Fokotuʻu ki he Ngaahi ʻAho Feliliuakí

ʻOku fakatefito e fakahinohino ki he vave hono akoʻí maʻá e kau faiako fakaʻahó ʻi ha taʻu fakaako ʻoku uike ʻe 36 pe ʻaho ʻe 180. ʻOku ʻoatu ʻe he tohi lēsoni ko ʻení ha ngaahi lēsoni fakaʻaho ʻe 160, ʻo ʻikai kau ki ai ha ʻaho ʻe 20 ʻa ia ʻoku ʻikai ʻoatu ki ai ha nāunau fakalēsoni. ʻOku totonu ke fakaʻaongaʻi fakapotopoto e “ʻaho feliliuaki” ʻe 20 ko ʻení ki ha ngaahi taumuʻa mo ha ʻekitivitī mahuʻinga, kau ai ʻa e ngaahi meʻa ko ʻení:

1. Siví. Ko e Taumuʻa ʻo e Seminelí mo e ʻInisitituti Fakalotú ke “tokoni ke fakamahino pea mo falala ʻa e toʻu tupú mo e kakai lalahi kei talavoú ki he ngaahi akonaki mo e Fakalelei ʻa Sīsū Kalaisí, fakafeʻungaʻi kinautolu ke maʻu ʻa e ngaahi tāpuaki ʻo e temipalé, pea teuteuʻi kinautolu, honau fāmilí mo e niʻihi kehé ke moʻui taʻengata mo ʻenau Tamai Hēvaní.” ʻI hono fakakaukauʻi e taumuʻá ni, kuo teuteuʻi ʻe he S&I ha ngaahi sivi. ʻOku fakataumuʻa e ngaahi sivi ko ʻení ke tokoniʻi e kau akó ke mahino, fakamatalaʻi, tui, mo moʻui ʻaki e meʻa ʻoku nau ako ʻi he kalasí.

   ʻI he 2014, naʻe liliu e ngaahi fie maʻu ke ʻosi mei he seminelí ʻa ia kuo pau ke lavaʻi ʻe he kau akó ʻa e ngaahi sivi ki he kalasi takitaha kae toki lava ke ʻosi. ʻOku totonu ke ke fakahoko e ngaahi siví ʻo tuʻo taha lolotonga e konga takitaha ʻo e taʻu fakaakó. ʻOku ʻi ai ha konga ʻe ua ʻo e fakafuofua takitaha: (1) ko hono fakahoko e siví, ʻa ia ʻe meimei miniti ʻe 40, pe ko ha kalasi fakaʻaho ʻe taha, pea mo (2) fakatonutonu mo aleaʻi e siví mo e kau akó lolotonga e taimi kalasí. Ko e toe vakaiʻi ko ʻení ko ha konga mahuʻinga ia ʻo hono tokoniʻi e kau akó ke ako mei he aʻusiá. Kapau ʻoku fakataha hoʻo kalasí ʻo fuoloa ange ʻi he miniti ʻe 60, ʻoku totonu ke ke toʻo pē ha taimi kalasi ʻe taha ke fakahoko mo toe vakaiʻi ʻaki e siví.

   ʻOku totonu ke fakaʻaongaʻi e ngaahi siví ke tokoni ki he kau akó. Neongo hono fanongonongo e tānaki atu ʻa e siví ki he ngaahi fie maʻu ke ʻosi mei he seminelí, naʻe pehē ʻEletā Paula V. Sionisoni ʻo e Kau Fitungofulú, “ʻOku fakahoko ʻe he tōʻonga fakakaukau ʻo ha faiako ha faikehekehe lahi. Kapau ʻe lava e kau faiakó ʻo vakai ki he founga ʻoku tāpuekina ai ʻe he meʻá ni e moʻui ʻa e kau akó, te nau vakai ki he ngaahi siví ko ha founga ke tokoniʻi ʻenau kau akó. … ʻOku ou tui ka ne ʻi ai ha fakatokanga, ko e ʻikai fie maʻu ke vakai e faiakó ko ha founga ʻeni ke taki ʻaki pe ko ha ʻakau tā (club)—ʻo ʻuhinga ia—ko ha meʻa ke tā ʻaki ha taha, pe ko ha ʻakau tā maʻa ha fānau ako pau. ʻOku tau fie maʻu ke nau vakai ki he meʻá ni ko ha meʻa te ne tāpuakiʻi moʻoni ʻenau moʻuí” (“Elevate Learning Announcement” [Seminaries and Institutes of Religion global faculty meeting, June 20, 2014], si.lds.org).

