Taialaina ma le Saogalemu i Le Mea e Tatau Ona Tatou I Ai

Saunia e Elder Benjamin M. Z. Tai

O Le Fitugafulu

O le a fesoasoani pea lava pea le Faaola ia i tatou i la tatou malaga i ni auala ofoofogia.

Ina ua 12 o’u tausaga, sa siitia atu lo’u aiga mai le mafanafana o Hong Kong i se nofoaga malulu, o taumalulu e le masani ai. E lei umi, ae valaaulia au i la’u savaliga sopo muamua o le taumalulu ma alii talavou o la’u uarota.

I le aso o le matou savaliga sopo, sa faia ou ofu mafanafana e pei ona ou iloa ai. A o matou agai atu i luga o le alasopo fepiopioa’i i le mauga, sa ou fiafia lava e vaai atu i le toulu o kiona ma ufitia ai le eleele. E ui i lea, sa le talafeagai o’u ofu mo lea nofoaga ma le tau, ma sa faigata ia te a’u ona o faatasi ma la’u vaega. Sa ou fai atu ia i latou e muamua ma o le a ou auai faatasi ma i latou sa ou manatu o loo mulimuli mai ia i matou.

A o ou faaauau pea i la’u lava saoasaoa, sa oo ina susū pala o’u seevae ma lavalava ma oo ina pepē o’u lima, vae, ma foliga. Ona amata lea ona matua malosi lava le toulu o le kiona ma sa le mafai ai ona ou toe iloa le ala. Ina ua mavae sina taimi o ou fesēa’i solo, sa ou iloa ai ua ou leiloa, tuuatoatasi, ma lē mautinoa pe na iloa e se tasi ua ou leiloa.

E i ai taimi i le malaga o le olaga, o le a tatou lagona ai le le saunia, leiloloa, po o le tuulafoaiina. Atonu e alu ese o tatou lagona o le taitaiga ma le vaaiga o le ala i o tatou luma atu. Atonu e foliga mai o le faigata tele o lo tatou taumafai e agai i luma, o le mamao ese foi lea mai lo tatou taunuuga e avea ai na ni ō. E mafai ona tulai mai le lē fiafia, ma o le faaosoosoga ia fiu e avea ma mea faatosina.

O le mea e lelei ai, ua i ai i le Faaola o Iesu Keriso le mana e taitai ai o tatou tulagavae, sii ae i tatou pe a tatou tautevateva (tagai i le Salamo 37:23–24), ma aumai ia i tatou le malologa (tagai i le Mataio 11:28), faamalologa (tagai i le Isaia 53:5; Alema 15:8; Mataupu Faavae ma Feagaiga 42:48), lototele (tagai i le Mataupu Faavae ma Feagaiga 121:45), ma le filemu (tagai i le Mosaea 4:3; Alema 38:8; Mataupu Faavae ma Feagaiga 19:23). “Faalatalata mai ia te au,” na Ia fetalai ai, “ma o le a ou faalatalata atu ai ia te outou; saili mai ia te a’u ma le filiga ma o le a outou maua ai a’u” (Mataupu Faavae ma Feagaiga 88:63). Atonu e le manino i taimi uma le ala vave, ae e mafai ona tatou mulimuli i le Faaola ma le faatuatua e faapea o le a iu ma le matagofie ma le manumalo la tatou malaga ona o le a Ia taialaina i tatou ma le saogalemu i le mea e tatau ona tatou i ai.

E mafai lava ona tatou vaavaai atu ia Iesu Keriso ona o Iesu Keriso o le “ala, ma le upu moni, ma le ola” (Ioane 14: 6).

O Le Ala Sa’o mo La Tatou Malaga

I la matou suesuega o le Tusi a Mamona i lenei tausaga, ua matou mulimuli ia Liae ma lona aiga i la latou malaga i le nuu folafolaina. Mafaufau i mea na onosaia e le aiga o Liae a o i ai i la latou malaga:

tauemuina mo le talitonu ma le mulimuli i perofeta
fesuia’ia o tulaga ua mafanafana ma masani ai mo se togavao e lē mailoa
malaga e aunoa ma se manino i le mamao, taunuuga, po o le umi
matelaina, faanoanoa, ma’i, ma le oti
galuega faigata, o nisi taimi e aunoa ma le malamalama i mafuaaga mo i latou po o le auala e faataunuuina ai
faafitauli, faatuai, fevaevaea’iga, ma le lē fiafia
tulaga faigata mo le tausiaina o aiga talavou

I le aluga o le ala, sa matou maitauina ai foi le ala na fesoasoani ai pea le Alii ia i latou. Sa Ia sauniaina

taitaiga faaperofeta ma faaaliga faaletagata lava ia,
tusitusiga paia o loo i ai faamanuiaga ma feagaiga folafolaina,
faamaumauga o gafa ma talafaasolopito o aiga,
meafaigaluega fou ma metotia e tuuina atu mo o latou manaoga,
faateleina o le gafatia e onosaia ai faigata,
poto ma faatonuga e faataunuu ai galuega e le masani ai,
o le Liahona (o se meafaigaluega e fesoasoani ia i latou e faatautaia la latou malaga), ma le
saogalemu ma le puipuiga mo o latou aiga.

E faapei foi o le aiga o Liae, o a tatou malaga o le a lē aunoa ma luitau ma osigataulaga. O le a faapena foi ona fesoasoani mai pea le Faaola ia i tatou i ni auala ofoofogia. Na aoao mai Nifae, “O le ala sa’o o le talitonu lea ia Keriso … ma lo outou manatu atoa, mafaufau atoa, ma le malosi atoa, ma o outou agaga atoa” (2 Nifae 25:29). Afai tatou te filifili le faatuatua ia Iesu Keriso, talia ma le lotomaualalo Lana afioga, ma maua le lototele e faatino ai, o le a tatou maua le olioli ma faamanuiaga i le lotolotoi o faigata tatou te fetaiai. I le aluga o le ala, e mafai ona tatou maua le lototele e mafai ona tatou ausia ai mea e finagalo o Ia tatou te faia (tagai i le 1 Nifae 3:7).

O nisi nei o auala e fesoasoani ai pea le Faaola ia i tatou.

O Le Tafa o Ata o se Aso Susulu, saunia e Simon Dewey

Na te Tuuina Mai Ia i Tatou Lana Aoaoga Faavae

Ua silafia e Iesu Keriso “le iuga mai le amataga” (Aperaamo 2:8). Sa Ia “fai (foi) le ala ma taitai mai.”¹ O Lana aoaoga faavae, ua lauiloa i tusitusiga paia o le mataupu faavae a Keriso, o le ala lea e tatau ona tatou mulimuli uma ai ina ia laveaiina ma faaolaina ai.

E tatau ona faaauau pea ona tatou faatinoina le faatuatua ia Iesu Keriso, salamo e le aunoa, ia papatisoina, maua le meaalofa o le Agaga Paia, ulu atu i feagaiga, ma taumafai i le mea sili tatou te mafaia e tumau ai. O le taui, ua folafola mai ia i tatou le faamagaloga, faamoemoe, ma le ola e faavavau. (Tagai i le 2 Nifae 31:2–20.)

I se lalolagi o ala eseese ma auala feteenai, ua tuuina mai ai e le mataupu faavae a Keriso le taitaiga manino ma talafeagai lea e mafai ona tatou mulimuli i ai e faatumau ai lo tatou agai atu i le ala sa’o (tagai i le 2 Nifae 31:21).

Na te Aumaia ia i Tatou le Mafanafana

E ala i Lana taulaga togiola, ua silafia ai e le Faaola le lagona o le tuuatoatasi moni ma le tuulafoaiina. Na te silafia lelei foi le ala e aumaia ai ia i tatou le mafanafana. Na Ia fetalai, “Aua le atuatuvale o outou loto” (Ioane 14:1) ma “Ou te le tuua outou o matuaoti: Ou te sau ia te outou” (Ioane 14:18).

Ua folafola mai e le Faaola le meaalofa o le Fesoasoani, o le Agaga Paia lea, ia i latou o e talitonu ia te Ia. Na Ia fetalai o le Fesoasoani, “na te aoao ia te outou i mea uma lava, e faamanatu mai foi e ia ia te outou i mea uma” (Ioane 14:26).

Na te Saunia le Afioga a le Atua mo i Tatou

E ala mai i le Toefuataiga o le talalelei a Iesu Keriso i o tatou aso, ua tuuina mai ai e le Alii ia i tatou tusitusiga paia anamua ma aso e gata ai, lea o loo i ai le afioga a le Atua. Na aoao mai Nifae e faapea “ai se e faalogo i le afioga a le Atua, ma pipiimau i ai, … e lē fano lava i latou” (1 Nifae 15:24).

