Lēsoni 125
Tokāteline mo e Ngaahi Fuakava 119–120
Talateú
ʻI he faʻahitaʻu māfana ʻo e 1838, naʻe aʻusia ʻe he Kāingalotú ha ngaahi faingataʻa fakapaʻanga ʻi heʻenau feinga ke langa hake ʻa e Siasí ʻi he tafaʻaki fakatokelau ʻo Mīsulí. Naʻe fekumi ʻa e Palōfita ko Siosefa Sāmitá ki ha fakahinohino mei he ʻEikí, pea naʻá ne maʻu ʻi he ʻaho 8 ʻo Siulai 1838 ʻa e ngaahi fakahā ʻoku lekooti ʻi he Tokāteline mo e Ngaahi Fuakava 119 mo e 120. Naʻe akoʻi ʻe he ʻEikí ʻi he ngaahi fakahā ko ʻení, ʻa e fono ʻo e vahehongofulú mo fakamafaiʻi ha kau taki pau ʻo e Siasí ke fakapapauʻi ʻa e founga hono fakaʻaongaʻi e paʻanga vahehongofulú.
Ngaahi Fokotuʻu ki hono Akoʻí
Tokāteline mo e Ngaahi Fuakava 119:1–4
ʻOku fakahā ʻe he ʻEikí e fono ʻo e vahehongofulú
Fakaafeʻi ha tokotaha ako ke lau leʻolahi e talanoa ko ʻeni naʻe fai ʻe Palesiteni Kōtoni B. Hingikelī:
“Naʻe ʻi ai ha fefine ʻi Sao Paulo Palāsila … ne ngāue lolotonga ʻene ʻalu ki he akó ke tokonaki maʻa hono fāmilí. ʻOku ou fakaʻaongaʻi ʻene ngaahi lea pē ʻaʻaná ʻi hono fai e talanoa ko ʻení. ʻOkú ne pehē:
“‘Naʻe ʻi ai ha lao ʻo e ʻunivēsiti ne u ako aí naʻe taʻofi ai ʻa e fānau ako ʻoku ʻi ai hanau moʻuá mei hono fai ʻo e ngaahi siví.’ …
“‘Kuó u manatuʻi ha taimi ʻe taha ne u … fepaki ai mo ha faingataʻaʻia fakapaʻanga lahi.’ … Pea ʻi heʻeku fikaʻi ʻeku patiseti fakamāhiná, ne u ʻilo ai he ʻikai feʻunga ia ke totongi fakatouʻosi ai ʻeku vahehongofulú mo ʻeku akó. Kuo pau ke u fili pē ha taha. Naʻe ʻamanaki fai ʻa e sivi fakamāhina uá ʻi he uike hono hokó pea kapau he ʻikai ke u sivi ko e mole ia ʻo e taʻu ko iá. Naʻá ku mamahi lahi. … Naʻe ʻi a ha fili fakamamahi ke u fai, pea naʻe ʻikai ke u ʻilo ʻa e meʻa ke filí’” (We Walk by Faith,”Ensign, May 2002, 73).
-
Ko e hā te ke talaange ki ha taha ʻoku ʻi ai haʻane palopalema tatau?
Fakaafeʻi ha tokotaha ako ke lau ʻa e toenga ʻo e fakamatalá:
“‘Naʻe nofo maʻu pē ʻa e fakakaukaú ni ʻiate au [ʻi ha ngaahi ʻaho]. Ko e taimi ia né u toki manatuʻi né u tali ai ke papitaiso he Siasí, ne u loto ai ke u moʻui ʻaki ʻa e fono ʻo e vahehongofulú. Kuó u toʻo mai ai ha tufakanga, ʻo ʻikai mo e ongo faifekaú, ka mo ʻeku Tamai Hēvaní. ʻI he momeniti ko iá, ne kamata ke mole atu ʻa e mamahí kae faingamālie ha potu moʻó e nongá mo e loto lahí. …
“‘ ʻI heʻeku lotu he pō ko iá, ne u kole ai ke fakamolemoleʻi au ʻe he ʻEikí ʻi heʻeku fakaveiveiuá. ʻI he ʻaho Sāpaté, … naʻá ku totongi fiefia moʻoni ʻeku vahehongofulú mo e ngaahi foakí. Ko ha ʻaho makehe ia. Naʻá ku ongoʻi fiefia mo nonga ʻiate au pea ʻi he Tamai Hēvaní’” (We Walk by Faith,” 73).
