Lēsoni 128
Tokāteline mo e Ngaahi Fuakava 121:34–46
Talateú
Ko e Tokāteline mo e Ngaahi Fuakava 121:34–46 ko ha konga ia ʻo e tohi fakalaumālie ʻa Siosefa Sāmita mei he Fale Fakapōpula Lipetií. ʻOku akoʻi ʻe he Palōfitá ʻi he konga ko ʻeni ʻo e tohí, ʻa e ngaahi tefitoʻi moʻoni fekauʻaki mo e mālohi pea mo e mafai ʻo e lakanga fakataulaʻeikí. ʻOkú ne fakamatalaʻi e ʻuhinga ʻoku ui ai ʻa e tokolahi kae fili pē ʻa e tokosiʻi mo e founga ʻe lava ke fakaʻaongaʻi ai ʻe he kau maʻu lakanga fakataulaʻeikí ʻa e ngaahi mālohi ʻo e langí ke tokoniʻi e niʻihi kehé.
Ngaahi Fokotuʻu ki hono Akoʻí
Tokāteline mo e Ngaahi Fuakava 121:34–40
ʻOku akoʻi ʻe Siosefa Sāmita ʻoku fehokotaki ʻa e ngaahi totonu ʻo e lakanga fakataulaʻeikí mo e ngaahi mālohi ʻo e langí
Fakaʻaliʻali ha maama ʻoku ʻikai palaki. Fakapapauʻi ʻoku tuʻu e meʻa kamosí ʻi he “maté” ke ʻoua ʻe ulo he taimi ʻe palaki aí. Kapau ʻoku ʻikai ke ke lava ʻo maʻu mai ha maama, tā ʻa e fakatātā ko ʻení (taʻe-kau ai e ngaahi leá) ʻi he palakipoé.
Fakamatalaʻi ange ʻoku fakafofongaʻi ʻe he māmá ʻi he lēsoni ʻo e ʻaho ní, ha tokotaha maʻu lakanga fakataulaʻeiki. ʻOku fakafofongaʻi ʻe he maama mei he māmá ʻa e ngaahi tāpuaki ʻe lava ke maʻu ʻe he kakaí mei he ʻOtuá ʻi he ngāue ʻa ha tokotaha maʻu lakanga fakataulaʻeikí. Kapau ʻokú ke maʻu ha maama, fakahingoa ia ko e Tokotaha maʻu lakanga fakataulaʻeikí. Ka ʻikai, pea hiki ʻa e kupuʻi lea ko ʻení ʻi he feituʻu totonu ʻi he fakatātaá.
ʻI he kamata ako ʻe he kau akó ʻa e Tokāteline mo e Ngaahi Fuakava 121:34–46 he ʻaho ní, kole ange ke fakakaukau ki he founga ʻoku kaunga ai e angamāʻoniʻoni fakatāutaha ʻa ha tokotaha maʻu lakanga fakataulaʻeikí ki heʻene malava ke tokoniʻi e niʻihi kehé ke maʻu e ngaahi tāpuaki ʻo e lakanga fakataulaʻeikí. Fakamahinoʻi ange neongo ʻoku fakataumuʻa ʻa e ngaahi veesi ko ʻení ki he kau maʻu lakanga fakataulaʻeikí, ka ʻoku ʻi ai e ngaahi tefitoʻi moʻoni ʻoku ʻaonga ki he kāingalotu kotoa pē ʻo e Siasí.
Fakamanatu ange ki he kau akó ʻoku ʻi he Tokāteline mo e Ngaahi Fuakava 121 ha ngaahi konga ʻo ha tohi fakalaumālie naʻe fai ʻe Siosefa Sāmita ʻi heʻene kei ʻi he Fale Fakapōpula Lipetií. Fakaafeʻi ha tokotaha ako ke lau leʻolahi e Tokāteline mo e Ngaahi Fuakava 121:34. Kole ki he kalasí ke fakatokangaʻi ʻa e fehuʻi ʻi he veesi ko ʻení.
