“O Le Faaola o Tagata Uma, o se Talalelei mo Tagata Uma,” Liahona, Mat. 2024.
O Le Faaola o Tagata Uma, o se Talalelei mo Tagata Uma
O le talalelei, Togiola, ma le Toetu o Iesu Keriso ua faamanuiaina ai fanau uma a le Atua.
O le talalelei toefuataiina a Iesu Keriso o le, muamua, silisili, ma le faavavau, o le puna o le fiafia tumau, filemu moni, ma le olioli mo tagata uma i nei aso e gata ai. O faamanuiaga e tafe mai le talalelei ma mai le agalelei le faatuaoia o Keriso sa lei fuafuaina lava mo na o ni nai tagata filifilia, anamua pe i aso nei.
Po o le a lava lo tatou le agavaa tatou te lagonaina, ma e ui lava i agasala e ono taumamao ai i tatou mai ia te Ia mo se taimi, ua faamautinoa mai e lo tatou Faaola ia i tatou e faapea “ua faaloaloa mai ona aao ia te i [tatou] i le aso atoa” (Iakopo 6:4), ma valaaulia i tatou uma ia o mai ia te Ia ma lagona Lona alofa.
Faamanuiaga o le Talalelei mo le Lalolagi Uma
O le talalelei a Iesu Keriso ua “toefuataiina i nei aso e gata ai ina ia taulimaina ai … manaoga o malo uma, o ituaiga, gagana, ma tagata i le lalolagi.”1 O le talalelei e sili atu i atunuu ma lanu uma a o sopoia laina faaleaganuu uma e aoao atu ai “ua tutusa tagata uma i le Atua” (2 Nifae 26:33).2 O le Tusi a Mamona o loo tu o se molimau ofoofogia o lenei upumoni.
O lenei talafaamaumau maoae o loo molimau mai ai e manatua e Keriso atunuu uma (tagai i le 2 Nifae 29:7) ma o le a faaali mai “e ia o ia lava ia te i latou uma o e e talitonu ia te ia, … [ma faia] vavega tetele, faailoga, ma mea ofoofogia, i totonu o le fanauga a tagata” (2 Nifae 26:13). I totonu o nei vavega maoae, o faailoga, ma mea ofoofogia o loo i ai le faasalalauina o le talalelei. O lea, tatou te auina atu ai faifeautalai i le lalolagi atoa e molimau atu i ona tala fiafia. Tatou te faasoa atu foi le talalelei ia i latou o siomia i tatou. O le faaaogaina o ki o le perisitua toefuataiina mo e o soifua ma e ua maliliu e faamautinoa ai o le atoatoaga o le talalelei o le a iu ina avanoa mo atalii ma afafine uma a o tatou matua faalelagi i le—tuanai, taimi nei, po o le lumanai.
O le fatu o lenei talalelei—o le savali tutotonu a perofeta uma ma aposetolo ua valaauina i le galuega—e faapea o Iesu o le Keriso ma na afio mai o Ia e faamanuia tagata uma. I le avea ai ma tagata O Le Ekalesia a Iesu Keriso o le Au Paia o Aso e Gata Ai, matou te tautino atu o Lana taulaga togiola e mo le lalolagi uma.
O Le Manaomia o se Togiola e Le I’u ma Faavavau
A o ou alu atu i le salafa o le lalolagi, ou te faia faatalanoaga ma le toatele o tagata eseese o le Ekalesia. Ua musuia au e faalogo i o latou lagona i faamanuiaga o le Togiola a Iesu Keriso i o latou olaga, e tusa lava pe latou te ta’uta’u atu se agasala ua tuanai. E maeu le matagofie o le avanoa i taimi uma o le mafanafana faamamaina o Lana Togiola mo i tatou uma!
“E tatau ona i ai o se togiola,” na tautino atu ai Amoleka, “a leai o le a le maalofia le fano.” O le a tatou “pauu uma ma … leiloa, … vagana ai e ala i le togiola,” lea e manaomia ai “se taulaga e ao ina leai sona gataaga ma e faavavau.” Auā “e le mafai ona i ai o se mea itiiti mai i se togiola e le gata o le a mafai ona lava e totogi mo agasala a le lalolagi” (Alma 34:9, 10, 12).
