“O Le Mea na Ou Mauaina Ina ua Ou Le Toe Fesootai i Ala o Faasalalauga Faaleagafesootai,” Liahona, Mat. 2024.
O Mea na Ou Mauaina Ina ua Ou Le Toe Fesootai i Ala o Faasalalauga Faaleagafesootai
O le faaitiitia o lo’u faaaogaina o ala o faasalalauga faaagafesootai ua mafai ai ona ou taulai atili atu i la’u fanau ma faaleleia la’u sootaga ma le Faaola.
Ata na tusia e David Green
Mo ni nai tausaga ua mavae atu, sa ou iloa sa uunaia au e le Atua e laa ese mai ala o faasalalauga faaagafesootai. Sa ou iloa o malologa mai ala o faasalalauga faaleagafesootai sa sili lea mo au, ae sa ou iloa foi sa ou fiafia i le faalapotopotoga na ou mauaina iina. Sa ou le iloa pe faapefea ona faaleleia nei mea e lua; ae sa ou iloa sa tatau ona faia se suiga.
Sa ou faitau i se tusi na mafua ai ona ou mafaufau loloto i le fesili, “O le a le tele o le taimi i luga o ala o faasalalauga faaagafesootai o le aofaiga sao lea e maua ai le manuia o le faalapotopotoga, e aunoa ma faatosinaga le lelei uma?” Mo au, o le tali i lenei fesili pe tusa ma le 20 minute … i le masina. Sa ou faatuina se sini ia tupu lenei mea, ma faatasi ai ma le fesoasoani a le Alii, sa sili atu ona faigofie nai lo le mea sa ou mafaufau i ai. O le mea ou te lei faamoemoeina o le tele o le faamalosia o lo’u sootaga ma lo’u Faaola ona o lenei suiga. Sa oo ina ou lagonaina atili le alofa o le Faaola mo au; ua ou malamalama atili i le fuafuaga ua ia te Ia mo au; ma ua ou vaai manino atili i manaoga o tagata o loo siomia au.
O le Le Faatagaina o O’u Ata (Selfies) e Filimaoti ai Lo’u Taua Faaletagata Lava Ia
Sa ou iloa lava o au o se afafine o le Atua ma e alofa o Ia ia te au. Sa ou lagonaina le alofa o lo’u Faaola i taimi faigata o lo’u olaga. Ae o le tele o taimi sa ou faatagaina ala o faasalalauga faaagafesootai e ta’u maia le auala na ou vaaia ma mafaufau ai ia te au lava ia. E ui i lo’u taumafai e faatalitonu au lava ia faapea o ata faafoliga i luga o ala o faasalalauga faaagafesootai e lei aafia ai au, ae na ou aafia moni ai lava. O le faaitiitia o lo’u taimi i luga o ala o faasalalauga faaagafesootai na mafai ai ona ou maua le filemu o le mafaufau ma le filemu sa manaomia ou te faalogo ai i le Faaola o ta’u mai ia te a’u Ona lagona e uiga ia te a’u. Ou te lei iloaina le tele o lo’u misia o le faalogo i Lona siufofoga seia oo ina ou fatuina le tele o avanoa mo Ia ia i ai iina.
Sa ou talitonu lava i le ata o le faaolataga. Ou te iloa o Iesu Keriso o le totonugalemu lea o lena fuafuaga. Ae ou te talitonu foi o loo i ai se fuafuaga a le Tama Faalelagi mo i tatou taitoatasi. Na aoao mai Larry M. Gibson, o le sa avea muamua ma Fesoasoani Muamua i le Au Peresitene Aoao o Alii Talavou, “Ou te iloa e popole le Tama Faalelagi mo i tatou taitoatasi ma e i ai se fuafuaga patino mo i tatou ina ia ausia ai lo tatou taunuuga e faavavau.”1
Sa ou faaaluina le tele o taimi e faasolosolo ai (scrolling) ma mafaufau po o le a lo’u faamoemoega. O le i ai i luga o ala o faasalalauga faaleagafesootai na tuuina mai ai ia te au se nofoa pito i luma i mea fatufatuai uma ma matagofie sa faia e tagata. Sa ou aoaoina ni mea se tele mai nei tagata, ae sa ou faaaluina le tele o le taimi e saili ai nai lo le faia. Talu mai le laa ese mai ala o faasalalauga faaagafesootai, ua ou lagonaina le taialaina o au ia iloa patino le mea e finagalo le Tama Faalelagi ou te faia. O le tele o nei mea sa faateia ma ese mai mea sa ou manatu o le a avea ai i latou, ae ua latou faatamaoaigaina atili ai lo’u olaga ma sili atu ona faamanuiaina.
Na afio mai le Faaola ina ia tatou maua le ola ma ia maua atili ai lava (tagai i le Ioane 10:10). Ou te faafetai mo uunaiga e tuuina mai e le Agaga Paia ia i tatou e fesoasoani ia i tatou ia maua se olaga sili atu ona faamanuiaina.
Olaga i tua atu o le Lau
Na silasila le Faaola ia i latou o e na le iloa e isi. Ou te fiafia e faitau i tala e uiga ia te Ia o auauna atu i na tagata ma aoaoina i latou i lo latou taua. O le faaaluina o le tele o le taimi i luga o ala o faasalalauga faaagafesootai na faalavelaveina ai au mai le iloa moni o tagata i lo’u lava olaga, e aofia ai ma lo’u aiga. Sa ou iloaina afai e le lagonaina e la’u fanau le faatauaina mai ia te a’u, o le a le pine ae latou vaavaai atu i punavai i fafo atu e faamaonia ai lo latou taua.
Sa ou maofa i le alofa o loo ia te au mo la’u fanau a o ou i ai faatasi ma i latou. Ua sili atu lo’u fiafia i la’u matafaioi o se tina talu mai le tausaga ua te’a nai lo se isi lava taimi muamua. Ua ou masani i tuaoi ma ua sili atu ona ou mataalia i lo’u nuu. Ua faateleina o’u avanoa mo le auaunaga. Sa ou manatu o ala o faasalalauga faaagafesootai sa fesoasoani ia te au ia ou nofouta atili, ae o le mea moni sa ou lei ola i le taimi lava lea e vaai moni ai i manaoga o i latou sa siomia au.
O le faaitiitia o lo’u faaaogaina o ala o faasalalauga faaagafesootai na foliga mai o se mea laitiiti ma faatauvaa, ae ua mafai ai ona ou faateleina lo’u faatuatua ma faaleleia lo’u sootaga ma lo’u Faaola. Ou te iloa e alofa le Tama Faalelagi ia i tatou, e i ai sana fuafuaga mo i tatou, ma e i ai fanau e manaomia ona lagonaina le iloaina foi e i tatou.
E nofo le tusitala i Niu Ioka, ISA.