Fakaafeʻi e kau akó ke fakalaulauloto ki he founga te nau ala tali ʻaki e tūkunga ko ʻení. Fakaafeʻi e kau akó ke kumi e ngaahi tefitoʻi moʻoni lolotonga ʻenau ako e folofolá he ʻaho ní ʻe lava ke tokoniʻi ai kinautolu ʻi heʻenau aʻusia e ngaahi tūkunga tataú.
Fakamatalaʻi ange naʻe kamata ke ʻausia ʻe he Siasí ʻi he 1837, ha ngaahi faingataʻa fakapaʻanga lahi, pea pehē ki ha niʻihi fakafoʻituitui tokolahi ʻo e Siasí. Naʻe hoko e ngaahi palopalema fakapaʻanga ko ʻení mei ha tō lalo fakaʻekonōmika fakapuleʻanga, fetāʻaki ʻa e kau fakatangá ʻi Mīsuli mo Ohaió ʻo tuli ai e Kāingalotú mei honau ʻapí, mo e taʻe loto fiemālie e niʻihi ʻo e Kāingalotú ke moʻui ʻaki e fono ʻo e fakatapuí. ʻI he 1838, ʻi he tokolahi ange e Kāingalotu ne tānaki fakataha ki he Vahefonua Kolotiuela, Mīsulí, naʻe fie maʻu ʻe he Siasí e paʻanga ke fakahoko e meʻa naʻe fekau ʻe he ʻEikí ke nau faí, ʻo hangē ko hono langa ʻo e temipale ʻi Hihifo Mamaʻó. Naʻe fakalotolahiʻi ʻe he kau pīsope ʻi ʻOhaiō mo Mīsulí ʻa e Kāingalotú ke ʻomi ʻenau vahehongofulú mo e ngaahi foakí ki he fale tukuʻanga koloá.
Kole ki ha tokotaha ako ke lau leʻolahi e talateu ki he vahé ʻo e Tokāteline mo e Ngaahi Fuakava 119. Kole ki he kalasí ke muimui ki ai, ʻo kumi e meʻa naʻe kole ʻe Siosefa Sāmita ʻi he taimi ko iá.
-
Ko e hā naʻe kole ʻe Siosefa Sāmita mei he ʻEikí?
Fakaafeʻi ha tokotaha ako ke lau leʻolahi e Tokāteline mo e Ngaahi Fuakava 119:1–4. Kole ki he kalasí ke muimui ki ai, ʻo kumi e tali ʻa e ʻEikí ki he kole ʻa Siosefa Sāmitá.
-
Fakatatau ki he veesi 4, ko e hā ʻa e vahehongofulu? (ʻOku totonu ke ʻiloʻi ʻe he kau akó e fekau ko ʻení: ʻOku fekau ʻe he ʻEikí ke tau totongi kiate Ia ʻa e vahe hongofulu ʻe taha ʻo ʻetau tupú ko e vahehongofulu. Mahalo te ke fie tohi ʻa e fekau ko ʻení ʻi he palakipoé.)
