Disyembre

Nahibalo Ko Nga si Jesukristo Moanhi Pag-usab

“Ako nasayud nga ang akong Manluluwas buhi man ug sa kaulahian nga adlaw siya motindog sa ibabaw sa yuta” ( Job 19:25).

Dugangi ang mga ideya nga gihatag dinhi og pipila nga imong mahunahunaan. Matag semana, pagplano og mga paagi sa (1) pag-ila sa doktrina, (2) pagtabang sa mga bata sa pagsabut niini, ug (3) pagtabang kanila nga magamit kini sa ilang kinabuhi. Pangutan-a ang imong kaugalingon, “Unsa ang buhaton sa mga bata aron makakat-on, ug unsaon nako sa pagtabang nga mobati sila sa Espiritu?”

Semana 1: Nanagna ang mga propeta nga si Jesukristo moanhi sa yuta.

I-awhag ang pagsabut (pagbasa sa mga kasulatan): Pag-display og litrato ni Isaias, Nephi, Haring Benjamin, Abinadi, Alma, ug Samuel nga Lamanite gikan sa Libro sa mga Hulagway sa Ebanghelyo ug sa Primary 4 nga pakete sa mga litrato. I-grupo-grupo ang mga bata ug hatagi ang matag grupo og usa sa mosunod nga mga kasulatan nga pangitaon: (1) Isaias 7:14; 9:6; (2) 1 Nephi 11:14–15, 20–21; (3) Mosiah 3:5–8; (4) Mosiah 15:1; (5) Alma 7:10–12; ug (6) Helaman 14:1–3. Hangyoa ang mga bata sa pagpangita kon asa nga propeta ang namulong ug alang kang kinsa ang iyang gipanagna. Hangyoa ang matag grupo nga ipakita ang litrato sa propeta ug sultihan ang ubang bata kon si kinsa siya ug unsay iyang gisulti. (Alang sa manghod nga mga bata, tabangi ang unom ka bata nga magsul-ob og yano nga mga costume nga magpaila sa unom ka propeta. Isulti sa daklit ang kabahin sa matag propeta unsay giingon sa matag usa mahitungod sa pagkatawo ug misyon ni Jesukristo.) Ipasabut nga ang matag usa niini nga propeta nanagna nga si Jesukristo moanhi sa yuta. Kantaha ang “Samuel Tells of the Baby Jesus” (CS, 36). Ipamatuod nga si Jesukristo mianhi sa yuta sigon sa gipanagna sa mga propeta.

Ipamatuod: Kon ikaw giaghat, ipamatuod ang doktrina nga imong gitudlo. Ang Espiritu Santo makasaksi sa matag bata sa kamatuoran sa imong gitudlo. Ang pagpamatuod makatabang sa mga bata nga mobati sa Espiritu ug makadasig kanila sa paglig-on sa ilang mga pagpamatuod.

Semana 2: Si Jesukristo mobalik nganhi sa yuta.

Ilha ang doktrina: Pag-display og litrato sa Ikaduhang Pag-anhi (LHE, nu. 66). Pahinumdumi ang mga bata nga si Jesukristo sa una mianhi isip usa ka bata didto sa Betlehem. Ipasabut nga atong nakat-unan sa mga kasulatan nga Siya moanhi pag-usab.

I-awhag ang pagsabut (pagdula og paris-paris): Paghimo og duha ka set sa pagtugma-tugma sa mosunod nga reference sa kasulatan, nga ang matag reference isulat sa lahi nga papel: Mateo 16:27; Mateo 24:30, 36, 42; Mga Buhat 1:9–11; D&P 36:8; D&P 45:57–59; D&P 88:95–98. Ipakulob sa pagbutang sa pisara ang mga papel. Pabanus-banusa ang mga bata sa pagpili og duha ka papel. Baliha ang papel aron makita kon nagtugma ba kini. Kon wala magkatugma, ibalik kini sa pagpakulob. Kon nagtugma kini, ipakita ang kasulatan ug hangyoa ang mga bata sa pagpangita sa reference aron makita kon unsay gitudlo niini kabahin sa pagbalik ni Kristo. Balik-balika hangtud magkatugma na ang tanan.

Ipahiangay ang mga kalihokan: Ipahiangay ang mga kalihokan nga haum sa naa nga kapanguhaan ug sa mga bata sa imong Primary. Sama pananglit, alang sa application activity sa semana 3, imong madapit ang mga bata sa pagpataas sa usa ka tudlo alang sa matag usa nga ilang mahimo sa pagpangandam imbis isulat sa papel ang ilang mga ideya.

Semana 3: Mangandam ko nga makapuyo uban sa Langitnong Amahan ug ni Jesukristo pag-usab.

