Lēsoni 43
Tokāteline mo e Ngaahi Fuakava 38:17-42
Talateú
Naʻe aleaʻi ʻi he lēsoni ne toki ʻosí e fuofua veesi 16 ʻo e Tokāteline mo e Ngaahi Fuakava 38. ʻOku aleaʻi ʻi he lēsoni ko ʻení hono toe ʻo e vahé. ʻI he tali ki he holi ʻa e Kāingalotú ke ʻilo lahi ange ki he fekau ke tānaki fakataha ki ʻOhaioó, naʻe fakahā mai ʻe he ʻEikí ha ngaahi tāpuaki ʻe maʻu ʻe he kau māʻoniʻoní lolotonga e Nofotuʻí. Naʻá ne fakahinohinoʻi e Kāingalotú ke nau fāitaha pea fakamatalaʻi ange e ʻuhinga naʻá Ne fekau ai ke nau tānaki fakataha ki ʻOhaioó. Ne faifai pea ʻoange ʻe he ʻEikí ha ngaahi fekau ke tokoniʻi e Kāingalotú ke ʻilo e founga ke kamata ai e tānaki fakatahá.
Ngaahi Fokotuʻu ki hono Akoʻí
Tokāteline mo e Ngaahi Fuakava 38:17-22
ʻOku fakahā ʻe he ʻEikí ha ngaahi tāpuaki ʻe hoko mai ki he kau angatonú ʻi he taimí ni pea ʻi he lolotonga e Nofotuʻí.
Fehuʻi ki he kau akó pe ko e hā ʻa e tofiʻa pea ko hai ʻokú ne faʻa maʻu iá.
-
Ko e hā ka ke ka fie maʻu ai ha tofiʻa?
Fakaafeʻi ha niʻihi ʻo e kau akó ke taufetongi ʻi hono lau leʻolahi e Tokāteline mo e Ngaahi Fuakava 38:17-22. Kole ki he kalasí ke nau muimui ki ai pea ʻiloʻi ʻa e tofiʻa naʻe talaʻofa ʻe he ʻEikí ke foaki ki Hono kakaí.
-
Ko e hā naʻe folofola ʻe he ʻEikí ʻoku fie maʻu ke fai ʻe Hono kakaí kae lava ke maʻu ʻa e tofiʻa ʻoku lau ki ai ʻi he ngaahi vēsí ni? (Fekumi ki ai ʻaki honau lotó kotoa [vakai, T&F 38:19]; fanongo ki Hono leʻó pea muimui kiate Ia [vakai, T&F 38:22].)
Fakaafeʻi ha tokotaha ako ke ne fakamatalaʻi ʻa e puipuituʻa ʻo e Tokāteline mo e Ngaahi Fuakava 38 ʻa ia naʻa nau ako he lēsoni kimuʻá. Kapau ʻe fie maʻu, fakamanatu ki he kau akó ne fie maʻu ʻe ha niʻihi ʻo e Kāingalotu ʻi Niu ʻIoké ha fakamatala lahi ange fekauʻaki mo e fekau ʻa e ʻEikí ke nau hiki ki ʻOhaioó.
-
Ko e hā e founga ʻokú ke pehē ne tākiekina ai ʻe hono akoʻi e Kāingalotú fekauʻaki mo honau tofiʻa taʻengatá ʻa ʻenau ongoʻi fekauʻaki mo e fekau ke nau hiki ki ʻOhaioó?
Poupouʻi ʻa e kau akó ke nau kumi ki ha toe ngaahi ʻuhinga ne ʻomi ai ʻe he ʻEikí ʻa e fekau ki he Kāingalotú ke tānaki fakataha ki ʻOhaiō ʻi heʻenau ako e toenga ʻo e Tokāteline mo e Ngaahi Fuakava 38.
Tokāteline mo e Ngaahi Fuakava 38:23-27
ʻOku fekauʻi ʻe he ʻEikí e Kāingalotú ke nau uouangataha
Kimuʻa pea kamata e kalasí, tā ʻi he palakipoé ha fakatātā faingofua ʻo ha konga ki tuʻa ʻo ha fale ʻi homou feituʻú. Pe tā ha fakatātā faingofua ʻo ha fale, ʻo hangē ko ia ʻoku hā atu hení. Fakakau ai e ngaahi konga mahuʻinga ʻo e falé, kau ai ha hūʻanga, ha matapā sioʻata, holisi, pea mo ha ʻato. Fehuʻi ki he kau akó pe ko e fē e konga mahuʻinga taha ʻo e falé. ʻI he tali ʻa e kau akó, tokoni ke nau fakatokangaʻi ʻoku ʻi ai ha taumuʻa mahuʻinga ʻo e konga takitaha ʻo e falé.
