E Na o Tusiga Faaeletonika: Aoaoga a Taitai o le Ekalesia mai Ala o Faasalalauga Faaagafesootai
Faamanuiaina e ala i le Togiola a Iesu Keriso
Tagai i mea na aoao mai talu ai nei e perofeta, aposetolo, ma isi taitai o le Ekalesia i luga o ala o faasalalauga faaagafesootai e uiga i le Togiola a Iesu Keriso.
Keriso o loo Tatalo i le Faatoaga o Ketesemane, saunia e Hermann Clementz
Ua faamanatu mai e leAlema 7:11–14 ia i tatou ona o le Togiola a Iesu Keriso, ua mafai ai ona faamamaina i tatou mai a tatou agasala pe a tatou salamo, ma e mafai ona tatou maua le malosi mai ia Iesu Keriso e fesoasoani ai ia i tatou e onosaia o tatou tiga ma ma’i.
Ua faamanatu mai ia i tatou e Peresitene Russell M. Nelson e faapea e ala mai ia Iesu Keriso lava Ia e oo mai ai lea laveaiina: “E le atoatoa le aoaoga faavae,” na ia saunoa ai “pe a tautalagia le taulaga togiola a le Alii e ala i fasifuaitau pupuu e pei ‘o le Togiola’ po o ‘le mana gafatia o le Togiola’ po o le ‘faatinoina o le Togiola’ po o le ‘faamalosia e ala i le Togiola.’ O nei faaupuga e aumaia ai se tulaga lamatia o le taitaiseseina o lo tatou faatuatua e ala i le taulimaina o lemea na tupue peiseai na i aisonaia lava ola ma gafatia e tutoatasi ai mai lo tatou Tama Faalelagi ma Lona Alo, o Iesu Keriso.
“I lalo o le fuafuaga sili faavavau a le Tama, o le Faaola na puapuagatia. O le Faaola na motusiaina noataga o le oti. O le Faaola na totogia le tau mo a tatou agasala ma solitulafono ma tafiesea ai e tusa ma tuutuuga o lo tatou salamo. O le Faaola na te laveai i tatou mai le oti faaletino ma le faaleagaga.
“E leai se tino le mailoa ua ta’ua ‘o le Togiola’ lea e mafai ona tatou valaau atu i ai mo se fesoasoani, faamalologa, faamagaloga, po o le mana. O Iesu Keriso o le puna lea. O faaupuga paia e pei o leTogiolama leToetuua faamatala ai le mea na faia e le Faaola, e tusa ma le fuafuaga a le Tama, ina ia mafai ai ona tatou ola i le faamoemoe i lenei olaga ma maua le ola e faavavau i le lalolagi a sau. O le taulaga togiola a le Faaola—le faatinoga tutotonu o le talafaasolopito o tagata ola uma—e silisili ona malamalama ma talisapaiaina pe a tatou fesootaia ma le patino ma le manino ia te Ia.”1
O a isi auala e mafai ai ona faamanuiaina i tatou e Iesu Keriso ma Lana taulaga togiola? Tagai i mea ua faasoa mai e taitai o le Ekalesia e uiga i lenei autu i luga o ala o faasalalauga faaagafesootai i upusii o loo i lalo. E mafai foi ona e faitau atili i lauga o le konafesi aoao e uiga i le Togiola a Iesu Keriso.
Ae Faapefea Pe Afai Ou Te Faaauau Pea ona Faia Agasala Lava e Tasi?
“Sa fesiligia talu ai nei au e se tagata talavou O Le Ekalesia a Iesu Keriso o le Au Paia o Aso e Gata Ai po o le a le manatu o le Faaola ia i tatou pe a faaauau pea ona tatou faia ia lava agasala e tasi.
“Sa ou faasoa atu ou te talitonu e manatu le Faaola ia i tatou o ni tagata masani o fanau uma a lo tatou Tama Faalelagi, ma e le faaitiitia ai le alofa o ia te Ia ma lo tatou Tama Faalelagi mo i tatou.
