Seminelí mo e ʻInisititiutí
Talateu ki he Tohi Lēsoni ʻa e Faiako Seminelí ʻi he Tokāteline mo e Ngaahi Fuakavá pea mo e Hisitōlia ʻo e Siasí

Talateu ki he Tohi Lēsoni ʻa e Faiako Seminelí ʻi he Tokāteline mo e Ngaahi Fuakavá pea mo e Hisitōlia ʻo e Siasí

Ko ‘Etau Taumuʻá

ʻOku pehē ʻe he Kaveinga ʻo e Seminelí mo e ʻInisititiuti Fakalotú

“Ko ʻetau taumuʻá ke tokoni ki he toʻu tupú mo e kakai lalahi kei talavoú ke mahino mo falala ki he ngaahi akonaki mo e Fakalelei ʻa Sīsū Kalaisí, fakafeʻungaʻi kinautolu ke maʻu ʻa e ngaahi tāpuaki ʻo e temipalé, pea teuteuʻi kinautolu, honau fāmilí mo e niʻihi kehé ki he moʻui taʻengata mo ʻenau Tamai Hēvaní.”

Ke aʻusia ʻetau taumuʻá, ʻoku tau akoʻi ki he kau akó ʻa e ngaahi tokāteline mo e ngaahi tefitoʻi moʻoni ʻo e ongoongoleleí, ʻo hangē ko ʻene hā ʻi he folofolá mo e ngaahi lea ʻa e kau palōfitá. ʻOku akoʻi ʻa e ngaahi tokāteline mo e ngaahi tefitoʻi moʻoni ko ʻení ʻi ha founga ʻe maʻu ai ʻa e mahinó pea mo ha fakamāmá. ʻOku tau tokoni ki he kau akó ke fakahoko honau fatongia ʻi he akó, mo teuteuʻi kinautolu ke akoʻi ʻa e ongoongoleleí ki ha niʻihi kehe.

Ke tokoni ke aʻusia e ngaahi taumuʻa ko ʻení, ʻoku poupouʻi koe mo e fānau ako ʻoku ke akoʻí ke fakakau atu ʻa e Ngaahi Meʻa Mahuʻinga ʻo Hono Akoʻi mo Ako ʻo e Ongoongoleleí ʻi he taimi ʻoku mou ako fakataha ai ʻa e folofolá:

  • Faiako mo ako ʻi he Laumālié.

  • Tanumaki ha ʻātakai ako ʻo e ʻofá, fakaʻapaʻapá, pea mo ha taumuʻa.

  • Ako fakaʻaho e folofolá pea lau ʻa e ngaahi fakamatala ki he lēsoní. (ʻE lava ke maʻu e ngaahi saati ki hono muimuiʻi ʻo e lau folofolá ʻi he fakamatala fakalahí ʻi he ngataʻanga ʻo e tohi lēsoni ko ʻení, ʻi he LDS.org, pea mo e store.lds.org [tohi fika 10494].)

  • ʻAi ke mahino ʻa e ʻuhinga mo e kakano ʻo e folofolá mo e ngaahi lea ʻa e kau palōfitá.

  • Feinga ke ʻiloʻi, mahino, ongoʻi hono moʻoni mo hono mahuʻinga e ngaahi tokāteline mo e ngaahi tefitoʻi moʻoni ʻo e ongoongoleleí, pea fakaʻaongaʻi kinautolu.

  • Fakamatalaʻi, vahevahe, mo fakamoʻoniʻi e ngaahi tokāteline mo e ngaahi tefitoʻi moʻoni ʻo e ongoongoleleí.

  • Taukei ʻi he ngaahi potufolofola mahuʻinga mo e Ngaahi Tefitoʻi Tokāteliné.

Kuo ʻosi teuteuʻi e tohi lēsoni ko ʻeni ʻa e faiakó ke tokoniʻi koe ke ke lavameʻa ʻi hono fakahoko ʻa e ngaahi taumuʻá ni.

ko ha taʻahine ʻoku lau folofola

Nāunau Fakalēsoni ʻa e Toʻu Tupú ki he Seminelí mo e ʻaho Sāpaté

Ko e tokoni ki he toʻu tupú ke nau ului ki he ongoongolelei ʻo Sīsū Kalaisí

Ko ha Ngāue Uouangataha

Kuo ui e Kau Palesitenisī ʻUluakí ki he ngaahi mātuʻá, kau faiakó, mo e kau takí ke nau “tokoni ki hono ako ʻe he toʻu tupú ʻa e ongoongoleleí ʻiate kinautolu peé, pea fakamālohia ai honau fāmilí mo e niʻihi kehé ʻaki ʻenau vahevahe e ngaahi meʻa kuo nau aʻusiá, ʻenau ʻiló mo ʻenau fakamoʻoní.” ʻE tokoni ia kiate kinautolu ke nau muimui ʻi he hala ʻe “tākiekina ai kinautolu ke nau uluí” (Teaching the Gospel in the Savior’s Way [2012], 2).

ʻI he malumalu e fakahinohino ʻo e lakanga fakataulaʻeikí, kuo ngāue fakataha e houalotu ʻa e Kau Talavoú, Finemuí, Lautohi Faka-Sāpaté mo e Seminelí ke fokotuʻu ha nāunau fakalēsoni ke tokoni ke aʻusia ʻe he toʻu tupú e ngaahi taumuʻa ko ʻení. Neongo ʻoku maʻu ʻe he houalotu takitaha ha fatongia mahuʻinga ʻi hono fakamālohia ʻo e toʻu tupú, ko e tefitoʻi taumuʻa ʻo e nāunau fakalēsoni kotoa ʻa e toʻu tupú ke tataki kinautolu ki he Fakamoʻuí pea fakaului kinautolu ki Heʻene ongoongoleleí. ʻOku fakataumuʻa e nāunau fakalēsoni ki he houalotu takitaha ʻa e toʻu tupú ke fenāpasi mo e ngaahi taumuʻa ʻa e ngaahi houalotu toʻu tupu kehé. Hangē ko ʻení:

  • “Ko e Faiako ʻi he Founga ʻa e Fakamoʻuí” (ko ha konga naʻe pulusi ʻi he nāunau fakalēsoni ʻa e seminelí mo e toʻu tupú ki he ʻaho Sāpaté) naʻe fokotuʻu fakataha ia ʻe he ngaahi houalotu ʻo e toʻu tupú ke tokoni ki he kau faiakó, mātuʻá, mo e kau takí ke nau ako fekauʻaki mo e founga faiako ʻa e Fakamoʻuí (vakai, Ko hono Akoʻi mo Ako ʻo e Ongoongoleleí: Ko ha Tohi Tuʻutuʻuni maʻá e Kau Faiako mo e Kau Taki ʻi he Seminelí mo e ʻInisititiuti Fakalotú [2012], v–vii; Ko e Faiako ʻi he Founga ʻa e Fakamoʻuí [2012], 4–5). ʻOku muimuiʻi ʻe he “Ko e Faiako ʻi he founga ʻa e Fakamoʻuí” e founga naʻe tokoni ai ʻa e Fakamoʻuí ki he niʻihi kehé ke nau moʻui ʻaki e ngaahi moʻoni toputapu naʻá Ne akoʻí ʻaki hono poupouʻi kinautolu ke ngāue ʻi he tui pea longomoʻui ʻi heʻenau akó. ʻOku fakakau e ngaahi tefitoʻi moʻoni ko ʻeni ʻo e faiako mo e ako ʻi he ongoongoleleí ʻi he nāunau fakalēsoní ki he ngaahi houalotu kotoa ʻa e toʻu tupú.