Ke tokoni ke mahino ki he kau akó e ʻuhinga ʻo e foʻi lea ko e tupu ʻi he veesi 4, fakaafeʻi ha tokotaha ako ke lau leʻolahi ʻa e lea ko ʻeni naʻe fai ʻe Palesiteni Hauati W. Hanitaá:
“ʻOku fakamatalaʻi mahino pē ʻa e fonó ia ʻo pehē ko e ‘vahe hongofulu ʻe taha ʻo e tupu kotoa pē ʻo ʻenau ngaahi meʻá.’ ʻOku ʻuhinga ʻa e tupú ki he meʻa ʻoku maʻu mei ai, lelei ʻoku maʻu pe hulu. Ko e vahe ʻoku maʻu ʻe ha taha ngāue, ko e tupu mei hono fakalele ʻo ha pisinisi, ko e lahi ʻo e meʻa ʻoku maʻu ʻe ha taha ʻokú ne tō ha ngoue pe fakatupu ha ngaahi koloa, pe ko ha paʻanga pē ʻoku maʻu ʻe ha taha mei ha toe faʻahinga founga pē. Naʻe folofola ʻa e ʻEikí ko ha fono tuʻu maʻu ‘taʻengata’ ia he kuo pehē mei he kuo hilí” (ʻi he Conference Report, Apr. 1964, 35).
-
Ko e hā ʻokú ke ako mei hono fekauʻi ʻe he ʻEikí e Kāingalotú ke totongi vahehongofulu ʻi ha taimi naʻe faingataʻa ai ke nau fai iá?
-
Ko e hā e ngaahi founga ʻoku hoko ai e totongi vahehongofulú ko ha ngāue ʻi he tuí?
Ke tokoni ke mahino ki he kau akó ʻa e founga ke totongi ai e vahehongofulú, fakaʻaliʻali ha foomu Vahehongofulú mo e Ngaahi Foaki Kehé. Kole ki he kau akó ke fakakaukau kuo nau toki maʻu pē ha paʻanga. Fakaafeʻi ha tokotaha ako ke fokotuʻu mai ha mahuʻinga.
-
Ko e hā e lahi ʻo e vahehongofulu ʻoku totonu ke totongi ʻi he paʻanga ko iá?
Lekooti e lahi ʻo e paʻanga vahehongofulú ʻi he feituʻu totonu ʻi he fōmú pea fai ʻa e fehuʻi ko ʻení:
-
Kapau te tau vahevahe ʻa e peseti ʻe 10 ʻo ʻetau paʻanga hū maí ʻi he ngaahi kulupu kehekehe ʻo e foakí ʻi he fōmú, kuo tau totongi nai ha vahehongofulu kakato? (Fakapapauʻi ke mahino ki he kau akó ʻoku totonu ke lisi e peseti ʻe 10 ʻo ʻenau paʻanga hū maí ko e vahehongofulú. ʻOku tānaki atu ha faʻahinga foaki pē ʻoku nau fai ki he ngaahi paʻanga kehé ki he peseti ʻe 10 ko iá.)
Vahevahe e kau akó ke tautau toko ua. Kole ange ke nau fefakamatalaʻaki ʻenau mahino ki he founga ʻoku fakaʻaongaʻi ai ʻa e paʻanga vahehongofulú. Hili iá pea fakaafeʻi kinautolu ke lau ʻa e fakamatala ʻa e ʻEikí ʻi he Tokāteline mo e Ngaahi Fuakava 119:2.
-
Fakatatau ki he veesi 2, ko e hā ʻoku fakaʻaongaʻi ki ai e paʻanga vahehongofulú? (ʻOku fakaʻaongaʻi e vahehongofulú “ki he langa ʻo e fale [ʻo e ʻEikí]” pea “ki hono ʻai ʻo e tuʻunga ʻo Saioné pea ki he lakanga fakataulaʻeikí” [fakapaʻanga e ngaahi tafaʻaki kehe ʻo e ngāue ʻa e ʻEikí, hangē ko hono langa mo monomono e ngaahi falelotú, liliu mo pulusi e folofolá, pea mo hono tokoniʻi e ngāue fakafaifekaú mo e hisitōlia fakafāmilí ʻi he māmaní kotoa]. Mahalo te ke fie fakamahinoʻi ange ʻoku ʻikai ha moʻua ʻo e Siasí he ʻahó ni. Hiki ʻa e moʻoni ko ʻení ʻi he palakipoé: ʻOku ngāue ʻaki e paʻanga vahehongofulú ke langa e ngaahi temipalé pea ke fakahoko ʻa e ngāue ʻa e ʻEikí.
