“Faitau Lemu: Vaaia o le Faaola i Tusitusiga Paia,” Liahona, Ian. 2024.
Faitau Lemu: Vaaia o le Faaola i Tusitusiga Paia
O le nono mai o lenei faiga mai faatufugaga e mafai ona fesoasoani tatou te vaai ai ia Iesu Keriso i le Tusi a Mamona.
La Pietà, saunia e Michelangelo
E silia ma le tausaga na vaneina ai e Michelangelo le La Pietà, o se faatagata vane mataina o Maria o loo siiina le tino o Iesu ina ua mavae le Faasatauroga. Na umi atu le taimi na faaaluina o Leonardo da Vinci, pe tusa ma le tolu tausaga, e vali ai lana ata lauiloa o le Tausamaaga Mulimuli.
Afai e te matea, o le a le umi e te faimai e faaalu e se tagata asiasi i se falemataaga o faatufugaga—i le averesi— e maimoaina ai galuega taitasi o faatufugaga?
O le tali e 17 sekone, e tusa ai ma se tasi o suesuega.1
Mafaufau faapea: e 17 sekone o loo tilotilo i se galuega o faatufugaga atonu na faaaluina e le tusiata ni tausaga e fatu ai.
E malamalama i ai. E faitau selau atavali ma faatagata i se falemataaga, ma o i tatou o ni tagata pisi. O lea tatou te faatopetope ai ma talia le tele o mea tatou te mafaia. O le mea e malie ai, o le uunaia e lo tatou fefefe i le misi o se mea, ua iu ina tatou misia le faamoemoega tonu o le faatufugaga—o lagona ma mafaufauga na mananao tusiata ia tatou oo i ai. E autilotilo solo o tatou mata i vaega uma i le falemataaga, ae tatou te le o vaai moni lava i ai. Ona tatou tuua lea o le fale mataaga ua vaivai ma ua lē musuia. Atonu foi tatou te tuufesili po o a mea e vaavaai i ai tagata i faatufugaga—e faatalitonuina, atonu, o lena ata e mo tagata ua maualuga le aoaoina, ae le mo tagata uma.
Tilotilo Lemu
Ina ia taulimaina lenei faafitauli, ua uunaia e falemataaga o faatufugaga i le lalolagi atoa ia tagata asiasi e faataitai se mea latou te ta’ua o le “tilotilo lemu.”2 Latou te valaaulia tagata e piki se galuega se tasi o faatufugaga i le falemataaga, maua le toafimalie, ma iloilo ma le faaeteete mo sina taimi—5 i le 10 minute. Vaai i ai mai itu eseese. Laa faalatalata iai e iloa ai faamatalaga auiliili. Toe laa i tua ma vaai i totonu o se vaega atoa. O nisi taimi, e ta’u atu ai foi i tagata asiasi e aua nei faitauina le faailoga faamatalatala a le falemataaga lea e faavasega ai galuega tau ata—seiloga ua latou maua se avanoa e fatu ai o latou lava manatu ma maua ai mea latou te iloaina.
O le tilotilo lemu ua suia ai le aafiaga o le falemataaga o faatufugaga mo le toatele o tagata. O nisi e le’i mafaufauina lava o i latou o ni tagata e fiafia i faatufugaga, ua oo ina faananau e uiga i faatufugaga. Latou te maua le talitonuga mautinoa e mafai ona latou iloa le uiga i soo se galuega o faatufugaga, ma latou te maua le olioli i mea latou te iloaina. Ua latou aoao latou te le manaomia se tikeri i le kolisi i le talafaasolopito o faatufugaga ina ia uunaia ai e faatufugaga; tau lava o le manaomia ona latou faalemu ma tuu atu i le faatufugaga se avanoa e fai ai le mea na foafoaina e fai.
Pe mafai e mataupu faavae lava nei e tasi ona faaaoga i le faitauina o tusitusiga paia—mo se faataitaiga, i la tatou suesuega o le Sau, Mulimuli Mai ia te A’u o le Tusi a Mamona i lenei tausaga?
Ua tatou iloa o le Tusi a Mamona, o se tasi molimau ia Iesu Keriso, sa tusia ma le faamoemoe e faamalosia lo tatou faatuatua i le Faaola (tagai i le 1 Nifae 6:4). Ua tatou iloa na tusia e perofeta musuia a le Atua, aemaise lava mo o tatou aso (tagai, mo se faataitaiga, Mamona 8:35). Ua tatou iloa o perofeta anamua o e na tusia le Tusi a Mamona sa faia i se osigataulaga maoae faaletagata lava ia. Pe na o le faagasologa lava o le togitogia o upu i luga o papatusi uamea o se galuega tigā ma le mamafa (tagai i le Iakopo 4:1). Ma o nisi o i latou na lamatia o latou ola e faasaoina faamaumauga ina ia avanoa mo i tatou i aso nei (tagai Mamona 6:6; Moronae 1).