“E mafai ona faamamaina i tatou mai a tatou agasala e ala i le salamo, ma o se olioli, ae le o se avega. A tatou salamo, e tatala e lo tatou Faaola alofa Ona aao e talia alii ma tamaitai uma ina ia olioli i faamanuiaga silisili ua i ai i le Atua mo Ana fanau.”
Peresitene Dallin H. Oaks, Facebook, 20 ulai, 2023, facebook.com/dallin.h.oaks.
O o Tatou Natura e Tatau ona Suia
“O le mulimuli ia Iesu Keriso o lona uiga o le suia o o tatou natura e ala i le Togiola a Iesu Keriso. Ua na o le pau lena o le ala e mafai ai ona tatou atiae i luga o Lana faavae mautinoa ma ia tu mausali ai i taimi o afa o faaosoosoga ma tofotofoga o loo i luma atu.
“Ina ia mafai ona oo i lenei suiga, e tatau ona avea i tatou o se tamaitiiti—o se tamaitiiti laitiiti.
“Mo nisi, o le a le faigofie ona taliaina lenei mea. O le toatele o i tatou e fia malolosi. Atonu tatou te vaai atu i le avea faapei o se tamaitiiti o le vaivai lea. Ae o le avea e faapei o se tamaitiiti e le o le faatamaitiiti.
“O le avea lea faapei o le Faaola, o lē sa tatalo i Lona Tama mo le malosi ia mafai ai ona faia le finagalo o Lona Tama ma togiola mo agasala a fanau uma a Lona Tama ona faia ai lea. E tatau ona suia o tatou natura ia avea ai faapei o se tamaitiiti e maua ai le malosi e tatau ona tatou maua e tu mausali ai i taimi o faigata.
“O lenei suiga o le a tatou agavaa ai e olioli i meaalofa e auala mai i le Agaga Paia. O le mauaina o le mafutaga a le Agaga o le a faamafanafana, taiala, ma faamalosia ai i tatou.”
Peresitene Henry B. Eyring, Facebook, 14 Iuni, 2022, facebook.com/henry.b.eyring.
I Aso Faigata, Mafaufau i Ketesemane
“Aua lava ne’i galo ia Ketesemane. Afai o e i ai se aso faigata—ma atonu o le a i ai—nofo i lalo mo sina taimi ma mafaufau i Ketesemane. Mafaufau i le Faaola ma mea sa Ia naunau e fai mo oe ma au. Ou te folafola atu a outou faia lena mea, o le a aveesea a outou avega, ma o le a outou lagonaina le uunaiga ma le mana o le Alii o Iesu Keriso i lou olaga. Ua Ia folafola mai e fesoasoani ia te oe.”
Peresitene M. Russell Ballard (1928--2023), Facebook, 3 Me, 2023, facebook.com/mrussell.ballard.
E Mafai Ona Tatou Toe Tutu i Luga
“O se vitio lenei o le tama teine a le afafine o lo’u afafine o loo aoao e savali. O i tatou sa tatou i ai i lona tulaga sa tautevateva ma pauu i isi taimi ae tatou te lei iloaina atoa foi ni mea.
“Peitai, mo le toatele o i tatou, ina ua tatou pauu, sa i ai iina ni matua alolofa e uunaia i tatou e aoao pea ona sa latou mananao ia tatou tuputupu ae ma avea ma tagata latou te iloa e mafai ona avea ai i tatou. I lea lava ala e tasi, ua silafia e lo tatou Tama oi le Lagi alofa o le a sili atu ona tatou toilalo nai lo le faatasi.
“O a tatou mea sese ma faaletonu o le a mafua ai ona tatou salamo pe tiga. O se vaega lenei o lo tatou aafiaga i le olaga nei—e masani lava o taunuuga o a tatou filifiliga. Ae afai tatou te le tuu atu ia faalotovaivaia i tatou e o tatou vaivaiga, o nei mea sese e mafai ona avea ma se faiaoga maoae. O le le ola e tusa ai ma le vaega sili o i tatou lava e le o se faailoga o le faaletonu—o se faailoga o le avea ma se vaega o le aiga o tagata. O le toilalo o le tau lea e tatau ona tatou totogiina ina ia lelei atili ai.
