« Nāhea te rirora’a ’ei ta’ata fa’atupu hau i te tauturu iā’u ’ia ha’aputuputu ia ’Īserā’ela ? », Liahona, Māti 2024.
Mai, pe’e mai
Nāhea te rirora’a ’ei ta’ata fa’atupu hau i te tauturu iā’u ’ia ha’aputuputu ia ’Īserā’ela ?
’Ua ’ite Nephi ē, e mārō te ta’ata i te mau mahana hope’a nei i te tahi ’e te tahi (hi’o 2 Nephi 28:3–4, 20), e ’ere rā te mārōra’a i te haere’a a te Fatu. Teie rā, nō te ha’aputuputu ia ’Īserā’ela, e ti’a ia tātou e nā roto i te « rāve’a teitei a’e ’e te mo’a a’e »1 ’e vetahi ’ē.
’Ua ha’api’i te peresideni Russell M. Nelson : « Mai te mea e mana’o pāpū tō ’outou nō ni’a i te tauturura’a ’ia ha’aputuputu ia ’Īserā’ela ’e nō ni’a i te patura’a i te mau autā’atira’a e vai ē a muri noa atu, teie te taime nō te tu’u i te hiti i te ’īriā. Teie te taime nō te fa’aea i te onoono ē, tō ’outou terā ’ē’a ’aore rā ’aita. Teie te taime nō te fa’aea i te rave i te mau mea ’e fa’ahaere ia vetahi ’ē i ni’a i te mau huero mo’a, nō tō rātou ri’ari’a ’ia fa’a’ino’ino ia ’outou. Teie te taime nō te huna i tā ’outou mau mauha’a tama’i. Mai e mea ē, ’ua ’ī tā ’outou ha’apu’era’a parau i te fa’a’ino’ra’a ’e te mau parira’a, te taime teie nō te tu’u ’ē atu te reira. E ti’a mai ïa ’outou ’ei tāne ’aore rā ’ei vahine pūai nō te Mesia i te pae vārua ».2
’Ua here te Metua i te ao ra ’e o Iesu Mesia i te mau tamari’i ato’a a te Atua, noa atu tō rātou mau ta’a-’ē-ra’a. Tē tāmata nei Sātane i te fa’a’ohipa i tō tātou mau ta’a-’ē-ra’a nō te vāhi ia tātou, nā roto rā i te mā’itira’a i te hau ’eiaha rā te mārōra’a, e fa’atupu tātou i te hō’ē vāhi fa’ari’ira’a maita’i ’o tē ’ume mai i te ta’ata i te ’evanelia a te Fatu tei fa’aho’i-fa’ahou-hia mai.
’A feruri i te mau ’ohipa i muri nei ’e ’a feruri i te mau rāve’a tā ’outou e nehenehe e pāhono ma te here :
Mai te mea e mana’o pūai tō ’oe nō ni’a i te hō’ē ’avei’a poritita, nāhea ’oe i te fa’a’ite i te mana’o fa’ari’i i roto i te mau ’āparaura’a ’e te feiā e mana’o pāto’i tō rātou ?
Mai te mea ’aita tō ’oe ’utuāfare e au ra te tahi i te tahi, nāhea ’oe i te fa’atupu i te hō’ē vāhi nō te hau ’e te fa’ari’i maita’i ?
Mai te mea tē māuruuru ’ore ra ’oe i te hō’ē ’ohipa ’o tā ’oe i tai’o i ni’a i te mau rāve’a ha’apararera’a tōtiare, e aha tā ’oe e rave nō te ’ape i te mārōra’a ?