O La Tatou Taulaga Sili

Saunia e Dean Cooper, Uosigitone, D.C., ISA

A tatou faapaiaina se malumalu, ua tatou fai atu i le Alii, “O la matou taulaga lenei. Ua lelei i le mea e gata mai ai lo matou mafai.”

Pe tusa ma le lua vaiaso a o lei toe faapaiaina le Malumalu o Uosigitone D.C. ia Aokuso 2022, sa ma matauina ai ma lo’u pule se tasi o laau o le seu Europa e tau atu i le malumalu na foliga mai ua ma’i. Sa tau leai ni lala i le ogatotonu ma sa i ai ni lala ua amata ona pepē.

I le avea ai ma teufanua o le lotoa o le malumalu, sa ou popole ua saunia ia le lotoa matagofie o le malumalu sei vagana ai lena vaega itiiti e tasi. O le laau sa i autafa o le vaipuna e latalata i le faitotoa i le malumalu.

Sa i ai se matou laau faaleoleo maloloina na ola latalata ane, ma sa matou talanoaina le avanoa e sui ai le laau maloloina mo le laau ma’i. Ae o le mea muamua e manaomia ona matou aveeseina le auala savali ma le mutia lata ane ona aveese lea o laina o le paipa ma le eletise o loo taatitia i le vaega lena. O lo’u popolega sili ona leaga o le a matou sua’eseina le laau ma’i, tuu i ai le laau e sui ai, ae o le a le lava se taimi e faia ai mea uma i autafa o le laau ina ia foliga lelei mo le toefaapaiaga.

Ina ua ou ta’u atu i lo’u toalua, o Carolyn, e ono matou aveeseina le laau, sa ia tali mai: “Tau lava o le ‘oti ese o lala pepē, ma o le a ou talosaga atu i o’u uso o tusitusiga paia i le salafa o le atunuu e tatalo e uiga i ai. O lotoa o le malumalu e a le Alii. O le a Ia faamanuiaina le laau.”

E i ai se vaega o uo a Carolyn na te valaauina o ona uso o tusitusiga paia—o tagata o le Ekalesia o e sa masani ona auai i le uarota e tasi. Sa latou suesueina faatasi le Sau, Mulimuli Mai ia te A’u seia oo ina latou siitia ese uma, ae sa latou fesootai pea lava pea. Pe a manaomia le tatalo, latou te valaau atu i le tasi ma le isi.

Ina ua uma ona ta’u atu e Carolyn ia i latou e uiga i le laau ma’i, sa latou ta’u atu ia latou fanau ma isi tagata o aiga. Sa le’i iloa e Carolyn pe toafia na tatalo mo le laau, ae sa ia faatuatua o le a faafofogaina e le Tama Faalelagi a latou tatalo.

I totonu o ni nai aso, sa totogo ae ai i le laau ni laulaau fou, ma faatumu ai le vaega sa valavala. “Ioe ua matagofie mai lona vaaiga,” o le tala lea a Carolyn. Sa ia auina atu ata o le laau i ona uso o tusitusiga paia, ma fai atu ia i latou, “Vaai i le ala na tali mai le Alii ia i tatou!”

Sa ou iloa sa tatalo tagata mo le laau, o lea sa ou le te’i ai foi. Sa ou iloaina foi ua latalata ona faapaiaina lea e Peresitene Russell M. Nelson le malumalu ma lotoa o le malumalu i le taimi o lana tatalo o le faapaiaga. O le a lelei le laau.

Sa matou faafetai ona sa faamamaluina e le Alii la matou taulaga ma le faatuatua.