Septyembre
Serbisyohan Nako ang Dios sa Tibuok Nakong Kasingkasing, Gahum, Hunahuna ug Kusog
“Higugmaa ang Ginoo nga inyong Dios uban sa inyong tibuok nga kasingkasing, uban sa inyong tibuok nga gahum, hunahuna, ug kusog; ug sa ngalan ni Jesukristo kamo moalagad kaniya” (D&P 59:5).
Dugangi ang mga ideya nga gihatag dinhi og pipila nga imong mahunahunaan. Matag semana, pagplano og mga paagi sa (1) pag-ila sa doktrina, (2) pagtabang sa mga bata sa pagsabut niini, ug (3) pagtabang kanila nga magamit kini sa ilang kinabuhi. Pangutan-a ang imong kaugalingon, “Unsa ang buhaton sa mga bata aron makakat-on, ug unsaon nako sa pagtabang nga mobati sila sa Espiritu?”
Semana 1: Gitudloan kita ni Jesus unsaon sa pagserbisyo sa uban.
Ilha ang doktrina (pagtan-aw sa mga litrato): Pag-display og pipila ka litrato ni Jesukristo nga nagserbisyo sa uban. Sama pananglit, gamita ang mga litrato nga naa sa LHE 41, 42, 46, 47, ug 55. Hangyoa ang mga bata sa paghulagway unsay panghitabo diha sa litrato. Ipasabut nga diha sa matag litrato nagserbisyo si Jesus sa uban. Isulat sa pisara ang “Gitudloan kita ni Jesus unsaon sa pagserbisyo sa uban.”
I-awhag ang pagsabut (pagbasa sa mga kasulatan ug pag-role play): Hangyoa ang mga bata nga magbanus-banos sa pag-akting sa usa sa mga panginahanglan nga gihulagway diha sa Mateo 25:35–36. Sama pananglit, ang usa ka bata mahimong magpakaaron ingnon nga gigutom, giuhaw, usa ka estranghero, o nasakit. Hangyoa ang mga bata sa pagtag-an sa panginahanglan ug dayon i-aksyon unsaon nila sa pagserbisyo sa tawo nga nagkinahanglan niana. Basaha og dungan ang Mateo 25:35–40, ug hangyoa ang mga bata sa pagpangita kon kinsa ang giingon ni Jesus nga atong giserbisyohan kon moserbisyo kita sa uban.
I-awhag ang paggamit: Hatagi og papel ang matag bata ug hangyoa sila sa paglista og mga ngalan o pag-drawing og mga litrato sa mga tawo nga ilang maserbisyohan ug unsay ilang buhaton alang niana nga mga tawo. Hangyoa sila pagpakigbahin sa ilang mga papel uban sa ilang pamilya sa panimalay.
Semana 2: Gipakita kanato sa mga propeta ug mga apostoles unsaon sa pagserbisyo.
Ilha ang doktrina: Pag-display og mga litrato ni Moises, Haring Benjamin, Joseph Smith, ug Thomas S. Monson. Sultihi ang mga bata nga kini nga mga propeta, sama sa ubang propeta ug mga apostoles, mipakita kanato unsaon sa pagserbisyo sa uban.
I-awhag ang pagsabut (pagdula og tagna-tagna): Pag-andam og mga timailhan kon giunsa ni Moises, Haring Benjamin, Joseph Smith, ug Thomas S. Monson sa pagpakita kanato unsaon sa pagserbisyo. Sama pananglit, ang pipila ka timailhan kabahin ni Presidente Monson mao kini “Regular nakong bisitahan ang mga biyuda sa akong ward,” “Sa gamay pa ko gihatagan nako ang laing bata sa paborito nakong mga dulaan,” ug “kanunay kong mobisita og mga tawo sa ospital.” Mahimo nimong gamiton ang mosunod nga mga reference sa pag-andam og mga timailhan. Moises: Exodo 2:16–17; 1 Nephi 17:24–29. Haring Benjamin: Mosiah 2:12–19. Joseph Smith: Joseph Smith—Kasaysayan 1:62, 67; D&P 135:3. Thomas S. Monson. Ensign, Sept. 1994, 12–17; Dis. 1995, 2–4; Nob. 2006, 56–59.
