« Te Fa’aora nō te tā’āto’ara’a, e ’evanelia nā te tā’āto’ara’a », Liahona, Māti 2024.
Te Fa’aora nō te tā’āto’ara’a, e ’evanelia nā te tā’āto’ara’a
E ha’amaita’i te ’evanelia, te tāra’ehara ’e te ti’afa’ahoura’a o Iesu Mesia i te mau tamari’i ato’a a te Atua.
Te Mesia ’e te ta’ata hāpepa, nā J. Kirk Richards, ’eiaha e tāpiti te nene’ira’a
Te ’evanelia a Iesu Mesia i fa’aho’i-fa’ahou-hia mai, ’ua riro nā mua roa ’e i te mau taime ato’a ’ei puna nō te ’oa’oa vai maoro, nō te hau mau ’e te ’oa’oa, nō te tā’āto’ara’a i teie mau mahana hope’a nei. Te mau ha’amaita’ira’a e māni’i mai nā roto mai i te ’evanelia ’e i te maita’i hope ’ore o te Mesia, ’aita roa i fa’ata’ahia nō te tahi noa mau ta’ata fāna’o, i tahito ra ’aore rā i te ’anotau ’āpī nei.
Noa atu ē, tē mana’o nei tātou e ’ere i te mea tano, ’e noa atu te mau hara ’o te fa’aātea ’ē ia tātou iāna nō te tahi ma’a taime, tē ha’apāpū mai nei tō tātou Fa’aora ia tātou ē, « tē fa’atoro noa nei ā ’oia i tōna rima ia [tātou] ē pō noa atu te mahana » (Iakobo 6:4), ma te ani manihini ia tātou pā’āto’a ’ia haere mai iāna ra ’e ’ia ’ite i tōna here.
Te mau ha’amaita’ira’a o te ’evanelia nō te ao ato’a
« ’Ua fa’aho’ihia mai i te mau mahana hope’a nei [te ’evanelia a Iesu Mesia] nō te pāhono i te… mau hina’aro o te mau nuna’a ato’a, o te mau ’ōpū ato’a, o te mau reo ato’a, ’e o te mau ta’ata ato’a i ni’a i te fenua nei ».1 E nā ni’a a’e te ’evanelia i te mau fenua ato’a ’e te ’ū ma te tomora’a nā roto i te mau rēni o te ta’ere ato’a, nō te ha’api’i ē, « hō’ē ana’e rātou ato’a i mua i te Atua » (2 Nephi 26:33).2 Tē ti’a nei te Buka a Moromona mai te hō’ē ’ite fa’ahiahia nō teie parau mau.
Tē fa’a’ite pāpū nei teie pāpa’a parau rahi ē, tē ha’amana’o nei te Mesia i te mau nūna’a ato’a (hi’o 2 Nephi 29:7) ’e e fa’a’ite mai ’oia « iāna iho ia rātou pā’āto’a ’o tei ti’aturi iāna, i te feiā ato’a e fa’aro’o iāna [’e te ravera’a] i te mau temeio rarahi, ’e te mau tāpa’o, ’e te mau piri i rotopū i te mau tamari’i a te ta’ata nei » (2 Nephi 26:13). I rotopū i teie mau temeio rarahi, te mau tāpa’o ’e te mau piri, tē vai ra te ha’apararera’a i te ’evanelia. Nō reira, tē tono nei tātou i te mau misiōnare nā te ao ato’a nei nō te fa’a’ite pāpū i tāna parau ’āpī maita’i. Tē fa’a’ite ato’a nei tātou i te ’evanelia i te feiā ’ati a’e ia tātou. E ha’apāpū te fa’a’ohipara’a i te mau tāviri o te autahu’ara’a tei fa’aho’ihia mai nō te feiā ora ’e te feiā pohe ē, e roa’a te ’īra’a o te ’evanelia i te mau tamaiti ’e te mau tamāhine ato’a a tō tātou nā metua i te ra’i ra—i tahito ra, i teienei, ’aore rā a muri a’e.
Te ’ā’au o teie ’evanelia—te poro’i tumu a te mau peropheta ’e te mau ’āpōsetolo ato’a tei pi’ihia i roto i te ’ohipa—’oia ho’i, ’o Iesu te Mesia ’e ’ua haere mai ’oia nō te ha’amaita’i i te mau ta’ata ato’a. ’Ei mau melo nō Te ’Ēkālesia a Iesu Mesia i te Feiā Mo’a i te mau Mahana Hope’a nei, tē fa’a’ite nei mātou ē, tāna tusia tāra’ehara nō te ao ato’a nei ïa.
Te hina’aro nō te hō’ē tāra’ehara hope’a ’ore ’e te mure ’ore
’A rātere ai au nā te ao nei, e rave au i te mau uiuira’a i te mau melo e rave rahi o te ’Ēkālesia. E fa’auruhia vau ’ia fa’aro’o e mea nāhea rātou i te putapūra’a i te mau ha’amaita’ira’a ’o te tāra’ehara a Iesu Mesia i roto i tō rātou orara’a, ’oia ato’a ’ia fā’i rātou i te hō’ē hara ātea. ’Auē ïa te fa’ahiahia ē, e noa’a i te tā’āto’ara’a te tāmāhanahanara’a tāmā ’o tōna tāra’ehara !
« E mea ti’a roa ’ia fa’ati’ahia te hō’ē tāra’ehara, » tē parau ra Amuleka, « ’e mai te mea ē ’aita, e pohe ïa te mau ta’ata ato’a ». E « hi’a [tātou ’e a muri noa atu] ’e… e mo’e, … maori rā nā roto i te tāra’ehara », ’o tē tītau i « te hō’ē tusia fāito ’ore ’e te mure ». Nō te mea, « ’aita roa e ti’a i te hō’ē mea i iti iho i te tāra’ehara fāito ’ore, ’ia fa’a’ore i te mau hara a tō te ao ato’a nei » (Alama 34:9, 10, 12).
’Ua ha’api’i ato’a te peropheta rahi ’o Iakoba ē, nō te mea « ’ua tae mai te pohe i ni’a iho i te mau ta’ata ato’a, … ’ia tae mai ïa te mana nō te ti’afa’ahoura’a e ti’a ai », nō te arata’i ia tātou i mua i te aro o te Atua (2 Nephi 9:6).
Tītauhia ’ia upo’oti’a i ni’a i te te hara ’e te pohe. ’O te misiōni ïa teie a te Fa’aora, ’o tāna i rave fa’aoti ma te itoito nō te mau tamari’i ato’a a te Atua.
Getesemane, nā J. Kirk Richards, ’eiaha e tāpiti te nene’ira’a
Te tusia a tō tātou Fa’aora
I tāna pō hope’a i te tāhuti nei, ’ua tomo atu Iesu Mesia i roto i te ō nō Getesemane. I reira, ’ua tūturi ’oia i rotopū i te mau tumu ’ōlive ’e ’ua ha’amata i te hō’ē poura’a i roto i te hō’ē māuiui rahi hōhonu ’o tā ’outou ’e ’o vau iho e ’ore roa e ’ite.
I reira, ’ua ha’amata ’oia i te rave i ni’a iho iāna te mau hara a tō te ao nei. ’Ua putapū ’oia i te mau māuiui ato’a, te ’oto ’e te mamae, ’e ’ua fa’a’oroma’i ’oia i te mau hepohepo ato’a ’e te mau pēpē ato’a tei orahia mai e ’outou, e ’o vau nei, ’e te mau vaerua ato’a tei ore na i ora mai ’aore rā ’o tē ora mai i muri iho. Nā teie mamae rahi ’e te fāito ’ore « i fa’atupu i roto [iāna], … tei hau a’e i te mau mea ato’a ra, i te rurutaina nō te māuiui, ’e ’ua tahe mai ra te toto nā te mau poa ato’a » (Te Ha’api’ira’a Tumu ’e te mau Fafaura’a 19:18). ’O ’oia ana’e te nehenehe e rave i te reira.
’Aita e ta’ata ’ē atu tei nava’i te maita’i
Nō te ’aufau i te ho’o o te hara.
’O ’oia ana’e te nehenehe e ’īriti i te ’ūputa
’O te ra’i ’e ’ia vaiiho ia tātou ’ia tomo atu i roto.3
I muri iho ’ua ’āfa’ihia Iesu i Kalavaria, ’e i te taime riaria roa a’e e te ti’a ’ore i roto i te ’ā’amu ’o teie nei ao, ’ua fa’asātaurohia ’oia. ’Aore e ta’ata e nehenehe e rave ’ē atu i tōna ora. ’Ei Tamaiti Fanau Tahi nā te Atua, e mana tōna i ni’a i te pohe tāhuti nei. ’Ua nehenehe roa iāna e pure i tōna Metua, ’e e haere mai te naho’a melahi nō te ha’amou i tōna mau ta’ata ha’amāuiui ’e e fa’a’ite i tōna mana i ni’a i te mau mea ato’a. « E aha ihora rā e tupu ai te parau i pāpa’ihia ra i reira », te uira’a a Iesu i tōna tāvirira’ahia, « ’ia tupu teie nei mau mea e ti’a ai ? » (Mataio 26:54).