Na aoao mai foi le perofeta maoae o Iakopo e faapea ona “e pei ona oo mai le oti i tagata uma, … e tatau ona i ai o se mana o le toetu” e aumaia ai i tatou i le afioaga o le Atua (2 Nifae 9:6).
O le agasala ma le oti e manaomia ona faatoilaloina. O le misiona lenei a le Faaola, lea na Ia faamaeaina ma le lototoa mo fanau uma a le Atua.
Ketesemane, saunia e J. Kirk Richards, e le mafai ona kopiina
O Le Taulaga a lo Tatou Faaola
I Lona po mulimuli i le olaga nei, sa ulufale atu ai Iesu Keriso i le Faatoaga o Ketesemane. O iina, sa Ia tootuli ai i le vaega o iai laau olive ma amata oo ai i le loloto o le tiga lea o le a le mafai lava e oe ma au ona iloaina.
O iina, na amata ai ona Ia tauaveina i Ona lava luga agasala a le lalolagi. Sa Ia lagonaina tiga uma, lototiga, ma le faavauvau, ma sa Ia onosaia tiga ma mafatiaga uma na oo ia te oe, o au, ma tagata uma o e na soifua pe o le a soifua mai. O lenei puapuaga tele ma le lē iu “na oo ia te [Ia], … o lē ua silisili i tagata uma, le gatete ona o le tiga, ma tafe toto ai i pu afu ninii uma” (Mataupu Faavae ma Feagaiga 19:18). E na o Ia lava na mafai ona faia lenei mea.
Ona aveina atu ai lea o Iesu i Kalevaria, ma i le taimi sili ona le tonu i le talafaasolopito o lenei lalolagi, sa faasatauroina ai o Ia. E leai se tasi e mafai ona aveesea Lona soifua mai ia te Ia. I le avea ai ma Alo Pele e Toatasi o le Atua, na ia te Ia le mana e pulea ai le oti faaletino. Sa mafai lava ona Ia tatalo i Lona Tama, ma e oo mai le anoanoai o agelu e faatoilalo ai Ona tagata faasauā ma faaalia ai Lana pule i mea uma. “Ona faapefea lea ona taunuu o tusi,” na fetalai atu Iesu i Ona tagata faalata, “e tatau ona oo ia mea?” (Mataio 26:54).
Ona o le usiusitai atoatoa i Lona Tama—ma le alofa atoatoa mo i tatou—na tuuina mai ai ma le naunautai e Iesu Lona soifua ma faamaeaina Lana taulaga togiola e le iu ma faavavau, lea e amata mai i le olaga ua tuanai seia oo i le lumanai ma le faavavau atoa.
O Le Manumalo a lo Tatou Faaola
Na poloaiina e Iesu Ona Aposetolo e faaauau Lana galuega ina ua mavae Lona maliu. O le a faapefea ona latou faia? O le toatele o i latou sa na o ni faifaiva faatauvaa, ma sa leai se tasi na aoaoina i sunako mo le galuega. I lena taimi, sa foliga mai ua faamoemoeina le Ekalesia a Keriso mo le faaumatiaina. Ae na maua e Aposetolo le malosi e tauave ai lo latou valaauga ma mamanu ai le talafaasolopito o le lalolagi.
O le a le pogai o le oo mai o le malosi mai i ia vaivaiga manino? Na saunoa mai le taitai o le ekalesia Anelekana ma le sikola o Frederic Farrar: “E toatasi, ma e na o le tasi lava le tali e mafai ona i ai —o le toetu mai le oti. O nei suiga tele uma sa mafua ona o le mana o le toetu o Keriso.”4 I le avea ai ma molimau a le Alii toetu, sa iloa e Aposetolo e leai se mea e mafai ona taofia lenei galuega mai le alualu i luma. O la latou molimau o se punavai o le mana lagolago a o faatoilaloina e le Ekalesia anamua mea le lelei uma.