-
Ko e hā ha founga ʻe lava ai ke fakatatau e ngaahi konga ʻo ha fale ki he kakai ʻi ha fāmili, kakai ʻi ha uooti pe kolo? (Hangē ko ia ʻoku mahuʻinga ʻa e konga takitaha ʻo ha fale, ʻoku mahuʻinga ʻa e tokotaha kotoa pē ʻi ha fāmili, uooti pe kolo pea ʻi ai haʻane fatongia mahuʻinga.)
Fakaafeʻi e kau akó ke lau fakalongolongo ʻa e Tokāteline mo e Ngaahi Fuakava 38:23–25 pea kumi ki ha kupuʻi lea ʻokú ne akoʻi ʻa e founga ʻoku totonu ke tau vakai ai ki he niʻihi kehé. Kole ki he kau akó ke nau lipooti e meʻa ʻoku nau akó.
-
ʻOkú ke pehē ko e hā hono ʻuhinga ki ha taha ke “ʻofa ki hono tokouá ʻo hangē pē ko iá”? (Hili e tali ʻa e kau akó, hiki e tefitoʻi moʻoni ko ʻení ʻi he palakipoé: ʻOku totonu ke tau fakamahuʻingaʻi e niʻihi kehé ʻo tatau pē mo ʻetau fakamahuʻingaʻi kitautolú.
Ke tokoni ke manatuʻi ʻe he kau akó e tefitoʻi moʻoni ko ʻení, hiki ʻa e fakamatala ko ʻeni naʻe fai ʻe Palesiteni Poiti K. Peeka ʻo e Kōlomu ʻo e Kau ʻAposetolo ʻe Toko Hongofulu Mā Uá ʻi he palakipoé. Mahalo te ke fie fokotuʻu ange ke hiki tatau ʻe he kau akó ʻa e lisi ko ʻení ʻi heʻenau folofolá, pepa ki he kalasí, pe tohinoa ako folofolá. (ʻOku maʻu ʻa e fakamatalá ʻi he “Ko e Kau Vaivai mo e Māʻulalo ʻo e Siasí,”Ensignpe Liahona,Nōvema 2007, 7.)
“ʻOku tuʻunga tatau e kāingalotu kotoa pē [ʻo e Siasí]. ʻOku ʻikai pehē ʻe ha taha ia ʻoku mahuʻinga ange ia ʻi he tokotaha koeé (vakai, T & F 38: 24 – 25)” (Palesiteni Boyd K. Packer).
-
Ko e hā ʻoku hoko ʻi he taimi ʻoku fakakaukau ai e kakaí ʻoku nau mahuʻinga pe lelei ange ʻi he niʻihi kehé?
-
Ko e hā ha founga ʻoku faitāpuekina ai e Siasí ʻi he taimi ʻoku ʻikai ke tau pehē ai ʻoku tau mahuʻinga ange ʻi he niʻihi kehé?
Talaange ki he kau akó naʻe akoʻi ʻe he Fakamoʻuí ha talanoa fakatātā ki he ʻuhinga ʻoku totonu ke tau ʻofa ai ki he niʻihi kehé ʻo hangē pē lo kitautolú. Fakaafeʻi ha tokotaha ako ke ne lau leʻolahi e talanoa fakatātā ko ʻení mei he Tokāteline mo e Ngaahi Fuakava 38:26. Kole ki he kalasí ke nau muimui ki ai pea fekumi ki he tōʻonga ʻo e tangata ʻi he talanoa fakatātā ko ʻení ki hono ngaahi fohá.
-
Ko e hā te ke ongoʻi kapau ko e foha koe naʻá ne maʻu ʻa e kofu mahaehaé ʻi he talanoa fakatātā ko ʻení?
-
Ko e hā ʻe lava ke fai ʻe he foha naʻá ne maʻu ʻa e pulupulú ke fakaleleiʻi e tūkunga ko ʻení?
-
ʻOkú ke pehē ko e hā e fekau ʻa e ʻEikí maʻatautolu ʻi he talanoa fakatātā ko ʻení?