O le taumamafa fiafia i aso uma i le afioga a le Atua e aumaia ai le puipuiga ma taitai atu ai i tatou ia iloa atili le alofa o le Atua. O Lana upu e faamalamalamaina ai lo tatou ala (tagai i le Salamo 119:105) ma “o le a ta’u mai ai ia te [i tatou] mea uma e tatau ona tatou faia” (2 Nifae 32:3).

Na te Taialaina i Tatou e ala i Ana Auauna—o Perofeta ma Aposetolo

Ua valaauina e Iesu Keriso perofeta ma aposetolo e fesoasoani ia i tatou. O a latou fautuaga ma aoaoga e mo i tatou ma mo o tatou aso. Afai e te iloa ua e leiloa pe le mautonu i lau malaga, atonu o le a aoga ia te oe le mafaufau loloto i fesili nei e tolu:

Na faapefea ona saunia a’u e le Alii e ala i upu a perofeta ma aposetolo mo tofotofoga ua ou oo i ai?
O a mea o loo valaaulia ai a’u e perofeta ma aposetolo e fai i le asō e saunia ai mo luitau o loo i luma atu?
O le a la’u mea o fai nei e faatino ai valaaulia faaperofeta?

O le mafaufau loloto i nei fesili, e mafai ai ona tatou iloa le taua o le taitaiga a perofeta ma aposetolo. E mafai ona tatou faalogo atili i le siufofoga o le Alii ma maitau le ala e fesoasoani mai ai pea o Ia ia i tatou. Afai tatou te filifili, e mafai ona tatou faalogo i perofeta ma aposetolo ma maua le taitaiga, manuia, ma le puipuiga i luga o le ala lea e tau atu i le Tama Faalelagi ma Lona Alo, o Iesu Keriso.

O Elder Tai i le vaega o Sierra Nevada o Kalefonia pe tusa o le 1988. O le tala na ia faasoa mai na tupu i luga o le Mauga o Baden Powell i Mauga o San Gabriel o Kalefonia i le 1984.

Ata pu’e mai faaaloaloga a le tusitala

O Le Faatuatua e Agai Ai i Luma

O le leiloa, maalili, ma le tuuatoatasi i luga o lena mauga kiona i le tele o tausaga ua mavae, sa oo ai ina ou atuatuvale. I le le iloa ai po o le a se isi mea e fai, sa ou tootuli ai i le kiona fou na toulu ma tatalo i lo’u Tama Faalelagi mo se fesoasoani. Sa ou faasoa atu lo’u faafitauli ma lo’u fefe ia te Ia ma aioi atu ina ia maua ma laveaiina.

Ina ua ou tu a’e mai la’u tatalo, o le kiona na siomia a’u ua faaitiitia, ma sa faatumulia laau i se filemu matagofie ma toafilemu. Sa faalavelaveina lenei toafimalie ina ua ou faalogo atu i le gasē mai o le pupuvao na lata ane. Na tulioso mai ai ni tama matutua se toalua. Sa la’ua taunuu i le tumutumu, ma nai lo le mulimuli i le alasopo, sa tonu ia i la’ua e faasee mai i lalo o le mauga. Mai nofoaga uma, sa la’ua faasee tonu mai lava i le mea sa ou iai!

Ina ua la fesili mai ia te au po o le a la’u mea o fai iina, sa ou fai atu ia i la’ua sa ou leiloa. Sa la valaaulia a’u ou te auai faatasi ma i laua, ma sa matou faasee faatasi atu ma le saogalemu i lalo o le alasopo i le pito i lalo o le mauga. Na iu lava ina matou toe faatasia ma le matou vaega atoa.

A o tatou agai i luma i a tatou malaga patino ma le faatuatua, tuuto, ma le tumau, tau ina ia tatou iloa le ala e savavali faatasi ai le Faaola ma i tatou ma fesoasoani malosi ia i tatou. O Iesu Keriso o le ala, le upumoni, ma le ola. Tau ina ia aumaia e lo tatou faatuatua ia te Ia le filemu i o tatou mafaufau ma le olioli i la tatou malaga.