  • ʻOku fakamamafaʻi ʻe he nāunau fakalēsoni ʻo e ngaahi houalotu kotoa ʻo e toʻu tupú ʻa e ngaahi tokāteline mahuʻinga tatau. ʻOku fekauʻaki e Ngaahi Tefitoʻi Tokāteline ʻoku fakamamafaʻi ʻi he nāunau fakalēsoni ʻa e seminelí mo e Ngaahi Tefitoʻi Moʻoni Fakatokāteline ʻoku akoʻi ʻi he nāunau fakalēsoni ʻa e toʻu tupú. ʻI he ngaahi kalasi ʻi he ʻaho Sāpaté, ʻoku nofo taha e nāunau fakalēsoni ʻa e toʻu tupú ʻi ha taha ʻo e ngaahi tokāteline ko ʻení ʻi he māhina takitaha. ʻI he seminelí, ʻoku fakamamafaʻi e ngaahi tokāteline ko ʻení ʻi he ngaahi folofola kotoa ʻoku fakaʻaongaʻi ʻe he Siasí. ʻOku tokoni e ngāue fakataha ko ʻení ke tau fakamālohia ai e ngaahi moʻoni ʻoku ako ʻe he toʻu tupú he ʻaho Sāpaté pea mo e meʻa ʻoku nau ako ʻi he loki ako seminelí. ʻE lava ke maʻu ʻe he toʻu tupú, kau faiakó mo e ngaahi mātuʻá ha ngaahi aʻusia lelei ʻi hono fakamamafaʻi e ngaahi tefitoʻi tokāteline tatau ko ʻení ʻi he nāunau fakalēsoni kotoa ʻa e toʻu tupú.

  • ʻOku fakataumuʻa e nāunau fakalēsoní ki he houalotu takitaha ke tokoni ki hono fakaloloto e mahino mo e fakamoʻoni ʻa e toʻu tupú ki he ongoongoleleí mo ako e founga ke akoʻi ai ia ki he niʻihi kehé. Ke fakahoko ʻení, ʻoku fakataumuʻa e ngaahi nāunau ʻa e seminelí mo e nāunau fakalēsoni ʻa e toʻu tupú fakatouʻosi ki hono tokonia e toʻu tupú ke nau longomoʻui ange ʻi heʻenau ako e ongoongoleleí, fekumi ki he ngaahi moʻoni ʻo e ongoongoleleí maʻanautolú, mo fakamatalaʻi, vahevahe mo fakamoʻoni fekauʻaki mo e ngaahi moʻoni ko ʻení ki he niʻihi kehé.

  • ʻE lava ke fakatokangaʻi ʻe kinautolu kuo ui ke nau faiako ʻi he Lautohi Faka-Sāpaté, Finemuí, pe Seminelí ʻa e tatau ʻo e founga ki hono ako mo akoʻi ʻo e ongoongoleleí. ʻOku nofo taha e ngaahi nāunau ʻa e seminelí mo e nāunau fakalēsoni ʻa e toʻu tupú ki hono tokoniʻi e toʻu tupú ke fakaloloto ʻenau uluí. ʻOku iku e ngaahi taumuʻa faaitaha ko ʻení ke vahevahe ai e seminelí pea fakakau ʻi he LDS.org ha konga lahi ʻo e ngaahi nāunau akó mo e mītia naʻe fokotuʻu maʻá e kau faiakó ʻaki e nāunau fakalēsoni ʻa e toʻu tupú ki he Sāpaté.

Ngaahi Tafaʻaki Makehé

ʻOku maʻu ʻe he houalotu takitaha ʻo e toʻu tupú ha fatongia makehe ʻi hono tokonia e toʻu tupú ke nau ului ki he ongoongoleleí (vakai, Teaching the Gospel in the Savior’s Way 12–13). Hangē ko ʻení, ʻoku nofotaha e nāunau fakalēsoni ʻoku fakaʻaongaʻi ʻi he ngaahi kalasi Lautohi Faka-Sāpaté, Kau Talavoú, mo e Kau Finemuí ʻi ha tefitoʻi moʻoni fakatokāteline ʻe taha ʻi he māhina. ʻI he tafaʻaki ʻe tahá, ʻoku ako ʻe he kau ako ʻi he seminelí e ngaahi tokāteline mo e ngaahi tefitoʻi moʻoni ʻo e ongoongoleleí ʻi heʻenau ako e ngaahi folofolá mei he kamataʻangá ki he ngataʻangá.

ʻI hono ako fakafoʻitefito e ongoongoleleí ʻi he ʻū kalasi he Sāpaté, ʻe lava ke fakaloloto ai ʻe he toʻu tupú ʻa e mahino ʻoku nau maʻu ki ha ngaahi tokāteline pau ʻaki ʻenau fekumi ki ha ngaahi tafaʻaki kehekehe ʻo e ngaahi moʻoni ko iá pea nau feakoʻiʻaki ia. ʻI he seminelí, ʻoku lava ke maʻu ʻe he kau akó mo mahino kiate kinautolu e ngaahi tokāteline tatau ko iá ʻi he puipuituʻa ʻo ha ngaahi moʻoni tatau ʻi he folofolá pea mo sio ki hono fakatātaaʻi ia ʻi he moʻui mo e ngaahi akonaki ʻa e niʻihi fakafoʻituitui ʻi he ngaahi folofolá. ʻIkai ngata aí, ʻi hono ako e folofolá mei he kamataʻangá ki he ngataʻangá, ʻe lava ke tupulaki e toʻu tupú ʻi heʻenau loto falala ʻoku “folofola mai ʻa e Tamai Hēvaní kiate kinautolu ʻi he ngaahi folofolá, mo [maʻu] ha loto falala te nau lava ʻo tafoki ki he folofolá ʻo maʻu e tali ki heʻenau ngaahi palopalemá mo ʻenau lotú” (Howard W. Hunter, “Eternal Investments” [address to Church Educational System religious educators, Feb. 10, 1989], 2; LDS.org). ʻOku toe feangai foki e toʻu tupú mo e folofolá koeʻuhí ke nau lava ʻo fakaʻaongaʻi lelei ia ko e kau faifekau, kau taki pe ngaahi mātuʻa ʻi he kahaʻú. ʻOku fengāueʻaki e ongo founga ki hono ako e folofolá fakatouʻosi ke tokoni ki he toʻu tupú ke nau fakaloloto ʻenau mahino ki he ongoongoleleí pea teuteuʻi kinautolu ke nau akoʻi e ongoongoleleí ki he niʻihi kehé.

