Atatusi o le Faatuatua

Upu o le Upumoni

Saunia e Weiling Chen Canfield (Winnie), Taiuani

Sa tele ni a’u fesili, ae sa fesoasoani la’u uo ma le Ekalesia ia te au e saili tali.

Ata pu’e mai faaaloaloga a le tusitala

I le tuputupu ae ai i se aganuu e le Kerisiano i Taiuani, ou te lei ola ae o se tagata lotu. Sa ou talitonu i le Atua, ae sa ou le iloa se mea e uiga ia Iesu Keriso. O la’u tapuaiga o la’u galuega ma le olaga faaagafesootai pisi sa o faatasi ai. Na aofia ai i lena mea le tele o le inupia ma le ulaula. Sa avea foi au ma se tagata e inu tele i le kofe ma le lauti. O vaega uma nei o la matou aganuu faapisinisi.

Sa amata ona ou masani i Le Ekalesia a Iesu Keriso o le Au Paia o Aso e Gata Ai e ala i la’u uo o le a ou faaipoipo i ai ma lona aiga. O Chase o se Amerika. Sa ola ae o ia i le Ekalesia ma auauna atu i se misiona, ae sa lei toaga o ia i lena taimi. Peitai, o lona atalii matua, sa sauni e auauna atu i se misiona, ma sa lagolagoina e Chase lana filifiliga.

I le taimi o le vavao o le KOVITI-19, sa matou auai i le sauniga faamanatuga i le fale o matua o Chase, ma matamata i faasalalauga tuusao mai lo latou falelotu o le ekalesia. Ina ua uma lauga, sa faamanuia ma tufatufa e atalii e toalua o Chase le falaoa ma le vai o le faamanatuga.

Sa tele ni au fesili sa i ai. Sa taliina ma le onosai e la’u uo. O ai Iesu? O le a lenei lagona i lo’u loto i taimi taitasi matou te potopoto ai e fai sauniga lotu? O se lagona ou te lei lagonaina muamua lava. O le a le mea e faatusa i ai le areto ma le vai o le faamanatuga? Aisea na maligi ai loimata ina ua ou tagofia le faamanatuga? O le a lenei filemu sa ou lagonaina?

I se tasi po sa ou maua ai se uepisaite i la’u lava gagana o loo faamatala ai Iesu ma faamatalaina ai Lona soifuaga. O le aso na sosoo ai, sa ou ta’u atu ai i le tina o la’u uo e faapea, ua ou malamalama ia Iesu ma ua ou talitonu ia te Ia.

I se tasi Aso Sa na sau ai le epikopo i le fale ona o le a faauuina e le atalii matua o Chase le tofi ositaulaga o lona uso laititi. Ina ua tuu e le atalii matua ona lima i luga o le ulu o lona uso, sa le mafai ona taofi lo’u tagi. Sa ou lagonaina se lagona ootia tele i lo’u loto, sa le mafai ona taofi o’u loimata. Mulimuli ane, sa faamatala mai e la’u uo sa ou lagonaina le Agaga Paia ma sa ia lagonaina foi.

Sa mafai ona ou iloa o le alofa o la’u uo mo lana ekalesia ua toe foi atu ia te ia. I se isi itu, sa ou iloaina o mea uma sa ou lagonaina sa fesootai ma le Atua ma i se mea moni. Sa ou lagonaina le alofa ou te lei lagonaina lava muamua.

“Sa Ou Valaau Atu i le Atua”

Sa muta le aogā o lo’u visa turisi ma sa tatau ona ou toe foi atu i Taiuani. I le tuuatoatasi ai i masina na sosoo ai, sa ou misia ai le mea sa ou lagonaina. Mo se taimi, sa faatumulia au i le faanoanoa ma le pogisa. O na lagona sa matuai lofituina lava ma sa ou manao ai e lafoai. Ou te lei iloa lelei pe faapefea ona tatalo, ae sa ou valaau atu i le Atua ma ta’u atu ia te Ia mea uma sa ou lagonaina ma mafaufau i ai. Na oo mai se lagona o le filemu—o le lagona lava lea e tasi na ou oo i ai ina ua ou auai i la matou lotu i le fale. Ou te iloa o le Agaga Paia. Sa ia faatoafilemuina au.

Ina ua uma lenei mea, sa auina mai e la’u uo faifeautalai e aoao a’u. Sa ou ta’u atu ia i la’ua ua uma ona ou iloa e moni le talalelei toefuataiina ma sa ou malamalama i lagona o le Agaga Paia. Ae sa ou popole o le a faigata ia te au ona lafoai le ulaula ma inu kofe ma le lauti.

Sa amata ona ou auai i le lotu, faitau le Tusi a Mamona, ma feiloai ma tamaitai faifeautalai e faatolu pe faafa i le vaiaso. Mulimuli ane, na fesoasoani le Agaga Paia ia te au e tuu le ulaula ma le inu kofe ma le lauti.

Sa amata ona vaaia e la’u uo mai lo’u laitiiti, ni suiga ia te a’u i lea vaiaso ma lea vaiaso. Sa ou valaauliaina o ia i a’u fonotaga ma faifeautalai. A o faalogologo o ia, sa ia lagonaina foi le Agaga Paia ma maua ai se molimau. Ina ua faaitiitia aafiaga o le KOVITI-19, sa iu ina toaga la’u uo i le Lotu, i Taiuani. Sa ma faaipoipo, ma sa ia papatisoina a’u. Sa avea a’u ma se tagata fou.

O Sister Weiling Chen Canfield (Winnie) ma tamaitai faifeautalai ma tagata o le uarota o e na aoaoina ma faaaumeaina o ia. “O loo matou talanoa pea i vaiaso uma ma galulue faatasi i lo’u valaauga fou i le Ekalesia i le Aualofa,” o lana tala lea.

Sa fai mai a’u uo ma paaga faipisinisi i le olaga atoa, e aofia ai nisi o tagata e vaaia faletupe ma tagata fai maketi, sa mafai ona latou vaai mai ua ou ese ma sili atu le fiafia. Sa ou valaauliaina i latou i lo’u papatisoga, ma sa latou o mai. Mulimuli ane, sa latou tau mai ia te au sa latou lagonaina se mea latou te lei lagonaina muamua.

Ou te le fefe e ta’u atu i isi mea ua ou iloa ma lagona e uiga ia Iesu Keriso—o le mea ua ou iloa e moni. Ou te iloa e malosi la’u molimau. O isi ua iloaina a’u i lo’u olaga atoa ua vaai i lenei mea. O lo latou faaaloalo mo lo’u faatuatuaga ua taofia ai foi i latou mai le ulaula ma le inupia i le taimi o fonotaga faapisinisi ma taumafataga o le afiafi. O se mea tulaga ese lenei i la matou aganuu faapisinisi.

O Sister Canfield ma Jin Hua, o se uo i le olaga atoa sa fiafia i le Ekalesia e ala i le liua o Sister Canfield.

Ou te le fefe e vaai, faalogo, ma lagona e isi la’u molimau. Ou te talitonu e toatele tagata e le iloa pe faapefea ona maua le Atua ma Iesu Keriso o le a lagonaina ia lava mea e tasi na ou lagonaina pe a latou faalogo i upu o le upumoni. O le a ou saunia lava e faasoa atu upu na suia ai lo’u olaga.