Nobyembre
Kinahanglan Kitang Magpasalamat sa Dios sa Tanang Butang
“Ug siya misugo kanila nga … matag adlaw sila kinahanglan mohatag og mga pasalamat ngadto sa Ginoo nga ilang Dios” (Mosiah 18:23).
Dugangi ang mga ideya nga gihatag dinhi og pipila nga imong mahunahunaan. Matag semana, pagplano og mga paagi sa (1) pag-ila sa doktrina, (2) pagtabang sa mga bata sa pagsabut niini, ug (3) pagtabang kanila nga magamit kini sa ilang kinabuhi. Pangutan-a ang imong kaugalingon, “Unsa ang buhaton sa mga bata aron makakat-on, ug unsaon nako sa pagtabang nga mobati sila sa Espiritu?”
Semana 1: Nagpasalamat ko sa akong lawas, ug nahibalo ko nga usa kini ka templo.
Ilha ang doktrina (pagtan-aw og mga litrato ug pagbasa sa mga kasulatan): Pag-display og litrato sa usa ka bata ug usa ka litrato sa templo. Basaha og kusog ang 1 Mga Taga-Corinto 3:16 nga magdungan. Pangutan-a: “Unsay atong nakat-unan kabahin sa atong lawas gikan niini nga kasulatan?” Isulat sa pisara ang “Ang akong lawas usa ka templo”.
I-awhag ang pagsabut (pagbasa sa mga kasulatan): Hisguti ang pamaagi nga atong ikapakita nga mapasalamaton kita sa Langitnong Amahan sa atong lawas; sama pananglit, kini atong giatiman ug gimatngunan nga limpyo. Ipasabut nga mitambag ang mga propeta kanato sa pag-atiman sa atong lawas pinaagi sa dili pagpanigarilyo, pag-inom og makahubog o ilegal nga drugas, o patik. I-grupo-grupo ang mga bata, ug hangyoa ang matag grupo sa pagbasa ug paghisgot og usa o sobra pa sa mosunod nga mga kasulatan: Doktrina ug mga Pakigsaad 88:124; 89:7, 8, 9, 10–11, 12, 16–17. Dapita ang matag grupo sa pagpakigbahin sa ilang nakat-unan gikan sa mga kasulatan kon unsaon nila sa pag-atiman ang ilang lawas.
I-awhag ang paggamit (paghimo og tumong): Pasulata o ipa-drawing sa mga bata ang butang nga ilang himoon sa sunod semana sa pag-atiman sa ilang lawas.
Semana 2: Mapasalamaton ko sa temporal nga mga panalangin.
Ilha ang doktrina: Isulat sa pisara, “Mapasalamaton ko sa temporal nga mga panalangin.” Hangyoa ang mga bata sa pagsulti og balik sa sentence. Ipasabut nga ang temporal nga mga panalangin mao ang mga panalangin nga atong makita, mahikap, madungog, matilawan, o mapanimahoan.
I-awhag ang pagsabut (pagdula og tagna-tagna): Pagpakita og mga butang o mga litrato nga nagrepresentar og pipila sa temporal natong mga panalangin (sama pananglit sa, lawas, balay, pagkaon, tubig, saput, panglawas, ang adlaw, bulan, bitoon, kalibutan, mga hayop, tanom, pamilya, mga higala, dulaan, libro, ug eskwelahan). Hatagi og mga timailhan nga maghulagway og usa sa mga panalangin, ug hangyoa ang mga bata sa pagtag-an kon asa nga panalangin ang imong gihulagway. Alang sa magulang nga mga bata, isulat ang matag panalangin sa lahi nga papel ug ibutang kini sa usa ka sudlanan. Pagdapit og usa ka bata sa pagpili og usa ug paghatag og timailhan kabahin niini ngadto sa ubang mga bata. Kon matag-anan sa mga bata ang panalangin, isulat kini sa pisara, ug hangyoa ang usa ka bata sa pagpakigbahin nganong mapasalamaton siya niini.