Teuteuʻi ʻo e Lēsoní

Naʻe fekauʻi ʻe he ʻEikí ʻa kinautolu ʻoku akoʻi ʻEne ongoongoleleí ke “akoʻi … ʻa e ngaahi tefitoʻi moʻoni ʻo ʻeku ongoongoleleí, ʻa ia ʻoku ʻi he Tohi Tapú mo e Tohi ʻa Molomoná, ʻa ia ʻoku ʻi ai ʻa hono kakato ʻo e ongoongoleleí” (T&F 42:12). Naʻá ne toe fakahinohinoʻi foki ʻoku totonu ke akoʻi e ngaahi moʻoni ko ʻení “ʻo fakatatau ki hono fakahinohinoʻi ʻa kinautolu ʻe he Laumālié,” ʻa ia “ʻe foaki atu … ʻi he lotu ʻo e tuí” (T&F 42:13–14). ʻI hoʻo teuteuʻi e lēsoni takitaha, lotua ke maʻu ʻa e tataki ʻa e Laumālié ke tokoni ke mahino kiate koe ʻa e ngaahi folofolá mo e ngaahi tokāteline mo e ngaahi tefitoʻi moʻoni ʻoku ʻi aí. Ko e meʻa tatau pē, muimui ki he ngaahi ueʻi ʻa e Laumālié ʻi hoʻo palani ʻa e founga ke tokoniʻi ai hoʻo kau akó ke mahino kiate kinautolu ʻa e folofolá, ako ke akoʻi ʻe he Laumālie Māʻoniʻoní, pea ongoʻi ha holi ke fakaʻaongaʻi e meʻa ʻoku nau akó.

ʻI he kalasi ko ʻení, ʻoku fakatefito hoʻo teuteú mo e akoʻí ʻi he Tokāteline mo e Ngaahi Fuakavá. Ako ʻi he faʻa lotu ʻa e ngaahi vahé pe ngaahi veesi te ke akoʻí. Fekumi ke mahino ʻa e kaveinga mo e kakano ʻo e konga folofolá, kau ai ʻa e talanoá, kakaí, ʻū feituʻú, pea mo e ʻū meʻa naʻe hokó. ʻI hoʻo maheni mo e kaveinga mo e kakano ʻo e konga folofola takitaha, feinga ke ʻiloʻi ʻa e ngaahi tokāteline mo e ngaahi tefitoʻi moʻoni ʻoku ʻi aí, pea fili pe ko e fē ʻi he ngaahi moʻoni ko ʻení ʻoku mahuʻinga taha ke mahino mo moʻui ʻaki ʻe hoʻo kau akó. Hili hoʻo ʻiloʻi ʻa e meʻa ʻe tukutaha ki ai e tokangá, te ke lava ʻo fili pe ko e fē ʻa e ngaahi founga, fokotuʻutuʻu, mo e ʻekitivitī ʻe tokoni lelei taha ki hoʻo kau akó ke nau ako pea fakaʻaongaʻi ʻa e ngaahi moʻoni toputapu ʻoku ʻi he ʻū tohi folofolá.

ʻOku fokotuʻutuʻu e tohi lēsoni ko ʻení ke tokoniʻi koe ʻi he ngāue ko ʻení. Vakaiʻi fakalelei ʻa e nāunau fakalēsoni fekauʻaki mo e konga folofola te ke akoʻí. Te ke lava ʻo fili ke fakaʻaongaʻi kotoa pe ko ha konga ʻo e ngaahi fokotuʻu ki ha konga folofola, pe ko hoʻo liliu e ngaahi fakakaukau ʻoku fokotuʻu atú ke hoa mo e ngaahi fie maʻu mo e ngaahi tūkunga ʻo e kau ako ʻokú ke akoʻí.

ʻOku mahuʻinga ke ke tokoni ke ako ʻe he kau akó ʻa e kotoa ʻo e konga folofola ʻi he lēsoni takitaha. ʻE tokoni hono fai iá ke maʻu ʻe he kau akó ʻa e pōpoaki kakato naʻe taumuʻa ʻa e tokotaha faʻu tohi ʻo e folofolá ke fakahokó. Ka neongo ia, ʻi hoʻo palani hoʻo lēsoní, te ke lava ʻo ʻiloʻi ʻoku ʻikai ke ke maʻu ha taimi feʻunga ʻi ha taimi kalasi ke fakaʻaongaʻi ai ʻa e ngaahi fokotuʻu fakafaiako kotoa pē ʻi he tohi lēsoní. Fekumi ki he fakahinohino ʻa e Laumālié pea fakakaukauʻi ʻi he faʻa lotu ʻa e ngaahi fie maʻu ʻa hoʻo kau akó ʻi hoʻo fakapapauʻi ʻa e ngaahi konga ʻo e folofolá ke fakamamafaʻí kae lava ke tokoni ki he kau akó ke nau ongo‘i ʻa e mo’oni mo e mahuʻinga ʻo e ngaahi moʻoni ʻo e ongoongoleleí pea fakaʻaongaʻi kinautolu ʻi heʻenau moʻuí. Kapau ʻoku nounou ʻa e taimí, mahalo ʻe fie maʻu ke ke liliu e ngaahi konga kehe ʻo e lēsoní ʻaki hano fakamatalaʻi fakanounou ha kulupu, ngaahi veesi pe ko hono tataki ʻa e kau akó ke nau ʻiloʻi vave ha tefitoʻi moʻoni pe tokāteline kimuʻa pea hoko atu ki he ngaahi veesi hokó.

ʻI hoʻo fakakaukauʻi e founga ke liliu ai ʻa e ngaahi fakamatala ʻo e lēsoní, fakapapauʻi ke muimui ʻi he faleʻi ko ʻeni meia ʻEletā Tāleni H. ʻOakesi ʻo e Kōlomu ʻo e Kau ʻAposetolo ʻe Toko Hongofulu Mā Uá:

ʻEletā Dallin H. Oaks

“ʻI heʻeku fanongó, kuo faʻa akoʻi ʻe Palesiteni Peeka ke tau ʻuluaki ohi mai, pea tau toki liliu. [Kapau] ʻoku tau tuʻu maʻu kakato ʻi he lēsoni kuo ʻomai ke tau akoʻí, te tau toki lava leva ʻo muimui ʻi he Laumālié ke Ne liliu ia” (A Panel Discussion with Elder Dallin H. Oaks” [fakamafola fakasatelaite ʻa e Seminelí mo e ʻInisititiuti Fakalotú, 7 ʻAokosi 2012]).