Kole ki he kau akó ke lau fakalongolongo ʻa e Tokāteline mo e Ngaahi Fuakava 38:7 pea fekumi ki ha tefitoʻi moʻoni ʻoku finangalo ʻa e ʻEikí ke mahino kiate kitautolu mei he talanoa fakatātā ko ʻení. (ʻE lava ke fakaʻaongaʻi ʻe he kau akó ha ngaahi lea kehe, ka ʻoku totonu ke nau fakahaaʻi ha faʻahinga meʻa hangē ko ʻení: Kapau ʻoku ʻikai ke tau taha, he ʻikai lava ke tau hoko ko e kakai ʻa e ʻEikí. Hiki ʻa e tefitoʻi moʻoni ko ʻení ʻi he palakipoé ʻo ofi ki he ʻuluaki tefitoʻi moʻoni naʻá ke tohí. Mahalo te ke fie fokotuʻu ange ke fakaʻilongaʻi ʻe he kau akó e ngaahi leá ʻi heʻenau folofolá ʻa ia ʻoku akoʻi ai e tefitoʻi moʻoni ko ʻení.)
-
Fakatatau ki he veesi 27, ʻoku ʻuhinga ki he hā ke “taha pē”? (Ke fāitaha mo e niʻihi kehé pea mo e ʻEikí ʻi he māʻoniʻoni.)
-
Ko e hā ha founga ʻe tokoni ai ʻetau fakamahuʻingaʻi e niʻihi kehé ʻo hangē ko kitautolú ke tau hoko ai ʻo taha? Ko e hā ha founga ʻe tokoni ai ʻeni ke tau taha ai mo e ʻEikí?
-
ʻOkú ke pehē ko e hā e ʻuhinga he ʻikai lava ai ke tau hoko ko ha kakai ʻa e ʻEikí ʻo kapau he ʻikai ke tau taha?
Fakamatalaʻi ange naʻe omi ʻa e fuofua kāingalotu ʻo e Siasí mei ha ngaahi puipuituʻa kehekehe ʻi hono ui kinautolu ke fakataha ki ʻOhaioó. Naʻe maʻu ʻe ha niʻihi ha ngaahi faama lelei pea fakaʻapaʻapaʻi ʻi honau tukui koló, ka naʻe ʻi ai ha niʻihi ne siʻi ʻenau koloá pea naʻe lau ʻoku nau ʻi ha tuʻunga fakasōsiale maʻulalo ange.
-
Ko e hā ha founga ʻe faitāpuekina ai ʻe he ngaahi tefitoʻi moʻoni ʻi he palakipoé e Kāingalotú ʻi heʻenau tānaki fakataha mo e kāingalotu kehe ʻo e Siasi ʻi ʻOhaioó?
Ki muʻa pea kamata e kalasí, mahalo te ke fie teuteu ha pepa tufa maʻá e tokotaha ako takitaha ʻoku ʻi ai ʻa e fakamatala ko ʻeni ʻa Palesiteni Henelī B. ʻAealingi ʻo e Kau Palesitenisī ʻUluakí. Fakaafeʻi ha tokotaha ako ke ne lau leʻolahi e fakamatalá. Kole ki he kalasí ke muimui ki ai, ʻo fekumi ki ha ngaahi founga ʻoku fekau ʻaki ai e fekau ke fāitahá mo e fekau ki Hono kakaí ke tānaki fakatahá.
“ʻOku tau ʻilo mei he ngaahi meʻa kuo tau aʻusiá ʻoku maʻu ʻa e fiefiá ʻi he taimi ʻoku tāpuakiʻi ai kitautolu ʻaki ʻa e uouangatahá. … ʻOkú Ne [ʻa ʻetau Tamai Hēvaní] fie tali ʻetau fakaʻamu toputapu ko ia ke ʻa e uouangatahá he ʻokú Ne ʻofa ʻiate kitautolu.
