Enero

Ako Anak sa Dios, ug Siya Dunay Plano alang Kanako

“Ang Espiritu gayud mao ang magapanghimatuod uban sa atong espiritu, nga kita mga anak sa Dios” (Mga Taga-Roma 8:16).

Dugangi ang mga ideya nga gihatag dinhi og pipila nga imong mahunahunaan. Matag semana, pagplano og mga paagi sa (1) pag-ila sa doktrina, (2) pagtabang sa mga bata sa pagsabut niini, ug (3) pagtabang kanila nga magamit kini sa ilang kinabuhi. Pangutan-a ang imong kaugalingon, “Unsa ang buhaton sa mga bata aron makakat-on, ug unsaon nako sa pagtabang nga mobati sila sa Espiritu?”

bata nga nagpakita sa tibuok tuig nga kalihokan — **Tibuok Tuig nga Kalihokan:** Ipakigbahin sa daklit ang imong namatikdan nga ikaw gihigugma sa Dios. Pagbutang og gamayng butang (sama sa liningin nga gapas, liso, o gagmayng bato) sulod sa tin-awng sudlanan. Sa tibuok tuig, tuguti ang mga bata nga mopakigbahin sa ilang mga namatikdan nga ang Dios nahigugma kanila. Sa matag higayon nga ang bata dunay ipakigbahin, pasudli niya ang sudlanan. Kanunaya ang pagpatan-aw sa sudlanan, maghisgot sa daghang paagi nga nagpakita ang Langitnong Amahan sa Iyang gugma kanato.

Semana 1: Ang Dios ang akong Langitnong Amahan. Nakaila ug Nahigugma Siya kanako.

Ilha ang doktrina (pagdula og usa ka tagna-tagna): Sultihi ang mga bata nga ikaw naghunahuna og tawo nga nahigugma kanato, nakaila natong tanan, ug nagpuyo sa layo. Ipatag-an nila kon kinsa ang imong gihuna-huna (Langitnong Amahan). Hisguti ang relasyon nato sa Langitnong Amahan. Dapita ang mga bata nga magdungan sa pagsulti og balik human nimo sa “Ang Dios ang akong Langitnong Amahan. Nakaila Siya ug nahigugma kanako.”

I-awhag ang pagsabut (pagbasa sa mga kasulatan): Igrupo-grupo ang mga bata. Pabasaha ang matag grupo sa Enos 1:5, Moises 1:6, ug Joseph Smith—History 1:17 ug hisguti sa unsang paagi mamulong ang Ginoo sa matag propeta. Pangutan-a ang mga bata: “Kon mobisita ang Langitnong Amahan kaninyo, unsay itawag Niya kaninyo?” Ipamatuod nga ang Dios nakaila sa tinagsa natong mga ngalan.

I-awhag ang paggamit (pagpanganta): Pabaruga nga magliyok ang mga bata ug ipapasa paliyok ang pipila ka butang nga nagpakita sa gugma sa Dios alang sa Iyang mga anak samtang magkanta sila sa “Ako Anak sa Dios” (SB, 2–3) o “Ako Nasayud Akong Amahan Buhi” (SB, 8). Ang mga butang maglakip sa mga kasulatan, litrato sa sakrament, piraso sa prutas, o litrato sa pamilya. Ipahunong og kalit ang pagkanta ug ingna ang mga bata nga nagkupot sa butang sa pagpakigbahin og paagi nga ilang nahibaloan nga gihigugma sila sa Dios. Balik-balika kutob nga may panahon.

Semana 2 ug 3: Ang plano sa Langitnong Amahan usa ka plano sa kalipay.

Ilha ang doktrina: Isulat sa papel ang “Ang plano sa Langitnong Amahan usa ka plano sa kalipay”. Isulod og sudlanan ang papel og pusta nga mora og regalo kini nga tan-awon. Guniti pataas ang regalo ug sultihi ang mga bata nga may sulod kini nga makahatag nila og kalipay. Ipatag-an nila kon unsa kini. Dayon ablihi ug ipabasa sa usa ka bata ang sentence diha sa klase. Ipasabut nga dunay plano ang Langitnong Amahan aron magmalipayon kita ug makapuyo og balik Kaniya.

I-awhag ang pagsabut (pagpanganta ug pagtubag sa mga pangutana): Hatagi ang matag usa og ginunting nga papel nga gisulatan og mga pangutana:

Unsay ania sa akong kinabuhi, ug diin kini magsugod?
Unsay akong kapilian, ug unsay angay nakong tinguhaon?
Unsay akong sundon, ug unsay akong huptan nga makanunayon?
Unsay akong bation kon mosunod ko sa plano sa Dios?