“Ioe, o le a tatou faia ni mea sese. Ae a tatou pauu, e mafai ona tatou toe tutu i luga, aua ua tatou iloa o loo i ai le Atua iina e fesoasoani ia i tatou, i soo se mea ma soo se taimi e ono tupu ai. O Ia o lo tatou faufautua, lo tatou faiaoga, lo tatou faamalologa, lo tatou malosi, lo tatou Faaola.
“O lea, po o fea lava o e i ai i le olaga, aua le fiu. Aua nei mou atu le faamoemoe! Ma ia mautinoa, e le tuulafoaiina lava oe. O loo faatasi le Atua ma oe. O Iesu Keriso o lou malosiaga lea. Sa ou aoaoina i lo’u olaga e tele ni amataga fou, e oo lava i amataga fou i aso taitasi. O le talalelei a Iesu Keriso, o le taulaga a Iesu Keriso, ma lo tatou naunautaiga e o atu i le ala o le salamo ma le faamagaloga e tatala ai faitotoa i nei amataga fou.
“Ona o le Togiola a Iesu Keriso, o a tatou mea sese o le a fesoasoani ia i tatou e aoao ma tuputupu ae ai i ni ituaiga sili atu o i tatou lava.”
Elder Dieter F. Uchtdorf, Facebook, 27 Fep., 2023, facebook.com/dieterf.uchtdorf.
E Agavaa Iesu Keriso mo Lo Tatou Maofa ma le Lotofaafetai e Faavavau
“I le avea ai ma se so’o o Iesu Keriso, ou te tuu atu la’u molimau e uiga ia te Ia. O Ia o lo’u Alii ma le Faaola. Ua Ia faatoilaloina le agasala ma le oti. E ala mai ia te Ia, e mafai ai e i tatou taitoatasi ona faia lea lava mea e tasi.
“O lagona o le lotofaafetai mo le Faaola na lofituina ai au i le asō a o tatou mafaufau i Lana taulaga i ni nofoaga faapitoa se lua. Sa matou asiasi atu i le Tuugamau Togalaau—o se tuugamau anamua e faatusatusa i le nofoaga semanu e faataatia ai le tino o Keriso ina ua mavae Lona faasatauroga.
“Sa matou asiasi atu foi i le eria sa manatu nisi o le Faatoaga o Ketesemane. A o matou savavali i totonu o laau olive ua faitau seneturi le matutua, sa matou faalogologo i fuaiupu o mau o loo faamatala mai ai le taulaga paia a le Faaola mo i tatou i le faatoaga ma luga o le satauro.
“O le aafiaga tiga a Iesu Keriso i le Faatoaga o Ketesemane ma luga o le satauro e manaomia ai lo tatou faaaloalo atoatoa ma le migao uma. E faapena foi, o mea matagofie na tutupu i le aso lona tolu ina ua mavae Lona faasatauroga e tatau ona i ai se nofoaga o le maofa ma le lotofaafetai e faavavau i totonu o o tatou loto ma mafaufau.
“I le avea ai ma se soo o Keriso, ua faamanuiaina a’u e folafola atu la’u molimau o loo soifua o Ia!
“O upu o le viiga ‘Ua Toetu o Ia’ ua oo mai i lou mafaufau:
“Ua toe tu o Ia! Ua toe tu mai le Alii!
“Ia alalaga ma fiafia.
“Mai i lona tuugamau,
“Ia tatou fiafia uma!
“Ua toe ola i tatou,
“Ona o Iesu toe tu.’”
Elder Dieter F. Uchtdorf, Facebook, 23 Ape., 2023, facebook.com/dieterf.uchtdorf.
Mafaufau i le Faatusa o le Tatauga o le Suauu
“O le ma asiasiga talu ai nei i Ketesemane na mafua ai ona ou mafaufau loloto i le taulaga a le Faaola mo i tatou taitoatasi. Atonu ua uma ona e iloa i le faaEperu, o le ‘kete’ o lona uiga o le ‘tatau’ ma le ‘semane’ o lona uiga o le ‘suauu.’ O Ketesemane o le nofoaga moni lava lea o le tatauina o le suauu.
“O lenei faamatalaga na matuai moni lava ia te au a o ou maua le avanoa e molimauina ai ma faagaoioia se fale tatau olive anamua i le Nofoaga Autu o le BYU i Ierusalema.
