O Leo o le Au Paia o Aso e Gata Ai

O Se Alofa Mutimutivale Agamalu i le 25 Tausaga Mulimuli Ane

Saunia e Mike Collins, Kalefonia, ISA

Ou te faafetai na faaaoga e le Atua se tusi ua galo, e galuea ai i se tasi o Lona alofa mutimutivale agamalu.

Ata pu’e mai faaaloaloga a le tusitala

A o ou aoaoina le seminare i vaveao i Eureka, Kalefonia, ISA, sa ou fai atu i a’u tamaiti aoga e mafaufau ia i latou lava i le 10 tausaga i le lumanai. Ona ou fai atu lea ia i latou e tusi se tusi faatasi ai ma a latou molimau o le talalelei ma po o le a lava se isi mea latou te mananao e faasoa atu e uiga i o latou tagata tuai. Sa ou fai atu ia i latou o le a ou lafoina ia tusi i le isi 10 tausaga.

Na mavae atu le taimi ma ou te lei alu lava e lafo tusi. I se tasi aso i le 25 tausaga mulimuli ane, sa maua ai e lo’u afafine o Heidi ni tusi ma fesili mai e uiga i ai. Ina ua uma ona ou faamatalaina le mea sa ou fuafuaina, sa ia vaavaai mo tuatusi o a’u tamaiti aoga sa i ai muamua e faaaoga ai meafaigaluega o ala o faasalalauga faaagafesootai.

Ata na tusia e Alex Nabaum

Ina ua uma ona ia lafoina tusi, sa ma mauaina ni tali maoae. Sa tusia e se tasi o a’u tamaiti aoga seminare sa i ai muamua:

“Ou te manao ia iloa e lou tamā ua ia mauaina i le taimi nei na tusi mo se mafuaaga. Sa tauivi la’u tama teine e 18 tausaga le matua ma lana molimau ma lagonaina o le avea ma se ‘teineitiiti atoatoa o le Au Paia o Aso e Gata Ai’ e le mo ia. Na te le faasoa maia ona lagona ia i matou. Sa faigata.”

O la’u tamaitiiti aoga sa i ai muamua, na matua lofituina i nisi o mea na tusia talu ai nei e lana tama teine i se lautusi patino, na ia faaopoopo mai:

“Sa ou iloa sa tatau ona ou talanoa ia te ia e uiga i ai. E pei ona masani ai, pe a matou faia nei talanoaga, o ona foliga sa ma’a’a ma faataute’e, ma na te lei fai maia se tala. Sa ou tuu atu ia te ia la’u tusi ma fai atu ia te ia ou te manao na te faitau i ai.

“Sa ou vaai ia te ia o toe faitauina le parakalafa muamua mo ni nai taimi. Sa ou tusia ou te lei iloa pe na i ai sa’u molimau, e faapea o le avea ma se tagata atoatoa o le Au Paia o Aso e Gata Ai e telē ma atonu e le mo a’u.

“Sa amata ona tagi la’u tama teine. Sa ou manao ia ona iloaina ou te malamalama moni lava i ona tauiviga. Semanu na te le talitonu lava i lea mea e aunoa ma lena tusi! O nisi o ona puipui ua soloia, ma ou te lagona moni lava le pei o le taimi o lenei tusi o se alofa mutimutivale agamalu. Ana faapea ou te mauaina i le 10 tausaga ua mavae, semanu ai ua ou lafoaia pe leiloa! Faamolemole faafetai atu i lou tamā mo le faatonuina o matou e tusia tusi ma mo le tuuseseina o i latou mo nei tausaga e tele! E leai se mea e tupu fua.”

E leoleo e lo tatou Tama Faalelagi alofa Ana mamoe uma, ma i Lana taimi ofoofogia, e mafai ona Ia galueaiina le alofa mutimutivale agamalu ma vavega ia i tatou taitoatasi e toe aumaia i latou o e ua se i le lafu.