Tokāteline mo e Ngaahi Fuakava 119:5–7
ʻOku fakamatalaʻi ʻe he ʻEikí ʻa e fono ʻo e vahehongofulú
Fakaafeʻi ha ongo tamaiki ako ke kau ʻi ha tulama. Vahe ki ha tokotaha ako ʻe taha ke hoko ko ha mēmipa faivelenga ʻo e Siasí, kae hoko e tokotaha ako hono uá ko ha taha ʻoku ʻikai ko ha mēmipa ʻo e Siasí. ʻOange ki he tokotaha ako hono uá ha laʻipepa kuo ʻosi hiki ai e fehuʻi ko ʻení: ʻOku ou fanongo ʻokú ke foaki ʻa e peseti ʻe 10 ʻo hoʻo paʻanga hū maí ki homou siasí. Ko e hā te ke fai ai iá?
Kole ki he tokotaha ako hono uá ke lau leʻolahi ʻa e fehuʻí, pea fakaafeʻi e tokotaha ako ʻuluakí ke fai ha tali. Hili e tulamá, fehuʻi ki he kalasí pe naʻe mei fēfē haʻanau tali. Fakamahinoʻi ange ʻoku ʻi ai ha ngaahi tali lelei lahi ki he fehuʻi ko ʻení.
Fakaafeʻi ha tokotaha ako ke lau leʻolahi e Tokāteline mo e Ngaahi Fuakava 119:6–7. Kole ki he kalasí ke kumi e meʻa ʻoku fakahoko ʻi he talangofua ki he fono ʻo e vahehongofulú.
-
Fakatatau ki he veesi 6, ko e hā ʻoku fakahoko ʻi he talangofua ki he fono ʻo e vahehongofulú? (Ko hono fakamāʻoniʻoniʻi e fonua ko Saioné ki he ʻEikí.)
Ke tokoni ke mahino ki he kau akó ʻa e veesi ko ʻení, fakamatalaʻi ange ʻoku ʻuhinga e fakamāʻoniʻoniʻí ke hoko ʻo tauʻatāina mei he angahalá—haohaoa, maʻa, mo māʻoniʻoni ʻi he Fakalelei ʻa Sīsū Kalaisí. ʻIkai ngata aí, fakamanatu ange ki he kau akó ʻoku mahulu hake ʻa Saione ʻi ha feituʻu fakatuʻasino; ko e kakai ia ʻoku “loto maʻá” (T&F 97:21).
Fakaafeʻi e kau akó ke fakamatalaʻi fakanounou e ngaahi ola ʻo e talangofua ki he fono o e vahehongofulú i heʻenau lea pē ʻanautolú. Neongo ʻe ala fakaʻaongaʻi ʻe he kau akó ha ngaahi lea kehe, ka ʻoku totonu ke nau ʻiloʻi ʻa e tefitoʻi moʻoni ko ʻení: ʻOku fakamāʻoniʻoniʻi kitautolu ʻi he totongi vahehongofulú ko ha niʻihi fakafoʻituitui pea mo ha Siasi. Tohi ʻa e tefitoʻi moʻoni ko ʻení ʻi he palakipoé. Mahalo te ke fie fokotuʻu ange ke hiki ia ʻe he kau akó ʻi he tafaʻaki ʻo ʻenau folofolá.
Ke tokoni ke mahino ki he kau akó pea nau ongoʻi ʻa e mahuʻinga ʻo e tefitoʻi moʻoni ko ʻení, kole ange ke nau tali ha taha ʻo e ngaahi fehuʻi ko ʻení ʻi heʻenau pepa ki he kalasí pe tohinoa ako folofolá:
-
Kuo tokoni fēfē hono totongi e vahehongofulú ke fakamāʻoniʻoniʻi koé?
-
Ko e hā ha ngaahi founga ʻokú ke pehē ʻe tokoni ai hono totongi e vahehongofulú ke fakamāʻoniʻoniʻi ha taha?
