ខែ តុលា
ខ្ញុំនឹងចែកចាយដំណឹងល្អជាមួយកូនចៅរបស់ព្រះទាំងអស់
« ឲ្យពន្លឺរបស់អ្នករាល់គ្នាបានភ្លឺទៅមុខមនុស្សលោកយ៉ាងនោះដែរ ដើម្បីឲ្យគេឃើញការល្អ ដែលអ្នករាល់គ្នាប្រព្រឹត្ត រួចសរសើរតម្កើងដល់ព្រះវរបិតានៃអ្នករាល់គ្នាដែលគង់នៅស្ថានសួគ៌ » ( ម៉ាថាយ 5:16 ) ។
សូមបន្ថែមគំនិតទាំងឡាយដែលបានផ្តល់ឲ្យត្រង់ចំណុចនេះទៅនឹងគំនិតរបស់អ្នក ។ នៅរៀងរាល់សប្តាហ៍ សូមដាក់ផែនការដើម្បី (1) ស្វែងរកគោលលទ្ធិ (2) ជួយកុមារយល់ពីគោលការណ៍នោះ ហើយ (3) ជួយឲ្យពួកគេអនុវត្តគោលការណ៍នោះនៅក្នុងជីវិត ។ សូមសួរខ្លួនអ្នកថា ៖ « តើកុមារត្រូវធ្វើអ្វីដើម្បីរៀន ហើយថាតើខ្ញុំអាចជួយពួកគេឲ្យទទួលអារម្មណ៍នៃព្រះវិញ្ញាណបរិសុទ្ធដោយរបៀបណា ? »
សប្តាហ៍ទី 1 ៖ រស់នៅតាមដំណឹងល្អ ជួយខ្ញុំឲ្យក្លាយជាអ្នកផ្សព្វផ្សាយសាសនានាពេលឥឡូវនេះ ។
ស្វែងរកគោលលទ្ធិ និងលើកទឹកចិត្តឲ្យមានការយល់ដឹង( ស្តាប់រឿង ) ៖ សូមដាក់តាំងរូបភាពអ្នកផ្សាយសាសនា ។ សូមសួរកុមារថាតើពួកអ្នកផ្សព្វផ្សាយសាសនាធ្វើអ្វី ។ សូមចែកចាយពីដំណើររឿងដូចខាងក្រោម ឬដំណើររឿងមួយដកស្រង់ចេញពី ប្រិយមិត្ត ឬ លីអាហូណា ៖ « នៅថ្ងៃមួយ មានអ្នកផ្សព្វផ្សាយសាសនាពីរនាក់បានគោះទ្វារផ្ទះ មួយ ។ ស្រ្តីម្នាក់ឈ្មោះថា លោកស្រី ជេមស៍ ក៏បានបើកទ្វារ ។ ពួកអ្នកផ្សព្វផ្សាយសាសនាបានប្រាប់ដល់គាត់ថា ពួកគេបានមកពីសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ។ លោកស្រី ជេមស៍ បានអញ្ជើញពួកអ្នកផ្សព្វផ្សាយសាសនាចូលក្នុងផ្ទះ ហើយបានប្រាប់ដល់ពួកគេថា គាត់ចង់រៀនថែមទៀតពីសាសនាចក្រ ។ … លោកស្រី ជេមស៍ បានប្រាប់ពួកគេថា គាត់ធ្លាប់រស់នៅជិតក្រុមគ្រួសារមួយដែលជាសមាជិកនៃសាសនាចក្រ ។ គាត់បាននិយាយថា កូនៗ នៅក្នុងក្រុមគ្រួសារនោះគឺសុភាពរាបសា និងមានចិត្តល្អណាស់ ។ ពួកក្មេងៗទាំងនោះ លេងជាមួយក្មេងៗគ្រប់គ្នាយ៉ាងយុត្តិធម៌ ហើយមិនធ្វើឲ្យទ្រព្យសម្បត្តិរបស់អ្នកដទៃហិនហោចឡើយ ។ លោកស្រី ជេមស៍ បាននិយាយថា គាត់ចង់រៀនអំពីសាសនាចក្រដែលបានបង្រៀនដល់កូនៗទាំងនោះ ដើម្បីធ្វើជាអ្នកជិតខាងដ៏ល្អ » (អង្គការបឋមសិក្សា 2 ទំព័រ 52 ) ។ សួរថា ៖ « តើកុមារដែលរស់នៅជិតលោកស្រី ជេមស៍ ធ្វើជាអ្នកផ្សព្វផ្សាយសាសនាដោយរបៀបណា ? » សូមពន្យល់ថា នៅពេលណាដែលយើងរស់នៅតាមដំណឹងល្អ គឺយើងកំពុងតែធ្វើជាអ្នកផ្សព្វផ្សាយសាសនា ។ សូមអញ្ជើញកុមារឲ្យថាតាមអ្នកថា « ការរស់នៅតាមដំណឹងល្អ ជួយខ្ញុំដើម្បីធ្វើជាអ្នកផ្សព្វផ្សាយសាសនានាពេលឥឡូវនេះ » សូមសង្កត់ធ្ងន់ទៅលើពាក្យ នាពេលឥឡួវនេះ ។
សប្តាហ៍ទី 2 ៖ រស់នៅតាមដំណឹងល្អជួយខ្ញុំធ្វើជាអ្នកផ្សព្វផ្សាយសាសនានាពេលឥឡូវ ។
លើកទឹកចិត្តឲ្យមានការយល់ដឹង( ច្រៀងចម្រៀង និងការពិភាក្សាពីបទដ្ឋានគោលការណ៍ដំណឹងល្អ ) ៖ សូមធ្វើប័ណ្ណ 13 សន្លឹក ដែលប័ណ្ណនីមួយៗត្រូវមាន « បទដ្ឋានដំណឹងល្អរបស់ខ្ញុំ » សរសេរនៅលើនោះ ( សូមមើល « ពេលវេលាចែកចាយ ៖ គោរពតាមបទបញ្ញត្តិទាំងឡាយ » ប្រិយមិត្ត ខែ មិថុនា ឆ្នាំ 2006 ទំព័រ 36 ) ។ សូមចែកប័ណ្ណទៅឲ្យកុមារ ហើយឲ្យពួកគេហុចប័ណ្ណតៗគ្នា ខណៈដែលកុមារគ្រប់គ្នាច្រៀងបទ « ខ្ញុំចង់ក្លាយជាអ្នកផ្សាយសាសនានៅពេលឥឡូវ »( ច.ក. ទំព័រ 168 ) ។ ពេលចម្រៀងចប់ ចូរឲ្យកុមារម្នាក់ៗដែលកាន់ប័ណ្ណអានបទដ្ឋានឲ្យឮៗ ហើយបន្ទាប់មកឲ្យចែកចាយថា តើការរស់នៅតាមបទដ្ឋាននឹងជួយពួកគេដើម្បីធ្វើជាអ្នកផ្សព្វផ្សាយសាសនាពេលឥឡូវបានយ៉ាងដូចម្តេច ។ សូមធ្វើសារឡើងវិញ ដោយប្រើប័ណ្ណខុសៗគ្នា ។
ការច្រៀងអំពីគោលលទ្ធិមួយជួយកុមារឲ្យរៀន ហើយចងចាំវា ។ កុមារទាំងឡាយក៏រៀនបានប្រសើរជាងផងដែរ ប្រសិនបើពួកគេមានជំនួយចក្ខុមួយ ឬសម្តែងសកម្មភាពមួយព្រមជាមួយនឹងតន្រ្តី ។
លើកទឹកចិត្តឲ្យមានការអនុវត្តន៍( ដាក់គោលដៅ ) ៖សុំឲ្យកុមារម្នាក់ៗឲ្យជ្រើសរើសបទដ្ឋានគោលការណ៍ដំណឹងល្អមួយ ដែលពួកគេនឹងព្យាយាមរស់នៅបានយ៉ាងប្រសើរនៅក្នុងសប្តាហ៍នេះ ។ សូមឲ្យពួកគេសរសេរវា ឬគូររូបភាពពីបទដ្ឋាននៅលើក្រដាសមួយសន្លឹក ហើយមើលបទដ្ឋាននោះរាល់ថ្ងៃទុកជាការរំលឹកមួយ ។ អញ្ជើញពួកគេឲ្យប្រាប់ពីបទពិសោធន៍នៅក្នុងថ្នាក់កុមារនៅសប្តាហ៍ក្រោយ ។