“He ʻikai lava ke Ne foaki ia kiate kitautolu fakafoʻituitui. ʻOku ʻikai ke fakafoʻituitui ʻa e fiefia ʻi he uouangataha ʻokú Ne finangalo ke tuku kiate kitautolú. [Kuo pau ke tau fekumi ki ai pea taau ke maʻu ia mo e niʻihi kehé]. ʻOku ʻikai leva ha ofo ʻi he naʻinaʻi ʻa e ʻOtuá ke tau taha kae lava ke Ne tāpuakiʻi kitautolu. ʻOkú Ne finangalo ke tau fakataha ʻi he ngaahi fāmili. Kuó Ne fokotuʻu ha ngaahi kalasi, uooti, mo e ngaahi kolo pea fekau ke tau faʻa fakataha. Ko hotau faingamālié ʻoku ʻi he ngaahi fakatahaʻanga ko ʻeni kuo fokotuʻu ʻe he ʻOtuá maʻatautolú. ʻE lava ke tau lotu ʻi he tui lahi pea ngāue ke maʻu ʻa e uouangataha ko ia te tau te tau maʻu ai e fiefiá mo lahi ange ai hotau mālohi ke ngāué” (Ke Taha Hotau Lotó,”Ensign pe Liahona, Nōvema 2008, 69).
-
Fakatatau kia Palesiteni ʻAealingi, ko e hā e ʻuhinga ʻoku finangalo ai e ʻEikí ke tau tānaki fakatahá? (Kae lava ke Ne tāpuakiʻi kitautolu mo tokoni ke tau uouangataha.) Ko e hā e ngaahi tāpuaki ʻo e uouangatahá? (Ko e fiefia mo e fakalahi hotau mālohi ke ngāué.)
-
Ko e hā ha founga ʻoku tokoniʻi ai kitautolu ʻe he fakamatala ʻa Palesiteni ʻAealingí ke mahino e ʻuhinga ʻoku tau tānaki fakataha ai ko ha fāmili? ʻI heʻetau hoko ko ha kāingalotu ʻo e Siasí?? ʻI heʻetau hoko ko ha kalasi semineli?
-
Ko e fē ha taimi kuó ke aʻusia ai e ngaahi tāpuaki ʻoku maʻu mei he tānaki fakataha mo e niʻihi kehé?
Fakaafeʻi e kau akó ke tuku ha kiʻi taimi ke hiki ʻi heʻenau pepa ki he kalasí pe tohinoa ako folofolá fekauʻaki mo e meʻa te nau lava ʻo fai ke hoko ʻo taha mo honau fāmilí, kau talavou mo e kau finemui ʻi honau kōlomú mo e ngaahi kalasi ʻi he Siasí, pea mo e ʻEikí. Hili ha taimi feʻunga, fakaafeʻi ha niʻihi ʻo e kau akó ke vahevahe e meʻa ne nau tohí.
Tokāteline mo e Ngaahi Fuakava 38:28-33
ʻOku fakamatalaʻi ʻe he ʻEiki ʻa e ʻuhinga naʻá Ne fekauʻi ai Hono Siasí ke tānaki fakataha ki ʻOhaioó
Fakamatalaʻi ange naʻe fakahā mai ʻe he ʻEikí ha ngaahi ʻuhinga kehe ki he ʻuhinga naʻá Ne fekauʻi ai e Kāingalotú ke mavahe mei Niu ʻIoke pea tānaki fakataha ki ʻOhaioó. Fakaafeʻi ha tokotaha ako ke lau leʻolahi ʻa e Tokāteline mo e Ngaahi Fuakava 38:28-30 , pea kole ki he kalasí ke nau fekumi ki ha ngaahi ʻuhinga kehe ne fekauʻi ai e Kāingalotú ke nau tānaki fakataha ki ʻOhaioó.
-
Ko e hā e meʻa naʻe fakatokanga ki ai e ʻEikí ki he Kāingalotú?
-
Fakatatau ki he veesi 30, ko e hā ʻe lava ke fai ʻe he kakaí ʻa e ʻEikí kae lava ke ʻoua te nau manavahē ki honau ngaahi filí? (Mahalo te ke fie fokotuʻu ange ke fakaʻilongaʻi ʻe he kau akó e ngaahi lea ʻokú ne akoʻi e tefitoʻi moʻoni ko ʻení: Kapau te tau mateuteu, he ʻikai te tau manavahē.)
Ke tokoni ke mahino ki he kau akó pea fakaʻaongaʻi ʻa e moʻoní naʻa nau ʻiloʻí, ʻai ke nau tauhoa pea fakaafeʻi e hoa takitaha ke nau aleaʻi ʻa e ngaahi tali ki he ngaahi fehuʻi ko ʻení. (Mahalo te ke fie maʻu ke hiki e ngaahi fehuʻi ko ʻení ʻi he palakipoé.)