Pagpili og upat ka bata nga morepresentar niini nga mga propeta, ug dapita ang usa kanila sa pagbasa sa mga timailhan nga imong giandam. Dapita ang ubang bata sa pag-isa sa ilang kamot kon sila nagtuo nga nakaila sila kinsa kana nga propeta. Dayon ipapangita nila ang litrato niana nga propeta. Balik-balika alang sa ubang tulo ka mga propeta.
Ang yano nga mga costume sama sa kupo ug mga kalo makahimo sa drama nga mas madanihon. Ang pagdrama-drama makatabang sa mga bata nga makabaton og panabut sa mga baruganan sa ebanghelyo ug mga asoy gikan sa mga kasulatan.
I-awhag ang paggamit (pagpaminaw sa komperensya): Dapita ang mga bata sa pagtan-aw o pagpaminaw sa kinatibuk-ang komperensya sa sunod bulan. Awhaga sila sa pagpaminaw sa mga istorya kon unsaon sa pagserbisyo ang uban. Hatagi sila og mga oportunidad sa pagpakigbahin unsay ilang nakat-unan.
Semana 3 ug 4: Kon nagserbisyo ko sa uban, nagserbisyo ko sa Dios.
Ilha ang doktrina (pagmemorya og kasulatan): Tabangi ang mga bata nga makamemorya sa katapusang bahin sa Mosiah 2:17 pinaagi sa pagsulat sa pisara sa, “Kon kamo anaa sa pag-alagad sa inyong mga isigkatawo kamo anaa lamang sa pag-alagad sa inyong Dios.” Dapita ang mga bata sa pagsulti og usab sa hugpong sa pulong kaduha o tulo ka higayon. Hangyoa ang usa ka bata sa pagpapas sa usa o duha ka pulong, ug ipasulti og usab sa mga bata ang hugpong sa pulong. Balik-balika hangtud mahurot ang pulong sa pisara.
I-awhag ang pagsabut (pagpaminaw og mga sitwasyon nga pagatun-an): Agi’g pangandam, tun-i nga mainampoon ang pakigpulong ni Presidente Dieter F. Uchtdorf sa Abril 2010 sa kinatibuk-ang komperensya, “Kamo ang Akong mga Kamot” (tan-awa sa Ensign o Liahona, Mayo 2010, 68–70, 75). Pangutan-a ang mga bata kon giunsa nato sa pagserbisyo ang Dios kon magserbisyo kita sa uban (atong gibuhat ang Iya untang buhaton kon Siya nia pa karon). Pagpaambit og usa ka istorya o personal nga kasinatian sa pagserbisyo, ug ipasabut kon sa unsang paagi kini nakapanalangin sa tighatag ug sa tigdawat. (Makakita ka og mga istorya kabahin sa pagserbisyo diha sa Friend o Liahona.) Pag-andam og pipila ka sitwasyon nga pagatun-an nga nagpakita unsaon sa mga bata sa pagserbisyo ang uban. Sama pananglit: “Si Annie naglakaw ug nadakin-as sa iyang pagpauli gikan sa eskwelahan, ug nagkatag sa yuta ang iyang mga papel. Mihunong si David aron pagpabarug kaniya ug pagpamunit sa iyang mga libro.” “Ang silingan ni Mary naglisud sa pagdala sa iyang mga kinumpra padulong sa iyang balay samtang naghilak ang iyang anak. Gitabangan siya ni Mary sa pagdala sa iyang mga kinumpra.” Hangyoa ang mga bata sa pag-aksyon sa sitwasyon nga pagatun-an ug isulti kon si kinsa ang naserbisyuhan (ang gitabangan ug ang Dios).
I-awhag ang pagsabut ug paggamit (pagdula og paris-paris): Pangita o pag-drawing og litrato sa mga tawo nga maserbisyohan sa mga bata, sama sa ginikanan, igsoon, apohan, higala, ug silingan. Paghimo og laing kopya niini nga mga litrato ug pagdula og paris-paris uban nila. Kon makatugma na ang bata, dapita siya sa pagsulti og usa ka paagi sa pagserbisyo sa tawo nga naa sa litrato. Ilista diha sa pisara ang ideya sa mga bata. Alang sa ubang mga ideya kon unsaon sa pagserbisyo, tan-awa sa Primary 4, 166.
Ang mga dula maghatag og kalahian sa mga leksyon, nagtugot sa mga bata nga makainter-aksyon sa uban, ug makadugang og kalig-on sa gitudlo nga baruganan sa ebanghelyo sa makalingaw nga paagi.