« Te mea tā’u i ’ite mai ’a tāpūhono ai au i te mau rāve’a ha’apararera’a tōtiare », Liahona, Māti 2024.
Te mea tā’u i ’ite mai ’a tāpūhono ai au i te mau rāve’a ha’apararera’a tōtiare
Nā te fa’aitira’a mai i tā’u fa’a’ohipara’a i te mau rāve’a ha’apararera’a, i ti’a ai iā’u ’ia vai tino i pīha’i iho i tā’u mau tamari’i ’e ’ia ha’amaita’i i tō’u tā’amura’a i te Fa’aora.
Fa’ahōho’ara’a nā David Green
I te mau matahiti i ma’iri a’enei, ’ua ’ite au tē muhumuhu noa mai ra te Atua ’ia fa’aātea iā’u i te mau rāve’a ha’apararera’a tōtiare. ’Ua ’ite au ē, te fa’aeara’a i te hi’o i te mau rāve’a ha’apararera’a tōtiare e mea maita’i nō’u, ’ua ’ite ato’a rā vau ē, e mea au nā’u te orara’a huira’atira tā’u i ’ite i reira. ’Aita vau i ’ite e nāhea ra e fa’atū’ati i nā mea e piti ; ’ua ’ite noa rā vau ē e mea ti’a i te hō’ē ’ohipa ’ia taui.
’Ua tai’o vau i te hō’ē buka ’o tei tūra’i iā’u ’ia feruri i te uira’a i muri nei : « E aha te roara’a taime e tano maita’i e rave i ni’a i te mau rāve’a ha’apararera’a tōtiare nō te fāna’o i te orara’a huira’atira i reira, ’aita rā terā mau pae ’ino ato’a ? » Nō’u nei, te pāhonora’a i teie uira’a, e 20 minuti ïa… i te ’āva’e. ’Ua ha’amau vau i te hō’ē fā nō te fa’atupu i te reira, ’e ma te tauturu a te Fatu, ’ua tupu ’ōhie maita’i te reira, ’aita roa vau i mana’o a’e. Te mea ’o tā’u i ’ore roa i mana’o, ’o te huru rahi ïa te reira e ha’apūai i tō’u tā’amura’a i tō’u Fa’aora. ’Ua nehenehe iā’u e putapū maita’i a’e i te here o te Fa’aora nō’u, ’ua ti’a roa iā’u ’ia hāro’aro’a maita’i a’e i tāna fa’anahora’a nō’u ; ’e ’ua nehenehe iā’u ’ia ’ite māramarama a’e i te mau hina’aro o te mau ta’ata ’ati a’e iā’u.
’Eiaha e vaiiho i te patara’a hōho’a iāna iho e fa’aoti i tō’u faufa’a
I ’ite noa na vau ē, e tamari’i au na te Atua ’e ’ua here ’oia iā’u. ’Ua putapū vau i te here o tō’u Fa’aora i te mau taime fifi o tō’u orara’a. Pinepine roa rā vau i te vaiiho i te mau rāve’a ha’apararera’a tōtiare ’ia parau mai i te huru vau e hi’o iā’u iho ’e e feruri iā’u iho. Noa atu ā e tāmata vau i te ha’apāpū iā’u iho ē, e’ita te mau hōho’a nehenehe roa i ni’a i te mau rāve’a ha’aparera’a tōtiare e ha’afifi iā’u, e au ra ’o terā iho ā. Maoti te fa’a’itira’a i tō’u taime i ni’a i te mau rāve’a ha’apararera’a tōtiare i noa’a ai iā’u te hau i te pae ferurira’a ’e te māniania ’ore tei tītauhia nō te fa’aro’o i te Fa’aora ’ia parau mai iā’u i te mea tāna e mana’o ra nō’u. ’Aita roa vau i ’ite noa a’e i te rahi o tō’u ’orera’a e fa’aro’o i tōna reo, ē tae roa i te taime ’ua hōro’a vau i te vāhi rahi a’e nōna.