Ke tokoniʻi e kau akó ke fakalaulauloto mo aleaʻi hono ʻuhinga ke ui ha tokotaha maʻu lakanga fakataulaʻeiki kuo “ui” mo “filí,” fakaafeʻi ha tokotaha ako ke lau leʻolahi e lea ko ʻeni, naʻe fai ʻe Palesiteni Sēmisi E. Fausi ʻo e Kau Palesitenisī ʻUluakí ki he kau maʻu lakanga fakataulaʻeikí:
“ʻOku ui kitautolu ʻi he taimi ʻoku hilifaki ai e nimá ki hotau ʻulú pea foaki mai ʻa e lakanga fakataulaʻeikí, ka ʻoku ʻikai fili kitautolu kae ʻoua kuo tau fakahaaʻi ki he ʻOtuá ʻetau anga māʻoniʻoní, faivelengá, pea mo ʻetau tukupaá” (Called and Chosen,”Ensign pe Liahona, Nov. 2005, 55).
-
Fakatatau kia Palesiteni Fausi, ko e hā hono ʻuhinga ke “uí” ha talavou?
Fakamahinoʻi ange ʻoku ʻikai tatau ʻa e “uí” mo hono “filí.” Ke hoko ko e taha kuo “fili,” ʻe he ʻOtuá, kuo pau ke moʻui ha tokotaha maʻu lakanga fakataulaʻeiki ʻi ha founga ʻe lava ai ke ne fakaʻaongaʻi e ngaahi mālohi ʻo e langí ke tokoni ki he niʻihi kehé ke maʻu e ngaahi tāpuaki ʻo e lakanga fakataulaʻeikí.
Fakamatalaʻi ange ʻoku tau ako ʻi he Tokāteline mo e Ngaahi Fuakava 121:35–39, ki he ʻuhinga ʻoku ʻikai fili ai ha kau maʻu lakanga fakataulaʻeiki ʻe niʻihi. Fakaafeʻi ha tokotaha ako ke lau leʻolahi e Tokāteline mo e Ngaahi Fuakava 121:35–36. Kole ki he kalasí ke muimui ki ai, ʻo kumi ki ha lēsoni ʻoku totonu ke ako ʻe he tokotaha maʻu lakanga fakataulaʻeiki kotoa pē.
-
Fakatatau ki he veesi 36, ko e hā e lēsoni ʻoku totonu ke ako ʻe he tokotaha maʻu lakanga fakataulaʻeiki kotoa pē?
Ke tokoni ke mahino ki he kau akó ʻa e lēsoni ʻi he veesi 36, fakamatala ki he maʻuʻanga ʻuhila ʻi he loki akó pe ʻi he fakatātā he palakipoé.
-
Ko e hā ʻa e kupuʻi lea ʻi he veesi 36 ʻe lava ke fakafofongaʻi ʻe he ʻuhilá? (“[Ko e] ngaahi mālohi ʻo e langí.” Tohi e Ngaahi mālohi ʻo e langí ʻi he palakipoé ʻo ofi ki he fakatātā ʻo e palakí, pe fakapipiki ha fakaʻilonga ofi ki he maʻuʻanga ʻuhilá.)
-
ʻOkú ke pehē ʻoku ʻuhinga ki he hā e kupuʻi lea “ko e ngaahi totonu ʻo e lakanga fakataulaʻeikí” ʻi he veesi 36? (ʻOku totonu ke fakahaaʻi ʻe he ngaahi tali ʻa e kau akó ʻoku maʻu ʻe ha tangata ʻa e totonu ke fakaʻaongaʻi ʻa e lakanga fakataulaʻeikí ʻi hono foaki kiate ia ʻa e mafai ʻo e lakanga fakataulaʻeikí ʻi he hilifaki ʻo e nimá.)
Fakahingoa e uaeá ko e Mafai ʻo e lakanga fakataulaʻeikí. Kapau ʻoku ke fakaʻaliʻali ha maama, fakaafeʻi ha tokotaha ako ke palaki e uaeá ki he maʻuʻanga ʻuhilá.
-
Ko e hā naʻe ʻikai ke moʻui ai ʻa e māmá? (Koeʻuhí ʻoku tamateʻi ʻa e meʻa kamosí.)