Ilha ang doktrina (pagdula og tag-an tag-an): Pagdapit og duha o tulo ka bata sa pag-aksyon nga nangamdam sa pagkatulog, sa pagsimba, o sa pagbiyahe og layo. Dapita ang ubang bata sa pagtag-an kon unsa ang ilang gibuhat. Hisguti uban sa mga bata kon unsay mahitabo kon wala pa kita mangandan sa paghimo niini. Ipasabut nga usa sa importanting butang nga angay natong andamon mao ang pagpuyo uban sa Langitnong Amahan ug ni Jesukristo pag-usab.

bata nga nag-aksyon alang sa pagkatulog

Ang makahatag og atensyon nga mga kalihokan, sama sa pag-aksyon, magamit sa pagmugna og interes ug pagtabang sa mga bata nga maka-focus sa ilang atensyon sa gihisgutan sa leksyon. Ang walay labut maapil usab samtang magtan-aw sila sa ubang bata.

I-awhag ang pagsabut (pagpanganta): Kantaha ang ikatulong bersikulo sa “Ako Anak sa Dios” (SB, 2), ug dapita ang mga bata sa pagpaminaw kon unsaon nato sa pag-andam nga makapuyo og balik sa Langitnong Amahan. Dapita ang mga bata sa pagbarug ug pagkanta og usab sa pulong nga “Kon sugo Niya tumanon”. Ipasabut nga pipila sa mga kanta sa Primary nagpahinumdom kanato sa mga butang nga atong mahimo aron makapuyo og balik uban sa Langitnong Amahan ug ni Jesukristo (sama pananglit sa, “Sundon Ko ang Plano sa Dios” [SB, 67–68], “Sunda ang Kasugoan” [SB, 68–69], “Pagkamabination Magagikan Kanako” [SB, 83], ug ang “Kon Ako Bunyagan” [SB, 53]). Patukara ang pianista og pipila ka nota sa usa niini nga mga kanta, ug ipatag-an sa mga bata kon unsa kini nga kanta. Dapita ang mga bata sa pagkanta ug pagbarug kon mokanta sila kabahin sa paagi nga sila maandam sa pagpuyo uban sa Langitnong Amahan. Balik-balika gamit ang ubang mga kanta.

I-awhag ang paggamit (pag-drawing): Pahunahunaa og paagi ang mga bata aron maandam sila sa pagpuyo uban sa Langitnong Amahan ug ni Jesukristo. Hatagi og papel ang matag bata, ug dapita sila sa paghimo og outline sa ilang kamot. Dayon hangyoa sila sa pagsulat o pag-drawing diha sa matag outline sa tudlo og usa ka butang nga ilang mahimo sa pagpangandam. Hangyoa ang mga bata sa pagpili og usa nianang mga butanga nga maoy ilang buhaton sa semana. Sultihi sila nga hangyoon nimo sila sa pagpakigbahin sa ilang nakat-unan inig ka sunod Dominggo.

mga bata nagpundok libut sa piano nga nanganta

Semana 4: Ako adunay pagpamatuod nga ako anak sa Dios.

Ilha ang doktrina (pagdula og tag-an tag-an): Sa pisara isulat ang, “Ako dunay______________.” Sultihi ang mga bata sa pagpaminaw sa mosunod nga mga timailhan ug sa pagkyugpos ug pagbarug kon sa ilang hunahuna may ikasulat sila sa blangko:

• Naghatag kini’g maayong pagbati kanato, kalipay, o kainit sa sulod.

• Gihatag kini sa Espiritu Santo kanato.

• Nagtabang kini nga kita mopili sa husto.

• Ikapakigbahin nato kini sa uban kon mamulong kita sa Primary, sa family home evening, ug sa miting sa puasa ug pagpamatuod.

Pangutan-a: “Unsa kining talagsaon nga butang?” Sulati ang blangko og pulong nga pagpamatuod, ug sultihi ang mga bata nga makabaton sila og pagpamatuod nga sila mga anak sa Dios.

Ang pagsulat og baruganan sa ebanghelyo makatabang sa mga bata sa paghinumdom niini.

I-awhag ang pagsabut (pagpanganta): Dapita ang mga bata sa pagkanta sa “Ako Anak sa Dios” (SB, 2–3), ug hangyoa sila sa paghunahuna kon unsay ilang gibati samtang nagkanta. Hangyoa ang pipila ka bata sa pagpakigbahin sa ilang gibati. Ipasabut nga ang nabatyagan nilang mga maayong pagbati naggikan sa Espiritu Santo, nagpahibalo kanila nga sila mga anak gayud sa Dios. Ipasabut nga ang pagkahibalo nga kini tinuod nagpasabut sa naangkon nga pagpamatuod. Ipasabut nga dunay daghang paagi aron mahibalo nga kita mga anak sa Dios. Pangutan-a: “Giunsa nimo sa pagkahibalo nga ikaw anak sa Dios?”

I-awhag ang paggamit (pagpaminaw og mga pagpamatuod): Pangutan-a ang mga bata “Nganong importante man ang pagbaton og pagpamatuod nga kita mga anak sa Dios? Sa unsang paagi ang pagbaton og pagpamatuod makatabang sa atong paghimo og hustong mga pagpili?” Ipakigbahin ang imong pagpamatuod ug dapita ang pipila ka mga bata ug hamtong sa pagpakigbahin sa ilang pagpamatuod nga kitang tanan mga anak sa Dios.