I lenei vaitau o le Eseta, i le avea ai ma se tasi o Ana molimau faauuina, ou te tautino atu e faapea i se taeao po o se tasi o Aso Sa matagofie, na toetu mai ai le Alii o Iesu Keriso mai le oti e faamalosia i tatou ma motusia noataga o le oti mo tagata uma. O loo soifua Iesu Keriso! Ona o Ia, o le oti e le o lo tatou mutaaga lea. O le Toetu o le meaalofa saoloto ma le lautele lea a Keriso i tagata uma.
O Keriso ma Maria i le Tuugamau, saunia e Joseph Brickey
O Mai ia Keriso
O le talalelei ma le Togiola a Iesu Keriso e mo tagata uma—o lona uiga, o tagata uma. Na pau lava le ala tatou te maua ai faamanuiaga atoatoa o le taulaga togiola a le Faaola o le taliaina lea e le tagata lava ia o Lana valaaulia: “O mai ia te au” (Mataio 11:28).
Tatou te o mai ia Keriso pe a tatou faatinoina le faatuatua ia te Ia ma salamo. Tatou te o mai ia te Ia pe a papatisoina i tatou i Lona suafa ma maua le meaalofa o le Agaga Paia. Tatou te o mai ia te Ia pe a tatou tausia poloaiga, maua sauniga, faamamalu feagaiga, opogi aafiaga i le malumalu, ma ola i le ituaiga olaga o soo o Keriso o loo soifua.
E i ai taimi o le a e fetaiai ai ma le lotovaivai ma faanoanoaga. Atonu e momomo lou loto mo oe lava po o se tasi e te alofa i ai. Atonu e mamafatu ia te oe agasala a isi. O mea sese na e faia—atonu o ni mea matuia—atonu e afua ai ona e fefe faapea o le a tuua oe e faavavau e lena filemu ma le fiafia. I taimi faapena, ia manatua e le gata ina sii ese e le Faaola le avega o le agasala ae faapena foi ona “mafatia i tiga ma puapuaga ma faaosoosoga o ituaiga eseese uma” (Alema 7:11), e aofia ai ma o outou tiga! Ona o le mea na Ia uia mo oe, ua Ia silafia patino ai le ala e fesoasoani ai ia te oe a o e taliaina Lana valaaulia e suia ai le olaga: “O mai ia te au.”
E Talisapaia Tagata Uma
Ua faamanino mai e Iesu Keriso o fanau uma a le Tama Faalelagi ua i ai le aia tutusa i faamanuiaga o Lana talalelei ma le Togiola. Ua Ia faamanatu mai ia i tatou o tagata uma “ua faamanuiaina i le tasi e pei o le isi, ma ua leai se tasi ua faasaina” (2 Nifae 26:28).
“Ua Ia valaauina i latou uma ia o mai ia te ia ma taumamafa i lona agalelei; ma e lē teena e ia se tasi e sau ia te ia, e uliuli pe pa’epa’e, e pologa pe saoloto, o tane ma fafine” (2 Nifae 26:33).
“Ua Ia valaauina i latou uma”—o lona uiga o i tatou uma! E le tatau ona tatou tuuina ni faailoga mamasagia ma ni eseesega faafoliga i o tatou lava luga po o isi. E le tatau ona tatou faatūina soo se papupuni i le alofa o le Faaola po o manatu faivavale e faapea e le mafai ona Ia aapa mai ia i tatou po o isi. E pei ona sa ou fai atu muamua, “E le mafai [e se tasi] ona magoto ia maualalo ifo nai lo le malamalama le gata o le Togiola a Keriso e aapa atu ai ia te oe.”5
Nai lo lena, e pei ona sa ma aoaoina ma Sister Holland i ni nai masina a o lei maliu o ia, ua poloaiina i ma’ua ia maua le “alofa mama, o lea alofa mama o le alofa lava lea” (2 Nifae 26:30).6 O le alofa lenei ua faaali mai e le Faaola ia i tatou, auā “e lē faia e Ia se mea vagana ai ua mo le manuia o le lalolagi; ona ua alofa o ia i le lalolagi, e oo ina tuuina mai e ia lona lava soifua ina ia mafai ona ia tosina mai o tagata uma ia te ia” (2 Nifae 26:24).
Ou te molimau atu o le talalelei ma le Togiola a Iesu Keriso e mo tagata uma. Ou te tatalo o le a outou opogi ma le olioli faamanuiaga Na te aumaia.