-
Ko e hā e kupuʻi lea ʻi he veesi 36 ʻe ala fakatatau ki he meʻa kamosí? (“[Ko e] ngaahi founga ʻo e māʻoniʻoní.” Fakamatalaʻi ange ʻoku ʻuhinga ʻa e kupuʻi lea ko ʻení ki he fatongia ʻo e kau maʻu lakanga fakataulaʻeikí ke moʻui anga māʻoniʻoní.)
Fakahingoa ʻa e meʻa kamosÍ ko e Ngaahi founga ʻo e māʻoniʻoní. Fakaafeʻi ha tokotaha ako ke fakamoʻui ʻa e meʻa kamosí.
-
ʻI he fakatātā ko ʻení, ko e hā e founga ʻoku tatau ai e moʻui angamāʻoniʻoní mo hono fakamoʻui ʻo e meʻa kamosí?
Fakaafeʻi e kau akó ke fakamatalaʻi ʻi heʻenau lea pē ʻanautolu ha tefitoʻi moʻoni mei he veesi 36. Fakamatalaʻi fakanounou ʻenau ngaahi talí ʻaki hono hiki ʻa e tefitoʻi moʻoni ko ʻení—pe ko ha meʻa meimei tatau mo ia—ʻi he palakipoé: ʻE lava pē ke fakaʻaongaʻi ʻe he kau maʻu lakanga fakataulaʻeikí ʻa e ngaahi mālohi ʻo e langí, ʻo kapau te nau moʻui angamāʻoniʻoni. Mahalo te ke fie fokotuʻu ange ke tohi ʻe he kau akó ʻa e tefitoʻi moʻoni ko ʻení ʻi heʻenau folofolá.
Fakaafeʻi ha tokotaha ako ke lau leʻolahi e Tokāteline mo e Ngaahi Fuakava 121:37–38. Kole ki he kalasí ke muimui ki ai, ʻo kumi e meʻa ʻoku hoko ki he malava ko ia ʻa ha tokotaha maʻu lakanga fakataulaʻeiki ke fakaʻaongaʻi e ngaahi mālohi ʻo e langí ʻo kapau ʻoku ʻikai ke ne moʻui angamāʻoniʻoní.
-
Ko e hā ʻoku hoko ʻi he taimi ʻoku ʻikai moʻui angatonu ai ha tokotaha maʻu lakanga fakataulaʻeikí? (ʻE mavahe ʻa e ngaahi mālohi ʻo e langí, pea taʻeʻaonga leva ʻa hono mafaí. Mahalo te ke fie fakamatalaʻi ange ʻoku ʻuhinga e kupuʻi lea ko e “ʻakahi ʻa e ngaahi meʻa māsilá” ki ha monumanu ʻokú ne fakafepaki ki ha vaʻakau māsila ʻoku fakaʻaongaʻi ke tataki ia ki ha feituʻu ʻoku fakataumuʻa ki ai. ʻOku ʻuhinga e kupuʻi lea ko ʻení kiate kitautolu ki hono fakafisingaʻi ʻa e fakahinohino mei he ʻEikí pe ko ʻEne kau tamaioʻeikí.)
Ke tokoni ke mahino ki he kau akó e tefitoʻi moʻoni ʻi he palakipoé, fakaafeʻi ha tokotaha ako ke lau e fakamatala ko ʻeni ʻa Palesiteni Poiti K. Peeka ʻo e Kōlomu ʻo e Kau ʻAposetolo ʻe Toko Hongofulu Mā Uá:
“ʻOku maʻu ʻa e mafai ʻo e lakanga fakataulaʻeikí ʻo fakafou ʻi he fakanofo; ʻoku maʻu ʻa e mālohi ʻo e lakanga fakataulaʻeikí ʻo fakafou ʻi he moʻui faivelenga mo e moʻui talangofua ʻi hono tauhi ʻo e ngaahi fuakavá. ʻOku fakalahi ia ʻi hono ngāue ʻaki pea fakaʻaongaʻi e lakanga fakataulaʻeikí ʻi he angatonú” (Ko e Mālohi ʻo e Lakanga Fakataulaʻeikí,”Ensign pe Liahona, Mē 2010, 9).
