O Leo o le Au Paia o Aso e Gata Ai

Sa Ou Iloa Sa Puipuia A’u

Saunia e Ljubica Blazevic, Herzegovina-Neretva Canton, Federation of Bosnia-Herzegovina

Sa vevesi se taua i fafo, ae a o ou faitauina le Tusi a Mamona, sa ou lagonaina le filemu ma sa ou le fefe.

Ata na tusia e Alex Nabaum

I le 1992, sa vevesi ai le taua a Yugoslavia. Sa tu’ipomuina lo matou taulaga o Mostar i aso taitasi. Sa taofia uma auaunaga lautele, e aofia ai le auaunaga i le meli.

Peitai, i le aso 1 o Aperila, na tuitui mai ai i lo’u faitotoa. Ina ua ou tatalaina, sa tuuina mai ia te au e se tamaloa ou te lei vaai muamua lava i ai se afifi mai la’u tama teine, lea sa nofo i le taimi lea i Malaga, Sepania, lea na ia auai ai i Le Ekalesia a Iesu Keriso o le Au Paia o Aso e Gata Ai. I totonu sa i ai se kopi o le Tusi a Mamona.

Sa amata ona ou faitauina i lena lava aso. Sa tupu se taua i fafo, ae a o ou faitau, sa ou lagonaina le filemu ma sa ou le fefe. Mulimuli ane, sa ou aoaoina ai o le filemu sa ou lagonaina o le Agaga Paia lea. Sa ou iloaina sa puipuia au ma o le a ou le oti.

A o ou faitau, sa ou aoao e uiga ia Iesu Keriso ma o loo soifua pea o Ia. Sa ou aoao e uiga i le papatisoga ma le Ekalesia a le Faaola. Sa ou lagonaina e moni mea uma sa ou faitauina. Mai lea taimi i lea taimi, e tali ai e la’u tama teine a’u fesili.

Ina ua maliu lo’u toalua i le 2019, sa tonu ia te au ou te alu i le Iunaite Setete, lea ua nofo ai nei la’u tama teine. Sa ou fia vaai ia te ia ma aoao atili e uiga i le Ekalesia toefuataiina.

Sa ou nofo i le Aai o Sate Leki, Iuta, mo le fa ma le afa masina. Sa ma o i le lotu i vaiaso uma ma la’u tama teine. Sa ou maua se lagona sa le mafai ona ou faamatalaina. Sa faia a’u lesona e faifeautalai. Na ou iloa e moni mea uma. Sa ou oo i le aso sili ona matagofie o lo’u olaga ina ua ou ulu ifo i le vai o le papatisoga ma sa faamauina o se sui O Le Ekalesia a Iesu Keriso o le Au Paia o Aso e Gata Ai i le aso 27 o Iulai, 2019.

Ina ua ou savali atu i totonu o le potu ina ia faamauina i le maea ai o lo’u papatisoga, sa fetagisi tagata uma. O le papatisoina ma le mauaina o le meaalofa o le Agaga Paia o se meaalofa sili mai lo tatou Tama Faalelagi. Ina ua uma lo’u faamauga, sa ou lagonaina ua matala le lagi ma sa matou i ai faatasi uma iina. I lo’u faamanuiaga faapeteriaka mulimuli ane, sa ou maua ai le tele o folafolaga faapitoa ma faavavau.

E moni le Tusi a Mamona. O le faitau ma tatalo e uiga i ai, e mafai ona tatou maua ai a tatou lava molimau. Faatasi ai ma lena molimau, o le a tatou iloa o Iosefa Samita o ia o se perofeta ma e ala mai ia te ia, na toefuatai mai ai le Ekalesia moni a Iesu Keriso i le lalolagi.