« Tītī nō te hō’ē hōho’a pū’oi’oi : Nāhea vau i te vaiihora’a i te Atua ’ia upo’oti’a », Liahona, Māti 2024.
Tītī nō te hō’ē hōho’a pū’oi’oi : Nāhea vau i te vaiihora’a i te Atua ’ia upo’oti’a
I tō’u fa’aru’era’a i te māta’ita’ira’a i teie hōho’a pū’oi’oi, ’ua putapū vau i te fa’aurura’a a te Vārua Maita’i i te fa’arahi-roa-ra’a-hia i roto i tō’u orara’a.
Fa’ahōho’ara’a nā Benedetta Vialli / Salzman International
E hōpoi mai te mā’itira’a ia Iesu Mesia i te mana rahi, « ’auē ïa ē, e hina’aro rahi mau tātou i tōna mana i te mau mahana i muri nei. »1 E ’ārepurepu rahi i roto i te ao nei. Mai te huru ra ē, ’ua rahi atu ā te mana o te ’enemi i ni’a i te mau tamari’i e rave rahi roa a te Atua. Fa’ahanahanahia te paieti ’ore, ’e fa’a’ōnevaneva te mau fa’ahemara’a ia tātou ma te fa’aātea ’ē atu ia tātou i te mea ’o tē ha’afātata atu ia tātou i te Fatu.
Nō te upo’oti’a i ni’a i te reira, tītau-roa-hia ia tātou ’ia mā’iti itoito ia Iesu Mesia i roto i tō tātou orara’a ’e ’ia fa’aru’e i te mau mea e fa’a’ino i te Vārua. ’Ua a’o mai ’o Moroni ē : « ’Ia ’aravihi ’outou i te mau mahana o te orara’a nei ; ’a fa’aru’e ’outou i te mea vi’ivi’i ato’a » (Moromona 9:28) ’e ’ua ani manihini ia tātou : « ’a haere mai i te Mesia, ’e ’ia maita’i roa ’outou iāna, ’e ’a ha’apae ’outou i te mau mea paieti ’ore ra […] ’e ’a here atu ai i te Atua ma tō ’outou mana ato’a, tō ’outou mana’o ato’a ’e te pūai ato’a » (Moroni 10:32).
Nāhea tātou e fa’aru’e ai i te mau mea o te ao nei, ’e ma te mana’o pāpū a’e e haere mai ai i te Mesia ? E fāito ta’a ’ē tō tātou tāta’itahi i roto i teie ravera’a. E nehenehe tā tātou pā’āto’a e fa’aru’e i te tahi mea e tāpe’a nei ia tātou ’ia ho’i mai i ni’a i te putapūra’a i te fa’aurura’a a te Vārua Maita’i. Tītauhia te mana o te tāra’ehara a te Fa’aora nō te rave i te reira, ’e e ha’amata nā ni’a i te fa’a’ohipara’a i tō tātou ti’amāra’a nō te mā’iti iāna.
Te hina’aro ’ia fa’aō i roto
I tō’u matahiti hope’a i te fare ha’api’ira’a tuarua, tei roto vau i te pupu « pompom girl » o te fare ha’api’ira’a. I te mau mahana ato’a i te ha’api’ipi’ira’a, e paraparau te mau tamāhine nō te pupu nō ni’a i te ’ohipa i tupu i roto i te hō’ē hōho’a pū’oi’oi i ni’a i te ’āfata teata. ’Aita vau i māta’ita’i a’e nei i te reira, ’ua ’ite rā vau e hōho’a fa’ahiahia ’ore i te pae mōrare. Terā rā, mai te huru ē, ’o vau ana’e i tō’u pae i te ha’api’ipi’ira’a, ’ana’anatae roa te mau tamāhine i te paraparau nō ni’a i te hōho’a. ’Ua muhumuhu mai te Vārua iā’u ’eiaha e māta’ita’i i te reira, ’ua hina’aro roa rā vau e fa’aō i roto i roto i tā rāua mau ’āparaura’a, māta’ita’i ihora vau.
E ’ere i te mea ’ino roa iā’u i hi’o atu. ’Ua feruri au ē, e’ita te reira e ha’ape’ape’a iā’u. ’Ua ’ite au ē, e’ita vau e rave i te mau ’ohipa ’ino tā’u i ’ite i roto i te hōho’a. ’Ua mau roa vau i ni’a i te reira ’e ’ua māta’ita’i au i te mau mahana ato’a. I tō’u haerera’a i te fare ha’api’ira’a Brigham Young University, ’ua fa’anahonaho vau i tā’u tārena ha’api’ira’a ’ia nehenehe iā’u ’ia māta’ita’i i te reira i te mau mahana ato’a. ’Aita roa atu vau i ma’iri i te hō’ē taime.