“I le taimi o le soifuaga o le Faaola, o le suauu na faia e ala i le faataavale muamua o se maa tele i luga o olive. Ona oomi lea o olive pala i utupoto mamafa e maua ai se suauu lelei. Ina ia mautinoa ua tatau mataua uma o le suauu, e tuu ni maa lapopoa i luga o utupoto, ma oomi ai mea na totoe.
“Mafaufau i le faatusa o lenei faagasologa a o e mafaufau i le aafiaga o Iesu Keriso i Ketesemane, lea na ‘sau ai le toto mai pu afu uma’ (Mosaea 3:7) a o puapuagatia le Faaola i ala e le mafaatusalia a o Ia tootuli i le tatalo malosi ma ofoina atu o Ia lava o se togiola mo a tatou agasala.
“Mai le alofa atoatoa, na Ia tuuina atu ai mea uma ina ia mafai ai ona tatou maua mea uma. O Lana taulaga faalelagi ua faamanatu mai ai ia i tatou le aitalafu aoao o le lotofaafetai tatou te nofoaitalafu ai ia Keriso mo Lana meaalofa paia.”
Elder Dieter F. Uchtdorf, Facebook, 24 Ape., 2023, facebook.com/dieterf.uchtdorf.
E Le Manaomia Ona E Faatali
“Atonu ua leva ona e toilalo i sini ma tautinoga na e setiina mo le tausaga fou. Faamolemole ia manatua, e le manaomia ona e faatali seia oo i le aso 1 o Ianuari [o le tausaga a sau] e toe taumafai ai. Ona o Iesu Keriso, ua mafai ai ona e toe amata i le asō ma aso uma.
“E maeu lo’u faafetai mo le meaalofa o le salamo ua tuuina mai ia i tatou e ala i le Togiola a Iesu Keriso.
“O le faasologa o le avea ma soo e faigofie ma tuusa’o: faatino le faatuatua i le Faaola, salamo, maua feagaiga ma sauniga e tatau ai, suiga, taumafai ia faatumauina pea le faamagaloina o agasala, ma fetaomi atu i luma ma le faamaoni i luga o le ala o feagaiga.”
Elder David A. Bednar, Facebook, 19 Ian., 2023, facebook.com/davida.bednar.
Vaai Muamua i lo Tatou Togiola
“O le salamo e manaomia ai le Togiola. O le liliu ese mai le leaga e le aumaia ai le faamalologa faaleagaga e aunoa ma le liliu atu ia te Ia.
“O Ezra Taft Benson (1899–1994), peresitene o le Ekalesia a Iesu Keriso o le Au Paia o Aso e Gata Ai, na aoao mai o le salamo e moni lava e maua ai suiga i uiga ma amioga, ae o le na o le suia o uiga faaalia ma amioga e le o le salamo lea.
“Na saunoa Peresitene Benson, ‘O le faatuatua i le Alii o Iesu Keriso o le faavae lea e tatau ona fausia ai i luga le salamo faamaoni ma le anoa. Afai tatou te saili moni e lafoai ese le agasala, e tatau ona tatou vaai muamua atu ia te Ia o lē o le Mataisau o lo tatou faaolataga.’”
Elder David A. Bednar, Facebook, 8 Set., 2023, facebook.com/davida.bednar,
O le “Faamoemoe” ma le “Loto” e Fesootai i le Salamo
“O loo a’oa’o mai le Tusi a Mamona: O se Tasi Molimau ia Iesu Keriso, “Ia talitonu e ao ina outou salamo ia outou agasala ma lafoai i ai, ma outou faamaualalo outou lava i luma o le Atua; ma ole atu ma le faamaoni o le loto ia faamagaloina e ia outou; ma o lenei, afai tou te talitonu i nei mea uma, vaai ia outou faia’ (Mosaea 4:10).