Hiki e meʻá ni ʻi he palakipoé:
Fakavaivaiʻi e fehokotakiʻangá Fakamālohia ʻa e fehokotakiʻangá
Fakaafeʻi e kau akó ke toe lau fakalongolongo e veesi 35 mo e 37, ʻo kumi e ngaahi tōʻonga fakakaukau taʻe anga-tonú mo e ngaahi ngāue ʻoku nau fakavaivaiʻi ʻa e fehokotakiʻanga ʻa ha tokotaha maʻu lakanga fakataulaʻeiki mo e ngaahi mālohi ʻo e langí. Mahalo te ke fie fokotuʻu ange ke nau fakaʻilongaʻi e meʻa ʻoku nau maʻú. Hili ha taimi feʻunga, kole ange ke nau lipooti e meʻa ne nau maʻú. Fakaafeʻi ha tokotaha ako ke hoko ko ha tangata tohi, ʻo tohi ʻa e ngaahi talí ʻi lalo ʻi he “Fakavaivaiʻi e fehokotakiʻangá.” Hili hono hiki e tali ʻa e kau akó, lau ʻa e ngaahi sīpinga ko ʻení. Kole ange ki he kau akó ke feinga ke ʻiloʻi e ngaahi tōʻonga fakakaukau pe ngāue kuo nau hiki ʻi he palakipoé, ʻo e sīpinga takitaha.
-
Ke feohi lelei mo e niʻihi manakoa ʻi hono toʻú, ʻoku kau atu ha tokotaha maʻu lakanga fakataulaʻeiki mo kinautolu ʻi hono fakakata ʻaki ha kaungā ako ʻi he akó.
-
ʻOku saiʻia ha palesiteni ʻo e kōlomu ʻo e kau akonakí ʻi he sipotí, pea ʻokú ne fakafisi ke kau ʻi hono palani ha faʻahinga ʻekitivitī ʻa e kōlomú ʻoku ʻikai kau ai ʻa e soká pe pasiketipoló. ʻI he taimi ʻoku kau ai ʻa e kōlomú ʻi ha ʻekitivitī pe ngāue tokoni, ʻokú ne fie maʻu ke fai ʻe he kau talavou kehé ʻa e meʻa ʻokú ne talaangé he ko e palesiteni ia ʻo e kōlomú.
-
Ko e hā ha sīpinga ʻo ha kakai ʻoku feinga ke fūfuuʻi ʻenau ngaahi angahalá?
-
Ko e hā ha ngaahi sīpinga ʻo ha kakai ʻoku tuku honau lotó ki he ngaahi meʻa ʻo e māmaní mo holi ki he fakaʻapaʻapa ʻa e tangatá?
-
ʻOkú ke pehē ʻoku taʻofi ai ʻe he ngaahi tōʻonga fakakaukau mo e ngāue ko ʻení ʻa e kau maʻu lakanga fakataulaʻeikí mei hono fakaʻaongaʻi e ngaahi mālohi ʻo e langí?
Fakaafeʻi ha tokotaha ako ke lau leʻolahi e Tokāteline mo e Ngaahi Fuakava 121:39–40, pea kole ki he kalasí ke kumi ha ʻuhinga ʻoku fakaʻaongaʻi ai ʻe he kakai ʻe niʻihi ʻa e mafai taʻe-māʻoniʻoní. Tuku ke nau lipooti e meʻa ʻoku nau maʻú.
-
Makatuʻunga ʻi he meʻa kuó ke ako mei he Tokāteline mo e Ngaahi Fuakava 121:34–40, te ke fakamatala fakanounouʻi fēfē ʻa e ʻuhinga ʻoku ui ai ʻa e tokolahi kae fili ʻa e tokosiʻí?
Tokāteline mo e Ngaahi Fuakava 121:41–46
ʻOku akoʻi ʻe Siosefa Sāmita e meʻa ʻoku totonu ke fai ʻe he kau maʻu lakanga fakataulaʻeikí.
