Ua Na’o Tusiga Faatekinolosi: Talavou Matutua
O E Lagonaina le Faaesea Ona o le Atuatuvale? E Mafai Ona Fesoasoani Fautuaga Nei e 3
E alala le tusitala i Amerika Samoa.
O la’u tauiviga ma le tuuatoatasi ma le atuatuvale ua ou latalata atili atu ai i le Tama Faalelagi ma Iesu Keriso ma fesoasoani ia te au ia malamalama i lo’u tulaga i le talalelei.
O nisi taimi, o le lagona e pei o loo e auai o se talavou nofofua matua e faigata.
O le tele o taimi ou te lagona ai le faaesea. O loo ou taumafai e fausia lo’u lava olaga, ae o loo ou lagonaina pea le tiutetauave mo le tausiga o lo’u aiga. Ma pea a ou manao e fesootai ma isi, ou te lagonaina lo’u alu ese lemu mai ia i latou ma mea ou te fiafia e fai.
I le taimi nei, o le popolevale ua faigata ai ia te a’u ona faia nei mea uma a o ou lagonaina pea se lagona o le auai. E masani ona iai lenei mea i le faapogai o le tele o o’u luitau.
O le atuatuvale ou te manao ai e tusi o’u manatu i lalo i se api talaaga nai lo le fesootai ma isi, e masani lava, ona ou te lagona e leai se tasi e malamalama i lo’u aafiaga. O iinei i Amerika Samoa, e le tele ni talanoaga o le soifua maloloina faalemafaufau. Ou te lagona e pei o isi e i ai se uiga “fia malosi” pe a ou taumafai e faamatala atu lo’u tauiviga ma le atuatuvale. O lea, nai lo le fesili atu mo se fesoasoani, ou te faaesea a’u lava.
Peitai, o lo’u tauivi ma le atuatuvale na aoaoina ai au i le taua tele o fesootaiga ma isi, aemaise lava i le Tama Faalelagi ma Iesu Keriso.
O ni nai auala nei ua aumaia ai a’u e la’u tauiviga ma le atuatuvale ia ou latalata atili atu ai i le Tama Faalelagi ma fesoasoani ou te iloa ai ou te auai moni lava i Le Ekalesia a Iesu Keriso o le Au Paia o Aso e Gata Ai.
O Le Faateleina o le Mana o le Tatalo
E ui lava sa ou tauivi i taimi uma ma le atuatuvale, ae o lenei luitau ua sili atu ona faigata i le tulaga talavou matua a o ou feagai ma avanoa fou ma le tele o suiga. O le ola ai ma lenei fefe faifai pea ma le popole ou te le talitonuina ai i nisi taimi lo’u taua faaletagata lava ia ma le alofagia o a’u.
Peitai, o se mea na fesoasoani ia te au e iloa moni ai o loo ou auai o le talanoa lea ma le Tama Faalelagi e ala i le tatalo.
E pei ona fautua mai Peresitene M. Russell Ballard (1928–2023): “O le tatalo e mafai ona suia ai o tatou lava olaga. I le faaosofia ai e le tatalo ma le loto i ai, e mafai ai ona faaleleia i tatou ma fesoasoani ai i isi e faia le mea lava lea.”1
Ona o le atuatuvale, ua ou faalagolago tele ai i le tatalo, ma ua fesoasoani lenei mea ia te au e faalolotoina ai la’u sootaga ma le Tama Faalelagi ma lo’u faatuatua e faafofoga mai o Ia i tatalo uma. Ua atili ai ona anoa au tatalo i le aluga o taimi a o ou feagai ma lenei luitau ma faalagolago ia Iesu Keriso ma le Tama Faalelagi mo se fesoasoani.
Ou te talanoa i le Tama Faalelagi e uiga i o’u lagona, o lo’u aso, o o’u popolega—soo se mea lava. E tusa lava pe Na te le aveesea mafaufauga ma lagona popole, pe a ou liliu atu ia te Ia mo se fesoasoani, ou te lagona e pei o loo i ai Lona aao i lo’u tauau ma Na te faamautinoa mai ia te au o loo faatasi o Ia ma a’u.
E fesoasoani mai o Ia ia ou iloa o a’u o Lona [atalii] ma e le o tuua na o a’u.
Faalolotoina le Malamalama i le Togiola a Iesu Keriso
Mai mataupu faavae uma o le talalelei, o le mataupu faavae ua iai la’u molimau aupito malosi o le mana faamalolo o lo’u Faaola, o Iesu Keriso.
