« Tei roto ’outou », Liahona, Māti 2024.
Feiā ʼāpī paʼari
Tei roto ’outou
E nehenehe tātou e ’ite fa’ahou mai i tō tātou nino’a mana’o nō te rirora’a, ma te fa’ananeara’a i te hō’ē tā’amura’a pāpū ’e te Metua i te ao ra ’e Iesu Mesia.
Parau ri’i nō te Fāito Hanahana, nā Annie Henrie Nader
’Ua fanauhia tātou tāta’itahi ma te hō’ē hina’aro tumu ’ia riro. Tē tītau mau nei tātou i te reira rirora’a i roto i tā tātou tā’atira’a ’e tō tātou ’utuāfare, tō tātou mau hoa, tō tātou mau hoa ’ohipa, mau pāroita ’e te tahi atu mau ta’ata i roto i tō tātou orara’a. Mai te huru ra te roa’ara’a teie mau tītaura’a tīretiera nō te hō’ē hina’aro hōhonu ’e te tāmau ’ia riro.
’Ua riro ’outou ’e ’o vau nei—’e tē riro noa nei ā—’ei tuha’a nō te hō’ē ’utuāfare mure ’ore ’e tō tātou Metua i te ao ra, hou roa ’a haere mai ai tātou i ni’a i te fenua nei. Tē fa’ata’a nei te mau pāpa’ira’a mo’a ia tātou ’ei « ta’ata ē’ē ’e te purutia i teie nei ao » (Hebera 11:13 ; Te Ha’api’ira’a Tumu ’e te mau Fafaura’a 45:13). I te fa’aru’era’a tātou i tō tātou nohora’a i te ra’i ra ’e tē taera’a mai i roto i te hō’ē ao tei ’ī i te ahoaho, te vai-’ōtahi-ra’a ’e te ’oto, e nehenehe tātou e mana’o mai te mau ta’ata ’ōvere tātou, e tītau nei i tō tātou nohora’a ’e i tō tātou mau tā’amura’a mure ’ore.
Mai te peu tē mihi ri’i ra ’outou i te ra’i, penei a’e nō te mea ’ua tū’atihia tō tātou ’utuāfare mau ’e tō tātou hīro’a ta’ata mau i tō tātou Metua i te ao ra ’e i te Fa’aora, ia Iesu Mesia. Nō reira e mea faufa’a roa ’ia roa’a te hō’ē tū’atira’a hōhonu ’e rāua. ’Ia tū’ati ana’e tātou ia rāua nā roto i tō tātou tā’amura’a o te fafaura’a, e ’ite mai tātou i te nino’a mana’o mau nō te rirora’a, ’o tā tō tātou vaerua e tītau nei.
Tō tātou tā’amura’a o te fafaura’a ’e te Atua
E fa’a’ite mai tā tātou mau ’ohipa ’e tō tātou mau mana’o i te mau tā’amura’a tā tātou e ha’afaufa’a nei. Mai te reira ato’a nō tō tātou tā’amura’a o te fafaura’a ’e tō tātou Metua i te ao ra ’e te Fa’aora.
’Ia ha’afaufa’a ana’e tātou i tō tātou tā’amura’a o te fafaura’a ’e te Atua, e taui te mau mea ato’a. ’Āhani i te fa’aurura’ahia e te ao nei, ’ia fa’auruhia tātou e āna ’e ’ia riro hau atu ā mai iāna te huru. E ha’amata tō tātou orara’a i te riro ’ei mea maita’i a’e, te pāpū ’e te pūai i te pae vārua. I terā taime, e nā ni’a a’e « te rirora’a » i te mau tuha’a o te tāhuti nei i te mea tā tātou e mana’o nei e te aura’a nō « te rirora’a ».
’Ia riro ana’e teie tā’amura’a o te fafaura’a ’e te Atua ’ei ’ohipa mātāmua, te mau fa’anevanevara’a faufa’a ’ore ’o te ao nei e morohi tōna mau umera’a, ’e e ’ite mai tātou te hau mau o te ta’ata iho ’e te rirora’a mau. I roto i te hō’ē ao ’aita e hōro’a pinepine nei i te mau mea ma te ho’o ’ore, e ha’aparare tō tātou Metua i te ao ra, ma te here, i te mau ha’amaita’ira’a o tāna fafaura’a, noa atu tō tātou ti’ara’a i roto i teie ao (hi’o 2 Nephi 9:50–51).
