Oktubre
Akong Ipakigbahin ang Ebanghelyo ngadto sa Tanang Anak sa Dios
“Pasigaa ninyo ang inyong kahayag sa atubangan sa mga tawo aron makita nila ang inyong mga maayong buhat ug dayegon nila ang inyong Amahan nga anaa sa langit” (Mateo 5:16).
Dugangi ang mga ideya nga gihatag dinhi og pipila nga imong mahunahunaan. Matag semana, pagplano og mga paagi sa (1) pag-ila sa doktrina, (2) pagtabang sa mga bata sa pagsabut niini, ug (3) pagtabang kanila nga magamit kini sa ilang kinabuhi. Pangutan-a ang imong kaugalingon, “Unsa ang buhaton sa mga bata aron makakat-on, ug unsaon nako sa pagtabang nga mobati sila sa Espiritu?”
Semana 1: Ang pagsunod sa ebanghelyo makatabang kanako nga mahimong misyonaryo karon.
Ilha ang doktrina ug i-awhag ang pagsabut (pagpaminaw og istorya): Pag-display og litrato sa mga misyonaryo. Pangutan-a ang mga bata unsay buluhaton sa mga misyonaryo. Ipakigbahin ang mosunod nga istorya o gikan sa Friend o Liahona: Usa ka adlaw duha ka misyonaryo nanuktok sa pultahan sa balay. Usa ka babaye nga si Mrs. James miabli sa pultahan. Giingnan siya sa mga misyonaryo nga mga miyembro sila sa Ang Simbahan ni Jesukristo sa mga Santos sa Ulahing mga Adlaw. Gipasulod ni Mrs. James ang mga misyonaryo ug miingon nga gusto siyang makakat-on og dugang kabahin sa Simbahan. … Giingnan ni Mrs. James ang mga misyonaryo nga kaniadto may silingan siyang pamilya nga miyembro sa Simbahan. Miingon siya nga ang mga anak niana nga pamilya matinahuron ug buotan. Maayo silang ikadula sa tanan ug gitahud ang mga butang sa ubang mga tawo. Miingon si Mrs. James nga gusto siyang makakat-on kabahin sa simbahan nga nagtudlo niadtong mga bata nga mahimong maayong mga silingan” (Primary 2, 52). Pangutan-a: “Sa unsang paagi ang mga anak sa silingan ni Mrs. James nahimong mga misyonaryo?” Ipasabut nga kon magsunod kita sa ebanghelyo kita mga misyonaryo. Dapita ang mga bata sa pagsulti dungan nimo sa “Ang pagsunod sa ebanghelyo makatabang kanako nga mahimong misyonaryo karon,” nga maghatag og empasis sa karon.
Semana 2: Ang pagsunod sa ebanghelyo makatabang kanako nga mahimong misyonaryo karon.
I-awhag ang pagsabut (pagpanganta ug paghisgot sa mga sumbanan sa ebanghelyo): Paghimo og 13 ka mga kard, ang matag usa dunay sulat nga “Ang Akong mga Sumbanan sa Ebanghelyo” (tan-awa sa “Sharing Time: Keep the Commandments,” Friend, Hunyo 2006, 36). Ihatag ang pipila sa mga kard ngadto sa mga bata, ug ipapasa nila ang kard sa usag usa samtang ang tanan manganta sa “Gusto Ko Karon nga Mamisyonaryo” (SB, 90). Kon mahuman ang kanta, ipabasa og kusog sa bata nga nakagunit sa kard ang sumbanan ug dayon mopakigbahin sa unsang paagi ang pagsunod niana nga sumbanan makatabang kaniya nga mahimong misyonaryo karon. Balik-balika, gamit ang lahi na sab nga kard.
Ang pagpanganta mahitungod sa doktrina makatabang sa mga bata nga makat-on ug mahinumdom niini. Ang mga bata mas makakat-on usab kon sila dunay makita nga biswal o mobuhat og kalihokan nga uyon sa musika.
I-awhag ang paggamit (paghimo og mga tumong): Hangyoa ang matag bata sa pagpili og usa ka sumbanan sa ebanghelyo nga mas paningkamutan nilang masunod sa moabut nga semana. Ipasulat o ipa-drawing nila ang litrato sa sumbanan diha sa usa ka papel ug tan-awon kini matag adlaw isip pahinumdom. Dapita sila sa pagreport sa ilang mga kasinatian inig ka sunod semana sa Primary.
Semana 3: Ikapakigbahin nako ang ebanghelyo ngadto sa akong pamilya ug mga higala.
