Avea ma se Molimau

Ua faaali atu e Moronae ia Maria Uitimera papatusi auro

I le tautotogo o le 1829, na faafeiloaia ai e Maria ma Peter Uitimera ia Iosefa ma Ema Samita ma Oliva Kaotui i lo la fale ina ia mafai ona faamaeaina le faaliliuga o papatusi auro. Sa mamafa le manaomia o le taimi o Maria. Sa ia tausia ni tagata se toaiva i lona lava fale ma fesoasoani i lana fanau faaipoipo o e sa nonofo latalata ane.

O atalii e toalima o Maria ma ona atalii faaletulafono (mulimuli ane) na avea ma molimau aloaia o papatusi auro ia Iuni 1829. O lena lava masina, na maua ai e Maria sana lava molimau.

I fafo atu o lona fale, sa alu atu ai se tamaloa lauulu-sinasina ma se taga i luga o lona tauau ia Maria ma fai atu, “O lo’u igoa o Moronae. Ua e vaivai lava i le tele o galuega faaopoopo e tatau ona e faia.” A o aveese mai le taga mai lona tauau, sa faaauau ai e Moronae, “Sa e faamaoni lava ma filiga i au galuega. O le mea lea, e tatau ai ona e maua se molimau ina ia mafai ona faamalosia ai lou faatuatua.” Ona ia faaali atu lea o mea sa i totonu o lana taga—o papatusi auro.¹

Na avea Maria ma molimau o papatusi auro, e pei o Molimau e Toatolu ma Molimau e Toavalu, o a latou molimau o loo i itulau tomua o le Tusi a Mamona. O le lotomaualalo ma le maelega o Maria na saunia ai o ia e avea ma se molimau. O lana molimau e le o tusia i itulau tomua o le Tusi a Mamona, ma o lona igoa e le o i ai i maa, maa faamanatu, po o mafaufau o le toatele o le Au Paia o e na mulimuli mai ia te ia. E ui lava o ana saofaga i aso taitasi i lona fale ma lona aiga e foliga mai e lei iloaina e le toatele, ae sa silafia e le Atua.

Na aoao mai Elder Dieter F. Uchtdorf o le Korama a Aposetolo e Toasefululua:

“E matua ese lava le faamasino a le Alii mai le ala tatou te faia ai. E fiafia o ia i le auauna tamalii, ae le o le tamalii e auauna mo ia lava.

“O i latou o e lotomaualalo i lenei olaga o le a ofuina pale o le mamalu i le isi olaga.”²

Ua faaliliuina nei ia faamaumauga a Moronae i le Tusi a Mamona, ma e mafai ona tatou maua se molimau o lona moni e tusa ai ma le folafolaga a Moronae o loo i ona itulau mulimuli: “Ou te apoapoai atu ia te outou ia outou ole atu i le Atua, le Tama Faavavau, i le suafa o Iesu Keriso, pe ua le moni ea nei mea; ma afai tou te ole atu ma le loto faamaoni, ma le manatu moni i ai, ma le faatuatua ia Keriso, o le a ia faaali mai le moni o ia mea ia te outou, i le mana o le Agaga Paia” (Moronae 10:4).

Pe i ai se taimi e te lagona ai e pei ua mamafa au avega ae o au taumafaiga e le faailoaina? E silafia oe e le Tama Faalelagi, ma Na te silafia mea lelei e te faia. A o e fealuai ma faia mea lelei (tagai Galuega 10:38), o le auauna atu e aunoa ma le tau faailoa, ma le suesueina o tusitusiga paia, e mafai e le Agaga Paia ona faamautu atu le moni o le talalelei ia te oe.

Fanau a Maria ma Peter Uitimera le Matua.

Christian Uitimera	Iakopo Uitimera	Ioane Uitimera	Tavita Uitimera	Katerina Uitimera (Page)	Peteru Uitimera	Elisapeta Ana Uitimera (Kaotui)
O se tasi o Molimau e Toavalu	O se tasi o Molimau e Toavalu	O se tasi o Molimau e Toavalu	O se tasi o Molimau e Toatolu	Na faaipoipo atu ia Hiram Page, o se tasi o Molimau e Toavalu	O se tasi o Molimau e Toavalu	Sa faaipoipo atu ia Oliva Kaotui, o se tasi o Molimau e Toatolu