Fakamatalaʻi ange hili hono akoʻi fekauʻaki mo e ngaahi tōʻonga fakakaukau mo e ngaahi ngāue ʻoku nau fakavaivaiʻi ʻa e fehokotakiʻanga ʻa e kau maʻu lakanga fakataulaʻeikí mo e ngaahi mālohi ʻo e langí, naʻe akonaki ʻa Siosefa Sāmita kau ki he ngaahi tōʻonga fakakaukau mo e ngaahi ngāue ʻoku nau fakamālohia ʻa e fehokotakiʻanga ko iá. Vahevahe ʻa e kalasí ke tauhoa, pea kole ange ke lau fakataha e Tokāteline mo e Ngaahi Fuakava 121:41–45. Kole ange ke nau kumi e ngaahi tōʻonga fakakaukau mo e ngaahi ngāue ʻoku tokoni ke fakaʻaongaʻi ʻe he kau maʻu lakanga fakataulaʻeikí ʻa e ngaahi mālohi ʻo e langí ke tokoniʻi e niʻihi kehé. (Kimuʻa pea nau laú, mahalo te ke fie fakamahinoʻi ange ʻoku ʻuhinga e foʻi lea ʻi he veesi 41 ko e pē ki he “tuku kehe pē.”)
Hili ha taimi feʻunga, kole ange ki he kau akó ke lipooti e meʻa ne nau maʻú. Fakaafeʻi ha tokotaha ako ke hoko ko ha tangata tohi, ʻo tohi e ngaahi talí ʻi lalo ʻi he “Fakamālohia e fehokotakiʻangá.” ʻI hono lisi ʻe he kau akó e ngaahi tefitoʻi moʻoni ʻo e māʻoniʻoní, mahalo te ke fie kole ange ke nau fakamatalaʻi pe ʻomi ha ngaahi sīpinga ʻo e tefitoʻi moʻoni takitaha. Kapau ʻe fie maʻu, fai ʻa e ngaahi fehuʻi ko ʻení:
-
ʻOkú ke pehē ʻoku ʻuhinga ki he hā ke ngāue ʻi he ʻofa taʻe ha mālualoi pe taʻe-ha-kākā? (ʻE ala kau ʻi he ngaahi talí ʻa e ʻoku ʻuhinga ia ke ʻofa moʻoni mo fakamātoato ʻi he kakaí pea ke ʻi ai ha fakaʻaiʻai angatonu.) Ko e hā ʻoku mahuʻinga ai e ngaahi ʻulungāngá ni ki he kau maʻu lakanga fakataulaʻeikí?
-
ʻOku ʻuhinga e foʻi lea ʻi he veesi 43 ko e valokiʻi ki hono tala ki ha taha ʻokú ne fai ha meʻa hala, ʻo angamaheni ʻaki ʻi ha founga angavaivai pe angaʻofa. ʻOku ʻuhinga e foʻi lea ko e taimi ke “vave” pe “kei taimi.” ʻE lava ke ʻuhinga e foʻi lea ko e lea māsila ki he fie maʻu ke tau fakamatalaʻi mahino kitautolú. ʻOkú ke pehē ko e hā ʻoku mahuʻinga ai ki ha taki lakanga fakataulaʻeiki ke valoki ʻi he founga mahino, ʻi he taimi totonu, pea fakatatau ki he fakahinohino ʻa e Laumālie Māʻoniʻoní? ʻOkú ke pehē ko e hā ʻoku mahuʻinga ai ke fakahaaʻi ha ʻofa lahi ange hili hono valokiʻi ha tahá? Ko e fē taimi ne ʻaonga ai kiate koe haʻo maʻu ha fakatonutonu pehē?
-
ʻOkú ke pehē ʻoku ʻuhinga ki he hā ke tuku ke fonu ʻa ho lotó ʻi he manavaʻofa ki he kakai fulipē pē? (Vakai, veesi 45.) ʻOkú ke pehē ko e hā ʻoku mahuʻinga ai ki he kau maʻu lakanga fakataulaʻeikí ke angavaivai mo angaʻofa ʻi heʻenau fengāueʻaki mo e niʻihi kehé?
-
ʻOkú ke pehē ʻoku ʻuhinga ki he hā ke tuku ke ngaohi ke fakaʻofoʻofa maʻu ai pē ʻe he angamaʻá hoʻo ngaahi fakafaukaú? (Vakai, veesi 45.) Ko e hā ha ngaahi meʻa te tau lava ʻo fai ke tauhi ke maʻa ʻetau ngaahi fakakaukaú?