2. Ko hono liliu e ngaahi lēsoni fakaʻahó. Mahalo te ke fie tuku ha taimi lahi ki he lēsoni ʻe lōloa angé ke lelei hono akoʻí. Mahalo te ke fie maʻu foki ke fakaʻaongaʻi e ngaahi fakakaukau tokoni fakafaiako ʻoku ʻasi ʻi he fakaʻosinga ʻo ha niʻihi ʻo e ngaahi lesoní pe tuku ha taimi ke tali e ngaahi fehuʻi ʻa e kau akó fekauʻaki mo ha ngaahi potufolofola pau pe kaveinga ʻo e ongoongoleleí. ʻOku fakaʻatā koe ʻe he ngaahi ʻaho feliliuakí ke ke fakaʻaongaʻi e ngaahi faingamālie ko ʻení kae kei tauhi pē hoʻo taimitēpile ki he vave hono akoʻí pea fakahoko ʻa e fekau kuo fai kiate koe ke akoʻi hokohoko ʻa e folofolá.

3. Ko hono maʻuloto e ngaahi potufolofola mahuʻingá mo e Ngaahi Tefitoʻi Tokāteliné. Mahalo naʻa fie maʻu ke ke fakaʻaongaʻi ʻa e ngaahi ʻekitivitī fakamanatu ki he ngaahi veesi fakataukei folofola ʻoku ʻi he tohi lēsoní mo e fakamatala fakalahi ki he tohí. Te ke lava ʻo faʻu mo ha toe ngaahi ʻekitivitī fakamanatu ʻo e fakataukei folofolá ʻoku feʻunga mo e fie maʻu pau mo e meʻa ʻoku saiʻia ai ʻa e kau ako ʻi hoʻo kalasí. Te ke lava foki ʻo fakaʻaongaʻi e konga ʻo ha ʻaho feliliuaki ki he ngaahi ʻekitivitī ʻe tokoni ki he kau akó ke toe vakaiʻi mo fakaloloto ʻenau mahino ki he Ngaahi Tefitoʻi Tokāteliné.

4. Toe vakaiʻi e ngaahi nāunau fakalēsoni kimuʻá. ʻE tokoni ke toutou vakaiʻi ʻe he kau akó ʻa e ngaahi meʻa kuo nau ako ʻi he ngaahi lēsoni kimuʻá pe mei ha tohi folofola pau. Te ke lava ʻo ʻoange ki he kau akó ha faingamālie ke fakamatalaʻi ha foʻi moʻoni mei ha lēsoni kimuʻa mo vahevahe ʻa e founga kuo tākiekina ai ʻenau moʻuí ʻe he foʻi moʻoni ko iá. Te ke lava ʻo faʻu mo fakahoko ha sivi pe ʻekitivitī fakaako ʻe toe vakaiʻi ai ʻa e nāunau fakalēsoni kimuʻá.

5. Fakaʻatā ki ha mālōlō ne ʻikai fakataimitēpileʻi. Mahaho ʻe fie maʻu ke ke kaniseli pe fakanounou e taimi kalasí he taimi ʻe niʻihi koeʻuhí ko e ngaahi ʻekitivitī fakaakó pe fakatahá, meʻa fakakoló, ʻeá, mo e ngaahi taimi mālōlō kehé. ʻE lava ke fakaʻaongaʻi e ngaahi ʻaho feliliuakí ke fakaʻatā ki he ngaahi mālōlō peheé.