Hulyo
Ang mga Pamilya Usa ka Bahin sa Plano sa Langitnong Amahan
“Ang pamilya giorden sa Dios” (“Ang Pamilya: Usa ka Pamahayag ngadto sa Kalibutan”).
Dugangi ang mga ideya nga gihatag dinhi og pipila nga imong mahunahunaan. Matag semana, pagplano og mga paagi sa (1) pag-ila sa doktrina, (2) pagtabang sa mga bata sa pagsabut niini, ug (3) pagtabang kanila nga magamit kini sa ilang kinabuhi. Pangutan-a ang imong kaugalingon, “Unsa ang buhaton sa mga bata aron makakat-on, ug unsaon nako sa pagtabang nga mobati sila sa Espiritu?”
Semana 1: Giplano sa Langitnong Amahan nga ako moadto sa usa ka pamilya.
Ilha ang doktrina: Ipakita sa mga bata ang “Ang Pamilya: Usa ka Pamahayag sa Kalibutan,” ug ipasabut nga gitudlo diha nga ang plano sa Langitnong Amahan mao ang pagpaadto sa Iyang mga anak sa yuta pinaagi sa pamilya.
I-awhag ang pagsabut (pagtan-aw sa mga litrato): Igrupo-grupo ang mga bata ug hatagi ang matag grupo og litrato sa usa ka pamilya (sama pananglit, Adan ug Eva nga nagtudlo sa ilang mga anak [LHE, nu. 5], Si Kristo nga mibuhi og balik sa anak ni Jairo [LHE, nu. 41], Pamilya ni Lehi nga miabut sa gisaad nga yuta [LHE, nu. 71], ug usa ka pamilya nga nag-ampo [LHE, nu. 112]). Dapita ang matag grupo sa pagpangita sa mga sakop sa pamilya sa ilang litrato. Ipakita sa matag grupo ang ilang litrato ngadto sa ubang mga bata ug itudlo ang amahan, inahan ug mga anak. Hangyoa ang mga bata sa pagpakita pinaagi sa ilang mga tudlo kon pila ang sakop sa kaugalingon nilang pamilya. Sultihi sila nga ang ilang pamilya usa ka bahin sa plano sa Langitnong Amahan.
I-awhag ang paggamit: Hangyoa ang mga lalaki sa pagbarug. Ipasabut nga silang tanan mamahimo nga amahan ugma damlag sa matarung nga pamilya. Dapita ang pipila sa mga batang lalaki sa pagsulti og butang nga makahimo nilang maayong amahan. Hangyoa ang mga batang babaye sa pagbarug, ug ipasabut nga silang tanan mamahimong inahan sa usa ka matarung nga pamilya. Hangyoa ang pipila kanila sa pagsulti og butang nga makahimo nilang maayo nga inahan. Dapita ang tanang bata sa pagpakigbahin og butang nga ilang mahimo aron magmalipayon ang ilang pamilya karon.
Ang mga bata mas makakat-on ug mas dugayng makalimot kon motanyag ka og mga ideya nga mogamit og mga hulagway ug uban nga mga biswal.
Semana 2: Ang pag-ampo uban sa pamilya, pagtuon sa kasulatan uban sa pamilya, ug family home evening makalig-on sa pamilya.
Ang paggamit og mga butang sa leksyon mahimong gamiton sa pagmugna og interes, aron ma-focus ang atensyon sa mga bata, o sa pagpaila og usa ka baruganan sa ebanghelyo (tan-awa sa
Ilha ang doktrina ug i-awhag ang pagsabut (pagtan-aw og usa ka leksyon nga naggamit og mga butang sa pagtudlo): Paggunita og usa ka hugpong sa tukog ang usa ka bata. Ipasabut nga ang mga tukog nagrepresentar sa mga sakop sa pamilya. Isulat ang “pamilya nga pag-ampo,” “pamilya nga pagtuon sa kasulatan,” ug “family home evening” sa tulo ka ginunting nga papel. Pangutan-a ang mga bata sa unsang paagi kini nga mga kalihokan makalig-on o makatabang nga mahugpong ang pamilya. Dapita ang mga bata nga iputos ang mga papel sa mga tukog. Ipasabut nga kini nga mga kalihokan nagdapit sa Espiritu diha sa atong panimalay ug kinabuhi ug makapaduol kanato ngadto sa Langitnong Amahan ug ni Jesukristo, nga naglig-on sa atong mga pamilya.
