Marso
Si Jesukristo ang Atong Manluluwas
“Patalinghug kamo niini nga mga pulong. Tan-awa, Ako si Jesukristo ang Manluluwas sa kalibutan” (D&P 43:34).
Dugangi ang mga ideya nga gihatag dinhi og pipila nga imong mahunahunaan. Matag semana, pagplano og mga paagi sa (1) pag-ila sa doktrina, (2) pagtabang sa mga bata sa pagsabut niini, ug (3) pagtabang kanila nga magamit kini sa ilang kinabuhi. Pangutan-a ang imong kaugalingon, “Unsa ang buhaton sa mga bata aron makakat-on, ug unsaon nako sa pagtabang nga mobati sila sa Espiritu?”
Semana 1: Gitudlo ni Jesukristo ang ebanghelyo ug mipakita og ehemplo kanato.
Ilha ang doktrina (pagpanganta): Kantaha sa makadaghan ang “Do As I’m Doing” (CS, 276), magdapit og lain-laing mga bata sa pagpili og mga aksyon. Ipasabut nga kon mosunod kita sa mga aksyon sa uban, gisunod nato ang iyang ehemplo. Pangutan-a kon si kinsa ang mipakita og perpekto nga ehemplo nga angay sundon (Jesukristo). Dapita ang mga bata sa pagdungan og sulti sa, “Mipakita og ehemplo si Jesukristo kanato.”
I-awhag ang pagsabut (pagbasa sa mga kasulatan): Pagbutang og mga litrato diha sa pisara sa mosunod nga mga hitabo: Si Kristo nga gibunyagan, si Kristo kauban sa mga bata, si Kristo nga nag-ampo, ug si Kristo nga nanudlo. Basaha og dungan ang usa ka kasulatan, ug hangyoa ang mga bata sa pagpasabut kon unsa ang gitudlo ni Kristo niana nga kasulatan: Marcos 16:15; Juan 13:34–35; 3 Nephi 11:37; 3 Nephi 18:19. Hinay-hinaya sa pagtudlo ang matag litrato ug dapita ang mga bata sa pagbarug kon imong matudlo ang litrato nga nagpakita sa gitudlo ni Kristo nga atong buhaton diha sa gibasa nga kasulatan. Balik-balika sab kini diha sa uban pang mga kasulatan.
Ang mga bata may kalagmitan nga mopakita og balaang pagtahud kon sila malakip sa pagkat-on. Niini nga kalihokan, ang pagpabarug ug pagpalingkod uban ang balaang pagtahud makahupot sa ilang atensyon.
I-awhag ang paggamit (pag-drawing og litrato): Hatagi ang matag bata og papel, ug dapita sila sa pag-drawing sa ilang kaugalingon nga nagsunod sa ehemplo ni Kristo. Sama pananglit, ang usa ka bata maka-drawing sa iyang kaugalingon nga gibunyagan, nagtudlo sa ebanghelyo ngadto sa iyang higala, o nagtabang sa uban. Pagdapit og mga bata nga mopakigbahin sa ilang mga litrato ngadto sa ubang bata, ug awhaga sila sa pagpakigbahin sa ilang gi-drawing ngadto sa ilang pamilya.
Semana 2: Tungod sa Pag-ula ni Kristo, ako makahinulsol ug makapuyo og balik uban sa Dios.
Ilha ang doktrina (pagkompleto sa blangko nga linya): Sa dili pa ang klase, isulat sa pisara ang, “Tungod sa_________ ni Kristo, ako _______ ug makapuyo og balik uban sa ______.” Isulat ang mga pulong nga Pag-ula, makahinulsol, ug Dios sa lahi nga ginunting nga papel ug ipapilit kini ilawom sa tulo ka lingkuranan diha sa kwarto. Dapita ang mga bata sa pagpangita sa ginunting nga pulong ug ibutang kini sa pisara sa husto nga dapit. Basaha og dungan ang sentence.
I-awhag ang pagsabut (pagbasa sa mga kasulatan ug pagtubag sa mga pangutana): Pagbutang og litrato ni Kristo sa Getsemani ug sa Paglansang sa krus nganha sa pisara. Tabuni ang mga litrato og gagmayng papel. Sulati og pangutana ang matag papel kabahin sa hitabo diha sa mga litrato ug sa reference sa kasulatan gikan sa Mateo 26–27 o Lucas 22–23 diin makita ang tubag. (Sama pananglit: Unsay ngalan sa dapit nga giadtoan ni Jesus aron mag-ampo? Mateo 26:36.) Igrupo-grupo ang mga bata, ug hangyoa ang matag grupo sa pagtan-aw sa usa ka mga kasulatan ug sa pagpangita og tubag sa pangutana. Sultihi ang grupo sa pagpakigbahin sa mga tubag sa ilang pangutana ug pagtangtang sa katugma nga papel aron makita ang mga litrato.
Sa pagpahiangay og mga kalihokan nga pagbasa sa kasulatan alang sa mas manghod nga mga bata, hangyoa sila sa pagpaminaw samtang magbasa ka ug sa pagbarug kon madungog nila ang piho nga pulong og mga pulong.