’Ua fa’aipoipo a’era vau ’e ’ua fānau i tā’u ’aiū mātāmua. E fa’ata’oto vau iāna i te mau mahana ato’a i te taime nō te hōho’a, ’ia nehenehe iā’u ’ia māta’ita’i i te reira.
’A he’e noa ai te mau matahiti, ’ua muhumuhu mai te Vārua iā’u e rave rahi taime e fa’aea i te māta’ita’i i taua hōho’a ra. ’Ua pāto’i rā vau. ’Ua ō roa vau i roto i te orara’a o terā hōho’a. ’Ua riro ato’a ’ei taime fa’afa’aeara’a nō’u, tāmau noa atu ra vau i te māta’ita’i. ’Ua pāpū i roto i tō’u ferurira’a ē, ’aita te reira e ha’apēpē nei iā’u.
Te anira’a manihini
’Ahuru ma iva matahiti i muri a’e i te ha’api’ira’a tuarua, tē māta’ita’i noa ra vau i terā hōho’a i te mau mahana ato’a. I te ’āmuira’a rahi, tē paraparau ra te tuahine Sheri L. Dew, tauturu piti i roto i te peresidenira’a rahi o te Sōtaiete Tauturu i terā taime, nō ni’a i te fa’aāteara’a iāna i te ao ’e te mau mea vi’ivi’i. Parau a’era ’oia : « Tē ani nei au ia tātou tāta’itahi ’ia ’imi hō’ē a’e mea tā tātou e nehenehe e rave nō te haere mai i rāpae i te ao nei ’e nō te ha’afātata atu i te Mesia ».2
I tōna fa’ataera’a i taua anira’a ra, ’ua ’ite au i te hō’ē mani’ira’a rahi o te Vārua, ’e ’ua fa’aro’o vau i teie mau parau i roto i tō’u ferurira’a : « ’Ei fa’aea i te māta’ita’i i te reira hōho’a i teienei ! » E pūai rahi tō te reira ; mai te huru i te hō’ē pā’i i ni’a i tō’u hōho’a mata. ’Ua ’ite au i taua iho taime ra ē, ’aita e ti’a iā’u ’ia tāu’a ’ore fa’ahou i teie fa’aurura’a. ’Ua tae mai te mana’o rū ’eiaha roa atue māta’ita’i fa’ahou i terā hōho’a. Māramarama ihora te ferurira’a ē, ’aita hō’ē o te mau ta’ata o te hōho’a e rave ra i te hō’ē mea au ’e te tura. Tē tītau manihini ra vau i te pehu i roto i tō’u orara’a i te mau mahana ato’a. ’Ua fafau vau i te Fatu, i taua taime ra ’e i reira ra ē, e ’ore roa vau e māta’ita’i fa’ahou i te reira.
E ’ere i te mea ’ōhie ! ’Aita i ’ōhie te ’ōfatira’a ’ahuru ma iva matahiti i roto i terā peu ’e terā ma’i fa’atītī. Mōnirē a’era, ’e hora atu ra nō terā hōho’a. ’Ua haere atu vau e rave mai i te patara’a nō te ’āfata teata. ’Ua hina’aro roa vau e tū’ama i te reira. ’Ua ha’amana’o ihora vau i tā’u fafaura’a i te Fatu ē, e’ita roa vau e hi’o fa’ahou i te reira. ’Ua haere ’ē atu ra vau.
I terā taime ’ua feruri au i terā ta’ata tā’u i au roa i roto i te hōho’a, e aha pa’i te ’ohipa e tupu nōna, ho’i mai nei au e ti’i i te patara’a. Pāpū roa e tītauhia te tauturu a te Atua, nō reira ’ua tūturi au e ’ua pure au nō te fa’ari’i i te pūai ’eiaha e māta’ita’i i te reira. ’Ua feruri au i tā’u fafaura’a i te Metua i te ao ra, ’e ’ua haere atu vau i rāpae i te piha. ’Ua mā’iti au e pe’e i te mau muhumuhu tā’u i fa’ari’i nō ’ō mai i te Vārua Maita’i ’e e fa’atura i tā’u fafaura’a.