ʻI hoʻo teuteú, manatuʻi ʻa e kau ako ʻoku ʻi ai haʻanau ngaahi fie maʻu makehé. Fulifulihi ʻa e ngaahi ʻekitivitií mo e ngaahi fakaʻānauá ke tokoni ke nau lavameʻa. ʻE tokoni e fetuʻutaki mo e ngaahi mātuʻá mo e kau takí ke ke ʻiloʻi ʻa e ngaahi fie maʻu ʻa e kau akó pea tokoniʻi koe ke ke lavameʻa ʻi hono ʻoange ha aʻusia ʻoku mahuʻingamālie mo fakamaama kiate kinautolú.

Lolotonga hoʻo teuteu lēsoní, mahalo te ke fili ke fakaʻaongaʻi e Ngaahi Fakamatalá mo e Tohinoa ʻi he LDS.org, pe ʻi he Gospel Library ki he telefoni toʻotoʻó. Te ke lava ʻo fakaʻaongaʻi e ngaahi meʻangāue ko ʻení ke fakaʻilongaʻi ʻa e folofolá, ngaahi lea ʻo e konifelenisi lahí, ngaahi fakamatala ʻi he makasini ʻo e Siasí, pea mo e ngaahi lēsoní. Te ke lava foki ke tānaki atu pea seivi e ngaahi fakamatalá ke fakaʻaongaʻi lolotonga hoʻo lēsoní. Ke ako lahi ange fekauʻaki mo e founga ke fakaʻaongaʻi ai e ngaahi meʻangāue ko ʻení, vakai ki he peesi Notes and Journal Help ʻi he LDS.org.

Fakaʻaongaʻi ʻa e Tohi Lēsoni Fakaʻaho ʻa e Faiakó

Talateu ʻo e Konga Folofolá

ʻOku ʻomi ʻe he talateu ki he konga folofolá ha vakai fakalūkufua nounou ʻo e kaveinga mo e kakano ʻo e ngaahi konga folofola ki he lēsoni takitaha.

Fakamatala Fakanounou ʻo e Ngaahi Veesi Fakakulupú mo e Kaveingá

ʻOku faʻa vahevahe e ngaahi konga folofolá ki ha ngaahi konga iiki pe kulupu ʻo e ngaahi veesi ʻa ia ʻoku nofotaha ʻi ha tefito pe ngāue pau. ʻOku hoko atu ʻi he fakamoʻoni fakafolofola ki he kulupu veesi takitaha ha fakamatala fakanounou ʻo e ngaahi meʻa naʻe hoko pe ngaahi akonaki ʻi he kulupu veesi ko iá.

Ngaahi Tokoni ki hono Akoʻí

ʻOku fakamatalaʻi ʻe he ngaahi tokoni fakafaiakó ʻa e ngaahi tefitoʻi moʻoni mo e founga hono akoʻi ʻo e ongoongoleleí. Te nau lava ʻo tokoni kiate koe ʻi hoʻo feinga ke fakalakalaka ʻi hoʻo hoko ko ha faiakó.

Kanotohi ʻo e Lēsoní

ʻOku ʻi he kanotohi ʻo e lēsoní ha fakahinohino maʻau ʻi hoʻo ako mo akoʻí. ʻOkú ne fokotuʻu mai ha ngaahi fakakaukau fakafaiako, kau ai ha ngaahi fehuʻi, ʻekitivitī, lea, ʻū fakatātā mo ha ʻū saati.

Ngaahi Tokāteliné mo e Ngaahi Tefitoʻi Moʻoní

Hangē ʻoku fakanatula pē hono ʻohake ʻo e ngaahi tokāteliné mo e tefitoʻi moʻoní mei hono ako ʻo e folofolá, ʻoku fakaʻilongaʻi atu kinautolu ke tokoniʻi koe ke ke ʻilo pea fakamamafaʻi kinautolu ʻi hoʻo fepōtalanoaʻaki mo e kau akó.

Ngaahi Fakatātā

ʻOku fakafofongaʻi ʻe he ngaahi fakatātā ʻo e kau taki ʻo e Siasí mo e ngaahi meʻa ne hoko he folofolá ha nāunau tokoni ki he ʻatá te ke lava ʻo fakaʻaliʻali lolotonga hoʻo faiakó ʻo kapau ʻoku lava ke maʻu.

ʻOtu ʻOku ʻAtaá

ʻE lava ʻo fakaʻaongaʻi ʻa e ʻotu ʻoku ʻataá ki hono teuteuʻi e lēsoní, kau hono hiki ha nouti, ngaahi tefitoʻi moʻoni, aʻusia, pē ngaahi fakakaukau kehe, ʻi hoʻo ongoʻi ʻa e ueʻi ʻa e Laumālie Māʻoniʻoní.

Ngaahi Fakamatala Fakamahino mo e Puipuituʻá

ʻOku ʻoatu ha ngaahi konga lea mo e fakamatala ʻi he fakaʻosinga ʻo e ngaahi lēsoní ke mahino ange ʻa e puipuituʻa fakahisitōliá, ngaahi fakakaukau pau pe ʻū veesi folofola. Fakaʻaongaʻi ʻa e fakamatala ʻi he konga ko ʻení ke teuteu ke tali e ngaahi fehuʻí pe toe tānaki atu ha fakakaukau ʻi hoʻo akoʻí. ʻE lava ke maʻu ha ngaahi fakamatala lahi ange ʻi he ngaahi tatau fakaʻilekitulōnika ʻo e tohi lēsoni ko ʻení ʻi he LDS.org.

Ngaahi Fakakaukau Tokoni Fakafaiakó

ʻOku hā ʻa e ngaahi fakakaukau tokoni fakafaiakó ʻi he fakaʻosinga ʻo e ngaahi lēsoni ʻe niʻihi. ʻOku nau ʻomi ha ngaahi fokotuʻu ki hono akoʻi ʻo e ngaahi tokāteline mo e ngaahi tefitoʻi moʻoni ʻa ia ʻe lava ke ʻikai ke faʻa ʻiloʻi pe fakamamafaʻi ʻi he kakano ʻo e lēsoní. ʻE lava foki ke nau ʻomi ha ngaahi fokotuʻu ki hono fakaʻaongaʻi ʻo e ngaahi mītia lahi, hangē ko e ngaahi fakamatala fakavitiō ʻi he DVD mo e ngaahi vitiō ʻi he LDS.org. ʻE lava ke ke maʻu ha ngaahi fakakaukau lahi ange ki he akoʻí ʻi he ngaahi tatau fakaʻilekitulōnika ʻo e tohi lēsoni ko ʻení ʻi he LDS.org

Polokalama Fakaʻaho ʻa e Seminelí (Lolotonga e Taimi Akó mo e Kalasi Pongipongí)

ʻOku ʻi he tohi lēsoni ko ʻení ʻa e ngaahi konga maʻá e kau faiako semineli fakaʻahó: lesoni ʻa e faiakó ki he ʻaho ʻe 160, ngaahi tokoni fakafaiako, mo e ngaahi maʻuʻanga tokoni ki hono akoʻi ʻo e fakataukei folofolá mo e Ngaahi Tefitoʻi Tokāteliné.

