Mayo

Ang mga Propeta Nagtudlo Kanato sa Pagkinabuhi sa Gipahiuli nga Ebanghelyo

“Sa pagkatinuod ang Ginoong Dios dili magabuhat sa bisan unsa, gawas kon ang iyang tinago ipadayag niya sa iyang mga alagad ang mga propeta.” (Amos 3:7).

Dugangi ang mga ideya nga gihatag dinhi og pipila nga imong mahunahunaan. Matag semana, pagplano og mga paagi sa (1) pag-ila sa doktrina, (2) pagtabang sa mga bata sa pagsabut niini, ug (3) pagtabang kanila nga magamit kini sa ilang kinabuhi. Pangutan-a ang imong kaugalingon, “Unsa ang buhaton sa mga bata aron makakat-on, ug unsaon nako sa pagtabang nga mobati sila sa Espiritu?”

Semana 1 ug 2: Ang buhi nga propeta nangulo sa Simbahan ubos sa direksyon ni Jesukristo.

Ilha ang doktrina (pagtan-aw og mga litrato ug pagdula): Pagpakita og litrato sa buhing propeta. Hangyoa ang ubang mga bata nga magbanus-banos sa pagpangulo sa Primary sa paghimo og yano nga aksyon sama sa paglukso o pagpakpak. Itudlo ang litrato sa propeta ug ipasabut nga siya ang Presidente sa Simbahan ug kinahanglan kitang mosunod sa iyang gihangyo nga atong buhaton. Pangutan-a: “Kinsa ang gisunod sa propeta?” Pagpakita og litrato ni Jesukristo, ug ipasabut nga ang propeta nagtrabaho ubos sa Iyang direksyon.

I-awhag ang pagsabut (paghisgot sa mga pagtulun-an sa propeta): Ipakita sa mga bata ang pinakabag-o nga isyu sa komperensya sa Ensign o Liahona. Ipasabut nga sa kinatibuk-ang komperensya, ang propeta nagtudlo nato unsay gusto ni Jesukristo nga atong buhaton. Pagpili og mga sentence gikan sa mga pakigpulong sa propeta, ug dapita ang mga bata sa pagbasa niini og kusog. Ang tanan, magtinabangay sa paghimo og lista sa mga butang nga mahimo sa mga bata sa pagsunod sa propeta.

I-awhag ang paggamit (pag-drawing og litrato): Hatagi og papel ang matag bata. Dapita sila sa pagpilo niini og katunga. Hangyoa sila sa pag-drawing og litrato sa propeta sa katunga sa papel ug sa pagsulat o pag-drawing og usa ka paagi nga sila mosunod sa propeta sa katunga nga bahin. Dapita ang mga bata sa pagbarug ug paggunit sa ilang mga litrato samtang manganta sila sa “Sunda ang Propeta” (SB, 58–59).

Alang sa semana 2, tudloi ang mga bata og butang mahitungod sa gitudlo sa propeta sa bag-ohay lang nga kinatibuk-ang komperensya. Samtang magplano ka og mga kalihokan nga imong gamiton, hunahunaa kon unsaon nimo sa pag-ila ang pagtulun-an sa propeta ug pagtabang sa mga bata nga makasabut ug mogamit niini sa ilang kinabuhi.

Semana 3: Gitudlo sa mga propeta ang pagbayad og ikapulo.

Ilha ang doktrina (pagbasa og kasulatan ug pagpaminaw og istorya): Ipasabut nga si Malaquias usa ka propeta sa Daang Tugon nga mitudlo sa mga tawo sa pagbayad sa ilang ikapulo. Hangyoa ang usa ka bata sa pagbasa sa Malaquias 3:10 samtang maminaw ang ubang bata sa gisaad kanato sa Ginoo kon mobayad kita sa ikapulo. Ipasabut nga ang “buksan ko kaninyo ang mga tamboanan sa langit” nagpasabut sa mga panalangin nga atong madawat kon mobayad kita sa ikapulo.

I-awhag ang pagsabut (pagtan-aw og leksyon nga naggamit og mga butang sa pagtudlo): Pagdapit og napulo ka bata sa pag-adto sa atubangan. Hatagi og mansanas ang matag usa (o laing prutas) ug hangyoa sila sa paggunit sa ilang mansanas ug maghunahuna nga sila kahoy nga mansanas. Ingna ang laing bata sa “pagpu-po” sa mga mansanas ug isulod kini sa basket. Ipasabut nga ang ikapulo mao ang ikanapulo nga bahin sa atong kinitaan ug sagad bayaran og kwarta, apan may panahon kaniadto nga bayaran kini sa mga tawo og bisan unsa nga naa nila. Pangutan-a kon pila ka mansanas ang ihatag sa bata ngadto sa bishop alang sa ikapulo.

mga bata magpakaaron ingnon nga namupu-po ug mansanas

I-awhag ang paggamit (paghisgot sa ikapulo): Pagpakita og resibo sa ikapulo ug sobre. Hisguti ang proseso sa pagbayad og ikapulo. Dapita ang mga bata sa pagpakigbahin sa unsang paagi napanalanginan ang ilang pamilya sa pagbayad og ikapulo. Ipamatuod ang mga panalangin tungod sa pagsunod sa tambag sa mga propeta sa pagbayad og ikapulo.