សប្តាហ៍ទី 3 ៖ ខ្ញុំអាចចែកចាយដំណឹងល្អជាមួយក្រុមគ្រួសារ និងមិត្តភក្តិទាំងឡាយរបស់ខ្ញុំ ។
ស្វែងរកគោលលទ្ធិ( ស្តាប់រឿងនិទាន ) ៖ពីមុនថ្នាក់កុមារចាប់ផ្តើម សូមអានសុន្ទរកថារបស់ អែលឌើរ រ៉ូប៊ឺត ស៊ី. អូកស៍ ក្នុងសន្និសីទខែ តុលា ឆ្នាំ 2000 « ចែកចាយដំណឹងល្អ » ( សូមមើលEnsignខែ វិច្ឆិកា ឆ្នាំ2000 ទំព័រ 81–82 ) ។ សូមប្រាប់កុមារពីទឹកក្រូច ។ សូមពន្យល់ថា ដំណឹងល្អគឺផ្អែមល្ហែមជាងទឹកក្រូចទៅទៀត ហើយយើងគួរតែចែកចាយវាជាមួយអ្នកដទៃ ។ សូមឲ្យកុមារនិយាយថា « ខ្ញុំអាចចែកចាយដំណឹងល្អជាមួយក្រុមគ្រួសារ និងមិត្តភក្តិទាំងឡាយរបស់ខ្ញុំ » ។
លើកទឹកចិត្តឲ្យមានការយល់ដឹង( ស្តាប់ភ្ញៀវកិត្តិយស ) ៖អញ្ជើញអ្នកផ្សព្វផ្សាយសាសនា ឬអ្នកត្រឡប់ពីបេសកកម្មឲ្យនិយាយអំពីវិធីទាំងឡាយដែលកុមារអាចចែកចាយដំណឹងល្អជាមួយអ្នកដទៃ ( ដូចជា តាមរយៈការធ្វើជាគំរូល្អ ការអញ្ជើញមិត្តភក្តិមកថ្នាក់កុមារ និងការចែកចាយទីបន្ទាល់របស់ពួកគេ ) និងពីរបៀបដែលកិច្ចខិតខំរបស់ពួកគេក្នុងការចែកចាយដំណឹងល្អបានជួយដល់ព្រះវរបិតាសួគ៌ និងពួកអ្នកផ្សព្វផ្សាយសាសនា ) ។
លើកទឹកចិត្តឲ្យមានការអនុវត្តន៍( ការស្តាប់រឿងនិទានមួយ និងការចែកចាយពីគំនិតទាំងឡាយ ) ៖សូមរំលឹកកុមារថា ពួកគេអាចធ្វើជាអ្នកផ្សព្វផ្សាយសាសនាពីពេលឥឡូវនេះ ។ សូមចែកចាយពីពេលដែលអ្នក ឬ នរណាម្នាក់ដែលអ្នកស្គាល់បានចែកចាយដំណឹងល្អ ។ សូមឲ្យកុមារក្រោកឈរម្នាក់ម្តងៗ ហើយម្នាក់ៗនិយាយឃ្លាមួយនៃប្រយោគថា « ខ្ញុំអាចចែកចាយដំណឹងល្អ » ។ អញ្ជើញកុមារដែលនិយាយពាក្យថា « ដំណឹងល្អ » ឲ្យគិតពីវិធីមួយដែលគាត់អាចចែកចាយដំណឹងល្អជាមួយក្រុមគ្រួសារ ឬមិត្តភក្តិ ។ សូមធ្វើសារឡើងវិញតាមដែលមានពេលវេលា ។
សប្តាហ៍ទី 4 ៖ ទីបន្ទាល់របស់ខ្ញុំ គឺត្រូវបានពង្រឹង នៅពេលខ្ញុំចែកចាយដំណឹងល្អ ។
គោលបំណងមេរៀនបង្កើតឲ្យមានចំណាប់អារម្មណ៍ និងការយកចិត្តទុកដាក់ពីកុមារទៅលើគោលការណ៍ដំណឹងល្អមួយ ។