Ngaahi Lēsoni Fakaʻaho ʻa e Faiakó

Fokotuʻutuʻu ʻo e Lēsoní

ʻOku nofotaha ʻa e lēsoni takitaha ʻi he tohi lēsoni ko ʻení ʻi ha konga folofola kae ʻikai ko ha foʻi fakakaukau, tokāteline pe tefitoʻi moʻoni pau. ʻE tokoniʻi koe mo hoʻo kau akó ʻe he fokotuʻutuʻú ni ke ako fakahokohoko ʻa e folofolá mo aleaʻi e ngaahi tokāteliné mo e ngaahi tefitoʻi moʻoní ʻi heʻenau hā ʻi he folofolá. ʻI hono ako ʻe he kau akó ʻa e ʻuhinga naʻe maʻu ai ha tokāteline pe tefitoʻi moʻoni, ʻe lava ke fakalahi ange ʻenau mahino ki he foʻi moʻoni ko iá. ʻIkai ngata aí, ʻe lava ke toe vakai pea mahino lelei ange ki he kau akó ʻa e kakato ʻo e ngaahi pōpoaki naʻe ueʻi ʻa e tangata tohi folofolá ke ne ʻomaí. ʻE tokoni foki hono akoʻi ʻo e folofolá he founga ko ʻení ke ako ʻe he kau akó ʻa e founga ke ʻiloʻi pea fakaʻaongaʻi ai ʻa e ngaahi tefitoʻi moʻoni taʻengatá ʻi heʻenau ako folofola fakatāutahá.

ʻOku ʻikai fakamamafaʻi ʻa e konga kotoa ʻo ha konga folofola, ʻi he lēsoni takitaha. ʻOku ʻi ai ha ngaahi konga ʻoku siʻisiʻi ange ʻa e tokanga ki aí koeʻuhí ʻoku ʻikai mahuʻinga ki he pōpoaki fakakātoa ʻa e tokotaha faʻu tohi fakalaumālié pe koeʻuhí ʻoku ʻikai fuʻu ʻi ai haʻane kaunga ki he toʻu tupú. ʻOku ʻi ai ho fatongia ke liliu ʻa e ngaahi nāunau fakalēsoni ko ení ʻo fakatatau ki he ngaahi fie maʻu mo e meʻa ʻoku tokanga ki ai ʻa e kau ako ʻokú ke akoʻí. ʻE lava ke ke liliu ʻa e ngaahi fakakaukau ʻo e lēsoní ʻi he tohi lēsoni ko ʻení ʻi haʻo fili ke lahi ange e fakamamafá ki ha tokāteline pe tefitoʻi moʻoni pau kae ʻikai ko ia ʻoku ʻomi ʻi he nāunau fakalēsoní pe ko hoʻo fili ke ʻoua ʻe fuʻu fakamamafaʻi ha konga ʻo e konga folofolá ʻoku fakamatalaʻi loloto ange ʻi he tohi lēsoní. Fekumi ki he tataki ʻa e Laumālie Māʻoniʻoní ke tokoniʻi koe ʻi hoʻo fai e ngaahi liliu ko ʻení ʻi hoʻo teuteú mo hoʻo akoʻí.

Ngaahi Tokāteliné mo e Ngaahi Tefitoʻi Moʻoní

ʻI he kakano ʻo e lēsoni takitaha, te ke ʻilo ai ʻoku fakaʻilongaʻi mataʻāʻā atu ha ngaahi tokāteline mo e tefitoʻi moʻoni mahuʻinga. ʻOku fakahā mai e ngaahi tokāteline mo e ngaahi tefitoʻi moʻoni ko ʻení ʻi he nāunau fakalēsoni koeʻuhí (1) ʻoku nau ʻomai ha tefitoʻi pōpoaki ʻo e konga folofolá, (2) ʻoku kaungatonu ki he ngaahi fie maʻú mo e tūkunga ʻa e kau akó, pe (3) ko e ngaahi moʻoni mahuʻinga ia ʻe lava ke tokoni ki he kau akó ke fakaloloto honau vā fetuʻutaki mo e ʻEikí. Fakatokangaʻi ʻoku akoʻi ʻe he Tokāteline mo e Ngaahi Fuakavá ha ngaahi moʻoni lahi ʻo hulu atu ʻi he ngaahi meʻa ʻoku ʻiloʻi ʻi he nāunau fakalēsoní. Naʻe akoʻi ʻe Palesiteni Poiti K. Peeka ʻoku ʻi he folofolá “ha ngaahi moʻoni kuo fakatahaʻi ʻe feʻunga mo e fie maʻu ʻa e tokotaha fakafoʻituitui kotoa pē ʻi he tūkunga kotoa pē” (“The Great Plan of Happiness” [CES Symposium on the Doctrine and Covenants/Church History, Aug. 10, 1993], LDS.org; vakai foki Teaching Seminary: Preservice Readings [2004], 69, LDS.org).

ʻOange maʻu pē ki he kau akó ha ngaahi faingamālie ʻi hoʻo faiakó, ke nau feinga ke ʻiloʻi ʻa e ngaahi tokāteline mo e ngaahi tefitoʻi moʻoni ʻi he folofolá. ʻI he fakahaaʻi ʻe he kau akó ʻa e ngaahi moʻoni ʻoku nau ʻiló, mahalo te nau fakaʻaongaʻi ha ngaahi lea ʻe kehe mei he founga ʻoku fakamatalaʻi ai ha tokāteline pe tefitoʻi moʻoni ʻi he tohi lēsoni ko ení. Mahalo naʻa nau toe ʻilo foki mo ha ngaahi moʻoni ʻoku ʻikai ke ʻi he fokotuʻutuʻu ʻo e lēsoní. Tokanga ke ʻoua naʻá ke fokotuʻu atu ʻoku hala ʻa e tali ʻa e kau akó koeʻuhí pē ko e kehe ʻa e lea ʻoku nau fakaʻaongaʻí mei he ngaahi lea ʻoku fakaʻaongaʻi he tohi lēsoní pe koeʻuhí ʻoku nau ʻilo ha moʻoni ʻoku ʻikai ke hā ʻi he nāunau fakalēsoní. Ka neongo ia, kapau ʻoku hala fakatokāteline ʻa e fakamatala ʻa ha tokotaha ako, ko ho fatongiá ke tokoni fakalelei ki he tokotaha akó ke fakatonutonu ʻene fakamatalá kae kei tauhi pē ha ʻātakai ʻo e ʻofá mo e falalá. ʻE lava ke ʻoange ʻi hono fai ʻení, ha aʻusia mahuʻinga ʻo e akó ki he kau ako ʻi hoʻo kalasí.