Semana 4: Nagtudlo ang mga propeta kanako sa Pulong sa Kaalam.

Ilha ang doktrina (pagbasa sa kasulatan): Hangyoa ang mga bata sa paghisgot og panahon dihang gipasidan-an sila sa ilang mga ginikanan kabahin sa peligro. Pangutan-a sila nganong pasidan-an man sila sa ilang mga ginikanan. Ipasabut nga ang Langitnong Amahan nahigugma kanato ug nagpasidaan kanato sa peligro pinaagi sa mga propeta. Hangyoa ang usa ka bata sa pagbasa sa Doktrina ug mga Pakigsaad 89:4, ug papaminawa ang mga bata kon unsa ang gipasidaan. Ipasabut nga si Propeta Joseph Smith nakadawat niini nga pasidaan, ang Pulong sa Kaalam, isip pagpadayag gikan sa Dios.

I-awhag ang pagsabut (pagbasa sa mga kasulatan): Sa dili pa ang klase, ipapilit ang mosunod nga mga reference sa kasulatan sa ilawom sa lain-laing lingkuranan: D&P 89:7, D&P 89:8, D&P 89:9, D&P 89:10, D&P 89:12, D&P 89:16. Ipasabut nga gihatagan kita og pisikal nga lawas sa Langitnong Amahan ug gusto Siya nga kini atong atimanon; gihatag Niya kanato ang Pulong sa Kaalam aron mahibalo kita unsang mga butanga ang makatabang sa atong lawas ug unsay makadaot niini. Hangyoa ang mga bata sa paglili ilawom sa ilang gilingkuran aron makita ang mga reference sa kasulatan. Dapita ang matag bata nga nakakita sa reference sa pagbasa og kusog sa kasulatan. Hisguti unsay ipasabut sa bersikulo. Iklaro nga ang “isug nga mga ilimnon” mao ang makahubog “ang mainit nga mga ilimnon” mao ang kape ug tsa.

I-awhag ang paggamit (pagdula): Sudli ang bag og litrato sa lain-laing pagkaon, mainom, ug ubang butang nga makaayo o makadaot sa lawas. Pagdapit og usa ka bata sa pagpili og litrato gikan sa bag ug ipakita kini sa uban. Hangyoa ang mga bata sa pagnga-nga kon ang butang maayo o sa pagtabon sa ilang baba kon ang butang dili maayo. Basaha ang Doktrina ug mga Pakigsaad 89:18–21 ug hisguti ang mga panalangin nga madawat kon sundon nato ang tambag sa propeta sa pagsunod sa pulong sa kaalam.

mga bata nga nagtan-aw sa mga litrato — Ang mga bata makakat-on pinaagi sa makalingaw nga mga kalihokan ug mga lihok ug sa gihapon magpabilin ang kinaiya sa balaang pagtahud.

Mga tabang alang sa lider sa musika

Ang kanta karong bulana mahimo nga “Salamat, O Dios, sa Propeta” (Mga Himno ug mga Awit sa mga Bata, nu. 36). Ang mosunod mao ang pipila ka mga ideya nga magamit sa pagtudlo og bisan unsang kanta. Bisan og ang mga ginunting maoy gigamit niini nga ehemplo, sa pipila ka kanta ang mga litrato mahimong gamiton sa pagtudlo sa mga kabataan.

Isulat ang hugpong sa mga pulong sa kanta sa lahi nga kolor sa ginunting nga pulong (o isulat ang matag hugpong sa pulong sa lahi nga kolor). Bahina sa duha ang matag hugpong sa pulong. Gamita ang bisan unsa sa mosunod nga pamaagi sa pagtudlo sa kanta:

Ibutang bisan asa ang mga ginunting nga pulong libut sa kwarto. Tuguti ang pipila ka bata nga moporma sa hugpong sa mga pulong sa husto nga pagkahan-ay samtang kamo og ubang mga bata mobalik-balik sa pagpanganta. Kantaha ug hisguti ang hugpong sa mga pulong, ug dayon kantaha ang tanan.
Sugdi sa ginunting nga pulong nga naa sa pisara. Kantaha kini uban sa mga bata. Hangyoa ang usa ka bata sa pagtang-tang sa usa ka ginunting nga pulong, ug kantahon na usab. Balik-balika hangtud ang tanang ginunting nga pulong natangtang na.
Ibutang ang unang bahin sa hugpong sa pulong diha sa pisara sa husto nga pagkasunod ug isulat ang ikaduhang bahin diha sa pisara nga dili magsunod. Kantaha ang unang bahin sa hugpong sa pulong ug hangyoa ang mga bata sa pagpangita sa ikaduhang bahin sa hugpong sa pulong ug pagpasabut niana nga hugpong sa pulong.
Bahina sa duha ka grupo ang mga bata. Ipakanta sa usa ka grupo ang unang bahin sa matag hugpong sa pulong ug ang ikaduhang grupo sa ikaduhang bahin. Magpuli ang mga grupo ug balikon.