Hili ha taimi feʻunga, fakaafeʻi ha niʻihi ʻo e kau akó ke fakamatalaʻi e meʻa kuo nau tohí. Mahalo te ke fie vahevahe foki ha aʻusia mo fai hoʻo fakamoʻoní ki he fono ʻo e vahehongofulú.
Tokāteline mo e Ngaahi Fuakava 120
ʻOku fokotuʻutuʻu ʻe he ʻEikí ha fakataha alēlea ke tokangaʻi e founga hono fakaʻaongaʻi ʻo e vahehongofulú
Kole ki ha tokotaha ako ke lau leʻolahi ʻa e talateu ki he Tokāteline mo e Ngaahi Fuakava 120. Kole ki he kalasí ke muimui ki ai pea kumi e taumuʻa ʻo e fakahā ko ʻení.
Fakaafeʻi ha tokotaha ako ke lau leʻolahi e Tokāteline mo e Ngaahi Fuakava 120:1. Kole ki he kalasí ke muimui ki ai, ʻo kumi pe ko hai naʻe fili ʻe he ʻEikí ke kau atu ki he fakataha alēlea ʻoku fakapapauʻi ai e founga ʻoku fakaʻaongaʻi ai ʻa e paʻanga vahehongofulú.
-
Ko hai ʻokú ne fakapapauʻi e founga ʻoku fakaʻaongaʻi ai e paʻanga vahehongofulú?
Mahalo te ke fie fakamatalaʻi ange ʻoku fatongia ʻaki ʻe he fakataha alēlea ʻoku ʻuhinga ki ai ʻa e Tokāteline mo e Ngaahi Fuakava 120 ʻa hono tokangaʻi ʻo e ngaahi totongi mo e fakamole kotoa pē maʻá e Siasí fakakātoa. ʻOku lolotonga ʻiloa ʻa e fakataha alēlea ko ʻení ko e Fakataha Alēlea ki hono Fakaʻaongaʻi ʻo e Vahehongofulú pea ʻoku kau ki ai ʻa e Kau Palesitenisī ʻUluakí, ko e Kōlomu ʻo e Kau ʻAposetolo ʻe Toko Hongofulu Mā Uá, mo e kau Pīsopeliki Pulé.
-
Fakatatau ki he Tokāteline mo e Ngaahi Fuakava 120:1, ʻoku fakapapauʻi fēfē ʻe he kau mēmipa ʻo e fakataha alēlea ko ʻení e founga ke fakaʻaongaʻi ai e paʻanga vahehongofulú? (ʻI he “leʻo [ʻo e Fakamoʻuí] kiate kinautolú.” Ko hono fakalea ʻe tahá, ʻi he fakahaá.)
Fakaafeʻi e kau akó ke fakamatalaʻi fakanounou ʻi heʻenau lea pē ʻanautolu e meʻa ʻoku akoʻi ʻe he fakahā ko ʻení ʻo kau ki he tokotaha ʻokú ne fakahinohinoʻi ʻa hono fakaʻaongaʻi ʻo e paʻanga vahehongofulú. (Neongo ʻe ala fakaʻaongaʻi ʻe he kau akó ha ngaahi lea kehe, ka ʻoku totonu ke nau ʻiloʻi ʻa e tefitoʻi moʻoni ko ʻení: ʻOku fakahinohinoʻi ʻe he ʻEikí ʻa hono fakaʻaongaʻi ʻo e paʻanga vahehongofulú ʻo fakafou ʻi Heʻene kau tamaioʻeiki kuo filí.)
Ke tokoni ke mahino ki he kau akó e founga ʻoku ngāue ai e tefitoʻi moʻoni ko ʻení ʻi he Siasí he ʻaho ní, fakamatalaʻi ange ʻoku fakahū ʻe he uooti pe kolo takitaha e paʻanga vahehongofulú ki he hetikuota ʻo e Siasí. ʻOku ʻikai aleaʻi ʻe he kau taki fakalotofonuá e founga hono fakaʻaongaʻi e paʻanga toputapu ko ʻení. ʻOku fai ʻe he Fakataha Alēlea ki hono Fakaʻaongaʻi ʻo e Vahehongofulú ʻa e ngaahi tuʻutuʻuni ko iá ʻi he fakahinohino ʻa e ʻEikí.