I-awhag ang paggamit (pagpakigbahin og mga ideya): Hangyoa ang mga bata sa paghunahuna kon unsay ilang mahimo aron makita nga sila mapasalamaton sa usa sa mga panalangin nga imong gihisgutan. Hangyoa ang pipila ka bata nga mopakigbahin sa ilang mga ideya.
Ang mga bata mas epektibong makakat-on kon ang lain-laing pamaagi sa pagtudlo ang gamiton. Pagpili og mga kalihokan ug pamaagi sa pagtudlo nga maapil ang tanang bata.
Semana 3: Mapasalamaton ko sa espirituhanong mga panalangin.
Ilha ang doktrina ug i-awhag ang pagsabut (pagbasa sa mga kasulatan): Pag-andam og regalo nga dunay sulod nga litrato sa Manluluwas ug sa mosunod nga reference sa kasulatan: Moroni 10:8–17. Isulat sa pisara ang, “Mapasalamaton ko sa espirituhanong mga panalangin.” Ipasabut nga dunay daghang espirituhanon nga panalangin nga ihatag sa Ginoo kanato; mihatag Siya kanato niini nga mga panalangin pinaagi sa gahum sa Espiritu Santo. Paablihi sa usa ka bata ang regalo ug ipakita ang mga sulod. Hangyoa ang mga bata sa pagpangita sa kasulatan ug pagpangita sa espirituhanong mga panalangin nga ikahatag sa Ginoo kanato, ug isulat kini sa pisara. Hisguti ang pipila niini nga mga panalangin, ug ipasabut nga kinahanglang gamiton nato kini sa pagtabang sa uban.
Semana 4: Kinahanglang magpasalamat kita sa Langitnong Amahan sa tanan natong panalangin.
Ilha ang doktrina: Ipakita sa mga bata ang usa o duha ka aytem nga hinatag sa uban diha nimo. Ipasabut nga importante kini nga mga gasa kanimo ug ikaw miingon og “Salamat” niini. Hangyoa ang mga bata sa pagpakigbahin og mga paagi nga atong ikapakita ang atong pasalamat sa mga gasa nga atong nadawat. Pangutan-a ang mga bata kon si kinsa ang atong pasalamatan sa tanang panalangin. Hisguti ang mga rason nganong magpasalamat gayud kita sa Langitnong Amahan sa tanan natong panalangin.
Ang pagdapit og mga bata nga mopakigbahin diha sa ginagmay nga grupo makahatag sa mga bata og oportunidad sa pag-apil. Ang mga magtutudlo makatabang sa pagsiguro sa partisipasyon ug mapadayon ang balaang pagtahud.
I-awhag ang pagsabut (paghimo og mga lista): Sa lima ka managlahing putos, sudli kini og papel, ballpen, ug usa sa mosunod nga mga aytem: Litrato sa usa ka meetinghouse sa Simbahan, usa ka butang nga igsusul-ob, mga kasulatan, litrato sa pamilya, ug litrato sa Manluluwas. Igrupo-grupo ang mga bata, ug hatagi ang matag grupo og putos. Ipatan-aw sa matag grupo ang mga aytem diha sa ilang putos ug pasulata sa papel og usa ka paagi nga ikapakita nila ang pagpasalamat niini. Dayon hangyoa sila sa pagbutang sa aytem, papel, ug ballpen balik sa putos ug ipasa kini ngadto sa laing grupo. Pabanus-banusa ang matag grupo sa matag putos, ug dayon dapita ang matag grupo sa pagpakigbahin unsay nasulat sa lista diha sa ilang putos.
I-awhag ang paggamit (pagpakigbahin og mga ideya): Hangyoa ang pipila ka bata nga mopakigbahin sa ilang nakat-unan gikan niini nga kalihokan ug unsay ilang buhaton aron magamit kini sa ilang kinabuhi.