Ana Iteraniba te Aono
Maiuakinan Tangiran te Tembora
Betty McIlwaine e ururinga te kimwareirei are e namakinna ngke ngaia ma buu are tia n motirawa, ae Bill, a reireinaki bwa utu a kona n akea tokiia rinanon otenati aika karaoaki n temboran Ana Ekaretia Iesu Kristo Ibukiia Aika Itiaki ni Boong Aika Kaitira. Imwiin ae raka iaon onobwi te ririki n riki bwa membwa n te Ekaretia, e teimatoa n kukurei n nebonebo ni katoa wiiki ao n beku n te Adelaide Australia Tembora.
Ni katoa wiiki, Betty e karinna n ana bwai te Ekaretia ae te FamilySearch app ni kakaeaia ana koraki ake a tia n motirawa bwa ena buokiia n karekea nakoia taian kakabwaia n te tembora. E taku, “Te namakin ae e onoti uotakin araia au utu nakon te tembora, iangoan maiun te aomata anne, ao te tataro bwa e na butimwaea te euangkerio ao ana otenanti.”
Ngkana e tanrikaaki n tara oin maiuna, ao e taku Betty, “Tamau are i Karawa ea tia n karaoa ae tamaroa ibukiu ao au utu.”
E bungiaki n 4 n Tianuare 1932 i Kadina, n te Yorke Peninsula i South Australia. Inanon tain te Great Depression ao tamana, temanna maibuakoia ake a kakaea aia mwakuri, e kamwaingiia ana utu nako Whyalla bwa ena mwakuri n teuana te tiriba ae tibwa uki.
A maeka n te auti n rianna iaon te bike ni karokoa are e a kona taman Betty n katea aia auti. E uringa, “Ni karokoa tokin am taratara, ao te bike e onrake irouia utu aika a maeka n taian auti n rianna.” Ataei a tangira te maeka ikekei ao a nanako n tebotebo i taari n taai ake a tangiria.
N 1950 Betty e kaitiboo ma kainabana ae Bill, are e mwaing mai Belfast, Northern Ireland ibukin karekean naba te mwakuri n te tiriba. A mareaki teuana te ririki imwiina ao a reke natiia teniman mmwane ao temanna te aine, ma te kananokawaki bwa, te kabuanibwai inanon te kawai e anaa maiun natiia are te kauoman n ikawai, ae Donal, ngke tibwa 21 ana ririki. Ngkai Betty ai 11 tibuna ao 26 tibutorona ao e taku, “A bane n tamaroa.”
Natiia te ikawai, Michael, e moan kaitiboo ma mitinare man Ana Ekaretia Iesu Kristo Ibukiia Aika Itiaki ni Boong Aika Kaitira n ana reirei te moan rinan. N te tai anne, te reirei e kakaraoa te angareirei man ekaretia aika kakaokoro ao Michael e aki totoki n oki n ingainga n tuangiia ana utu kukureina n taian kiraati aika.
E aki maan ao mitinare a kawara te utu ae McIlwaines ao n reiakiniia kain te utu ae bwanin ana euangkerio Iesu. E uringa Betty namakinan mwaakan te Tamnei ae Raoiroi n moan kaitiboona ma kain te Whyalla Mwaanga, moarara riki n tain te bootaki n toa.
Te utu ae McIlwaine a bwabetitoaki n taarin Whyalla n 29 Ritembwa 1962. N bong te Kiritimati n 1967, aia utu ae bwanin a kibwa nako New Zealanf bwa ana kabaeaki bwa te utu ae akea tokina n te Hamilton New Zealand Tembora. Imwiin aia moan tai ni kawara te tembora Betty ma Biil “e reke tangiran te tembora irouia” ao a okiokiria “ n taai ake a kona iai n reke kantokaia.”
E bati te ririki imwiin, n 2000, e katabuaki te Adelaide Australia Tembora, ao ni katoa namwakaina, Bill ma Betty a mwananga aua te aoa mai Whyalla bwa ana beku ao n nebonebo ikekei. Ngkane n 2003, a “korea te mronron iaon mwakoro ake 30–te miniti kaean te tembora mai iai” ao a kakabwaiaaki bwa e reke mwengaia ae ti tebwina–te miniti raroana man te tembora. A moana aia beku n te tembora ni katoa uoua te bong ao a karaoa aio inanon 10 te ririki ni karokoa ea aoraki Bill.
Betty e okira manga tein kakawaran te tembora irouna mai mwaina imwiin motirawan Bill n 2015 ao ngkai, n ana ririki ae 91, e taku, “Au kaantaninga bwa nna kakaraoa aei ni karokoa aei ni karokoa mateu”.
Inanon Maati 2023, natina are Michael e weteaki bwa ena beretitenti n te Adelaide Australia Tembora, ao kainaba, ae Caroline, bwa te temple matron. Betty e “rang kukurei” ngke e a ataia ao e kakoaua bwa, “Bill e wingare mai karawa”.
Maten natina are Donal ao, ae manga boou riki, are maten kainabana are Bill e karekea te nano n kakaitau iroun Betty ao n ataia bwa te kakabwaia ataakin Ana Kainibaire ni Kakukurei te Atua bwa e na kaitibooia utu n te maiu are akea tokina.
E tangira te koaua n te euangkerio are utu a kona n riki n akea tokiia. “Bon te bwai ni kaunganano ae korakora bwa tina kateimatoaira iaon te kawai are eti man irariki bwa tina kona n mang akaitibooaki ma ara utu n te maiu are imwiina.”