« E hōho’a mata i roto i te ha’amāramarama », Liahona, Māti 2024.
Te reo o te feiā mo’a i te mau mahana hope’a nei
E hōho’a mata i roto i te ha’amāramarama
’Ua mana’o vau tē ’ō’omo ra terā vahine i pīha’i iho mai i tōna ihu i roto i tā’u mau ’ohipa, ’aita rā e hoa noa tāna i hina’aro.
Hōho’a hō-mai-hia e te ta’ata pāpa’i
Tē ’ite noa ra vau i terā hōho’a mata i te fā’ao mai nā roto i te ha’amāramarama o terā nohroa’a tahua. ’Ua mana’o vau : « E ’ere ānei i te mea ’oto nō te hō’ē ta’ata ’ia fā’ao noa mai nā roto i tōna ha’amāramarama, nō te ha’avā i te ’ohipa a te tahi atu mau ta’ata ? »
’E i te hō’ē mahana, ’ua tae mai te mana’o ē, e haere paha ïa e fārerei iāna, hina’aro paha ’oia i te tauturu. ’Ua mana’o vau e ’āfa’i atu i te tahi faraoa ’eu-’āpī-hia.
’Ua putapū roa te ’ā’au o terā vahine ruhiruhiā iti i terā fa’aroa. Ma te roimata, ’ua fa’a’ite mai ’oia i tōna mana’o mo’emo’e. ’Aita e ta’ata e paraparau nei iāna, ’aita ato’a e tāniuniu mai, tāna mau tamari’i ato’a. Rūrū noa tōna rima i te horoira’a i te roimata i ni’a i tōna papari’a.
Ma te autā ’ua nā ’ō mai : « E mea au a’e paha ïa e fa’aru’e i teie nei ao. ’Aita vau e fa’a’ino nei i te ta’ata nā roto i tō’u ha’amāramarama. E hi’o noa vau i te mau tamari’i ’ia ha’uti, ’e te tahi atu mau ’ohipa e tupu i roto i te ’āua. »
Fa’ahōho’ara’a nā Alex Nabaum
Ē i muri mai, ’ua paraparau māua nō ni’a i te ’evanelia. I te ha’amatara’a, ’ua ’ōtohe ri’i ’oia, e ti’ara’a pa’i tā tāna tāne i te roto i te tahi atu ’ēkālesia. Terā rā, rahi noa atu māua i te paraparaura’a, rahi noa ato’a atu ’oia i te fa’ari’ira’a i te mau parau mau tā’u i fa’a’ite iāna nō ni’a i te ’evanelia a Iesu Mesia i fa’aho’ihia mai.
« E mea au roa, hō’ē ā Iesu tā tātou ! », tāna ïa parau. « E fārerei tāua i te ra’i ? »
’Ua pāhono atu ra vau ē : « ’Ē, tāua tē haere atu—ma te tāpe’a i te rima. »
Mai te reira atu taime, ’ua hoa roa māua e rave rahi matahiti te maoro, ē fa’aru’e atu ra ’oia.
I teienei, e mea au nā’u ’ia feruri ē, tē hi’o mai ra terā hoa iti nā roto i te ha’amāramarama o tōna fa’aeara’a i te ra’i, i te hi’ora’a i tā mātou mau ’ohipa e rave ’e te ti’aturira’a ’ua nava’i tō tātou hoara’a ’e tō tātou here i te tahi ’e te tahi.