Ko hono Vavé

ʻOku ʻi he tohi lēsoni ko ʻení ha ngaahi lēsoni semineli fakaʻaho ʻe 160. Mahalo naʻa lava ke ke liliu e lēsoní mo hono vavé ʻo fakatatau mo e fie maʻú ki he lahi ʻo e taimi ʻokú ke maʻu ke akoʻi ai e lēsoni ko ʻení. Vakai ki he fakamatala fakalahi ʻi he fakaʻosinga ʻo e tohi lēsoni ko ʻení ki ha sīpinga ʻo ha fakahinohino ki he vave hono akoʻí. ʻOku fakatefito ʻa e vave hono akoʻí ʻi ha taʻu fakaako uike ʻe 36 pe ʻaho ʻe 180 pea kau ai ha “ngaahi ʻaho feliliuaki” ʻe 20 te ke lava ʻo fakaʻaongaʻi ke liliu e ngaahi lēsoni fakaʻahó, tokoni ke maʻuloto ʻe he kau akó ʻa e ngaahi potufolofola fakataukei mahuʻingá mo e Ngaahi Tefitoʻi Tokāteliné, toe vakaiʻi ʻa e ngaahi nāunau fakalēsoni kimuʻá, pea fakaʻatā ki he ngaahi feliliuaki ki he taimi-tēpilé.

Ngāue Fakakakató

ʻE lava ke fakaʻaongaʻi e Tohi Fakahinohino Ako ʻi he Fuakava Foʻoú maʻá e Kau Ako Semineli ʻi ʻApí ʻi he polokalama semineli fakaʻahó ko ha maʻuʻanga tokoni ke ʻoange ha ngāue fakakakato ki he kau akó. ʻOku lele tatau pē ʻa e ngaahi lēsoni ʻi he tohi fakahinohino ako maʻá e kau ako semineli ʻi ʻapí mo ia ʻoku ʻoatu ʻi he tohi lēsoni ko ʻení. ʻE lava ke vahe ki he kau ako ko ia ʻoku lahi ʻenau liʻakí ke fakakakato ʻa e ngaahi ngāue ʻi he tohi fakahinohino akó ʻa ia ʻoku felāveʻi mo e meʻa ne ʻikai ke nau maʻu he kalasí. ʻE lava ke paaki ʻa e ngaahi ngāue ke faí mei he LDS.org ko ia ʻoku ʻikai fie maʻu ke ke ʻoange kotoa e tohi lēsoní ki he kau ako ʻoku fie maʻu ke fai e ngāue fakakakató. ʻOku ʻoatu ha fakamatala lahi ange ʻo kau ki he Tohi Fakahinohino Ako ʻi he Fuakava Foʻoú maʻá e Kau Ako Semineli ʻi ʻApí ʻi he konga ʻoku ui ko e “Polokalama Semineli Ako ʻi ʻApí” ʻi he tohi lēsoni ko ʻení.

Ngaahi Tokoni ki hono Akoʻí

ʻOku ʻasi atu e tokoni fakafaiakó ʻi he tafaʻaki ʻo e tohi lēsoni ko ʻení. ʻOku fakamatalaʻi mo fakatātaaʻi ʻe he ngaahi tokoni fakafaiako ko ʻení mo fakatātāʻi ʻa e founga te ke lava ai mo e kau ako ʻokú ke akoʻí ʻo fakaʻaongaʻi e Ngaahi Meʻa Mahuʻinga ʻo Hono Akoʻi mo Ako e Ongoongoleleí ʻi hoʻo ako ʻo e Tokāteline mo e Ngaahi Fuakavá mo e hisitōlia ʻo e Siasí. ʻOku nau ʻoatu foki ha ngaahi fokotuʻu ki hono fakaʻaongaʻi lelei ha ngaahi founga fakafaiako kehekehe, taukei, mo e ngaahi founga. ʻI he taimi ʻoku mahino ai kiate koe ʻa e ngaahi tefitoʻi moʻoni ʻoku kau ʻi he ngaahi tokoni fakafaiakó, kumi ha ngaahi founga ke fakaangaanga mo fakaʻaongaʻi maʻu pē kinautolu ʻi hoʻo faiakó.

Ko Hono Fakaʻaongaʻi ʻo e Ngaahi Tohi Lēsoni Ako ʻi ʻApí

Fakamatala Fakanounou ʻo e Ngaahi Lēsoni ʻa e Kau Akó

ʻE tokoni ʻa e fakamatala fakanounoú ke ke feangainga mo e kanotohí pea mo e ngaahi tokāteline mo e ngaahi tefitoʻi moʻoni ne ako ʻe he kau akó lolotonga e uiké ʻi he tohi fakahinohino ʻa e tokotaha akó.

Talateu ʻo e Lēsoní

ʻE tokoni e talateu ki he lēsoní ke ke ʻilo e konga ʻo e konga folofolá ʻe fakamamafaʻi ʻi he lēsoní.

Kanotohi ʻo e Lēsoní

ʻOku ʻoatu ʻe he kanotohi ʻo e lēsoní ha fakahinohino kiate koe ʻi hoʻo ako mo akoʻí. ʻOkú ne fokotuʻu mai ha ngaahi fakakaukau fakafaiako, kau ai ha ngaahi fehuʻi, ʻekitivitī, lea, ngaahi fakatātā mo ha ngaahi saati.

Fakamatala Fakanounou ʻo e Ngaahi Veesi Fakakulupú mo e Kaveingá

ʻOku vahevahe fakakulupu ʻa e ngaahi vēsí ʻo fakatatau ki he feituʻu ne fai ai e liliu ʻi he kaveingá pe kakanó ʻi he konga folofolá. ʻOku hoko atu ʻi he fakamoʻoni fakafolofola ki he kulupu veesi takitaha, ha fakamatala fakanounou ʻo e ngaahi meʻa naʻe hoko pe ngaahi akonaki ʻi he kulupu veesi ko iá.

Ngaahi Tokāteliné mo e Ngaahi Tefitoʻi Moʻoní

Hangē ʻoku fakanatula pē hono ʻohake ʻo e ngaahi tokāteliné mo e tefitoʻi moʻoní ʻi hono ako ʻo e folofolá, ʻoku fakaʻilongaʻi atu kinautolu ke tokoniʻi koe ke ʻilo pea fakamamafaʻi kinautolu ʻi hoʻo fepōtalanoaʻaki mo e kau akó.

Talateu ki he ʻIuniti Hokó

ʻOku ʻomi ʻe he palakalafi fakaʻosi ʻo e lēsoni takitaha ha vakai nounou ki he ʻiuniti hokó. Vahevahe ʻa e palakalafi ko ʻení mo hoʻo kau akó ʻi he fakaʻosinga ʻo e lēsoni takitaha ke tokoniʻi kinautolu ke nau ʻamanaki atu ki hono ako ʻa e folofolá he uike ka hoko maí.

Polokalama Semineli Ako ʻi ʻApí

ʻE lava ke fokotuʻutuʻu ʻa e ngaahi kalasi semineli ako ʻi ʻapí ʻi he malumalu ʻo e fakahinohino ʻa e kau taki lakanga fakataulaʻeiki fakalotofonuá mo e fakafofonga S&I, ʻi he ngaahi feituʻu he ʻikai lava ke ʻalu e kau akó ki ha kalasi fakaʻaho koeʻuhí ko e mamaʻó pe ko ha ngaahi meʻa kehe (hangē ko ha faingataʻaʻia fakaesino). ʻOku meimei ke ʻikai faʻa lava ʻa e ngaahi kalasi semineli ako ʻi ʻapí ʻi he feituʻu ʻoku fai ai e ngaahi kalasi fakaʻahó (lolotonga e uiké) ʻi he pongipongí pe taimi tukuangé.