Ina ua ou iloa le ala na fesoasoani mai ai le Faaola ia te au, ua mafai ona ou lagonaina se lagona o le auai ma le faamautinoaga o loo iloa a’u. O la’u tauiviga ma le atuatuvale e faaosofia ai au e saili le mafutaga faamafanafana a le Agaga, ma ona o lenei mea, ou te punouai ai lava i taimi uma i mausa laiti ma faatauvaa faaleagaga (tagai i le Alema 37:6) i aso uma e maua ai le mana o Keriso i lou olaga.
O le i ai o le faatuatua i Lona alofa tunoa ma le ositaulaga e moni lava o le ki aupito sili lea ou te manaomia e taulima ai faigata ma luitau uma o le olaga. E pei ona Ia aoao mai, “O au o le malamalama o le lalolagi” (Ioane 8:12), o lea, ia te au, o lona uiga e leai se pouliuli tatou te oo i ai e mafai ona tafiesea ai Lona malamalama.
Sa aoao mai foi ma le alofa e Elder Jeffrey R. Holland o le Korama a Aposetolo e Toasefululua le taua o le sailia o meafaigaluega mo i latou o loo tauivi ma le soifua maloloina faalemafaufau, fai mai: “Saili le fautuaga a tagata faatuatuaina e i ai aoaoga faamaonia, tomai faapolofesa, ma tulaga faatauaina lelei. Ia faamaoni ia i latou e uiga i lou talafaasolopito ma ou luitau. Mafaufau ma le agaga tatalo ma le manatu tonu i fautuaga latou te tuu atu ma fofo latou te fautuaina. Ua faamoemoeina i tatou e lo latou Tama i le Lagi ia faaaoga ia meaalofa ofoofogia uma ua Ia saunia i lenei tisipenisione mamalu.”2
Faatasi ai ma le lagolago a le Faaola, o le a tatou vaai ai i le malamalama i luma.
Atiina Ae o Fesootaiga Anoa
E lei leva atu, sa ou tauivi ai ma le atuatuvale tele. Ae nai lo le alu ese mai isi, sa ou tatalo i le Tama Faalelagi mo se fesoasoani, ma sa fesoasoani mai le Agaga ia te au e vaai i se upumoni e suia ai le olaga:
Tatou te manaomia le tasi ma le isi.
E ui lava o le atuatuvale e mafai ona ou manao ai e aluese mai isi, o le faaesea o au lava e le o le mea lea e finagalo ai le Tama Faalelagi mo au. E manao le tiapolo ia tatou lagona le motuese—e faapea tatou te le auai, ae maise lava i o tatou luitau. Ae a ou faalagolago i le Faaola e tuuina mai ia te au le malosi e aapa atu ai i o’u tei po o uo e uiga i o’u luitau, latou te tali mai ma le alofa ma fesoasoani ia te a’u ia agai pea i luma.
Ua ou vaaia lena mea pe a tatou naunau uma e fesootai le tasi ma le isi (aemaise lava pe a tatou faataumamao atu i tatou lava), e mafai ona tatou lagonaina lena lagona o le auai—lena lagona o le faatasia ma le faamoemoe ia Keriso.
Talalelei o le Auai
Ou te le iloa pe aisea e tatau ai ona matua faigata nisi o luitau. Ae ou te iloa e ala i o’u aafiaga ma le atuatuvale, ua mafai ai ona faalolotoina la’u molimau i le Tama Faalelagi, Iesu Keriso, ma lo tatou manaomia o le fesootaiga. Ina ua maua le fesoasoani e ala i le talalelei ma meafaigaluega o le soifua maloloina faalemafaufau, e mafai ona ou iloa lelei atu e i ai moni lava sou nofoaga i le talalelei a Iesu Keriso—e aofia ai tagata uma, e tusa lava po o a o latou tulaga.
Ou te iloa o loo i ai lava se avanoa mo le faaleleia atili e fesoasoani ai i tagata uma ia lagona le alofagia i le Ekalesia, aemaise lava i talavou matutua. Ae o loo faaauau pea ona ou vaaia le tutupu o vavega.
Afai o tou tauivi ma luitau o le soifua maloloina faalemafaufau, ou te faamoemoe tou te iloa o le talalelei a Iesu Keriso o se talalelei o le faamalologa, o le olioli, ma le, mea aupito sili ona taua, o le auai—mo fanau uma a le Tama Faalelagi.
Ou te lagonaina lena upumoni i lo’u loto.