foi e Nifae e tusa ai ma lona manao. E ala i le sailia ma le filiga o le upumoni ma le talitonu ma le faatuatua o le a faaali mai e le Tama Faalelagi upumoni ia te ia, sa faamanuiaina Nifae e vaai i mea na vaai i ai lona tama. Sa ia vaai i le laau o le ola, lea e faatusa i le alofa o le Atua—o le alofa “ua silisili atu ona manaomia i mea uma” ma “le silisili ona olioli i le agaga” (1 Nifae 11: 22, 23).
E ala mai i le Agaga Paia, e faaali mai ai e lo tatou Tama Faalelagi upumoni o loo avanoa mo Ana fanau uma. Na faaali mai e le Alii e ala mai i le Perofeta o Iosefa Samita e faapea, e mafai ona fetalai mai le Agaga Paia i o tatou mafaufau ma o tatou loto (tagai Mataupu Faavae ma Feagaiga 8:2), “uuna’i malosi … i o [tatou] lagona” (Mataupu Faavae ma Feagaiga 128:1), e mafua ai ona “mu o tatou loto i totonu ia te [outou]” (Mataupu Faavae ma Feagaiga 9:8), faatumuina o tatou agaga i le olioli, faapupula ai o tatou mafaufau, pe tautala atu le filemu i o tatou loto mafatia (tagai Mataupu Faavae ma Feagaiga 11:13; 6:14–15, 22–23).
Ou te molimau atu o le upumoni a le Atua e aveesea ai le masalosalo ma le fefe ma faamalosia ai a tatou molimau. Faatasi ai ma Nifae, ou te tautino atu, “Aua o ia o lē e saili ma le filigā o le a maua e ia” (1 Nifae 10:19). O le a faaali mai e le Atua le upumoni pe afai tatou te sailia ma le filigā, aua o Ia “na te tauia mai o e matuā saili ia te ia” (Eperu 11:6). Ma o le a Ia faia ma le manino ma o le a le masalomia lava le taialaina e Lona aao o o tatou olaga.