I-awhag ang paggamit (pagtan-aw og leksyon nga naggamit og mga butang sa pagtudlo): Hisguti uban sa mga bata ang buot ipasabut sa mga pulong nga Pag-ula ug paghinulsol, ug ipasabut sa unsang paagi ang Pag-ula makapanalangin kanato (tan-awa sa Matinud-anon sa Tinuohan: Usa ka Pakisayran sa Ebanghelyo [2004], 14–20, 132–35). Ipakita sa mga bata ang regalo. Hangyoa ang usa ka bata nga mosulay sa paghatag sa gasa ngadto sa laing bata, ug hangyoa ang ikaduhang bata sa pagbalibad niini. Ipasabut nga kon dili nato dawaton ang gasa nga gihatag, dili nato matagamtam ang mga panalangin niana nga gasa. Papaminawa ang mga bata sa unsay angay nilang buhaton aron madawat ang gasa sa Pag-ula samtang dungan ninyong basahon ang Doktrina ug mga Pakigsaad 19:16.
Semana 3: Tungod kay nabanhaw si Jesus, ako usab mabanhaw.
Ilha ang doktrina (pagpaminaw og istorya): Gamita ang paghulagway nga naa sa pahina 123 sa manwal sa nursery (tan-awa ang mga instruksyon nga naa sa pahina 121) sa pagsugilon sa istorya sa Pagkabanhaw (tan-awa sa Juan 19:41–42; 20:1, 11–18). Ipasabut nga dihang nabanhaw si Jesukristo, ang Iyang lawas ug espiritu nagkabalik; naghimo kining posible nga ang tanan mabanhaw. Pasultiha ang mga bata sa, “Tungod kay nabanhaw si Jesus, ako usab mabanhaw.”
I-awhag ang pagsabut (paghisgot sa mga pagbati): Sa pisara ilista ang mga pulong nga naghulagway kon unsa kaha ang gibati sa mga disipulo sa adlaw nga namatay si Jesus (sama sa pagbangutan, kasubo, kaguol, ug kasagmuyo). Pasultiha ang mga bata sa mga katugbang niana nga mga pulong (sama sa kamaya, kalipay, paglaum, ug hugot nga pagtuo), ug isulat kini sa pisara. Ipasabut nga kini nga mga pagbati maoy gibati sa mga disipulo dihang nabanhaw si Jesus. Hisguti ang pipila ka mga panalangin nga moabut tungod sa kahibalo nga kita mabanhaw (tan-awa sa Isaias 25:8; Alma 22:14).
I-awhag ang paggamit (pagpakigbahin og mga pagbati): Isulat sa pisara ang, “Mapasalamaton ko nga nabanhaw si Jesus tungod kay …” Pagdapit og miyembro sa ward kinsa namatyan og usa ka minahal sa pag-adto sa Primary ug mopakigbahin og kadali nganong mapasalamaton siya sa Pagkabanhaw. Pangutan-a ang mga bata kon duna ba silay kaila nga namatay, ug dapita sila sa pagpiyong ug paghunahuna nianang tawhana. Dapita ang pipila ka mga bata sa pagbarug ug pagkompleto sa sentence diha sa pisara ug mopakigbahin kon unsa ang Pagkabanhaw alang kanila.
Semana 4: Si Jesukristo ang atong Manluluwas.
Ilha ang doktrina (paghisgot sa pulong nga “Manluluwas”): Pagpakita og pipila ka butang o mga litrato nga nagrepresentar og mga tawo nga tingali makaluwas sa atong kinabuhi (sama sa doktor, pulis, o lifeguard), ug hisguti unsaon nila sa pagluwas kanato. Pagpakita og litrato ni Jesus, ug ipasabut nga Siya lamang ang dunay gahum sa pagluwas kanato gikan sa mahangturong sangputanan sa kamatayon ug sala. Isulat sa pisara ang, “Si Jesukristo ang atong Manluluwas,” ug basaha kini uban sa mga bata, nga hatagan og empasis ang pulong nga “Manluluwas.”
I-awhag ang pagsabut ug paggamit (pagpaminaw og mga istorya sa kasulatan): Sultihi ang mga bata og pipila ka istorya sa kasulatan kabahin sa mga tawo nga naluwas sa sala pinaagi sa Manluluwas (pananglit si, Alma nga Batan-on [tan-awa sa Alma 36:6–24], Enos [tan-awa sa Enos 1:1–8], Zeezrom [tan-awa sa Alma 15:3-12], amahan ni Lamoni [tan-awa sa Alma 22:1–26], o ang tawo nga gidala ngadto kang Jesus [tan-awa sa Lucas 5:17–26]). Ipasabut nga pinaagi sa Pag-ula ni Jesukristo, tanan kita maluwas gikan sa sala. Ipamatuod nga si Jesukristo atong Manluluwas, ug pagdapit og pipila ka bata sa pagpamatuod Kaniya.