Hunyo
Mosunod Ko sa Plano sa Langitnong Amahan pinaagi sa Pagpabunyag ug Pagpakumpirma
“Duol ngari kanako, ug magpabunyag sa akong ngalan, nga kamo makadawat sa kapasayloan sa inyong mga sala, ug mapuno uban sa Espiritu Santo” (3 Nephi 30:2).
Dugangi ang mga ideya nga gihatag dinhi og pipila nga imong mahunahunaan. Matag semana, pagplano og mga paagi sa (1) pag-ila sa doktrina, (2) pagtabang sa mga bata sa pagsabut niini, ug (3) pagtabang kanila nga magamit kini sa ilang kinabuhi. Pangutan-a ang imong kaugalingon, “Unsa ang buhaton sa mga bata aron makakat-on, ug unsaon nako sa pagtabang nga mobati sila sa Espiritu?”
Semana 1: Mosunod ko ni Jesukristo pinaagi sa pagpabunyag ug pagpakumpirma ug paghupot sa akong mga pakigsaad sa bunyag.
Sa dili pa ang klase, paggunting og duha ka dagkong tunob sa tiil sa duha ka lain-laing kolor nga papel. Isulat sa usa ang “pagpabunyag ug pagkumpirma” ug diha sa usa “ug paghupot sa akong mga pakigsaad sa bunyag.” Pag-andam og sama sa gagmayng tunob sa tiil sa pareho nga kolor. Isulat sa usa ang mosunod nga mga tunob sa una nga kolor: 8 anyos, paghinulsol, interbyu sa bishop, pagpaunlod, awtoridad sa priesthood, pakigsaad, puti nga sinina, Espiritu Santo. Sa matag gagmayng tunob sa tiil sa ikaduha nga kolor, isulat ang usa sa mga sumbanan gikan sa “Ang Akong mga Sumbanan sa Ebanghelyo.” Ibutang bisan asa lang ang gagmayng tunob sa tiil libut sa kwarto.
Ilha ang doktrina: Isulat sa pisara ang “Mosunod ko kang Jesukristo pinaagi sa …” Pagbutang og dakong tunob sa tiil diha sa pisara, tinagsa-tagsa, ug unya magbasa og dungan. Ipasabut nga mao kini ang lakang nga kinahanglanon sa plano sa Langitnong Amahan. Kon gikinahanglan, tabangi ang mga bata nga makasabut unsa ang pakigsaad sa bunyag.
Mga tunob sa tiil anaa sa sharingtime.lds.org
I-awhag ang pagsabut ug paggamit (pagdula og paris-paris): Hangyoa ang usa ka bata sa pagpangita og usa sa mga tunob sa tiil sa una nga kolor. Hangyoa siya sa pagbasa sa pulong o hugpong sa pulong nga naa sa tunob ug ibutang kini sa pisara ubos sa katugma nga dakong tunob. Pangutan-a ang mga bata unsay kalabutan niini sa pagbunyag ug pagkumpirma. Balik-balika kini alang sa tanang tunob sa una nga kolor.
Hangyoa ang usa ka bata sa pagpangita og usa ka tunob sa ikaduha nga kolor. Hangyoa siya sa pagbasa sa pulong og hugpong sa pulong nga naa sa tunob ug ibutang kini sa pisara ubos sa katugma nga dakong tunob. Hisguti sa unsang paagi ang pagsunod sa nakalista nga mga sumbanan sa ebanghelyo nga naa sa mga tunob makatabang sa mga bata sa paghupot sa ilang mga pakigsaad sa pagbunyag. Balik-balika alang sa ubang tunob.
Semana 2: Kon ako magpakabuhi nga takus, ang Espiritu Santo motabang kanako sa pagpili sa husto.
Ilha ang doktrina (pagpanganta): Pangutan-a ang mga bata kon unsa nga gasa ang gihatag kanato human sa atong bunyag. Kantaha ang ikaduhang bersikulo sa “Ang Espiritu Santo” (SB, 56). Sa dili pa ka mokanta, hangyoa ang mga bata sa pagpaminaw alang sa tubag sa mosunod nga pangutana: Unsay itabang sa Espiritu Santo nga atong buhaton? Tabangi ang mga bata sa pagsabut nga ang hinay, hinagawhaw nga tingog mao ang Espiritu Santo ug Siya motabang kanato nga mopili sa matarung.
I-awhag ang pagsabut (pagtan-aw og leksyon nga naggamit og mga butang sa pagtudlo): Ipasabut nga kinahanglan natong makat-unan ang pagpaminaw sa pag-aghat sa Espiritu Santo pinaagi sa pagbantay sa atong gihunahuna, pagbati sa atong kasingkasing (tan-awa sa D&P 8:2). Ipasulod sa usa ka bata ang sinsilyo sa bildo nga sudlanan ug ipauyog kini. Paobserbahi sa mga bata kon unsa ka klaro nilang madungog ang tingog. Pabutangi sa mga bata ang sudlanan og usa ka kutsara nga yuta, bugas, balas, o gapas. Kada butang og usa ka kutsara, ipauyog na sab kini sa usa ka bata, ug pakomentaryuha ang mga bata kon unsay epekto niini sa tingog. Ipadayon sa pagdugang og kinutsara hangtud dili na madungog ang sinsilyo. Ipahisama kini sa kalisud nga paminawon sa Espiritu kon ang atong kinabuhi puno sa mga makabalda o sala. Kuhai ang sudlanan sa tanang sulod ug ipakita unsa ka klaro nga madungog og balik ang sinsilyo. Ipamatuod nga ang paghupot sa mga sugo ug paghinulsol sa atong mga sala makatabang sa atong pagdungog sa Espiritu Santo.