ស្វែងរកគោលលទ្ធិ( មើលគោលបំណងមេរៀន ) ៖សូមដាក់ទឹកនៅក្នុងដបកែវថ្លាមួយ ។ សូមពន្យល់ថា រាល់ពេលយើងចែកចាយដំណឹងល្អ នោះទីបន្ទាល់របស់យើងរីកចម្រើនច្រើនឡើង ។ សូមបន្តក់ព៌ណសម្រាប់លាយក្នុងអាហារមួយដំណក់ទៅក្នុងដបទឹកនោះ ។ សូមផ្តល់ជាឧទាហរណ៍មួយចំនួនពីរបៀបដែលយើងអាចចែកចាយដំណឹងល្អ ដោយបន្តក់ព៌ណសម្រាប់លាយក្នុងអាហារនូវព៌ណដដែលមួយដំណក់ទៀត ទុកធ្វើជាឧទាហរណ៍នីមួយៗ ។ សូមបង្ហាញថា ពណ៌ក្នុងដបទឹកកាន់តែឡើងព៌ណខ្លាំងឡើងៗរាល់ពេលដែលយើងដាក់លក្ខណ៍សម្រាប់លាយពណ៌ក្នុងអាហារចូល នោះទីបន្ទាល់របស់យើងក៏កាន់តែរឹងមាំគ្រប់ពេលដែលយើងចែកចាយដំណឹងល្អដូច្នេះដែរ ។
លើកទឹកចិត្តឲ្យមានការយល់ដឹង( ចែកចាយទីបន្ទាល់ ) ៖សូមដាក់សម្ភារខាងក្រោមចូលក្នុងថង់មួយ ៖ រូបភាពព្រះយេស៊ូវគ្រីស្ទ រូបភាពយ៉ូសែប ស្ម៊ីធ រូបភាពនៃ ព្យាការីបច្ចុប្បន្ន ព្រះគម្ពីរមរមន និងពាក្យថា « សាសនាចក្រពិត » ។ សូមសរសេរនៅលើក្តារខៀនពាក្យថា ទីបន្ទាល់ហើយសុំសួរកុមារថា តើទីបន្ទាល់មានន័យយ៉ាងណា ។ សូមពិភាក្សាពីចម្លើយរបស់ពួកគេ ។ សូមប្រាប់ដំណើររឿងដូចខាងក្រោម ៖ « មានកុមារីក្មេងខ្ចីម្នាក់ភ័យខ្លាចដើម្បីចែកចាយទីបន្ទាល់ ពីព្រោះនាងមានអារម្មណ៍មិនជឿជាក់លើអារម្មណ៍របស់នាង ។ ប៉ុន្តែនាងបានដឹងថា វាសំខាន់ណាស់ ដូច្នេះនៅថ្ងៃមួយនាងបានឈរដោយក្លាហាន ហើយបានថ្លែងទីបន្ទាល់របស់នាង ដោយសរសេរនូវចំណុចប្រាំយ៉ាងដែលនាងជឿលើ ។ ពេលដែលនាងអាចធ្វើបាន នាងមានអារម្មណ៍ល្អ ហើយបានដឹងថា ទីបន្ទាល់របស់នាងបានរីកចម្រើនខ្លាំងឡើង ។ សូមឲ្យកុមាររកចំណុចប្រាំយ៉ាងដែលនាងមានទីបន្ទាល់អំពី តាមរយៈការលូកយកសម្ភារៈចេញពីស្បោងដែលអ្នកបានរៀបចំ ។ សូមពិភាក្សាពីសម្ភារៈទាំងនេះ ហើយដាក់តាំងវានៅលើក្តារខៀន ។
លើកទឹកចិត្តឲ្យមានការអនុវត្តន៍ ( ចែកចាយគំរូ ) ៖ សូមអនុញ្ញាតឲ្យកុមារចែកចាយគំរូដែលពួកគេអាចចែកចាយដំណឹងល្អ ។ រាល់ពេលដែលកុមារម្នាក់ៗលើកឡើងពីអ្វីមួយ សូមបន្តក់ពណ៌សម្រាប់លាយក្នុងអាហារមួយដំណក់បន្ថែមចូលទៅក្នុងដបទឹក ដើម្បីបង្ហាញថា ការចែកចាយដំណឹងល្អអាចពង្រឹងទីបន្ទាល់បាន ។ ( ប្រសិនបើមានកុមារច្រើន អ្នកអាចធ្វើកិច្ចការនេះជាក្រុម ដើម្បីឲ្យកុមារម្នាក់ៗមានឱកាសចែកចាយពីគំនិតទាំងឡាយ ) ។