“Ua Matou Tautalatala e Uiga ia Keriso” Liahona, Nov. 2024.
Mo Mātua
Ua Matou Tautalatala e Uiga ia Keriso
Mātua Pēlē,
Na aoao e Nifae lona nuu i le taua tele o le faamuamua o le Alii i o tatou olaga. Na ia tusia, “Ma ua matou tautalatala e uiga ia Keriso, ua matou olioli ia Keriso, ua matou tala’i atu e uiga ia Keriso, ua matou vavalo e uiga ia Keriso, ma ua matou tusitusi foi e tusa ma a matou valoaga, ina ia mafai ona iloa e a matou fanau po o le a le punavai e mafai ona latou tepa taula’i i ai mo se faamagaloga o a latou agasala” (2 Nifae 25:26). E mafai ona e iloiloina faatasi ma lou aiga ia tusiga nei e faasino atu ai i latou ma isi e te alofa i ai i le talalelei a Iesu Keriso, i Lana taitaiga, ma i mataupu faavae atamai lea o le a fesoasoani ia i tatou e saili atu ai ia te Ia i se lalolagi o faigata, i ona po nei.
Talanoaga o le Talalelei
O Le Talalelei a Iesu Keriso e mo Tagata Uma
E manaomia e tagata uma le faamoemoe ma le togiola lea ua saunia e le talalelei ma le Togiola a Iesu Keriso. Talanoa ma lou aiga nisi o aoaoga mai le tusiga a Elder Jeffrey R. Holland i auala e mafai ona e alofa ai, faasoa atu, ma valaaulia se tasi e maua ma opogi le talalelei a Iesu Keriso (tagai i le itulau 4).
Mataupu Faavae Atamai mo le Faaaogaina o Ala o Faasalalauga
O tekinolosi ma ala o faasalalauga o ni meafaigaluega aoga pe a sa’o le faaaogaina. Iloilo nisi o mataupu faavae taiala o loo i le itulau 22 ma talanoaina tulaga faatonuina a lou aiga mo le faaaogaina o ala o faasalalauga. I le faaaogaina o “fesili e mafaufau loloto i ai,” mafaufau po o le a le mea o loo sologa lelei ma mea e mafai ona faaleleia.
Mulimuli i le Faaola i le Faatuatua
I lana tusiga i le itulau 40, o loo faasoa mai ai e Elder Benjamin M. Z. Tai ni auala se fa e fesoasoani ai le Faaola ia i tatou. A uma ona iloiloina nei mea ma lou aiga, talanoa pe na faapefea ona fesoasoani ia te oe a o e mulimuli i le Faaola i le faatuatua.
Mai le Mekasini o le Mo Le Malosi o le Autalavou
O le lomiga o lenei masina o se lomiga faapitoa faatasi ma le autu “O Iesu Keriso o le Malosi o le Autalavou.”
Faitau se savali mai ia Elder Jeffrey R. Holland e uiga i le auala e mafai ai e talavou uma ona maua le malosi ia Iesu Keriso.
Saili tusiga e uiga i le ala e faamalosia ai i tatou e le Faaola e tetee atu i le atuatuvale, faanoanoa, agasala, maasiasi, vaivaiga, faalelalolagi, ma le popole, faapea foi ma tusiga e uiga i le auala Na te faamalosia ai i tatou e auauna atu, saunia, ma avea na ni ō.
Olioli i pepa lautele o i ai se savali musuia ma galuega tau ata a le Faaola.
Mai le Mekasini o le Uo
Manuia le Eseta!
Saili tala ma gaoioiga e fesoasoani ai i lou aiga ia maua se Eseta anoa, e faatotonugalemu ia Keriso.
Sauniuni mo le Konafesi Aoao
O e fiafia e matamata i le konafesi i le masina a sau? O le Uo o le masina lenei e i ai se gaoioiga mo lau fanau e fai a o latou faalogologo.
Tumau Saogalemu i le Initoneti
Faitau se tala e uiga i se teineitiiti na lagonaina le uunaia o ia e le Agaga Paia e taofi le matamata i vitio leaga. E mafai ona e maua nisi punaoa o ala o faasalalauga i le abuse.ChurchofJesusChrist.org.
Aoao mai le Tusi a Mamona
Saili gaoioiga faalevaiaso, faapupula mai tala o tusitusiga paia, ma isi mea e fesoasoani ia malie ai le suesueina e lou aiga o tusitusiga paia.