Nā roto i te aurarora’a ti’a roa i tōna Metua—’e te here ti’a roa nō tātou—’ua hōro’a Iesu i tōna ora ma te ’ā’au tae mau ’e ’ua fa’aoti i tāna tusia tāra’ehara fāito ’ore ’e te mure ’ore, ’o tē ho’i roa i mua i roto i te tau ’e a muri noa atu.
Te rē a tō tātou Fa’aora
’Ua fa’aue Iesu i tāna mau ’āpōsetolo ’ia tāmau i te rave i tāna ’ohipa i muri a’e i tōna pohera’a. Nāhea rātou i te rave i te reira ? E rave rahi ’o rātou e feiā rāva’ai noa, ’e ’aita e ta’ata i ha’api’ipi’ihia i roto i te mau sunago nō te tāvinira’a. I taua taime ra, mai te huru ra ē, tē mou ra te ’Ēkālesia a te Mesia. ’Ua ’itehia mai rā i te mau ’āpōsetolo te pūai nō te rave i tō rātou pi’ira’a ’e i te hāmani i te ’ā’amu o te ao nei.
E aha te mea tei hōro’a mai te pūai i roto i taua huru paruparu ra ? ’Ua parau te ti’a fa’atere ’e te ’aivāna’a ’o te ’ēkālesia Peretāne ’o Frederic Farrar ē : « Tē vai ra hō’ē, ’e hō’ē ana’e pāhonora’a ti’a—te ti’afa’ahoura’a mai te pohe mai. Te tumu o teie tauira’a rahi ’o te mana ïa o te ti’afa’ahoura’a o te Mesia ».4 ’Ei mau ’ite nō te Fatu tei ti’afa’ahou, ’ua ’ite te mau ’āpōsetolo ē, ’aita roa e mea e nehenehe e tāpe’a i te nu’ura’a i mua o teie ’ohipa. ’Ua riro tō rātou ’itera’a pāpū ’ei puna o te mana vai maoro, ’a fa’a’oroma’i noa ai te ’Ēkālesia i tahito ra i te mau fifi ato’a.
I teie tau nō Pāsa, ’ei hō’ē ’o tāna mau ’ite i fa’atōro’ahia, tē parau nei au ē, i te po’ipo’i roa i te hō’ē sābati nehenehe, ’ua ti’afa’ahou mai te Fatu Iesu Mesia mai te pohe mai, nō te ha’apūai ia tātou ’e nō te ’ōfati i te mau tā’amu o te pohe nō te ta’ata ato’a. Tē ora nei Iesu Mesia ! Maoti ’oia, e ’ere te pohe i te hope’ara’a nō tātou. Te ti’afa’ahoura’a ’o te hōro’a tāmoni ’ore ïa ’e nō te ao ato’a nei a te Mesia nō te tā’āto’ara’a.
Te Mesia ’e ’o Maria i te mēnema, nā Joseph Brickey
Haere mai i te Mesia
Nō te mau ta’ata ato’a te ’evanelia ’e te tāra’ehara a Iesu Mesia—’oia ho’i, te mau ta’ata ato’a. Te rāve’a hō’ē roa nō te fāna’o i te mau ha’amaita’ira’a ato’a o te tusia tāra’ehara a te Fa’aora, ’o te fa’ari’ira’a ïa te ta’ata tāta’itahi i tāna anira’a manihini : « E haere mai ’outou iā’u nei » (Mataio 11:28).
E haere tātou i te Mesia ra ’ia fa’a’ohipa ana’e tātou i te fa’aro’o iāna ’e ’ia tātarahapa. E haere tātou iāna ra ’ia bāpetizo-ana’e-hia tātou ma tōna i’oa ’e ’ia fa’ari’i i te hōro’a o te Vārua Maita’i. E haere tātou iāna ra ’ia ha’apa’o ana’e tātou i te mau fa’auera’a, ’ia fa’ari’i i te mau ’ōro’a, ’ia ha’apa’o i te mau fafaura’a, ’ia fa’ari’i i te mau ’itera’a i roto i te hiero ’e ’ia ora i te huru orara’a e orahia e te mau pipi a te Mesia.