’Ua ha’api’i nehenehe te peresideni Russell M. Nelson ē, « ’ia rave ana’e tātou i te hō’ē fafaura’a ’e te Atua, e fa’aru’e tātou i te rēni rōpū ’e a muri noa atu. E’ita te Atua e fa’aru’e i tōna tā’amura’a ’e te feiā i fa’atupu i te reira huru natira’a ’e ’ōna. ’Oia mau, te feiā ato’a tei rave i te hō’ē fafaura’a ’e te Atua, e fāri’i rātou i te hō’ē huru here ’e te aroha ta’a ’ē ».1
Nā tātou e fa’aoti e fa’atupu ānei tātou i te hō’ē tā’amura’a ’e te Atua—e vai tāmau noa ’oia i ni’a ia tātou, e ti’a rā ia tātou ’ia mā’iti ’ia vai tāmau noa i ni’a iāna. ’E te reira mā’itira’a hanahana ’ua riro ’ei mea pūai ’e mea ti’amā ! E fa’ati’amā teie mā’itira’a ia tātou i te mau hi’ora’a hape ’o vai tātou ’e i te mau fifi rarahi ’o te mau tītaura’a o te ao nei.
’E ’ia ’ite ana’e mai tātou i te reira rirora’a i tō tātou Metua i te ao ra, e nehenehe ïa tātou e hi’o i rāpae’au mai ’e ’ia hi’o ia vetahi ’ē mai iāna te huru. ’Ia ta’a ana’e iā’u e aha tāna e putapū ra nō’u, e ta’a maita’i a’e iā’u e aha tāna e putapū ra nō ’oe, ’e e riro tō’u ’aravihi ’e tō’u hina’aro ’ia rae’ahia ’e ’ia ha’aputuputu ia vetahi ’ē e mea pūai a’e.
Fa’ahōho’ara’a nō te hiero nō Nauvoo i te topara’a mahana, nā Max D. Weaver
E ’īriti te mau fafaura’a i te mau ha’amaita’ira’a
Tē hina’aro nei te Metua i te ao ra ’e ’o Iesu Mesia ’ia rave tātou i te mau fafaura’a ’e ’o rāua, ’ia nehenehe ia rāua ’ia ha’amaita’i ia tātou ’ia au i tō tātou mau hina’aro, ’e ’ia taui ia tātou ’ia ti’a ho’i ia tātou ’ia ho’i atu i mua i tō rāua aro.
Tē ani manihini nei au ia ’outou ’ia haere pinepine i te fare o te Fatu. ’A fafau ai au i te haere pinepine ’e ma te hina’aro mau, e fa’ari’i au i te tāmarūra’a o te ao nei, ’e e fa’ateiteihia tō’u mau mana’o ’e tō’u nātura.
Nā roto i te ha’apa’ora’a i tā tātou mau fafaura’a, e fa’ari’i tātou i te mana o te autahu’ara’a ’o tē ’īriti i te mau ha’amaita’ira’a o te tāra’ehara a te Fa’aora i roto i tō tātou orara’a. Taua mau ha’amaita’ira’a ra, tei roto te fa’aorara’a, te arata’ira’a, te pārurura’a, te tauturu, te pūai, te hau, te hi’ora’a ātea ’e te ’oa’oa. Tē hina’aro nei te Metua i te ao ra e ha’amaita’i ia tātou ma teie mau mea ato’a nā roto i tō tātou tā’amura’a o te fafaura’a.
Mai te peu ’aita ā ’outou i fa’ari’i i te mau ha’amaita’ira’a o te hiero, tē ani nei au ia ’outou ’ia tuatāpapa i te mau ha’amaita’ira’a o te hiero, te mana o te autahu’ara’a, te mau fafaura’a, ’e e aha tā te Atua e hina’aro nō ’outou. ’Eiaha e tīa’i nō te fa’ari’i i tāna tāmarūra’a, tōna mana ’e tāna tauturu here.
’Ua parau te peresideni Nelson :
« Tē fa’aitoito atu nei au ia ’outou ’eiaha e tīa’i ’e tae roa atu i te taime fa’aipoipora’a nō te fa’ari’i i te ’ōro’a hiero i roto i te fare o te Fatu. ’A ha’amata i teienei ’ia ha’api’i mai ’e ’ia fa’a’ohipa i te aura’a nō te parau ’ia ha’anahia i te mana o te autahu’ara’a.
