Te reo o te feiā mo’a i te mau mahana hope’a nei

E aroha marū e 25 matahiti i muri mai

Nā Mike Collins, California, Marite

’Ua māuruuru vau ’ua fa’a’ohipa te Atua i te hō’ē rata mo’ehia nō te rave i te hō’ē o tōna aroha marū.

Hōho’a hō-mai-hia e te ta’ata pāpa’i

I te ha’api’ira’a vau i te ha’api’ira’a evanelia po’ipo’i i Eureka, i California, i te Marite, ’ua ani au i tā’u mau pīahi ’ia feruri ia rātou iho ’āhani ’o rātou e 10 matahiti i muri mai. ’E ’ua ani au ia rātou ’ia pāpa’i i te hō’ē rata ma tō rātou ’itera’a pāpū nō te ’evanelia ’e te tahi atu mau mea tā rātou e hina’aro e fa’a’ite ia rātou iho i teienei. ’Ua parau vau ia rātou ē, e hāpono vau i te mau rata 10 matahiti i muri mai.

’Ua he’e te tau ’e ’aita vau i hāpono i te mau rata. I te hō’ē mahana, e 25 matahiti i muri mai, ’ua ’itehia mai e tā’u tamāhine ia Heidi te mau rata ’e ’ua ani mai e aha te reira. I muri a’e i tō’u fa’ata’ara’a i te mea tā’u i ’ōpua na, ’ua ’imi ’oia i te mau vāhi nohora’a o tā’u mau pīahi tahito ma te fa’a’ohipa i te mau mauha’a tūreiara’a tōtiare.

Fa’ahōho’ara’a nā Alex Nabaum

I muri a’e i tōna hāponora’a atu i te mau rata, ’ua fa’ari’i māua i te tahi mau pāhonora’a rahi. ’Ua pāpa’i te hō’ē o tā’u mau pīahi tahito :

« Tē hina’aro nei au i tō ’oe pāpā ’ia ’ite ē, ’ua ’itehia mai iāna teie mau rata nō te hō’ē tumu. Tē tāfifi ra tā’u tamāhine 18 matahiti ’e tōna ’itera’a pāpū ’e ’ua tae mai te mana’o ē, e ’ere nōna te ‘rirora’a ’ei tamāhine maita’i roa nō te mau mahana hope’a nei’. ’Aita ’oia e fa’a’ite mai i tōna mana’o ia mātou. E taime fifi mau. »

’Ua oti roa tā’u pīahi tahito i te tai’ora’a ’oia i te hō’ē mea tā tāna tamāhine i pāpa’i i ni’a i te hō’ē blog, ’e ’ua nā ’ō mai :

« I ’ite au ē, tītauhia iā’u ’ia paraparau iāna nō ni’a i te reira. Mai tei mātarohia, ’ia tupu ana’e teie mau paraparaura’a, e hi’o ’āfaro noa ’oia ma te ’ōrure ia ’oe, ’aita ’oia e parau i te hō’ē mea. ’Ua hōro’a atu vau i tā’u rata ma te parau ē, ’ua hina’aro vau ’ia tai’o ’oia i te reira.

« ’Ua ’ite au iāna i te tai’o-fa’ahou-ra’a i te paratarāfa mātāmua e rave rahi taime. ’Ua pāpa’i au ē, ’aita vau i ’ite ē, e ’itera’a pāpū ānei tō’u, ’e e mea teimaha roa nō’u te vaira’a e melo nō te ’ēkālesia, ’e pēnei a’e ē, e ’ere nō’u.

« ’Ua ha’amata ta’u tamahine i te ta’i. ’Ua hina’aro vau iāna ’ia ’ite ē, tē māramarama mau nei au i tāna mau tāfifira’a. E’ita roa atu ’oia e ti’aturi mai ’āhiri ’aita taua rata ra ! ’Ua ’āfāfā ri’i mai te papa’i i rotopū ia māua, ’e ’ua mana’o vau ē, tano maita’i teie rata, mai te tahi aroha marū ïa. ’Āhani vau i fa’ari’i i te reira 10 matahiti nā mua atu, ’ua fa’aru’e paha ïa vau i te reira, ’aore rā, ’ua mo’e te reira ! ’A ha’amāuruuru i tō ’oe pāpā nō te ha’apāpa’ira’a ia mātou i teie mau rata ’e nō te mo’era’a i te reira i teie mau matahiti ato’a ! E ’ere i te tano nei. »

Tē tīa’i nei tō tātou Metua here i te ao ra i tāna mau māmoe ato’a, ’e i roto i tāna tārena fa’ahiahia, e nehenehe tāna e fa’atupu i te aroha marū ’e te mau temeio nā roto ia tātou tāta’itahi, nō te fa’aho’i mai ia rātou tei hahi ’ē na, i roto i te nana.