-
ʻOkú ke pehē ko e hā ʻoku fie maʻu ai ke muimui e kau maʻu lakanga fakataulaʻeikí ki he ngaahi tefitoʻi moʻoni ko ʻeni ʻo e angamāʻoniʻoní kae lava ke fakaʻaongaʻi e ngaahi mālohi ʻo e langí?
Fakamahinoʻi ange ʻa e foʻi lea ko e pea ʻi he veesi 45. Fakamatalaʻi ange ʻoku ʻuhinga e foʻi lea ko ʻení ki he ngaahi ola ʻo e moʻui ʻo fakatatau ki he ngaahi tefitoʻi moʻoni ʻo e māʻoniʻoní ʻoku maʻu ʻi he veesi 41–45. Fakaafeʻi ha tokotaha ako ke lau leʻolahi e Tokāteline mo e Ngaahi Fuakava 121:45–46. Kole ki he kalasí ke muimui ki ai, ʻo kumi e ngaahi tāpuaki ʻoku maʻu ʻe he kau maʻu lakanga fakataulaʻeiki ʻoku nau fakaʻaongaʻi e ngaahi mālohi ʻo e langí ʻi he moʻui angamāʻoniʻoní. (Kimuʻa pea toki lau e tokotaha akó, mahako te ke fie fakamatalaʻi ange ko e tokotokó, ko ha tokotoko fakatuʻi ia ʻoku toʻotoʻo ʻe ha tuʻi pe kuini. Ko ha fakaʻilonga ia ʻo e mafai mo e mālohi.)
-
Ko e hā ha niʻihi ʻo e ngaahi tāpuaki ʻo hono moʻui ʻaki e ngaahi tefitoʻi moʻoni ʻo e māʻoniʻoní?
-
Fakakaukau angé ki ha tokotaha maʻu lakanga fakataulaʻeiki ʻokú ke ʻiloʻi ʻoku moʻui ʻi ha founga ʻoku tokoni ke ne fakaʻaongaʻi e ngaahi mālohi ʻo e langí. Kuo tāpuekina fēfē koe ʻi heʻene ngāué?
Vahevahe hoʻo fakamoʻoní fekauʻaki mo e ngaahi tāpuaki kuó ke maʻu ʻo fakafou ʻi he mafai mo e mālohi ʻo e lakanga fakataulaʻeikí. Fakaafeʻi e kau akó ke vahevahe foki ʻenau fakamoʻoní. Fakaafeʻi kinautolu ke fili ha tefitoʻi moʻoni ʻe taha ʻo e māʻoniʻoní ʻoku hā ʻi he Tokāteline mo e Ngaahi Fuakava 121:41–45 pea ke fokotuʻu ha taumuʻa ke moʻui lelei ange ʻaki ʻa e tefitoʻi moʻoni ko iá.
Ngaahi Fakamatala Fakamahino mo e Puipuituʻá
Tokāteline mo e Ngaahi Fuakava 121:36–37. Ko e “ngaahi totonu ʻo e lakanga fakataulaʻeikí” mo e “ngaahi mālohi ʻo e langí”
Naʻe fakamamafaʻi ʻe ʻEletā Tēvita A. Petinā ʻo e Kōlomu ʻo e Kau ʻAposetolo ʻe Toko Hongofulu Mā Uá ʻa e fie maʻu ke moʻui ʻa e kau maʻu lakanga fakataulaʻeikí koeʻuhí ke maʻu e mafai pea mo e mālohi fakatouʻosi ʻo e lakanga fakataulaʻeikí:
“Ko e mālohi ʻo e lakanga fakataulaʻeikí, ko e mālohi ia ʻo e ʻOtuá ʻoku ngāue ʻi he kakai tangata mo e fānau tangata hangē ko kitautolú pea ʻoku fie maʻu ki ai ʻa e angatonu fakatāutahá, faivelengá, talangofuá, mo e mateakí. ʻE lava ke maʻu ʻe ha tamasiʻi pe tangata e mafai ʻo e lakanga fakataulaʻeikí ʻi he hilifaki ʻo e nimá ka he ʻikai ke ne maʻu e mālohi ʻo e lakanga fakataulaʻeikí kapau ʻokú ne talangataʻa, taʻe taau, pe taʻe fie ngāue. …
“… ʻOku fakatou fie maʻu ʻe he kau maʻu lakanga fakataulaʻeiki talavou mo matuʻotuʻá ʻa e mafaí mo e mālohí—ʻa ia ko e ngofua pea mo e ivi fakalaumālie ia ʻoku fie maʻu ke fakafofongaʻi ai e ʻOtuá ʻi he ngāue ʻo e fakamoʻuí” (“Ko e Ngaahi Mālohi ʻo e Langí,” Ensign pe Liahona, Mē 2012, 49).