« E ia ’outou tāta’itahi tei rave i te mau fafaura’a o te hiero, tē tāparu atu nei au ia ’outou ’ia ’imi—nā roto i te pure ’e ma te tāmau—’ia māramarama i te mau fafaura’a ’e te mau ’ōro’a o te hiero. E matara te mau ’ūputa pae vārua. E ha’api’i mai ’outou e nāhea ’ia vāhi i te pāruru i rotopū i te ra’i ’e te fenua, nāhea ’ia ani i te mau melahi a te Atua ’ia tauturu mai ia ’outou, ’e nāhea ’ia fa’ari’i maita’i a’e i te arata’ira’a a te ra’i. E fa’aitoito ’e e ha’apūai tā ’outou mau tauto’ora’a itoito i tō ’outou niu pae vārua ».2
Te rirora’a nā roto i te tātarahapara’a
Te tātarahapara’a tāmau ’o te tahi atu ïa rāve’a nehenehe ’e te mana nō te fa’aea piri noa i te Metua i te ao ra ’e ia Iesu Mesia. Pinepine tātou i te ti’aturi hape ē mai te peu e tātarahapa rahi tātou, e mea ātea roa paha ïa tātou ia rāua. E mea hape roa ïa te reira !
’Aita te tātarahapa e fa’anu’u ia ’outou ’ia ātea ’ē ia rāua—e ha’afātata te reira ia ’outou ia rāua !
E nehenehe e ’itehia mai ia ’outou te rirora’a rahi a’e ’e te tā’amura’a hōhonu a’e ’e rāua, maoti tā ’outou mau tauto’ora’a nō te fāriu atu i ni’a ia rāua, nō te fa’ari’i i te tauturu ’e nō te fa’ari’i i te fa’a’orera’a hara.
E nehenehe tātou tāta’itahi e ’ite ia tātou iho e mea ātea roa tātou i te maita’i roa ra ’o tā tātou e hina’aro ra, ’aita ra vau e mana’o nei ē, tē ha’ape’ape’a rahi nei te Metua i te ao ra i te reira hau atu i tō tātou hina’aro ’e i tō tātou mau tauto’ora’a ’ia tāmata fa’ahou. ’Ua here ’oia ia tātou, ’ua ’ite ’oia i hea tātou e haere ai ’e e arata’i ’oia ia tātou ma te here.
E tītau te ’itera’a i tō tātou mau paruparu ’e tō tātou mau hape i te mana’o pāruru ’ore, nā roto rā i te tātarahapara’a, tē ani ra tātou i te Metua i te ao ra ’ia ha’afātata mai i taua vāhi pāruru ’ore tō tātou. E fa’ati’a teie ha’afātatara’a iāna i te ha’aparare ia tātou tōna here rahi ’e ’ia hōpoi mai i te fa’aorara’a, te fa’a’orera’a hara ’e te pārurura’a ’o tā tātou e hina’aro. I roto i teie tū’atira’a i te Atua ’o tā tātou e fa’ananea nei te ti’aturira’a ’e ’ia ’itehia mai te mau fa’aitoitora’a ’e te rirora’a mau.
Te poietera’a, nā Annie Henrie Nader
Te ’imira’a i te hi’ora’a ātea teitei a’e
E nehenehe tō tātou hi’ora’a ātea e tauturu i tō tātou nino’a mana’o nō te rirora’a i te ’Ēkālesia a te Fatu. E nehenehe tātou e mā’iti i te hi’ora’a ātea ’ia au te reira i tā tātou iho mau ’ohipa ’o te tauturu i tā tātou pāroita, tā tātou Sōtaiete Tauturu, ’aore rā, tā tātou pupu peresibutero ’ia riro mai ’ei vāhi au nō te rirora’a. Te ’imira’a i te tauturu ia vetahi ’ē ’ia riro mai, e fa’arahi te reira i tō tātou iho nino’a mana’o nō te rirora’a.