Ilha ang doktrina (pagpaminaw og istorya): Sa dili pa ang klase, basaha ang pakigpulong ni Elder Robert C. Oaks sa Oktubre 2000 nga komperensya, “Sharing the Gospel” (tan-awa sa Ensign, Nob. 2000, 81–82). Isugilon sa mga bata ang istorya kabahin sa orange juice. Ipasabut nga ang ebanghelyo mas tam-is pa kay sa orange juice ug kinahanglang ipakigbahin nato kini sa uban. Pasultiha ang mga bata sa, “Ikapakigbahin nako ang ebanghelyo ngadto sa akong pamilya ug mga higala.”
I-awhag ang pagsabut (pagpaminaw sa dinapit nga mamumulong): Pagdapit og usa ka misyonaryo o returned missionary sa paghisgot og mga paagi diin ang mga bata makapakigbahin sa ebanghelyo ngadto sa uban (sama sa pagkamaayo nga ehemplo, pagdapit og mga higala ngadto sa Primary, ug pagpakigbahin sa ilang pagpamatuod) ug sa unsang paagi ang ilang paningkamot sa pagpakigbahin sa ebanghelyo nakatabang sa Langitnong Amahan ug sa mga misyonaryo.
I-awhag ang paggamit (pagpaminaw og istorya ug pagpakigbahin og mga ideya): Pahinumdumi ang mga bata nga mahimo silang mga misyonaryo karon. Pagpakigbahin og usa ka panahon diin ikaw o ang laing tawo nga imong nailhan mipakigbahin sa ebanghelyo. Pabanus-banusa og barug ang mga bata ug pasultiha ang matag usa og pulong o sentence nga “Akong ikapakigbahin ang ebanghelyo.” Dapita ang bata kinsa nagsulti sa “ebanghelyo” sa paghunahuna og paagi nga iyang ikapakigbahin ang ebanghelyo ngadto sa pamilya og mga higala. Balik-balika kutob sa itugot sa panahon.
Semana 4: Malig-on ang akong pagpamatuod kon akong ipakigbahin ang ebanghelyo.
Ang paggamit og mga butang sa leksyon makamugna og interes ug maka-focus sa atensyon sa mga bata sa usa ka baruganan sa ebanghelyo.
Ilha ang doktrina (pagtan-aw og leksyon nga naggamit og butang): Butangi og tubig ang tin-aw nga sudlanan. Ipasabut nga sa matag higayon nga mopakigbahin kita sa ebanghelyo, mas molig-on ang atong pagpamatuod. Butangi og usa ka tolu sa food coloring ang sudlanan. Paghatag og pipila ka ehemplo kon unsaon nato sa pagpakigbahin sa ebanghelyo, magdugang og usa ka tolu sa mao gihapon nga kolor sa food coloring sa matag ehemplo. Ipasabut nga samtang magkaisog ang kolor sa matag tolu sa food coloring, ang atong pagpamatuod magkalig-on sa matag higayon nga mopakigbahin kita sa ebanghelyo.
I-awhag ang pagsabut (paghisgot og mga pagpamatuod): Isulod ang mosunod sa usa ka bag: litrato ni Jesukristo, litrato ni Joseph Smith, litrato sa propeta karon, Basahon ni Mormon, ug mga pulong nga “matuod nga Simbahan.” Isulat sa pisara ang pulong nga pagpamatuod, ug pangutan-a ang mga bata kon unsa ang pagpamatuod. Hisguti ang ilang mga tubag. Isugilon ang mosunod nga istorya: “Usa ka batan-ong babaye nahadlok nga mopamatuod tungod kay dili siya sigurado sa iyang pagbati. Apan nahibalo siyang importante kini, busa usa ka adlaw maisugon siyang mibarug ug mipamatuod, gilista ang lima ka butang nga iyang gituohan. Pagkahuman, nindot ang iyang gibati ug nahibalo nga mas nalig-on ang iyang pagpamatuod.” Padiskubriha ang mga bata sa lima ka butang sa iyang pagpamatuod pinaagi sa pagkuha sa mga butang gikan sa bag nga imong giandam. Hisguti ang matag aytem, ug i-display kini sa atubangan sa kwarto.
I-awhag ang paggamit (pagpakigbahin og mga ehemplo): Tuguti ang matag bata nga mopakigbahin og mga ehemplo kon unsaon niya sa pagpakigbahin ang ebanghelyo. Sa matag higayon nga maghisgot ang bata og mga butang, dugangi og usa ka tolu sa food coloring ang tubig aron makita nga ang pagpakigbahin sa ebanghelyo makalig-on sa mga pagpamatuod. (Kon daghan ang mga bata nimo sa Primary, mahimo nimong himoon kini nga maggrupo aron ang tanang bata may oportunidad sa pagpakigbahin sa mga ideya.)