ʻOku fakaʻatā ʻe he polokalama semineli ako ʻi ʻapí ke maʻu ʻe he kau akó ha maaka ʻi he seminelí ʻi hono fakakakato e ngaahi lēsoni fakafoʻituituí mei ʻapi kae ʻikai maʻu kalasi he lolotonga ʻo e uiké. ʻOku maʻu ʻa e ngaahi lēsoni ko ʻení ʻi ha tohi lēsoni kehe ʻoku ui ko e Tohi Fakahinohino Ako ki he Tokāteline mo e Ngaahi Fuakavá maʻá e Kau Ako Semineli ʻi ʻApí. ʻOku talanoa e kau akó tuʻo taha ʻi he uike mo ha faiako semineli ke ʻave ʻenau ngāué pea kau ki ha lēsoni ʻi he loki akó. ʻOku toe fakamatalaʻi atu ʻi lalo ʻa e tohi fakahinohino ako ʻa e tokotaha akó pea mo e ngaahi lēsoni fakauike ʻi loki akó.

Tohi Fakahinohino Ako maʻá e Kau Ako ʻi ʻApí

ʻOku fakataumuʻa ʻa e Tohi Fakahinohino Ako ki he Tokāteline mo e Ngaahi Fuakavá pea mo e Hisitōlia ʻo e Siasí maʻá e Kau Ako Semineli ʻi ʻApí ke tokoni ki he tokotaha ako ʻi ʻapí ke maʻu ha aʻusia ʻi hono ako e Tokāteline mo e Ngaahi Fuakavá mo e hisitōlia ʻo e Siasí, ʻo tatau pē mo e tokotaha ako semineli ʻa ia ʻoku kau ʻi he ngaahi kalasi ʻo e ʻaho ʻo e uiké. Ko ia ai, ʻoku tatau ʻa e vave ʻo e tohi fakahinohino ako ʻa e kau akó pea pehē ki he ngaahi tokāteline mo e ngaahi tefitoʻi moʻoni ʻokú ne fakamamafaʻí mo e nāunau fakalēsoni ʻi he tohi lēsoni ko ʻení. ʻOku kau foki ʻi he tohi fakahinohino ako ʻa e tokotaha akó ha fakahinohino kau ki he fakataukei folofolá. ʻOku aleaʻi ʻa e ngaahi veesi fakataukei folofolá ʻi heʻenau hā ʻi he folofolá, pea ʻoku faʻa ʻomi e ngaahi ʻekitivitī fai tohí ʻi he ngaahi lēsoni ʻoku aleaʻi ai ʻa e ngaahi potufolofolá.

Kuo pau ke fakakakato ʻe he fānau semineli ako ʻi ʻapí ʻi he uike takitaha, ha ngaahi lēsoni ʻe fā mei he tohi fakahinohino ako ʻa e tokotaha akó pea kau atu ki ha lēsoni fakauike ʻoku fai ʻe heʻenau faiako seminelí. ʻOku fakakakato ʻe he kau akó e ngaahi ngāue kuo fakafikefika mei he tohi fakahinohino akó ʻi heʻenau tohinoa ako folofolá. ʻOku totonu ke ʻi ai ha tohinoa ako folofola ʻe ua ʻa e kau akó koeʻuhí ke nau tuku ʻa e taha mo ʻenau faiakó pea kei hokohoko atu pē ʻa e ngāué ʻi he meʻa ʻe tahá. ʻI he fakataha ʻa e kau akó mo ʻenau faiakó ʻi he uike takitaha, ʻoku ʻave ʻa e tohinoa ʻe taha ki he faiako ako ʻi ʻapí pea fakafoki ʻa e taha ki he tokotaha akó ke fakaʻaongaʻi ki he ngaahi lēsoni he uike hoko maí. (Hangē ko ʻení, lolotonga ha uike ʻe taha ʻoku fakakakato ʻe he kau akó e ngaahi ngāué ʻi he tohinoa 1. ʻOku ʻomi leva ʻe he tokotaha akó ʻa e tohinoa ko ʻení ki he kalasí pea ʻoange ia ki he faiakó. Lolotonga e uike hono hokó, ʻoku fakakakato ʻe he tokotaha akó e ngaahi ngāué ʻi he tohinoa 2. ʻI he taimi ʻoku ʻoange ai ʻe he tokotaha akó ʻa e tohinoa 2, ʻe fakafoki ange ʻe he faiakó e tohinoa 1. ʻOku fakaʻaongaʻi leva ʻe he tokotaha akó ʻa e tohinoa 1, ke fakakakato e ngāue ʻo e uike hoko maí.)

ʻOku poupouʻi atu e kau ako semineli kotoa pē ke ako fakaʻaho ʻa e folofolá pea lau ʻa e fakamatala ki he lēsoní, ka ʻoku totonu ke mahino ki he kau ako mei ʻapí ʻoku fie maʻu ke nau fakaʻaongaʻi ha toe miniti ʻe 30 ki he 40 kehe ʻi he lēsoni kotoa ʻe fā ʻi he ʻiuniti takitaha pea kau atu ki he lēsoni ʻo e kalasi fakauiké.

Lēsoni Fakauike ʻa e Faiako Ako Mei ʻApí

ʻOku fekauʻaki e ʻiuniti takitaha ʻi he Tokāteline mo e Ngaahi Fuakavá pea mo e Hisitōlia ʻo e Siasí maʻá e Kau Ako Semineli ʻi ʻApí ki he lēsoni ʻe nima ʻi he tohi lēsoni fakaʻaho ʻa e faiakó. Te ke maʻu ʻi he fakaʻosinga ʻo e lēsoni kotoa pē ʻe nima ʻi he tohi lēsoni ko ʻení, ha lēsoni fakauike ʻi ʻapi ʻe taha ʻa e faiakó. ʻE tokoni ʻa e ngaahi lēsoni ako ʻi ʻapí ke toe fakamanatu, fakaloloto ʻenau mahinó, pea fakaʻaongaʻi ʻe he kau akó ʻa e ngaahi tokāteline mo e ngaahi tefitoʻi moʻoni naʻa nau ako ʻi heʻenau fakakakato e ngaahi lēsoni ʻi he fakahinohino ako ʻa e tokotaha akó lolotonga e uiké. ʻE lava foki e ngaahi lēsoni ko ʻení ʻo vakaiʻi ha toe ngaahi moʻoni ʻoku ʻikai fakamatala ki ai e tohi fakahinohino ako ʻa e tokotaha akó. (Ke maʻu ha tokoni ʻi hono palani hoʻo taimi tēpile ki he lēsoní, vakai ki he fakahinohino ki he vave hono akoʻí maʻá e faiako ako ʻi ʻapí ʻi he fakamatala fakalahi ʻoku maʻu ʻi he fakaʻosinga ʻo e tohi lēsoni ko ʻení.)