“Mai lenei mau ma isi, ua tatou aoao ai o upu o le ‘faamoemoe’ ma le ‘loto’ e fesootai i le faagasologa o le salamo. A o tatou faalagolago atu ma liliu atu i le Alii, e tatau ona tatou faamaoni ia i tatou lava. Ma e tatau ona i ai lo tatou faamoemoega moni ma ia faamaoni ia te Ia o lē ana le faamagaloga o loo tatou sailia. O le ta’uta’u atu ma le faamaoni i le Atua, ma pe a tatau ai i taitai perisitua, e tatau ona atoatoa ma mae’a.”
Elder David A. Bednar, Facebook, 9 Set., 2023, facebook.com/davida.bednar.
E Mafai Ona Tatou Atoatoa ia Keriso
“I le taimi o le ma asiasiga i le Eria o le Pasefika, sa ma faaaluina ai ma Kathy se taimi i le setete o Ausetalia o Tasmania. A o i ai iina, sa ma asiasi atu i se kolone tuai o faasalaga sa i ai i Port Arthur, o se nuu sa masani ona nonofo ai pagota i le Seneturi lona 19 (o le toatele e mai le U.K.). O le asō, o Port Arthur o se nofoaga talafaasolopito e toatele tagata e asiasi i ai. O le lotoa tuai o le falepuipui sa i ai se vaaiga o togalaau teuteuina lelei, vaomatua lauusiusi, ma nisi o faatufugaga faagaeetia.
“O ituaiga eseese o faasalaga ma toefatua’iga sa taumafaia i Port Arthur faatasi ai ma se manuia tele pe itiiti ifo i le toeitiiti atoa le 50 tausaga o lona talafaasolopito. I se faatusatusaga, sa le mafai ona taofia lo’u mafaufau i le aapa atu e le iu ma le atoatoa o le Togiola a Iesu Keriso. O le alofa tunoa o Keriso e mafai ona suia i tatou. Faatasi ai ma Lana fesoasoani, e mafai ai ona tatou faatoilaloina soo se faafitauli po o se mea sese. E le faapea e tatau ona avea i tatou ma pagota o le oti po o le agasala—ae, e mafai ona faaatoatoaina i tatou ia te Ia.”
Elder D. Todd Christofferson, Facebook, 11 Iuni, 2023, facebook.com/dtodd.christofferson,
Ua Tuuina Atu le Taulaga Togiola a Iesu Keriso i Tagata Uma
“Ou te molimau atu o Iesu Keriso o loo soifua ma o Lona alofa atoatoa, na faaalia e ala i Lana taulaga togiola, ua tuuina atu ia i latou uma o ē mananao e savavali faatasi ma Ia, ma olioli ai i Lona filemu i lenei lalolagi ma i le lalolagi a sau.”
Elder Ulisses Soares, Facebook, 8 Ape., 2023, facebook.com/soares.u.
Ua Ofo Mai e Iesu Keriso le Mapusaga i a Tatou Avega
“Tatou te oo uma lava i avega o le olaga faaletino. Tatou te oo i ma’i, maliu, lototiga, le fiafia, ma faigata—ae a o tatou faaogatusa o tatou loto ma mafaufau ma Iesu Keriso, o le a Ia lagolagoina i tatou. O le a Ia ofoina atu le mapusaga.”
Peresitene Camille N. Johnson, Facebook, 2 Iuni, 2023, facebook.com/RSGeneralPresident.
E Leai Se Tasi e Le Oo i ai le Mana Togiola o Keriso
“O se tasi o tala faatusi paia ou te fiafia lava i ai o le fafine i le vaieli. I le Ioane 4:5–30, tatou te faitau ai i le tala ia Iesu o loo tuuina mai ai le uluai tautinoga faalauaitele o Lona tulaga faaMesia i se fafine Samaria o le … sa ola i le agasala. Ae na afio atu Iesu i se vaieli i Samaria ma feiloai i lenei fafine, ma le iloaina o mea uma e uiga ia te ia, ma tautino atu pea Lona tulaga faaMesia ia te ia, ma valaaulia o ia e inu mai Lana vai ola. Sa i ai se aafiaga patino o lenei fafine ma le Faaola ma avea ai o se molimau ia te Ia a o ia tamoe atu i le aai, ma ta’u atu i tagata uma o le a faalogo e o mai ma vaai i le Keriso, lea e toatele na latou faia.