I te tahi taime, e fa’aruru ’outou i te tarapapera’a ’e te ’ino’ino. E nehenehe tō ’outou ’ā’au e ’oto nō ’outou iho ’aore rā nō te hō’ē ta’ata tā ’outou i here. E teimaha paha ’outou i te mau hara a vetahi ’ē. Te mau hape tā ’outou i rave—penei a’e e mea fifi roa—e nehenehe te reira e ha’amata’u ia ’outou ē, e mo’e roa paha nō ’outou te hau ’e te ’oa’oa. I roto i te reira mau taime, ’a ha’amana’o ē, e’ita te Fa’aora e ha’amāmā noa i te hopoi’a o te hara, ’ua « fa’a’oroma’i ato’a rā [’oia] i te mau māuiui ’e te mau ’ati, ’e te mau huru fa’ahemara’a ato’a » (Alama 7:11), tae noa atu i tō ’outou ! Maoti te mea tāna i ora nō ’outou, ’ua ’ite ’oia iho e nāhea i te tauturu ia ’outou ’a fa’ari’i ai ’outou i tāna anira’a manihini ’ia taui te orara’a : « ’A haere mai iā’u nei ».
E fa’ari’i-maita’i-hia te tā’āto’ara’a
’Ua ha’amāramarama maita’i mai Iesu Mesia ē, e ti’ara’a ’aifaito tō te mau tamari’i ato’a a tō tātou Metua i te ao ra, nō te mau ha’amaita’ira’a o tāna ’evanelia ’e tōna tāra’ehara. Tē fa’aha’amana’o mai nei ’oia ia tātou ē, « ’ua fāna’o te mau ta’ata ato’a, te tahi ’ia au i te tahi, ’e ’aore roa te hō’ē i ’ōpanihia » (2 Nephi 26:28).
« ’E ’ua ani ’oia ia rātou ato’a ’ia haere mai iāna ra ’e ’ia fāri’i i tōna maita’i ; ’e ’aita roa ’oia e pāto’i i te hō’ē ’ia haere mai iāna ra, te ’ere’ere ’e te ’uo’uo, te tītī ’e te ti’amā, te tāne ’e te vahine » (2 Nephi 26:33.
« ’E ’ua ani ’oia ia rātou ato’a »—te aura’a ’o tātou pā’āto’a ïa ! ’Eiaha tātou e tu’u i te mau parau pāpa’i noa ’e te mau fa’ata’ara’a pāpū ’ore i ni’a ia tātou iho ’aore rā i ni’a ia vetahi ’ē. ’Eiaha roa atu tātou e tu’u i te mau pāruru i te here o te Fa’aora ’aore rā, e feruri ē e’ita tātou ’aore rā vetahi ’ē e nae’ahia mai iāna. Mai tā’u i parau nā mua a’e, « e’ita e nehenehe ia ’outou ’ia paremo hōhonu roa i te fāito e ’ore te māramarama mure ’ore o te tāra’ehara a te Mesia e tae’a ».5
Terā rā, mai tā te tuahine Holland e ’o vau i ha’api’i i te tahi nau ’āva’e nā mua noa a’e i tōna pohera’a, ’ua fa’auehia tātou ’ia « fa’atupu i te aroha, ’o te aroha rā ’o te here ïa » (2 Nephi 26:30).6 ’O te here teie tā te Fa’aora e fa’a’ite nei ia tātou nō te mea « ’aore ho’i ’oia e rave i te hō’ē a’e ’ohipa, maori rā nō te maita’i o te ao nei ; ’e ’ua here ’oia i tō te ao nei, ’e ’ua hōro’a ’oia i tōna iho ora, ’ia ti’a iāna ’ia ’ume mai i te mau ta’ata ato’a iāna ra » (2 Nephi 26:24).
Tē fa’a’ite pāpū nei au ē, nō te mau ta’ata ato’a te ’evanelia ’e te tāra’ehara a Iesu Mesia. Tē pure nei au ’ia fāri’i ’outou ma te ’oa’oa i te mau ha’amaita’ira’a tāna e hōpoi mai.