Naʻe lea ʻa Palesiteni Kōtoni B. Hingikelī ki hono fakaʻapaʻapaʻi lahi ʻe he Fakataha Alēlea ki hono Fakaʻaongaʻi ʻo e Vahehongofulú ʻa e paʻanga vahehongofulú:
“ʻOku ou tauhi ʻi he tesi ʻi hoku ʻōfisí ha kihiʻi paʻanga ʻa e uitoú naʻe foaki mai kiate au ʻi Selusalema ʻi he ngaahi taʻu lahi kuo hilí ko ha fakamanatu maʻu pē, ʻo e toputapu ʻo e paʻanga ʻa ia ʻoku mau ngāue ki aí. ʻOku haʻu ia mei he uitoú, ko ʻene feilaulaú ia pea pehē ki he vahehongofulu ʻa e tangata koloaʻiá, pea ʻoku totonu ke fakaʻaongaʻi tokanga ia ki he ngaahi taumuʻa ʻa e ʻEikí. ʻOku tau tokangaʻi lelei mo maluʻi ia pea feinga ʻi he founga kotoa pē te tau lavá ke sio ʻoku fakaʻaongaʻi ia ʻi heʻetau ongoʻi ʻoku finangalo e ʻEikí ke fakaʻaongaʻi ia ki hono langa hake ʻo ʻEne ngāué mo e lelei ʻa e kakaí” (This Thing Was Not Done in a Corner,”Ensign, Nov. 1996, 50).
Fakaafeʻi e kau akó ke vahevahe ha ngaahi fakakaukau kehe pe ko ʻenau ngaahi fakamoʻoni fekauʻaki mo e fono ʻo e vahehongofulú.
Ngaahi Fakamatala Fakamahino mo e Puipuituʻá
Tokāteline mo e Ngaahi Fuakava 119. Ko e fono ʻo e vahehongofulú
Naʻe fakamatalaʻi ʻe ʻEletā Lōpeti D. Heili ʻo e Kōlomu ʻo e Kau ʻAposetolo ʻe Toko Hongofulu Mā Uá ha niʻihi ʻo e ngaahi taumuʻa fakalaumālie ʻo hono totongi ʻetau vahehongofulú:
“Ko e fono ʻo e vahehongofulú ʻa e fakavaʻe ʻo e moʻui fakapotopotó. Ko e ʻuluaki taumuʻa ʻo e fonó ni ke tokoniʻi kitautolu ke fakalakalaka ʻetau tui ki he Tamai Hēvaní mo Hono ʻAlo ko Sīsū Kalaisí. ʻOku tokoniʻi kitautolu ʻe he vahehongofulú ke tau ikunaʻi ʻa e ngaahi holi ki he ngaahi meʻa ʻo e māmaní ka tau loto ʻaki e feilaulau maʻá e niʻihi kehé. Ko e vahehongofulú ʻa e fono maʻongoʻonga mo taʻe filifilimānakó, he ʻoku tatau ai pē pe ʻoku tau koloaʻia pe masiva, ʻoku tau totongi tatau ʻa e vahe hongofulu ʻe taha ʻo ʻetau tupu kotoa pē ʻi he taʻu takitaha (vakai, T&F 119:4pea ʻoku tau maʻu kotoa pē ha ngaahi tāpuaki lahi ‘ʻe ʻikai ha potu [te nau] faʻa hao ki ai’ (Malakai 3:10Hoko ko ha Kau Tauhi Fakapotopoto Fakatuʻasino mo Fakalaumālie,”Ensign pe Liahona, Mē 2009, 9).