“O le a afio mai foi le Faaola ia i tatou, ma le iloaina o mea uma e uiga ia i tatou. O nisi taimi tatou te manatu ai e tatau ona tatou ‘agavaa’ e tatalo pe maua le alofa o le Faaola. Ae o lenei tala ua faaalia ai e naunau o Ia e afio mai ia i tatou i tagata o tatou i ai. E finagalo o Ia ia tatou maua se aafiaga patino ma Ia ma lagona lona alofa, aua o lena alofa o se malosiaga mamana lea e mafai ona suia ai o tatou loto ina ia mafai ai ona tatou liliu atu ma le atoatoa ia te Ia. E mafai ona avea i tatou ma molimau o Lona mana liua i o tatou olaga ma valaaulia isi e ‘o mai ma vaai’ i le Keriso, e pei lava ona sa faia e le fafine Samaria.
“Ou te manatu o le mea moni o loo i ai atavali i malumalu o loo faaalia ai le tala i le fafine i le vaieli e matuai aoga lava. Ona o le Faaola ma Lana taulaga togiola, e leai se tasi e le oo i ai Lona mana togiola. E le tatau ona tatou tuuina ni tapulaa po o ai tatou te manatu e mafai ona Ia laveaiina pe o ai foi e tatau ona tatou aapa atu i ai i Lona suafa. O le isi taimi e te vaai ai i se atavali o le fafine i le vaieli, manatua ona o Ia, o loo i ai le faamoemoe mo i tatou uma.”
Sister J. Anette Dennis, Facebook, 28 Fep. 2023, facebook.com/RS1stCounselor.
E Masani ona Tuuina Mai e Iesu Keriso le Toomaga e Ala i Isi
“Ua tofu uma i tatou ma aafiaga faigata o le olaga pe o feagai foi ma aafiaga faigata o le olaga. Atonu e te mafaufau pe mafai faapefea e Iesu Keriso ona tuuina atu le mapusaga i ou tulaga patino.
“… E moni lava e tuuina mai e Iesu Keriso le mapusaga i o tatou agaga. O Lana taulaga togiola e aofia ai ma faatumulia ai vaega uma o o tatou olaga. Na te silafia auiliiliga o o tatou lagona, atugaluga, lototiga, ma fiafia. Ma Na te silafia le ala e fesoasoani lelei ai ma faamaloloina.
“E matagofie, e masani ona Ia tuuina mai lena mapusaga e ala mai i le tasi ma le isi! O le mafuaaga lena ua Ia poloaiina ai i tatou e tausi e le tasi le isi, ia ‘faanoanoa faatasi ma e faanoanoa’ ma ‘faamafanafana atu ia te i latou o e e manaomia le faamafanafanaga’ (Mosaea 18:9).
“Pe a tatou fai atu ‘Aualofa,’ matou te faamoemoe o le a mafai ona outou lagonaina ma vaai atu i le Faaola i le ‘Alofa”—aua i le Aualofa tatou te faasino atu ai le tasi i le isi i le Faaola, ofo atu Lona alofa, ma naunau e avea ma Ona aao i le aumaia o le mapusaga faaleagaga ma faaletino ua matua manaomia i fanau uma a le Atua.”
Sister Kristin M. Yee, Facebook, 2 Ape., 2023, facebook.com/RS2ndCounselor.
Taulai Atili Atu i le Tagata Laveai Nai lo le Laveaiina
“Ina ua mavae le toeitiiti tolu augatupulaga o nonofo i nuu eseese, sa toe avea sa Nifae ma nuu e tasi. O le nuu o Limae, o le nuu o Alema, ma le nuu o Mosaea—e oo lava i le nuu o Saraemila. O le mea muamua sa latou faia i le taimi lava na faapotopoto faatasi ai i latou o le faasoa atu lea o a latou tala o le laveaiina. E patino lava, o le aoao atu ma le molimau atu i le Laveai Lava Ia, o Iesu Keriso. Ua tatou aoao mai i nei tala o le laveaiina e le o taimi uma e vave ai, ae o le agalelei o le Atua! (tagai Mosaea 25:10)
“Ou te iloa mai aafiaga pe a ou liliu atu ia Iesu Keriso, e vave lava ona avea o Ia ma se vaega o la’u tala. O le mea lea, o la’u taulaiga e tatau ona itiiti ifo i le auala e laveaiina ai a’u mai luitau o o tatou aso ma isi mea e uiga i le Laveai lava Ia. E vave lava ona lelei le Atua! O le mea lea, e le gata ina mafai ona ou faalagolago i Lona finagalo ae faapea foi i Lana taimi.”