-
ʻOkú ke pehē ko e hā e ʻuhinga ʻoku ʻomi ai ʻe mateuteú ha loto falala ʻi he fehangahangai mo e fakafepakí pe faingataʻá?
-
Ko e hā te tau lava ʻo fai ke tau mateuteu ai ki he ngaahi feinga ʻa e filí ke fakahoko ha kovi kiate kitautolu?
Fakamanatu ki he kau akó ne fehuʻia ʻe ha niʻihi ʻo e Kāingalotu ʻi Niu ʻIoké ʻi he 1831 e ʻuhinga ne fekauʻi ai kinautolu ke ō ki ʻOhaioó. Fakaafeʻi ha tokotaha ako ke ne lau leʻolahi e Tokāteline mo e Ngaahi Fuakava 38:31-33 . Fakaafeʻi e kalasí ke nau muimui ki ai pea fekumi ki ha ngaahi founga ʻe faitāpuekina ai e Kāingalotú kapau te nau talangofua ki he fekau ke tānaki fakataha ki ʻOhaioó. ʻOku totonu ke ʻiloʻii ʻe he kau akó ha ngaahi tāpuaki ʻe fā: (1) ke nau “hao mei he mālohi ʻo e filí”; (2) te nau “tānaki fakataha ki he [ʻOtuá] ko ha kakai māʻoniʻoni”; te nau maʻu ai e fono ʻa e ʻOtuá, pea (4) ʻe “fakakoloaʻiaʻi ai ʻa kinautolu ʻaki ʻa e mālohi mei ʻolungá.”
Hiki ʻa e tefitoʻi moʻoni ko ʻení ʻi he palakipoé: ʻOku tānaki ʻe he ʻEikí Hono kakaí ke maluʻi mo fakamālohia fakalaumālie kinautolu.
-
Ko e hā ha founga ʻoku tokoni ai e tānaki fakataha mo kinautolu ʻoku mou tuʻunga moʻui tataú ke ke ongoʻi malu ai mei he mālohi ʻa Sētané?
-
Ko e hā ha founga ʻoku tokoni ai hono maʻu ʻo e ngaahi fono ʻa e ʻOtuá ke fakamālohia fakalaumālie kitautolu?
Tokāteline mo e Ngaahi Fuakava 38:34-42
ʻOku foaki ha fekau ki he Siasí fekauʻaki mo e tānaki fakataha ki ʻOhaioó
Fakamatalaʻi nounou ʻa e Tokāteline mo e Ngaahi Fuakava 38:34–42 ʻaki hano fakamatalaʻi ange ne foaki mai ʻe he ʻEikí ha ngaahi fekau mo ha faleʻi ki he Kāingalotú ʻa ia ʻe tokoniʻi ai kinautolu ʻi heʻenau hiki ki ʻOhaioó. Fakamatalaʻi ange foki ko e tokolahi ʻo e Kāingalotú, ko ʻenau maʻuʻanga moʻuí pē ʻa ʻenau fāmá. Koeʻuhí ko e lahi ʻo e kāingalotu ʻo e Siasí ne fakatau atu ʻenau koloá ʻi he taimi tatau, ne fehangahangai e tokolahi ʻo e Kāingalotú mo e malava ke ʻi ai e mole fakapaʻanga ʻi heʻenau ngaahi fāmá pe ko e ʻikai lava pē ke fakatau atu kinautolu. Ko e lahi ko ia e kelekele ke fakatau atú ʻe tukuhifo ai e totongí pea fakaʻatā e kau fakataú ke fakatau e ngaahi faama ʻo e Kāingalotú ʻi ha mahuʻinga maʻamaʻa ʻaupito.
Fakaafeʻi e kau akó ke nau lau fakalongolongo ʻa e Tokāteline mo e Ngaahi Fuakava 38:37, 39 pea kumi ki he faleʻi ʻa e ʻEikí kau ki he ngaahi faama mo e ngaahi koloa ʻo e Kāingalotú. Fakaafeʻi e kau akó ke lipooti e meʻa ne nau maʻú.
-
Ko e hā ha founga ʻoku tokoniʻi ai koe ʻe hono ʻilo e ngaahi talaʻofa taʻengata kuo fai atu ʻe he ʻEikí ke ke talangofua ki Heʻene ngaahi fekaú?