Nō te mea e tamari’i ’outou nā te Atua, ’ua riro ïa ’outou—noa atu te huru hi’ora’a a vetahi ’ē ia ’outou, ’aore rā tā ’outou huru hi’ora’a ia ’outou iho. ’Ua fa’ata’ahia te fa’anahora’a nō te oa’oa a te Metua nō ’outou, ’e e ti’ara’a faufa’a rahi tō ’outou i roto i te reira. E ’aravihi tō ’outou tāta’itahi nō te tauturu ma te ta’a ’ē ’e ’ia riro ’ei melo nō te bāsileia o te Atua, noa atu tō ’outou ti’ara’a tīvira, tō ’outou ’ite i te pae ha’api’ira’a, ’aore rā tō ’outou huru orara’a.
Hō’ē mana’o tei tae tāmau noa mai i roto i tō’u ferurira’a, ’oia ho’i, terā mau parau « feiā ’āpī pa’ari ’ōtahi », « feiā ’āpī pa’ari », ’e « feiā pa’ari ’ōtahi » e ’ere te reira i tō ’outou huru mau. E mau ta’o teie nō te ihi nu’ura’a ’o tē tauturu nei i te fa’ata’a i te fāito matahiti ’e te ti’ara’a tīvira, e ’ere rā te reira i te mau parau fa’ata’ara’a tano roa nō te ihota’ata mau, te fā ’e te ’aravihi mure ’ore.
E nehenehe te mau tāpa’o ’aore rā te mau fa’aaura’a e tā’ōti’a, e nāhea tātou ’ia hi’o ia tātou iho ’e tō tātou faufa’a ’e tō tātou fāito pūai i roto i te bāsileia o te Atua. Nō te mea e melo ’outou nō Te ’Ēkalesia a Iesu Mesia i te Feiā Mo’a i te mau Mahana Hope’a nei. ’Ua rave ’outou i te mau fafaura’a ’e te Atua. E roa’a ia ’outou tōna mana autahu’ara’a. E melo ’outou nō te Sōtaiete Tauturu ’aore rā nō te pupu peresibutero. ’Ua riro ’outou, mai tā te peresideni Nelson i ha’api’i, e tamari’i nā te Atua, e tamari’i nō te fafaura’a, ’e e pipi nā Iesu Mesia. ’O terā ’e nā mua roa ’o vai mau ’outou, ’e nā te reira « e arata’i ia ’outou i te ora mure ’ore i roto i te bāsileia tīrētiera o te Atua ».3
’Ua fa’aho’ihia mai te ’evanelia nā roto mai i te hō’ē feiā ’āpī pa’ari–e peropheta pa’ari–’o Iosepha Semita. E mana’o pūai teie ’ia feruri. ’Ua tītau te Metua i te ao ra ’e ’o Iesu Mesia i te peropheta ’e tōna mau hoa ’āpiti nō teie fāito matahiti ’ia fa’aho’i fa’ahou mai i te ’Ēkālesia. Tē ti’aturi ato’a nei te Atua ia ’outou ’ia riro ’ei tuha’a nō teie ’ohipa rahi i teie mau mahana hope’a nei.
Mai te peu e hina’aro ’outou e ’ite ’o vai ’outou ’e ’ua herehia ānei ’outou ’e ’ua ha’afaufa’ahia, ’a ani i tō ’outou Metua i te ao ra. E parau noa ’oia ia ’outou i te parau mau nō ni’a ia ’outou. E tauturu ’oia ia ’outou ’ia hi’o ia ’outou iho mai tāna e hi’o nei ia ’outou—ma te ’aravihi ’e te here rahi. E nehenehe tāna e arata’i ia ’outou i te mau rāve’a rarahi ’e i te hō’ē tupura’a rahi ’o tā ’outou e ’ore paha e mana’o !
E mata na tō tātou pā’āto’a nō te hi’o i te tahi ’e te tahi ’e ia tātou iho, ’eiaha nā roto i te tīti’a hi’ora’a o te fāito matahiti ’aore rā, o te ti’ara’a tīvira, nā roto rā i te tīti’a tāhō’ē a te mau ta’ata ha’apa’o i te fafaura’a, te mau pipi nā Iesu Mesia, te mau hoa, te mau taea’e ’e te mau tuahine, ’e te mau tamaiti ’e te mau tamāhine nā te Atua. ’E i roto i teie mau ti’ara’a ’e teie mau tā’amura’a mure ’ore, e ’itehia mai ia tātou te nino’a mana’o o te rirora’a teitei roa a’e ’e te ti’a mau