Ae o nisi taimi, i lo tatou pisi tele, tatou te faatopetope atu ai i le faitauina o le Tusi a Mamona. Atonu tatou te faitauina ni nai fuaiupu i le malutaeao po o le agai atu i le galuega. Atonu na ona vaavaai atu o tatou mata i upu uma i se mataupu, ae le o le tele o na mea e magoto i totonu. E le o taimi uma, ae o nisi taimi, tatou te tapunia ai le tusi po o le polokalama ma lagonaina le leai o se eseesega nai lo le mea na tatou lagonaina ina ua tatou amata.
Faitau lemu
Afai o se galuega o faatufugaga lelei e tatau ona talisapaia e ala i le tilotilo lemu, atonu e manaomia e le Tusi a Mamona la tatou “faitau lemu.” E le faapea la e manaomia ai ona umi atu a tatou suesuega o tusitusiga paia, tau lava ina ia faamanuiaina i tatou mai se suiga o le saoasaoa. Nai lo le faananati e faauma se mataupu, atonu mo lau suesuega o lenei aso o le a taula’i atu i le na o le tolu pe fa fuaiupu. Ae tatou te faatofuina moni lava i tatou lava i na fuaiupu. Tatou te matauina auiliiliga, upu, ma fasifuaitau. Tatou te mafaufau loloto pe aisea e ono taua ai—pe o aoao mai ea ia te au se mea e uiga i le Faaola? Pe faalolotoina ea lo’u alofa mo Ia ma lo’u faatuatua ia te Ia? E i ai se mea e finagalo o Ia ou te iloa?
O le faitau lemu e mafai ai ona tatou matauina ni mea i le Tusi a Mamona lea semanu tatou te le iloaina. O le mea e sili ona taua, e mafai ona fesoasoani tatou te vaai soo ai i le Faaola i lenei tusi sa tusia e molimau ia te Ia. O le faitau lemu o se auala lea e tatala ai o tatou mata, mafaufau, ma loto i le molimau mamana a le Tusi a Mamona ia Iesu Keriso. O se galuega musuia o faatufugaga, pe a tatou faaaluina se taimi e vaai moni ai i ai, e mafai ona suia ai le olaga. I se auala e sili atu ona loloto, o le vaaia o le Faaola i tusitusiga paia e mafai ona uunaia loloto ai o tatou mafaufauga ma lagona—ma, o se taunuuga, o o tatou olaga.
Mo se faataitaiga, faapea o loo e faitauina le 1 Nifae mataupu 1. Ua tosina atu lou mafaufau i le fuaiupu 6, o lea e te faalemu ai ma nofo ai iina mo sina taimi. Atonu o le a tosina atu oe i le “afi faaniutu” na vaai i ai Liae o loo “nofo i luga o se papa.” O se amioga uiga ese lena mo se afi. O le a le uiga o lena mea? Atonu e o atu ou mafaufauga i isi afi faaniutu o loo ta’ua i tusitusiga paia (e mafai ona fesoasoani vaefaamatalaga ia te oe iina). Atonu e te mafaufau loloto pe aisea e tele ai ina faatusatusa le afio ai o le Alii i le afi. O le a se mea o ta’u mai e lena mea e uiga ia te Ia? Pe na avea ea o Ia e pei o se afi faaniutu i lou olaga?
E tele lava mea e mafai ona mafaufau i ai. Ae e te lei faamaeaina lava le fuaiupu.
Ioe, e i ai le taua i le faitauina vave o le Tusi a Mamona. E mafai ona fesoasoani ia i tatou e aoao ai le tala atoa ma piki i luga ni autu lautele ma ta’ua soo. Ae e tele naua mea e aoao e uiga ia Iesu Keriso i auiliiliga o le Tusi a Mamona, ma o nisi taimi o le auala sili e vaai ai i na faamatalaga o le faalemu lea ma vaai toto’a.
Na fai mai Nifae e uiga i upu na ia tusia i le Tusi a Mamona, “O nei upu … o afioga i latou a Keriso, ma sa tuu mai i latou ia te a’u; ma … o le a faaali atu e Keriso ia te outou, i le mana ma le mamalu tele, o i latou o ana afioga” (2 Nifae 33:10–11). E le faapea e tau avea oe ma se tagata lelei le faitau e sue ai afioga a le Faaola i le Tusi a Mamona. Tau lava o lou faalemu ma tuu atu i le Tusi a Mamona se avanoa e fai ai le mea na foafoaina e fai—fausia lou faatuatua ia Iesu Keriso.