ʻI hoʻo hoko ko e faiako ako ʻi ʻapí, ʻoku totonu ke ke maʻu ha mahino lahi ki he meʻa ʻokú ke ako ʻi ʻapí he uike takitaha kae lava ke ke tali ʻa e ngaahi fehuʻí pea fokotuʻu mo ha ngaahi fealeleaʻaki ʻoku mahuʻingamālié ʻi hoʻo fakataha mo kinautolú. Kole ki he kau akó ke nau omi mo ʻenau folofolá, tohinoa ki he ako folofolá, pea mo e tohi fakahinohino ʻa e tokotaha akó ki he kalasi fakauiké ke nau lava ke mou vakai ki ai lolotonga ʻa e lēsoní. Liliu e ngaahi lēsoní ʻo fakatatau ki he fie maʻu ʻa e kau ako ʻoku ke akoʻí pea fakatatau ki he tataki ʻa e Laumālie Māʻoniʻoní. Mahalo te ke fie vakai foki ki he ngaahi lēsoni fakaʻaho ʻa e faiakó ʻi he tohi lēsoni ko ʻení ʻi hoʻo teuteú mo hoʻo faiakó. ʻE lava ʻo fakalahi atu hoʻo faiako fakauiké ʻi hano ako e ngaahi tokoni fakafaiakó mo e ngaahi founga ʻoku ngāue ʻaki ʻi he ngaahi lēsoni fakaʻahó. Feau ha ngaahi fie maʻu pau ʻa e kau ako ʻokú ke akoʻí. Hangē ko ʻení, kapau ʻoku faingataʻaʻia ha tokotaha ako ʻi he tohí, tuku ke ne fakaʻaongaʻi ha meʻangāue hiki pe fakahoko e ngaahi fakakaukaú ki ha mēmipa ʻo e fāmilí pe kaungāmeʻa te ne lava ke hiki ʻa ʻene ngaahi talí.

ʻI he fakaʻosinga ʻo e lēsoni fakauike takitaha, tānaki ʻa e tohinoa ako folofola ʻa e kau akó pea poupouʻi kinautolu ʻi he hokohoko atu ʻenau akó. ʻOange kiate kinautolu ha tohinoa ako folofola ki he ngaahi ngāue ke fai he uike hono hokó, hangē ko hono fakamatalaʻi ʻi ʻolungá ʻi he konga ko e “Tohi Fakahinohino Ako maʻá e Fānau Ako ʻi ʻApí.” (ʻI he malumalu ʻo e fakahinohino ʻa e kau taki lakanga fakataulaʻeikí mo e ngaahi mātuʻá, ʻe lava e kau faiako semineli ʻo e siteikí [kuo uí] ʻo fetuʻutaki fakaʻilekitulōnika mo e kau ako semineli ʻoku kau ʻi he ako semineli ʻi ʻapí.)

ʻI hoʻo lau ʻi he ngaahi ngāue ʻi he tohinoa ako fakafolofola ʻa e kau akó, tali fakataimi ki heʻenau ngāué ʻaki haʻo tohi ha kiʻi nouti pe fakahikihikiʻi ʻi hoʻo mou fetaulaki ka hokó. Mahalo te ke fie fekumi ki ha ngaahi founga kehe ke fakahoko ai ha poupou mo ha tokoni ʻoku mahuʻingamālié. ʻE tokoni eni ke ʻiloʻi ʻe he kau akó ʻokú ke tokanga ki heʻenau ngāué pea ʻe tokoni ia ke fakaʻaiʻai kinautolu ke nau toe fakamaatoato ange ʻi heʻenau ngaahi talí.

ʻE fai e ngaahi feinga lahi taha ʻa e kau akó ke maʻuloto e ngaahi potufolofola mahuʻingá ʻi heʻenau fakakakato ʻa ʻenau ngaahi lēsoni ako ʻi ʻapí. ʻE lava ke muimuiʻi ʻe he kau faiako ako ʻi ʻapí e ngaahi ngāue ʻa e kau akó lolotonga e ngaahi lēsoni ako ʻi ʻapí, ʻaki hono fakaafeʻi ʻo e kau akó ke lau maʻuloto pe fakamanatu ha ngaahi veesi fakataukei folofola naʻe ʻasi ʻi he ʻiuniti ako ʻo e uike ko iá.

Ngaahi Maʻuʻanga Tokoni Kehé

Joseph Smith Papers Project

Ko e konga lahi ʻo e ngaahi fakamatala fakahisitōlia ʻi he tohi lēsoni ko ʻení naʻe toʻo mei he History of the Church pea mo e Joseph Smith Papers Project. Naʻe tokoni makehe ʻo e voliume 1 mo e 2 ʻo e Ngaahi Fakamatala ʻo e The Joseph Smith Papers, naʻe pulusi ʻi he Church Historianʻs Press (ko ha fakaʻilonga ʻo e Potungāue Hisitōlia ʻo e Siasi ʻo Sisū Kalaisi ʻo e Kau Māʻoniʻoni ʻo e Ngaahi ʻAho Kimui Ní). Ke sio ʻi he ngaahi tā mo e tatau fakaʻilekitulōnika ʻo e ngaahi meʻa fakapepa totonú ʻi he Joseph Smith Papers Project, vakai ki he josephsmithpapers.org.

Meʻangāue ki he Ngaahi Fakamatalá mo e Tohinoá

ʻOku maʻu e ngaahi fakahinohino ki he tohi lēsoni ʻa e faiakó mo e tokotaha akó ʻi he LDS.org pea ʻi he Gospel Library ki he ngaahi telefoni toʻotoʻó. ʻE lava ke fakaʻaongaʻi ʻe he kau faiakó mo e kau akó ʻa e ngaahi meʻangāue ki he Ngaahi Fakamatala mo e Tohinoa ʻi he ʻinitanetí mo e telefoni toʻotoʻó ke fakaʻilongaʻi pea tānaki atu ha fanga kiʻi fakamatala ki he tatau ʻo e tohi lēsoni ko ʻení ʻi he ʻinitanetí, ʻi heʻenau teuteu e ngaahi lēsoní mo ako e folofolá. ʻOku toe lava foki ke download e ngaahi tohi lēsoni ʻa e faiakó mo e tohi fakahinohino ako ʻa e tokotaha akó ʻi ha ngaahi sīpinga kehekehe (hangē ko e PDF, ePub, mo e mobi [Kindle] files) ʻi he LDS.org.

Ngaahi Meʻa Kehe

ʻOku maʻu ʻi he ʻinitanetí ʻa e ngaahi maʻuʻanga tokoni ko ʻení, fakafou ʻi hoʻo supavaisá, ʻi he senitā tufakiʻanga nāunau fakalotofonua ʻo e Siasí, pea ʻi he falekoloa ʻo e Siasí ʻi he ʻinitanetí (store.lds.org):