Kantaha ang unang duha ka linya sa “Sundon Ko ang Plano sa Dios” (SB, 86–87), ug hisguti ang tubag sa unang pangutana. Balik-balika sab kini alang sa ubang mga kanta ug sa ubang pangutana.

mga planeta — Kinabuhi sa wala pa sa yuta

Jesukristo — Kinabuhi sa wala pa sa yuta

I-awhag ang pagsabut (pagkompleto sa mga pulong): Pagbutang og mga litrato nga nagrepresentar sa kinabuhi sa wala pa sa yuta, kinabuhing mortal ug sa kinabuhi human sa kamatayon sa tulo ka lain-laing dapit sa kwarto. Pag-drawing og malipayon nga nawong sa usa ka papel. Sultihi ang mga bata nga sa matag higayon nga imong iisa ang malipayon nga nawong, moingon sila og, “Malipayon.” Barug duol sa litrato sa kinabuhi sa wala pa sa yuta ug ihulagway ang Konseho sa Langit. Kutob sa mahimo, pasumpayi sa mga bata ang imong mga pulong og “malipayon” kon imo nang ipataas ang malipayon nga nawong. Pananglitan: “Gusto sa Langitnong Amahan nga kita malipayon. Iya kitang gisultihan sa Iyang plano nga ipadala kita sa yuta ug makadawat og lawas. Miingon Siya nga kita malipayon kon motuman kita sa Iyang mga sugo. Nahibalo Siya nga nagkinahanglan kita og Manluluwas aron kita malipayon, tungod kay walay perpekto kanato. Dihang nadungog nato ang plano sa Amahan, kita malipayon kaayo nga naninggit sa kalipay!” Ipadayon kini nga kalihokan samtang mopadayon ngadto sa laing dapit ug mohulagway sa plano sa kalipay: “Miabut kamo sa inyong pamilya, ug sila malipayon kaayo nga kamo natawo.” “Kita malipayon samtang mopili kita sa matarung.” “Kita malipayon nga ikauban sa hangtud ang atong pamilya ug Langitnong Amahan ug si Jesukristo sa celestial nga gingharian.” “Dugangi og mga detalye ang plano nga haum sa mga edad ug panabut sa mga bata.

I-awhag ang paggamit (pag-drawing og mga litrato): Hatagi ang matag bata og papel nga dunay malipayon nga nawong ug dunay mga pulong nga “Ang plano sa Langitnong Amahan usa ka plano sa kalipay”. Dapita sila sa pag-drawing og litrato nga may kalabutan sa plano sa Langitnong Amahan nga naghimo nilang malipayon. Ipamatuod nga ang plano sa Amahan gituyo alang sa mahangturon natong kalipay.

Semana 4: Duna akoy kabubut-on, ug responsable sa akong mga pagpili.

Ilha ang doktrina: Pag-andam og duha ka ginunting nga pulong, ang usa nakasulat og “duna akoy kabubut-on” ug ang usa nakasulat og “responsable ako sa akong mga pagpili.” Grupoha sa duha ka grupo ang mga bata. Paghangyo og duha ka bata sa pagduol sa atubangan. Hangyoa ang usa nga ipataas ang unang ginunting nga pulong, ug pabaruga ang usa sa mga grupo ug pasultiha, “duna akoy kabubut-on.” Hangyoa ang laing bata sa pag-isa sa ikaduhang ginunting nga pulong, ug pabaruga ang laing grupo ug pasultiha, “responsable ako sa akong mga pagpili.” Balik-balika kini sa makadaghan, nga mopasulti sa matag grupo sa mga pulong.

I-awhag ang pagsabut (paghisgot sa mga sangputanan): Pangutan-a ang mga bata kon unsay sangputanan kon pilion nila nga dili mokaon, mohikap sa init nga stove, mosimba, o magmabination sa uban. Ipasabut nga ang Langitnong Amahan nahigugma kanato ug gusto nga mopili ta og maayo ug makadawat sa mga panalangin niana nga mga pagpili.

mga bata nagtan-aw sa litrato — Ang pagpaapil gayud sa mga bata sa usa ka kalihokan makakuha sa ilang atensyon ug may oportunidad silang makaapil sa pagkat-on.

I-awhag ang paggamit (pagdula): Pagsulat diha sa ginunting nga papel og maayong mga pagpili ug dili maayong pagpili nga mahimo sa usa ka bata. Isulod ang ginunting sa usa ka sudlanan. Pabaruga nga duha ka linya ang mga bata, usa ka linya alang sa “pagpili” ug linya alang sa “mga sangputanan”. Paadtoa sa atubangan ang bata nga nag-una sa matag linya samtang ang tanan manganta sa unang linya sa “Choose the Right” (Hymns, nu. 239). Ang bata nga naa sa linya sa “pagpili” pahulbota ug pabasaha sa usa ka pagpili. Pasultiha ang laing bata sa posible nga sangputanan niana nga pagpili. Ang ubang bata mopataas sa iyang kumagko kon usa kini ka maayo nga pagpili ug mopatuwad sa iyang kumagko kon dili maayo kini nga pagpili. Padayon kutob sa itugot sa panahon.

Mga tabang alang sa lider sa musika

Hangyoa ang mga bata sa pagkanta dungan nimo sa chorus sa “Ako Anak sa Dios” (SB, 2–3) ug sa pagpaminaw sa mga pulong nga naghulagway kon unsay gusto nila nga buhaton sa uban diha kanila. Ilista ang ilang tubag (giyahi, ubani, tabangi, tudloi) diha sa pisara. Pangutan-a mahitungod sa matag pulong. Sama pananglit, “Kinsay naggiya kanato?” o “Nganong gusto man mo nga dunay maggiya kaninyo?” Ipamatuod ang mga panalangin sa pagkaadunay mga ginikanan, magtutudlo, lider, propeta, kasulatan, ug Espiritu Santo aron pagtabang kanatong makabalik sa Langitnong Amahan.