I-awhag ang paggamit (pag-drawing og mga litrato): Hatagi og papel ang mga bata, ug dapita sila sa pag-drawing og litrato sa mga kalihokan nga ilang nahimo uban sa ilang pamilya nga nakalig-on kanila. Dapita sila sa pagpakigbahin sa unsay ilang gi-drawing ngadto sa ilang pamilya.
Semana 3: Ang priesthood makapanalangin ug makalig-on sa akong pamilya.
Ilha ang doktrina (pagdula og tagna-tagna): Sultihi ang mga bata nga hatagan nimo sila og mga timailhan kabahin sa butang nga makapanalangin ug makalig-on sa mga pamilya. Hangyoa sila sa pag-isa sa ilang kamot kon nahibalo sila sa tubag. Hatagi og mga timailhan kabahin sa priesthood, sama sa “Ang mga papa makapanalangin sa ilang pamilya tungod niini” ug “ang mga lalaki nga 12 anyos makadawat niini.” Kon matag-anan na sa mga bata, magdungan dayon sa pagsulti, “Ang priesthood makapanalangin ug makalig-on sa akong pamilya.”
I-awhag ang pagsabut (paghisgot kabahin sa priesthood): Hangyoa ang mga bata sa pagngalan og mga butang nga mahimo sa mga naghupot sa priesthood (sama pananglit, pagbunyag, paghatag sa gasa sa Espiritu Santo, pagpanalangin sa masakiton, ug pag-apud-apod sa sakrament). Ipakita ang mga litrato niini nga mga ordinansa ug panalangin samtang hisgutan nimo kini, ug tabangi ang mga bata nga makasabut unsaon nila sa pagpanalangin ug paglig-on sa mga pamilya. Ipakita ang litrato sa templo. Ipasabut nga usa sa pinakamahinungdanong panalangin sa priesthood mao nga naghimo kining posible nga makaadto sa templo ug ma-seal isip pamilya sa kahangturan.
I-awhag ang paggamit (pagpakigbahin og mga ideya): Pagdapit og pipila ka bata sa pagbarug ug pagpakigbahin og usa o duha ka paagi diin ang priesthood nakapanalangin ug nakalig-on sa ilang pamilya. Awhaga sila sa pagpakigbahin niini nga mga ideya ngadto sa ilang mga pamilya.
Semana 4: Gusto sa Langitnong Amahan nga maminyo ko sa templo ug makabaton og mahangturong pamilya.
Ilha ang doktrina (pagtan-aw og litrato): Pagpakita og litrato sa usa ka magtiayon nga nagbarug atubangan sa templo nga nakasinina og pangkasal. Pangutan-a ang mga bata nganong gusto sa Langitnong Amahan nga maminyo ta sa templo. Ipasabut nga kon maminyo ta sa templo, ang atong pamilya mahimong mahangturon.
I-awhag ang pagsabut (pagpaminaw og mga pagpamatuod): Dapita ang pipila ka mga magtutudlo, lakip ang mga magtiayon, nga mopakigbahin sa mga panalangin nga ilang nadawat tungod sa templo ug pagminyo sulod sa templo. Hangyoa ang mga bata sa pagpaminaw og pihong mga panalangin samtang ang mga magtutudlo mopakigbahin sa ilang hunahunaa. Ilista sa pisara kini nga mga panalangin.
I-awhag ang paggamit: Hangyoa ang pipila ka bata sa pagbarug ug mopakigbahin nganong gusto silang maminyo sa templo ug unsay ilang mahimo karon sa pagpangandam niana nga panalangin.