Te reo o te feiā mo’a i te mau mahana hope’a nei

’Ua ’ite au ’ua pāruruhia vau

Nā Ljubica Blaevic, Herzegovina-Neretva Canton, te tā’atira’a nō Bosnia-Herzegovina

Tē ’ū’ana ra te hō’ē tama’i i rāpae, ’a tai’o ai rā vau i te Buka a Moromona, ’ua putapū vau i te hau ’e ’aita vau i mata’u.

Fa’ahōho’ara’a nā Alex Nabaum

I te matahiti 1992, ’ua ’ū’ana roa te tama’i i Yugoslavie. ’Ua tupitahia tō mātou ’oire o Mostar i te mau mahana ato’a. ’Ua fa’ataimehia te tā’āto’ara’a o te mau ’ohipara’a tīvira, tae noa atu i te ’ohipa a te fare rata.

Terā rā, i te 1 nō ’Ēperēra, ’ua pātōtōhia mai i tō’u ’ōpani. I tō’u ’īritira’a i te reira, ’ua hōro’a mai te hō’ē ta’ata ’o tā’u i ’ore a’ena i ’ite, i te hō’ē pū’ohu nā tā’u tamāhine, ’o tē ora ra i Malaga i Pāniora, i reira tōna ’āmuira’a atu i Te ’Ēkālesia a Iesu Mesia i te Feiā Mo’a i te mau Mahana Hope’a nei. I roto tē vai ra hō’ē nene’i o te Buka a Moromona.

’Ua ha’amata vau i te tai’o i te reira i taua iho mahana ra. Tē tāmau noa ra te hō’ē tama’i i rāpae, i tō’u rā tai’ora’a, ’ua putapū vau i te hau ’e ’aita vau i mata’u. I muri a’e, ’ua ha’api’i mai au ē, te hau tā’u i putapū ’o te Vārua Maita’i ïa. ’Ua ’ite au ’ua pāruruhia vau ’e e’ita vau e pohe.

’A tai’o ai au, ’ua ha’api’i mai au nō ni’a ia Iesu Mesia ’e tē ora noa nei ā ’oia. ’Ua ha’api’i mai au nō ni’a i te bāpetizora’a ’e te ’Ēkālesia a te Fa’aora. E au ra ’iā’u ē, te mau mea ato’a tā’u i tai’o e parau mau ïa. I te tahi taime, e pāhono mai tā’u tamāhine i tā’u mau uira’a.

I te pohera’a tā’u tāne fa’aipoipo i te matahiti 2019, ’ua fa’aoti au e haere i te fenua Marite, tei reira tā’u tamāhine i te orara’a i teienei. ’Ua hina’aro vau e hi’o iāna ’e ’ia ha’api’i rahi atu ā nō ni’a i te ’Ēkālesia tei fa’aho’i-fa’ahou-hia mai.

’Ua fa’aea vau i Roto Miti, Utaha, e maha ’āva’e ’e te ’āfa. ’Ua haere au i te purera’a i te mau hepetoma ato’a ’e tā’u tamāhine. ’Ua tae mai te hō’ē nino’a mana’o e’ita e ti’a iā’u e fa’ata’a atu. ’Ua pe’e au i te mau ha’api’ira’a a te mau misiōnare. ’Ua ’ite au e parau mau ana’e te reira. ’Ua ora vau i te mahana nehenehe roa a’e o tō’u orara’a, ’a tomo ai au i roto i te pape nō te bāpetizora’a ’e ’a ha’amauhia ai au ’ei melo nō Te ’Ēkālesia a Iesu Mesia i te Feiā Mo’a i te mau Mahana Hope’a nei i te 27 nō Tiurai 2019.

I tō’u tomora’a atu i roto i te piha ’ia ha’amauhia vau i muri a’e i tō’u bāpetizora’a, tē ta’i ra te mau ta’ata ato’a. ’Ia bāpetizohia ’e te fa’ari’ira’a i te hōro’ara’a o te Vārua Maita’i, e hōro’a rahi ïa nō ’ō mai i tō tātou Metua i te ao ra. I muri a’e i tō’u ha’amaura’ahia, ’ua ’ite au ē, ’ua matara te ra’i ’e tei reira pā’āto’a mātou. I roto i tō’u ha’amaita’ira’a pātereāreha i muri iho, ’ua fa’ari’i au e rave rahi mau fafaura’a ta’a ’ē ’e te mure ’ore.

E parau mau te Buka a Moromona. Nā roto i te tai’ora’a ’e te purera’a nō te reira, e nehenehe tātou e fa’ari’i i tō tātou iho ’itera’a pāpū nō te reira. Nā roto i teie ’itera’a pāpū, e ’ite ïa tātou ē, e peropheta o Iosepha Semita ’e nā roto iāna, ’ua fa’aho’i-fa’ahou-hia mai te ’Ēkālesia mau a Iesu Mesia i ni’a i te fenua nei.