Fakamatalaʻi ange ne faingataʻaʻia e niʻihi ʻo e Kāingalotú ʻi hono fakatau atu ʻenau fāmá hili hono maʻu ʻo e fekau ko ʻení. Ne fakatau atu ʻe ha niʻihi ʻenau fāmá ʻi ha mahuʻinga ne maʻulalo ange ʻi hono mahuʻinga totonú; ne ʻikai lava ha niʻihi ʻo fakatau atu ʻenau ngaahi koloá. Ne ʻi ai ha kāingalotu faivelenga ʻe niʻihi ne nau liʻaki honau ʻapí mo e koloá pea ō ki ʻOhaiō.
Mahalo te ke fie fakaʻosi ʻaki e kalasí hano vahevahe hoʻo fakamoʻoni ki he ngaahi moʻoni ne aleaʻi ʻi he lēsoni ko ʻení. Fakaafeʻi e kau akó ke nau ngāue ʻo fakatatau mo e ngaahi meʻa naʻa nau ongoʻi mo lekooti lolotonga e lēsoní.
Ngaahi Fakamatala Fakamahino mo e Puipuituʻá
Tokāteline mo e Ngaahi Fuakava 38:24–25. “Tuku ke ʻofa ʻa e tangata kotoa pē ki hono tokouá ʻo hangē pē ko iá”
Naʻe vahevahe ʻe Palesiteni Poiti K. Peeka ha talanoa ʻokú ne fakatātaaʻi ʻa e ngaahi akonaki ʻa e ʻEikí ʻi he Tokāteline mo e Ngaahi Fuakava 38: 24–25:
“ʻI heʻeku kei talavoú, ne u faiako fakaʻapí ki ha fineʻeiki kuo motuʻa ʻaupito. Naʻá ne akoʻi au ʻi he ngaahi meʻa naʻá ne aʻusia ʻi heʻene moʻuí.
“ʻI heʻene kei siʻí naʻe ʻalu ange ʻa Palesiteni Pilikihami ʻIongi ki he Kolo ko Pilikihamí pea ko ha meʻa lahi ʻeni ia he kolo naʻe fakatauhingoa ki aí. Naʻe fakalāngilangiʻi ia ʻaki ha tuʻu laine ʻa e fānau Palaimelí ʻi he veʻehala ki he koló, kuo nau teunga hina kotoa mo toʻotoʻo e kato matalaʻiʻakau ke laku ʻi muʻa he saliote naʻe heka ai ʻa e Palesiteni ʻo e Siasí.
“Naʻe ʻi ai ha meʻa naʻe ʻikai ke saiʻia ai. Naʻe ʻikai te ne laku ʻe ia ʻene matalaʻiʻakaú ka ne ʻakahi atu ha foʻi maka ʻi muʻa he salioté mo ne pehē ange, ‘ʻOku ʻikai ke lelei ange ia ʻi heʻeku Kui Tangata ko Lavilení.’ Naʻe ongoʻi ʻene leá pea naʻe tafuluʻi lahi ia.
“ʻOku ou ʻilo pau ko Palesiteni Pilikihami pē ʻe muʻomuʻa taha ke ne talamai ʻokú ne tui tatau pē mo e kiʻi taʻahine ko ʻeni ko Sēini Sitītí. He ʻikai ke ne pehē ʻe ia ʻokú ne lelei ange ʻi he Kuitangata ko Lavilení pe ko ha toe mēmipa moui taau pē ʻo e Siasí” (Ko e Kau Vaivai mo e Māʻulalo ʻo e Siasí, ”Ensign pe Liahona, Nōvema 2007, 7).
Tokāteline mo e Ngaahi Fuakava 38:27, 34-36. Tokangaʻi e masivá pea uouangataha
Naʻe fekauʻi ʻe he ʻEikí ʻi he fakahā ko ʻení e Kāingalotú ke nau uouangataha pea ke tokangaʻi e masivá. Ko e ongo fekau tefito ʻeni ʻo e fono ʻo e fakatapuí. ʻOku toe fakamamafaʻi foki e ongo fekaú ni ʻi he Mōsese 7:18 mo e 4 Nīfai 1:2–3. ʻI he feinga ʻa e Kāingalotú ke moʻui ʻaki e fono ʻo e fakatapuí ʻi Mīsulí, naʻe ʻikai ke ola lelei he “[naʻe] ʻikai ke nau foaki ʻenau ngaahi koloá … ki he masivá” pea naʻe ʻikai ke nau “uouangataha” (T&F 105:3–5).