Tokāteline mo e Ngaahi Fuakava 121:34, 40. “ʻOku ui ʻa e tokolahi, kae fili ʻa e tokosiʻi”
Naʻe akonaki ʻa ʻEletā Tēvita A. Petinā ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:
“ʻOku ʻikai ko ha tuʻunga makehe kuo foaki kiate kitautolu ke hoko ko ha tokotaha fili pe ke hoko ʻo fili. Ka, ko kitaua pē ʻokú ta fakapapauʻi pe ʻe fili kitaua. …
“ʻOku ou tui ʻoku fakahangatonu e ʻuhinga ʻo e ngaahi veesi ko ʻení [T&F 121:34–35]. ʻOku ʻikai ke ʻi ai ha lisi ia ʻa e ʻOtuá ʻo e kakai ʻoku saiʻia taha aí ʻa ia ʻoku pau pē ke tau ʻamanaki ʻe tānaki atu ki ai hotau hingoá ʻi ha ʻahó. ʻOku ʻikai ke Ne fakangatangata ʻa ‘kinautolu kuo filí’ ki ha niʻihi tokosiʻi pē. Ka, ʻoku fakapapauʻi fakaʻosi ʻe hotau lotó mo ʻetau fakaʻamu vivilí mo ʻetau talangofuá pe ʻoku lau kitautolu ko e taha kuo fili ʻe he ʻOtuá” (“The Tender Mercies of the Lord” Ensign pe Liahona, May 2005, 101).
Tokāteline mo e Ngaahi Fuakava 121:43. “Valokiʻi ʻi hono taimí, ʻi he lea māsila”
Naʻe akonaki ʻa ʻEletā H. Poaki Pitasoni ʻo e Kau Fitungofulú ʻo pehē:
“Mahalo ʻoku totonu ke fakakaukau ki hono ʻuhinga ke valokiʻi ʻi he lea māsilá. ʻOku ʻuhinga e valokiʻi ʻi he lea māsilá ki hono valokiʻi mahino, ʻi he ʻofa mālohi, ʻi he loto fakamātoato. ʻOku ʻikai ʻuhinga ia ke valokiʻi ʻi he manuki, pe tāufehiʻa, pe ʻita pea ʻi he leʻolahi. Ko e tokotaha ko ia ʻoku valoki ʻo hangē ko ia kuo fakahinohino ʻe he ʻEikí ʻokú ne fai ia ʻi he ngaahi tefitoʻi moʻoní, kae ʻikai ko e ʻulungāngá. ʻOku ʻikai ke ne ʻohofi e ʻulungāngá pe fakasiʻia ha tokotaha fakafoʻituitui.
“ʻI he meimei tūkunga kotoa pē ʻoku fie maʻu ai ʻa e fakatonutonú, ʻoku lelei ange ʻa e valoki fakatāutahá ʻi he valoki ʻi he kakaí. Tuku kehe kapau ʻoku fie maʻu ke valokiʻi fakakātoa ʻa e uōtí, ʻoku lelei ange ki ha pīsope ke lea ki he tokotaha fakafoʻituituí kae ʻikai fakaʻaongaʻi ʻa e founga fakatokolahí. Hangē pē ko iá, ʻoku maʻu ʻe ha fānau pe mali ʻa e totonu ke fakahaaʻi fakataautaha ange ʻa e ngaahi fehalaakí. ʻOku faʻa taʻeʻofa pe takihalaʻi ʻa e fakatonutonu ʻi he tokolahí” (“Unrighteous Dominion,” Ensign, July 1989, 10).