Tokāteline mo e Ngaahi Fuakava 120. Ko e Fakataha Alēlea ki hono Fakaʻaongaʻi ʻo e Vahehongofulú
ʻI he kamataʻangá, naʻe fakahinohinoʻi e fakataha alēlea māʻolunga ʻi Mīsulí ke kau ʻi he Fakataha Alēlea ki hono Fakaʻaongaʻi ʻo e Vahehongofulú. Naʻe ʻoange kimui ange ʻa e fatongia ko iá ki he Kōlomu ʻo e Kau ʻAposetolo ʻe Toko Hongofulu Mā Uá. Ko ia ai, ko e Fakataha Alēlea ki hono Fakaʻaongaʻi ʻo e Vahehongofulú ʻi he Siasí he ʻahó ni, ʻoku kau ai ʻa e Kau Palesitenisī ʻUluakí, ko e Kōlomu ʻo e Toko Hongofulu Mā Uá, mo e kau Pīsopeliki Pulé.
Naʻe ʻuluaki lea ʻa ʻEletā Lōpeti D. Heili ʻi heʻene hoko ko ha Pīsope Pule pea kimui ange ʻi heʻene hoko ko ha mēmipa ʻo e Kōlomu ʻo e Kau ʻAposetolo ʻe Toko Hongofulu Mā Uá fekauʻaki mo ʻene aʻusia ʻi heʻene hoko ko ha mēmipa ʻo e Fakataha Alēlea ki hono Fakaʻaongaʻi ʻo e Vahehongofulú:
“Hangē ko ia naʻe fakahā ʻe he ʻEikí, ʻoku aleaʻi hono fakaʻaongaʻi ʻo e vahehongofulú ʻi ha fakataha alēlea ʻoku kau ki ai ʻa e Kau Palesitenisī ʻUluakí, Kōlomu ʻo e Kau ʻAposetolo ʻe Toko Hongofulu Mā Uá, mo e Kau Pīsopeliki Pulé. ʻOku fakahā pau mai ʻe he ʻEikí ʻe fakahinohinoʻi ʻa e ngāue ʻa e fakataha alēleá ‘[ʻi] hoku leʻo pē ʻoʻokú kiate kinautolu’ [T&F 120:1]. ʻOku ui ʻa e fakataha alēlea ko ʻení ko e Fakataha Alēlea ki hono Fakaʻaongaʻi ʻo e Vahehongofulú.
“ʻOku fakaofo ke mamata tonu ʻi he talangofua ʻa e fakataha alēlea ko ʻení ki he leʻo ʻo e ʻEikí. ʻOku ʻilo pea kau ʻa e mēmipa takitaha ki he ngaahi tuʻutuʻuni kotoa pē ʻa e fakataha alēleá. ʻOku ʻikai fai ha tuʻutuʻuni kae ʻoua kuo loto taha e fakataha alēleá. ʻOku fakaʻaongaʻi ʻa e paʻanga vahehongofulu kotoa pē ki he ngaahi taumuʻa ʻa e Siasí, kau ai ʻa e uelofeá—tokoniʻi e masivá mo e faingataʻaʻiá—ngaahi temipalé, ko hono langa mo tokangaʻi e ngaahi falelotú, akó, nāunau fakalēsoní—ʻi hono fakanounoú, ko e ngāue ʻa e ʻEikí. …
“ʻOku ou fakamoʻoni ki he kāingalotu ʻo e Siasí mo e niʻihi kehe ʻi he funga ʻo e māmaní, ki he Fakataha Alēlea ki hono Fakaʻaongaʻi ʻo e Vahehongofulú. Kuó u tangutu ʻi he fakataha alēlea ko ʻení … ʻi heʻeku hoko ko e Pīsope Pule ʻo e Siasí pea ʻi he taimí ni ko ha mēmipa ʻo e Kōlomu ʻo e Kau ʻAposetolo ʻe Toko Hongofulu Mā Uá. Kuo fakaʻaongaʻi ʻa e paʻanga vahehongofulu ʻa e Siasí ni ki Heʻene ngaahi taumuʻá, ʻo ʻikai ha fakaʻatā makehe” (Tithing: A Test of Faith with Eternal Blessings,”Ensign, Nov. 2002, 28).