Abril

Gipahiuli ni Jesukristo ang Iyang Simbahan sa Ulahing mga Adlaw

“Ako nakapadala sa kahingpitan sa akong ebanghelyo pinaagi sa kamot sa akong sulugoon nga si Joseph” (D&P 35:17).

Dugangi ang mga ideya nga gihatag dinhi og pipila nga imong mahunahunaan. Matag semana, pagplano og mga paagi sa (1) pag-ila sa doktrina, (2) pagtabang sa mga bata sa pagsabut niini, ug (3) pagtabang kanila nga magamit kini sa ilang kinabuhi. Pangutan-a ang imong kaugalingon, “Unsa ang buhaton sa mga bata aron makakat-on, ug unsaon nako sa pagtabang nga mobati sila sa Espiritu?”

Kanta: Kanta nga imong gusto gikan sa Songbook sa mga Bata

Semana 1: Sa pagkamatay ni Jesukristo ug sa Iyang mga Apostoles, ang mga kamatuoran sa ebanghelyo nawala.

Ilha ang doktrina (panaghisgot): Hangyoa ang mga bata sa pagngalan og mga butang nga gitudlo ni Jesukristo sa dinhi pa siya sa yuta. Pagpakita og litrato ni Kristo nga nag-orden sa mga Apostoles. Ipasabut nga human mamatay ug mabanhaw si Kristo, ang Iyang mga Apostoles mitudlo sa ebanghelyo, apan daghang tawo ang wala maminaw; unya, nangamatay ang mga Apostoles, ug ang pipila ka importanting kamatuoran sa ebanghelyo wala na matudlo. Isulat sa pisara ang “Sa pagkamatay ni Jesukristo ug sa Iyang mga Apostoles, ang mga kamatuoran sa ebanghelyo nawala,” ug pasultiha ang mga bata niini dungan nimo.

Ang pag-drawing magtugot sa mga bata nga makapahayag sa ilang panabut sa mga baruganan sa ebanghelyo. Ganahan ang mga bata nga makakita sa kaugalingon nilang litrato nga gamitong visual aid.

I-awhag ang pagsabut (pag-drawing og mga litrato): Isulat sa pisara ang pipila ka baruganan sa ebanghelyo nga nawala o nausab atol sa Apostasiya (sama pananglit, bunyag, priesthood, mga templo, buhing mga propeta, ug sakrament). Bahina ang mga bata sa ginagmayng grupo. Hatagi ang matag grupo og papel nga may sulat nga usa ka baruganan sa ebanghelyo, ug hangyoa ang mga bata sa pag-drawing og litrato nga magrepresentar niana nga baruganan. Pagdapit og usa ka bata gikan sa matag grupo sa pagbutang sa ilang litrato sa pisara. Ipasabut nga sa dinhi pa si Kristo sa yuta, gitudlo Niya kining tanang importante nga kamatuoran sa ebanghelyo. Hangyoa ang mga bata sa pagpiyong. Tangtanga ang tanang litrato ug tagoa kini. Dayon hangyoa ang mga bata sa pagbuka sa ilang mga mata. Ipasabut nga ang mga kamatuoran sa ebanghelyo nawala human sa pagkamatay ni Jesukristo ug sa Iyang mga Apostoles. Sultihi ang mga bata nga ang ebanghelyo gipahiuli pinaagi ni Joseph Smith. Ibalik ang mga litrato, ug ipamatuod nga anaa sa Simbahan ni Jesukristo sa Ulahing mga Adlaw ang tanang kamatuoran nga kaniadto nawala. (Hipusa ang mga litrato aron magamit sa semana 4.)

Semana 2: Ang Langitnong Amahan ug si Jesukristo mipakita kang Joseph Smith.

Ilha ang doktrina (pagtan-aw og litrato): Tabuni og gagmayng papel ang litrato sa Unang Panan-awon. Dapita ang mga bata sa pagkuha sa mga papel nga tinagsa-tagsa. Hangyoa ang mga bata sa hilom nga pagtaas sa ilang kamot kon mahibalo sila kon unsa kana nga litrato. Human ang tanang papel nakuha na, hangyoa ang mga bata sa pagsulti nimo kon unsa ang hitabo diha sa litrato.

I-awhag ang pagsabut (pagbasa sa mga kasulatan): Ipakita sa mga bata kon asa sa mga kasulatan kita makabasa sa paghulagway ni Joseph Smith sa iyang kasinatian didto sa Sagradong Kakahoyan (Joseph Smith—Kasaysayan 1:14–19). Hangyoa ang pipila ka bata sa pagbasa og mga bersikulo nga naghulagway sa nahitabo. Mahimo kang mohangyo sa mas manghod nga mga bata sa paghimo og yano nga mga aksyon, sama sa pagbarug ug pagpataas sa kamot sama sa kahoy o pagkyugpos sama nga nag-ampo sila. Pangutan-a ang mga bata unsa kaha ang bation kon nakakita pa sila sa Langitnong Amahan ug ni Jesukristo nga mipakita ug nakigsulti kang Joseph Smith. Hisguti ang kaimportante niini nga hitabo.

I-awhag ang paggamit (pagpakigbahin og mga pagpamatuod): Pakantaha ang mga bata sa “The Sacred Grove” (CS, 87). Unya ipamatuod nga ang Langitnong Amahan ug si Jesukristo mipakita kang Joseph Smith. Pagdapit og pipila ka bata nga mopakigbahin sa ilang pagpamatuod sa Unang Panan-awon.