’Ua ti’aturi noa na vau i te fa’anahora’a nō te fa’aorara’a. ’Ua ’ite au ē, ’o Iesu Mesia te pū o teie fa’anahora’a. Tē ti’aturi ato’a nei rā vau ē, e fa’anahora’a ta’a ’ē tā te Metua i te ao ra nō tātou tāta’itahi. ’Ua ha’api’i Larry M. Gibson, tauturu hō’ē tahito i roto i te peresidenira’a rahi o te Feiā ’Āpī Tamāroa ē : « ’Ua ’ite au ē, tē māna’ona’o nei te Metua i te ao ra ia tātou tāta’itahi, ’e e fa’anahora’a tāna nō tātou nō te fa’atupu i tō tātou hope’ara’a mure ’ore ».1
E rave rahi taime tō’u tūra’ira’a i te paruai i ni’a ’e raro nō te tāmata i te hi’o e aha mau tā’u fā. ’Ua hōro’a mai te mau rāve’a ha’apararera’a tōtiare iā’u i te parahira’a mua roa nō te ’ite mai i te mau ’ohipa hāmani ato’a ’e te fa’ahiahia a te ta’ata. ’Ua ha’api’i rahi mai au mai roto mai i teie mau ta’ata, e rahi a’e rā tā’u ’imira’a i te ravera’a. Mai te taime ’a fa’aātea mai au i te mau rāve’a ha’apararera’a tōtiare, ’ua putapū vau i te arata’ira’ahia vau nō te ’ite pāpū maita’i i te mea tā te Metua i te ao ra e hina’aro ’ia rave au. E rave rahi o teie mau mea e mau mea māere ’e te ta’a ’ē i tā’u i mana’o noa na, ’ua ha’afaufa’a a’e rā ’e ’ua fa’a’auhune a’e rā te reira i tō’u orara’a.
’Ua haere mai te Fa’aora ’ia roa’a ia tātou te ora ’e ’ia ’auhune te reira nō tātou (hi’o Ioane 10:10). Tē māuruuru nei au nō te mau poro rima a te Vārua Maita’i, nō te tauturu ia tātou ’ia roa’a te hō’ē orara’a ’auhune a’e.
Te orara’a i’ō mai i te paruai
I ’ite te Fa’aora i te feiā tā vetahi ’ē i ’ore i ha’apa’o atu. E mea au nā’u ’ia tai’o i te mau ’ā’amu nō ni’a i tāna aupurura’a i taua mau ta’ata ra, ’e te ha’api’ira’a ia rātou i tō rātou faufa’a. Te rave-rahi-ra’a i te taime i ni’a i te mau rāve’a ha’apararera’a tōtiare, ’ua fa’ataupupū ïa i tā’u ’itera’a i te mau ta’ata i roto i tō’u iho orara’a, mai tō’u nei ’utuāfare. ’Ua ’ite a’era vau ē, mai te mea ’aita tā’u mau tamari’i e mana’o ra tē ’ite atu ra vau ia rātou, e fāriu vave atu ïa rātou i ni’a i te mau rāve’a nā rāpae’au nō te ha’apāpū i tō rātou faufa’a.
’Ua māere au i tō’u here nō tā’u mau tamari’i, i te ti’a-maoro-a’e-ra’a i rotopū ia rātou. E rahi a’e tō’u here i tō’u ti’ara’a metua vahine i te matahiti i ma’iri a’enei, i nā mua a’enei. ’Ua ha’amātau vau i tō’u mau ta’ata tupu ’e ’ua itoito a’e au nō tō’u va’ata’ata. ’Ua mara’a a’e tā’u mau rāve’a tāvinira’a. ’Ua mana’o vau ē, tē tauturu nei te mau rāve’a ha’apararera’a tōtiare iā’u ’ia ’ite rahi atu ā i te hina’aro, te parau mau rā, ’aita i roto roa nō te ’ite mau i te mau hina’aro o te feiā ’ati a’e iā’u.
Te fa’aitira’a i tā’u fa’a’ohipara’a i te mau rāve’a ha’apararera’a tōtiare e au ra ē e ’ohipa na’ina’i ’e te ’ōhie te reira, maoti rā te reira i ti’a ai iā’u ’ia ha’amara’a rahi roa i tō’u fa’aro’o ’e i te ha’amaita’i i tō’u tā’amura’a i tō’u Fa’aora. ’Ua ’ite au ē, ’ua here te Metua i te ao ra ia tātou, e fa’anahora’a tāna nō tātou, ’e e mau tamari’i tāna tei hina’aro ato’a ’ia ’ite ē, tē hi’o atu nei tātou.
Tē ora ra te taʼata pāpa’i i New York, i Marite.