Sister Amy A. Wright, Facebook, 14 Mat, 2023, facebook.com/Primary1stCounselor.
O le Salamo o se Fo’i Mai
“O le salamo e le na o se faatinoga o le taofia mai le faia o se mea sese ae o se liliuga, po o le toe foi mai, i mea e lelei, amiotonu, lelei, ma ogatusa ma aoaoga a Iesu Keriso.
“O loo ta’ua i le Bible Dictionary, “O le oo mai o le salamo o lona uiga o se liua o le agaga ma le loto i le Atua, [atoa ai ma] le lafoaia o agasala tatou te ono solia ona o lo tatou natura.”
Tuafafine Amy A. Wright, Facebook, 29 Ape., 2023, facebook.com/Primary1stCounselor.
O Mea Matuitui e Mafai ona Avea o se Faatusa o le Mamalu o le Atua
“Sa ou maua le avanoa matagofie e malaga faatasi ai ma Sister Becky Craven talu ai nei ma faatasi ai ma le Au Paia i le Malo o Cabo Verde, o se atumotu ma le atunuu e i le va o Aferika ma Potukale. Ina ua maea le feiloaiga ma le Tamaitai Sili o Cabo Verde, sa matou savavali atu i le togalaau o le lotoa o le maota o le peresitene ma oo mai i luga o lenei faaaliga ofoofogia o fugalaau. O le matou faafeao Cabo Verdean na faailoa maia i la matou vaega o lenei laau sa masani ona ta‘ua i le motu o le ‘Pale a Keriso’. Oka se faatusa ina a mataina. O poga‘i matuitui o lenei laau o le pale tuitui ua faatusa i le pale tuitui ua tuu i luga o le ao o le Faaola i se taumafaiga e tauemu ia te Ia ao le i oo atu i lona Faasatauroga i Kalevaria. Ae e pei lava o mea uma, e mafai e Iesu Keriso ona liua mea matuitui i le mamalu. E pei lava o le tumutumu o poga‘i vaotuitui o se faaaliga mamalu o fuga lanu mumu mananaia.
“Ua aoao mai Iesu Keriso ia i tatou i le Tusi a Mamona, ‘Ma na auina mai a’u e lo’u Tama, ina ia sii ae a’u i luga o le satauro; ma a mavae ona sii ae o a’u i luga o le satauro, ina ia mafai ona ou aumai o tagata uma ia te au’ (3 Nifae 27:14).
“O le Faasatauroga o le Faaola, o lona uiga i Ona fili o le faamuta lea o Ana aoaoga, i Lana galuega, ma i Ona soo, o se vaega o Lana Togiola e faavavau. O le tau tele na totogi e Iesu Keriso mo a tatou agasala ina ia mafai ai ona faapaleina i tatou i le ola e faavavau pe afai tatou te o mai ia te Ia.
“Na folafola mai foi e le Perofeta o Iosefa Samita, “O lenei, ina ua uma ona faia molimau e tele e uiga ia te ia, o le molimau tupito mulimuli lenei i mau uma lava, mā te faia ia te ia: O loo soifua o ia!” (Mataupu Faavae ma Feagaiga 76:22).
“Uso e ma tuafafine, ou te faaopoopo atu la’u molimau i le molimau a se perofeta pele a le Atua. E ala i le Toetu, o loo soifua Iesu Keriso! I le Eseta ma aso uma, o loo soifua o Ia ma valaauina i tatou e o mai ma noatia ia te Ia ina ia mafai ai foi ona suia i tatou. Ina ia mafai e mea matuitui o o tatou olaga, e ala i Lana Togiola, ona avea ma faatusa o Lona mamalu.”
Sister Tracy Y. Browning, Facebook, 9 Ape., 2023, ,facebook.com/Primary2ndCounselor.