’Ua nā ni’a iho noa terā ’ume’umera’a i te mau mahana ato’a i terā hepetoma ’e i te hepetoma nō muri iho. I te mau mahana ato’a, e tūturi au ’e e pure au ’e e tāparu vau i te pūai ’eiaha e māta’ita’i, ’e i te mau mahana ato’a ’ua mā’iti au ia Iesu Mesia ’e ’ua fa’aātea ’ē au i te hō’ē hōho’a vi’ivi’i i ni’a i te ’āfata teata. ’Ua fa’ari’i au i te pūai nō te upo’oti’a, mai roto mai i te mana tā te Fa’aora e pūpū nā roto i tāna tāra’ehara.
I muri a’e i te ravera’a i te reira nō te hō’ē maorora’a, ’ua tupu te hō’ē temeio. ’Ua pe’e roa tō’u hina’aro e mātaita’i i terā hōho’a, i muri a’e i te mata’ita’ira’a i te reira i te mau mahana ato’a 19 matahiti i te maoro. ’Ohipa fa’ahiahia mau ! ’Ua pe’e ato’a tō’u hina’aro e māta’ita’i i te mau hōho’a ha’apa’ora’a ’ore ri’i tā’u i māta’ita’i na, nō reira ’ua fa’aea roa vau.
’Ua ’oe’oe roa atu ra tō’u manava ha’avā, e ti’a roa iā’u ’ia ’ite e mea ’ino terā. ’Ua hina’aro mau vau ’ia ’ape i te mau mea huru ri’i ’ino ra (hi’o 1 Tesalonia 5:22). ’Aita fa’ahou tō’u mata ara i ha’aparuparuhia nō te reira.
Te ha’amaita’ira’a fa’ahiahia roa a’e
Te mea fa’ahiahia roa a’e rā tei tupu maoti rā, ’ua putapū vau i te fa’aurura’a a te Vārua Maita’i i te fa’arahira’ahia i roto i tō’u orara’a, hau atu i te mau mea tā’u i ’ite nā mua atu. E mea vitiviti roa tō’u nu’ura’a i mua i te pae vārua ! Pauroa terā mau matahiti ’ua mana’o vau ē, tē poupou ra vau i te hoara’a o te Vārua Maita’i, terā rā, e ma’a ’ānapanapa ri’i noa nō te mea mau e fa’ari’i. ’Ua ’ite a’era vau ē, e ’ohipa tā terā mau hōho’a i ni’a iā’u, terā maorora’a. ’Ua māu’a e rave rahi matahiti ha’apūaira’a i tō’u hoara’a i te Atua. I tō’u fa’a’ohipara’a i tō’u ti’amāra’a ’ia mā’iti nō te fa’aru’e i te mau mea vi’ivi’i, te mau mea o teie nei ao, ’ua vata a’era nō te Vārua ’ia haere mai iā’u nei ma te fāito rahi atu ā, ’e ’auē ïa ta’a-’ē-ra’a fa’ahiahia i roto i tō’u orara’a, nō te ha’apūai, nō te tāmāhanahana ’e nō te arata’i iā’u.
E au ē, e mea tāpe’a ’eta’eta tātou i te mau mea faufa’a ’ore—te mau mea e tāpiri i te ’ūputa i te mau ha’amaita’ira’a tā te Atua e hina’aro e ’āfa’i mai i roto i tō tātou orara’a. Nō te aha tātou e ’aitaui ai i te fa’aurura’a pūai ’e te ha’ape’epe’e a te Vārua nō te ’ārearea ’aore rā te tu’iro’o ? Pēnei a’e e ’ere te māta’ita’ira’a i te hō’ē hōho’a i ni’a i te ’āfata teata i te hō’ē ’ohipa rahi ’aore rā te hō’ē hara rahi, ’ua ’ōpani rā te reira iā’u i te fāito rahi roa o te Vārua Maita’i i roto i tō’u orara’a, ’e ’ua ha’ataupupū i tō’u haerera’a i mua i te pae vārua.
’Ua māuruuru roa ho’i au i te mea ē, ’aita te Fatu i fa’aru’e iā’u, ’ua fa’a’oroma’i rā ’e ’ua tāmau noa i te ani iā’u ’ia fa’aru’e i te hō’ē mea vi’ivi’i ’ia ti’a iāna ’ia fa’a’ī roa i tō’u orara’a ’e ’ia mani’i roa tōna mana.
Tē ora nei te ta’ata pāpa’i i Utaha, Marite.