Ang pagsumpay sa doktrina ngadto sa usa ka biswal makatabang sa mga bata sa paghinumdom sa leksyon nga gitudlo.
I-awhag ang paggamit (pagpakigbahin og mga ideya): Igrupo-grupo ang mga bata ug ipapasa palibut sa matag grupo ang gamayng butang samtang kantahon nimo ang mga pulong sa “Ang Espiritu Santo.” Hunonga og kalit ang kanta ug ang bata nga naggunit sa butang mosulti og usa ka butang nga ilang mahimo aron mas klaro nilang mabati ang Espiritu Santo. Tapusa pinaagi sa pagkanta og dungan sa “Ang Espiritu Santo”.
Semana 3: Kon ako moambit sa sakrament akong gibag-o ang akong mga pakigsaad sa bunyag.
Ilha ang doktrina (pagtan-aw sa mga litrato): Pagpakita og litrato sa bunyag ug litrato sa sakrament ug pangutan-a unsay kalabutan sa duha ka litrato. Ipahinumdom sa mga bata nga mohimo kita og mga pakigsaad sa Langitnong Amahan kon kita bunyagan, ug ipasabut nga kon moambit kita sa sakrament atong gibag-o ang atong mga pakigsaad sa bunyag.
I-awhag ang pagsabut (pagpaminaw ug paghisgot): Dapita ang mga bata nga itudlo ang ilang kaugalingon o ang langit sa pag-ila kon kinsa ang mihimo sa saad samtang basahon nimo ang mosunod nga mga pahayag gikan sa pag-ampo alang sa sakrament (tan-awa sa D&P 20:77): “pagdala nganha kanila sa ngalan sa imong Anak”; “kanunay mohinumdom kaniya”; “maghupot sa iyang mga sugo”; “kanunay makabaton sa Espiritu uban kanila.” Hisguti ang kahulugan sa matag hugpong sa pulong.
I-awhag ang paggamit (paghimo og mga aksyon): Hangyoa ang mga bata sa paghunahuna og aksyon nga makapahinumdom kanila sa matag bahin sa ilang pakigsaad nga atong nadungog sa pag-ampo alang sa sakrament, sama sa pagtapion sa ilang kamot diha sa ilang kasingkasing (pagdala nganha kanila sa ngalan sa imong Anak); pagtudlo sa ilang agtang (kanunay mohinumdom kaniya); pagbuka sa ilang kamot sama sa pagbuka sa libro (maghupot sa iyang mga sugo); ug sa paggakos sa ilang kaugalingon (kanunay makabaton sa Espiritu). Balik-balika sa kadaghan ang upat ka mga saad uban sa aksyon. Dasiga ang mga bata sa pagribyu niini nga mga aksyon diha sa ilang hunahuna kon madungog nila ang pag-ampo alang sa sakrament.
Semana 4: Kon ako maghinulsol, ako mapasaylo.
Ilha ang doktrina (paghan-ay sa mga pulong): Hangyoa ang mga bata sa pagpasabut sa pulong nga paghinulsol ug pagpasaylo. Hatagi og sobre ang matag klase nga dunay mga pulong sa sulod, kada usa sa lain-laing papel: Kon, ako, maghinulsol, ako, mapasaylo. Dapita ang matag klase sa pagbutang sa husto nga pagkahan-ay sa mga pulong. Kon mahuman na sila, ipasulti kini og balik nga magdungan ang tanang bata.
I-awhag ang pagsabut (pag-akting sa istorya sa kasulatan): Isugilon ang panghitabo sa anak nga nawala (tan-awa sa Lucas 15:11–24) sa kaugalingon nimong pulong, nga mogamit og daghang aksyon kutob sa mahimo (sama pananglit, ipataas ang duha ka tudlo sa pagrepresentar sa duha ka anak, ug huwap-huwapon ang imong tiyan nga nagpasabut sa gutom). Dapita ang mga bata sa pagpaminaw sa istorya ug hilom nga mosunod sa imong mga aksyon. Pagpakita og litrato nga nagrepresentar sa anak nga nawala ug pangutan-a sa unsang paagi ang amahan niana nga istorya sama sa atong Langitnong Amahan. Ipasabut nga sama sa amahan, ang atong Langitnong Amahan nahigugma kanato ug gusto nga makabalik kita Kaniya; mopasaylo Siya sa tanan natong sayop kon kita maghinulsol.
I-awhag ang paggamit (pagbasa sa mga kasulatan): Pagdapit og usa ka bata sa pagbasa sa Mosiah 26:30. Hangyoa ang mga bata sa pagpaminaw kon unsa ka sagad mapasaylo ang tawo. Dapita sila sa hilom nga paghunahuna kon unsay ilang buhaton kon makahimo sila og sayop.