“E Mafai Faapefea e le Avea ma se Faatupu Filemu ona Fesoasoani ia te A’u e Faapotopoto Isaraelu?,” Liahona, Mat. 2024.
Sau, Mulimuli Mai ia te A’u
E Mafai Faapefea e le Avea ma se Faatupu Filemu ona Fesoasoani ia te A’u e Faapotopoto Isaraelu?
Na vaai Nifae o tagata i aso e gata ai o le a fefinauai le tasi ma le isi (tagai i le 2 Nifae 28:3–4, 20), ae o finauga e le o le ala lea a le Alii. O le mea moni, o le faapotopotoina o Isaraelu e manaomia ona tatou maua se auala e “maualuga atu ma le paia”1 o fegalegaleaiga ma isi.
Na aoao mai Peresitene Russell M. Nelson: “Afai e te faamaoni e uiga i lou fesoasoani e faapotopoto Isaraelu ma le fauina o sootaga o le a tumau e oo i le faavavau, o le taimi lenei e lafoa’iese ai mea inosia. Onei o le taimi lea ia faamuta ai lou tausiusi pea a lē o lau ala ia e leai. Onei o le taimi lea ia taofi ai le faia o mea e faaeteetegatā ai isi ona o le popole i e ita. Onei o le taimi lea e tatanu ai au auupega o le taua. Afai ua tumu lau utuvāgana o upu ma tala i mea faatiga ma tu’uaiga, o nei o le taimi lea e lafoa’ia ai. O le a e tula’i a’e o se alii po o se tamaitai malosi o Keriso.”2
E alolofa le Tama Faalelagi ma Iesu Keriso i fanau uma a le Atua e tusa lava po o a o latou eseesega. E taumafai Satani e faaaoga o tatou eseesega e vaeluaina ai i tatou, ae e ala i le filifilia o le filemu nai lo le fefinauai, tatou te fatuina ai se siosiomaga e faafiafia tagata lea e aumaia ai tagata i le talalelei toefuataiina a le Alii.
Mafaufau i tulaga nei ma mafaufau loloto i auala e mafai ona e tali atu ai ma le alofa:
Afai e te lagona le naunau e uiga i se vaaiga faaupufai, e mafai faapefea ona e maua se malamalama sili atu i au talanoaga ma i latou e i ai se vaaiga faafeagai?
Afai e le o sologa lelei lou aiga, e mafai faapefea ona e aumaia se siosiomaga filemu o le alofa ma le taliaina ia i latou?
Afai e te lagona le le fiafia i se mea e te faitauina i luga o ala o faasalalauga faaagafesootai, o le a se mea e mafai ona e faia e aloese ai mai le oo atu i se finauga?