Երեց Ի. Ռայմոնդ Էգբո

Բարձրագույն Իշխանություն Յոթանասունական

Մինչ երեց Ի. Ռայմոնդ Էգբոն Նիգերիայի կրոնական գիշերօթիկ դպրոց էր հաճախում, նրա ավագ քույրը անընդհատ հրավիրում էր նրան «գալ և տեսնել», թե ինչ էր առաջարկում Հիսուս Քրիստոսի Վերջին Օրերի Սրբերի Եկեղեցին: 14 տարեկանում նա սկսեց երեկոյան հաճախել սեմինարիա։

Սեմինարիայի ուսումնասիրության դասընթացը կարդալիս երեց Էգբոն կարդաց Վարդապետություն և Ուխտեր 135 բաժինը և Ջոզեֆ Սմիթի նահատակության մասին:

«Ինչ-որ զորեղ բան հուզեց ինձ, և ես իմացա, որ մարգարե Ջոզեֆ Սմիթը Աստծո մարգարեն էր: Ես գիտեի, որ նա սպանվել է ճշմարտության համար»,- ասել է երեց Էգբոն, որը շուտով միացավ Եկեղեցուն: «Ես դեռ զգում եմ, թե ինչ զգացի այդ օրը, երբ կարդացի այդ մասին»:

Ավելի ուշ, երբ նա համալսարանի ուսանող էր, քույրը խրախուսեց նրան ծառայել միսիայում: Նրանց հայրը զայրացած էր նրա վրա ուսումը թողնելու համար, բայց երեց Էգբոն պարբերաբար նամակներ էր գրում հորը, որտեղ նկարագրում էր այն ամենը, ինչ նա անում էր և ուսուցանում:

Ի զարմանս երեց Էգբոյի՝ իր միսիայի ավարտին մոտ նրա միսիայի նախագահը կարդաց նրա հոր նամակը, որտեղ ասվում էր, որ հայրը մկրտվել էր: «Ասացեք նրան, որ ես կսպասեմ իրեն»,- գրել էր հայրը։

Երեց Իդիո Ռայմոնդ Էգբոն ծնվել է 1974 թվականի հունիսի 25-ին, Պորտ Հարքուրտ քաղաքում (Ռիվերս նահանգ, Նիգերիա)՝ Ուդո Իդիո Էգբո և Վերոնիկա Ուկամակա Էգբոների ընտանիքում: Նա հանդիպեց Կոմֆորտ Իկիպ Էսեին, երբ ապագա կնոջ ընտանիքը 1994 թվականին տեղափոխվեց իրենց ճյուղը: Նրանք ամուսնացան 2003 թվականի մայիսի 15-ին՝ Կալաբարում (Նիգերիա): Նրանք ունեն երեք զավակ:

Երեց Էգբոն երեք համալսարաններում ստացել է կրթության, տարածաշրջանային պլանավորման և բիզնեսի կառավարման աստիճաններ: Նա 2002 թվականից աշխատել է Սեմինարիայի և կրոնի ինստիտուտում տարբեր պաշտոններում, այդ թվում՝ որպես երկրի տնօրեն և տարածքային տնօրեն:

Իր կոչումը ստանալու պահին երեց Էգբոն ծառայում էր որպես Տարածքային Յոթանասունական Աֆրիկայի Արևմտյան Տարածաշրջանում: Նա ծառայել է որպես Նիգերիայի Կալաբար միսիայի նախագահ և եղել է ցցի նախագահության խորհրդական և բարձրագույն խորհրդական: Նա լիաժամկետ միսիա է ծառայել Նիգերիա Լագոս Միսիայում: