Unsaon sa Paggamit ang Musika sa Primary

Ang tuyo sa musika sa Primary mao ang pagtudlo sa mga bata sa ebanghelyo ni Jesukristo. Ang mga kanta sa Primary maghimo sa pagkat-on sa ebanghelyo nga mas makalingaw, makadapit sa Espiritu, ug makamugna og palibut nga may balaang pagtahud nga tukma alang sa pagkat-on (tan-awa sa Handbook 2: Administering the Church [2010], 11.2.4).

Kon mag-andam alang sa pagtudlo og kanta, pangutan-a ang imong kaugalingon: Unsaon nako nga madani ug magpadayon ang atensyon sa mga bata? Unsa ang akong ipangutana aron matabangan ang mga bata nga makasabut sa mensahe sa ebanghelyo niana nga kanta? Unsa kaha nga paagi ang akong gamiton sa pagtudlo niini nga kanta? Ang mosunod mao ang pipila ka paagi nga inyong masulayan. Ang mga ehemplo makatabang kanimo sa pagtudlo og mga kanta nga gisugyot niini nga outline. Alang sa dugang nga mga ideya, tan-awa sa seksyon sa Primary diha sa Serve and Teach sa LDS.org ug sa “Unsaon sa Paggamit ang Musika sa Primary” nga seksyon sa 2015, 2016, ug 2017 nga mga outline.

Ipahiangay ang mga kalihokan: Ang ubang mga ideya sa pagtudlo nga gihulagway dinhi mas mohaum alang sa mas manghod nga mga bata. Ipahiangay ang inyong mga pamaagi sa pagtudlo sa lain-laing edad aron malakip sila sa pagkat-on ug pagpanganta.

Ipasabut ang mga baruganan sa ebanghelyo diha sa kanta.

Ikonsiderar ang mosunod nga mga ideya samtang magtudlo ka sa “Ang Pamilya Mahimong Manag-uban sa Hangtud” (SB, 98). Hangyoa ang mga bata sa pagpaminaw sa bahin sa plano sa Langitnong Amahan samtang kantahon nimo ang unang linya sa kanta ug sa pagbarug kon mahibalo sila kon unsa kini (pamilya). Dapita ang mga bata sa pagkanta niana nga linya dungan nimo. Ipasabut nga ang melodiya sa “duna koy pamilya” ug sa “gipangga ko nila” pareho ra og pattern, ug hangyoa ang mga bata sa pagkanta niana nga mga pulong. Hangyoa sila sa pagpaminaw sa sunod nga bahin sa kanta aron makita kon unsa katas-on ang pagpakigbahin nila sa ilang kinabuhi uban sa ilang pamilya. Kantaha ang ikaduhang linya, maghatag og empasis sa mga pulong nga “sa kahangturan.” Dapita ang mga bata sa pagkanta niana nga linya dungan nimo, ug dayon kantahon og dungan ang duha ka linya. Hangyoa ang mga bata sa pagpaminaw sa laing pulong nga nagpasabut sa “sa kahangturan” diha sa chorus. Kantaha ang, “Pamilya mahimong manag-uban,” ug ila kining sublion balik nimo. Kantaha ug ipasubli nila og balik diha nimo ang, “Ngadto’s kahangturan.” Pangutan-a kon unsa ang plano sa Amahan, magpahinumdom sa mga bata nga Iyang gusto nga maminyo sila sa templo ug makabaton og kaugalingong mahangturong pamilya. Tiwasa sa pagtudlo ang chorus pinaagi sa pagkanta sa hugpong sa pulong ug pagdapit sa mga bata sa pagsubli niini.

Ipa-praktis Sa pagtudlo og kanta sa epektibo nga paagi, ikaw mismo kinahanglan nga makamao sa kanta. Praktisa kini sa balay aron imong matan-aw ang mga bata kon magtudlo ka nila.

Sa pagtabang sa mga bata nga makat-on sa melodiya sa kanta, “gamita ang imong kamot nga pinahigda sa pagsinyas, ug samtang manganta imong isinyas pataas ang imong kamot nagpasabut sa taas nga paningog ug ipaubos kon mubo nga paningog”.

Paggamit og biswal nga tabang sa mga bata sa pagkat-on ug paghinumdom sa mga pulong.

Ang mga biswal anaa sa sharingtime.lds.org

Ikonsiderar ang mosunod nga mga ideya samtang magtudlo ka sa “Kon Naa ang Manluluwas” (pahina 28 niini nga outline):

• Paghimo og ginunting nga papel alang sa matag hugpong sa pulong sa kanta, ug pangita og litrato nga morepresentar sa matag ginunting nga pulong. Ibutang ang mga litrato sa pikas kilid sa kwarto ug ang ginunting nga mga pulong sa pikas. Hisguti uban sa mga bata unsa ka lahi ang ilang lihok kon makita nila ang Manluluwas nga anaa uban nila. Kantaha kini, ug hangyoa ang mga bata sa pagtugma sa mga litrato ngadto sa mga pulong.

• Pagpakanta sa mga bata nga dungan nimo samtang imong itudlo ang mga litrato.

• Hatagi ang matag bata og hugpong sa pulong nga kantahon samtang nagbarug, ug dayon ilisan kini hangtud ang tanan makakanta sa tanang hugpong sa pulong.

Ipamatuod: Hatag og mubo nga pagpamatuod ngadto sa mga bata kabahin sa mga kamatuoran sa ebanghelyo nga naa sa mga kanta sa Primary. Tabangi ang mga bata sa pagsabut nga ang pagkanta usa ka paagi nga sila makapamatuod ug mobati sa Espiritu.

Gamita ang tukma nga mga aksyon aron mapaapil ang mga bata ug matabangan silang mahinumdom sa kanta.

Ikonsiderar ang mosunod nga mga ideya samtang magtudlo ka sa “Gihigugma Ako sa Langitnong Amahan” (SB, 16–17). Pangutan-a ang mga bata giunsa nila sa pagpakita og gugma sa mga sakop sa ilang pamilya. Pangutan-a kon giunsa sa pagpakita og gugma sa Langitnong Amahan kanila. Ipasabut nga Iyang gihimo kining matahum nga kalibutan alang kanila tungod kay Siya nahigugma kanila. Kantaha ngadto sa mga bata ang usa ka hugpong sa pulong sa matag higayon, ug dapita sila sa pagkanta dungan nimo samtang mag-aksyon sila sa matag bahin: mga langgam nga nanganta, nagsud-ong sa kalangitan, mga ulan nagpangatagak sa ilang nawong, ug uban pa. Alang sa ikaduhang bersikulo, dapita sila sa pag-aksyon sama sa pagtudlo sa ilang mga mata, pag-aksyon sama sa alibang-bang, pagtabon sa ilang mga dalunggan. Dapita sila sa paggakos sa ilang kaugalingon samtang magkanta sa, “He gave me my life,” dayon pikpikon ang ilang ulo (“my mind”), itapion ang kamot sa ilang kasingkasing (“my heart”), ug moduko ug mokyugpos (“I thank him reverently”). Hangyoa sila sa pagtapion og balik sa ilang kasingkasing samtang manganta sila sa, “Yes, I know Heavenly Father loves me.”

Ang pagbalik-balik makatabang sa mga bata pagkat-on og bag-ong mga kanta. Balik-balika ang mga kanta sa lain-laing paagi, sama sa paghagawhaw, pag-hum, pagpak-pak dungan sa kanta, pag-usab sa tempo, o pagkanta samtang naglingkod ug nagbarug.