Ipamatuod: Samtang magtudlo ka sa mga bata, tinguhaa nga daklit kang makapamatuod sa mga kamatuoran sa ebanghelyo.

Semana 3: Ang awtoridad sa priesthood gipahiuli pinaagi sa langitnong mga mensahero.

Ilha ang doktrina (pagpanganta): Pangutan-a ang mga bata kon unsaon nila sa pagpahibalo ang importante kaayo nga butang. Ipasabut nga kaniadto ang trumpeta patingugon kon may importante kaayong ipahibalo. Hangyoa ang mga bata sa pagpiyong ug pag-imagine nga nadungog nila ang trumpeta samtang nagtukar ang piyanista sa “Ang Priesthood Gipahiuli” (SB, 60). Hangyoa ang mga bata sa pagkanta ug pagpangita sa importanting mensahe nga gipahibalo sa kanta. Hangyoa ang pipila ka bata sa pagpasabut unsay gipasabut sa kanta.

I-awhag ang pagsabut (pagpaminaw sa dinapit nga mga mamumulong): Ipakita sa mga bata ang mga litrato sa pagpahiuli sa Aaronic Priesthood ug sa Melchizedek Priesthood. Pagdapit og usa ka Aaronic Priesthood sa daklit nga pag-istorya sa pagpahiuli sa Aaronic Priesthood (tan-awa sa D&P 13; Joseph Smith—Kasaysayan 1:68–72). Unya dapita ang usa ka Melchizedek Priesthood sa pagsulti sa mga bata kabahin sa pagpahiuli sa Melchizedek Priesthood (tan-awa sa D&P 27:12–13; Joseph Smith—Kasaysayan 1:72). Ipakita og usab ang mga litrato, ug hangyoa ang mga bata sa pagngalan sa mga tawo nga naa sa litrato.

Ang dinapit nga mga mamumulong makahatag og kalainan ug interes sa Primary.

I-awhag ang paggamit (pakigbahin sa pagpamatuod): Pasulata sa papel ang matag bata og usa ka butang nga ania karon tungod sa pagpahiuli sa Aaronic Priesthood (sama pananglit sa, bunyag ug sakrament) ug usa ka butang nga ania karon tungod sa pagpahiuli sa Melchizedek Priesthood (sama pananglit sa, pagkumpirma ug pagpanalangin sa masakiton). Hangyoa ang pipila ka bata sa pagpakigbahin sa ilang gisulat. Isulti ang imong pagpasalamat sa mga panalangin nga gikan sa atong Langitnong Amahan tungod sa pagpahiuli sa priesthood.

Ipahiangay ang mga kalihokan: Ang pipila sa mga kalihokan dinhi sa outline mas mohaum alang sa mas magulang nga mga bata; ang uban mas mohaum alang sa mas manghod nga mga bata. Samtang magplano ka sa imong leksyon, ikonsiderar ang mga edad og abilidad sa mga bata nga imong gitudloan.

Semana 4: Gihubad ni Joseph Smith ang Basahon ni Mormon ug gipahiuli ang mga kamatuoran sa ebanghelyo.

Ilha ang doktrina ug i-awhag ang pagsabut (panaghisgot): Sa dili pa ang klase, isulat ang “Gihubad ni Joseph Smith ang Basahon ni Mormon ug gipahiuli ang mga kamatuoran sa ebanghelyo” sa usa ka papel, ug gunting-guntinga ang papel nga mahimong puzzle. Sa luyo sa matag piraso, isulat ang ngalan sa tawo o butang nga may kalabutan sa paghubad sa Basahon ni Mormon (sama pananglit, Joseph Smith, Urim ug Thummim, anghel Moroni, bulawan nga mga palid, gahum sa Dios, ug Oliver Cowdery). Hatagi ang matag usa og piraso sa puzzle, ug hangyoa sila sa paghisgot kon sa unsang paagi ang butang o tawo nga naa sa luyo may kalabutan sa paghubad sa Basahon ni Mormon. Dapita ang matag usa sa pag-adto sa atubangan, mopakigbahin sa ilang gihisgutan, ug ibutang ang ilang puzzle ngadto sa pisara. Kon makompleto na ang puzzle , basaha ang sentence nga magdungan.

Ang puzzle anaa sa sharingtime.lds.org

I-awhag ang pagsabut (pagpaminaw sa dinapit nga mamumulong): Pagdapit og usa ka priesthood nga modala sa papel ni Joseph Smith ug moistorya giunsa niya sa paghubad ang Basahon ni Mormon. Hatagi siya og mga litrato nga drawing sa mga bata sa semana 1 ug hangyoa siya sa pagpakigbahin sa unsang paagi ang mga baruganan sa ebanghelyo gipahiuli pinaagi ni Joseph Smith. Mahimo siyang magsul-ob og yano nga costume, sama sa itom nga bow tie. Dapita siya sa paghubo sa costume ug mopamatuod kabahin ni Joseph Smith.

I-awhag ang paggamit (pagpakigbahin og mga ideya): Hangyoa ang mga bata sa pagbarug kon makangalan sila og usa ka kamatuoran sa ebanghelyo nga nawala ug gipahiuli pinaagi ni Joseph Smith. Pagdapit og pipila ka bata sa pagpakigbahin sa ilang mga hunahuna. Ipakigbahin ang imong pagpamatuod sa gipahiuli nga ebanghelyo ug sa Basahon ni Mormon.